Lombolola Ciwa Ocipama

OSIMBU handi kua sokiyile ocipama cove lesuñamelo liwa, o sukila oku kala locimãho cimue vovisimĩlo viove. Anga hẽ ocimãho cove oku situluila omanu ondaka yimue yatiamẽla ketavo, kocituwa, kelinga limue, ale kekalo limue liomuenyo? O yongola hẽ oku lekisa uvangi watiamẽla kocisimĩlo cimue ale oku ci pisa? Onjongole yove hẽ oku vetiyila omanu koku sola ale koku linga cimue? Cikale okuti oka lingila ocipama cove kovaso yomunu umosi ale yocimunga cimue cinene colonjeveleli, oco o ci linge ciwa, o sukila oku kũlĩhĩsa eci ovo va kũlĩha ale kuenda ocisimĩlo cavo kueci catiamẽla kondaka yaco. Pana okuti wa ci linga ale, sokiya ocipama cove lonjila yimue okuti yika ku kuatisa oku tẽlisa ocimãho cove.

Catiamẽla kupange woku kunda wa Saulu (Paulu) ko Damasko, elivulu Liovilinga 9:22 li tu sapuila hati, eye ‘wa tangelekisa va Yudea va tungile vo Damasko, momo wa toñomãla loku lekisa uvangi wokuti Yesu eye Kristu.’ Nye ca kongeliwile vuvangi waco? Ndomo ca lekisiwa vesapulo liatiamẽla kupange woku kunda Paulu eya oku lingila ko Antiokea loko Tesalonike, eye tete wa kakatelele kesunga liokuti va Yudea va tavaile Kovisonehua vio Heveru kuenda va tavailevo kueci ovio vi popia catiamẽla ku Mesiya. Noke, vovisonehua viaco, Paulu wa nõlailemo olonepa vina vi lombolola eci catiamẽla komuenyo kuenda kupange wa Mesiya. Eye wa tukola ovisonehua viaco oco a vi sokise leci ca pita muẽle ocili vomuenyo wa Yesu. Oku sulako, wa teta onimbu hati, Yesu eye Kristu, ale Mesiya. (Ovil. 13:16-41; 17:2, 3) Nda ove wa lombololavo ocili Cembimbiliya ndomo mua suñama, cika vetiya omanu oku tava.

Sokiya Ciwa Eci Oka Lombolola. Eci cika lomboluiwa ci tava okuti ci sokiyiwa volonepa viñi viñi via suñama. Nda wa limbuka okuti cika ku kuatisa, ci tava okuti o tokekisa ovoloño añi añi. Konomuisa amue pokati kovoloño o pondola oku kuama.

Oku sokiya ocipama cove votuinimbu. Eci ci lomboloka oku tepa ocipama cove votuinimbu, okuti onepa lonepa yi kuatisa koku tẽlisa ocimãho cove. Otuinimbu tuaco ci tava okuti tu kala atosi ana a velapo a kuatisa koku kuata elomboloko liocipama cove. Ale ci tava okuti a kala elomboluilo limue lionimbu lieca uvangi wa cimue ale lina li pisa cimue. Atosi amue, ndaño okuti a kuete elitokeko locipama, ci tava okuti opiwamo ale a vokiyiwako, cosi catiamẽla ño kolonjeveleli oka vangula lavio ale kocimãho cove.

Kũlĩhĩsa ongangu yimue yoku sokiya ocipama votuinimbu. Velomboluilo limue lionimbu lia tiamẽla konduko ya Suku, ci tava okuti mu kongela (1) esunga lieci ci kuetele esilivilo oku kũlĩha Suku konduko (2) onduko ya Suku helie, kuenda (3) ndamupi tu pondola oku lekisa esumbilo konduko yaco.

Poku konomuisa alivulu ana a siata oku sandekiwa “[l]ukuenje wa kolelua haeye wa lunguka” a sokiyiwila oku songola alilongiso Embimbiliya, tu pondola oku lilongisilako calua catiamẽla koku sokiya ocipama votuinimbu. (Mat. 24:45) Valivulu aco ndomo ca siata, muli ovolandu añi añi a kuatisa olondonge oku kuata ocisimĩlo ca suapo catiamẽla kocili ca velapo ci lomboluiwa Vembimbiliya. Alivulu anene a kuete otusapi tu tepa osapi ya velapo votuinimbu. Okasapi lokasapi, ka pongiyila ovisimĩlo viondonge kocipama cikuãimo okuti cu kuatisavo oku kuata ocisimĩlo ca suapo cocipama cosi.

Esunga liocina cimue kuenda eci ciyililako. Oku konomuisa esunga liocina cimue kuenda eci ciyililako, onjila yimue yikuavo yoku lombolola ciwa ocipama.

Nda o kasi loku vangula locimunga cimue ale lomanu vamue va sukila oku kũlĩhĩsa ciwa lutate eci ci iyilila kocina cimue va kasi loku linga ale ceci va yongola oku linga, oku kuama onjila eyi ceca vali onima yiwa. Elivulu Liolosapo kocipama 7, lieca ongangu yiwa yatiamẽlako. Olio li lekisa ciwa ndomo ukuenje umue “wa kamba olondunge” (esunga) eya oku kupukila peka liocipuepue, kuenje weya oku li kokela ovitangi vialua (ceci ceyililako).​—Olosapo 7:7.

Oco wece evetiyo lia velapo, ove ci tava okuti o lekisa oku litepa ku kasi pokati kũvi wiyilila kuava va li kala oku endela volonjila via Yehova kuenda uwa wiyilila kuava va yevelela kondaka ya Yehova. Levetiyo liespiritu lia Yehova, Mose oco a linga poku vangula la va Isareli osimbu handi ka va iñilile Vofeka Yohuminyo.​—Esin. ocip. 28.

Olonjanja vimue, ciwa oku fetika elomboluilo liove loku lekisa ocitangi cimue (ceci ceyililako) kuenje oco o lombolola noke uvangi u lekisa eci ca koka ocitangi caco (esunga). Eci olonjanja vialua mu kongela oku tukula ocitangi cimue kuenda ndomo ci tetuluiwa.

Oku tukula ocitangi kuenda ndomo ci tetuluiwa. Kupange woku kunda, eci o tukula ocitangi cimue ci kasi loku sakalaisa omanu, kuenje o lekisa okuti kuli onjila yoku ci tetulula, ci vetiya omunu oku ku yevelela. Ocitangi caco ci tava okuti cimue ove o tukula ale cimue omunu a votola.

Catiamẽla kocitangi caco, ci tava okuti o tukula oku fa loku kuka kuomanu, ungangala walua u kasiko, ale ekambo liesunga. Ka ci sukila oku vangula calua oco o lekise okuti kuli ovitangi viaco, momo, vi letiwe lomanu vosi. Fetika ño loku tukula ocitangi caco, noke lekisa onjila yoku ci tetulula ndomo yi lekisiwa Vembimbiliya.

Handi pamue, ocitangi caco ci tava okuti ci kala cimue catiamẽla ño komunu lomunu, ndeci ekatanga lionjali yi kasi loku tekula omãla lika liayo, esumuo omo lioku vela kualua, ale ohali yomunu umue ka tatiwile locisola lukuavo. Konepa eyi, oco o tẽlise uwa wa velapo, tete te wa kala onjeveleli yiwa. Embimbiliya lieyuka alomboluilo alua a silivila atiamẽla kovitangi viosi evi. Pole alomboluilo aco a sukila oku a lekisa lolondunge. Nda elomboluilo liove lika kuatisa muẽle ocili omunu, o sukila oku kala ukuacili. Lekisa ciwa komunu nda o kasi loku tukula onjila yika mãlako, yika tepululako ño, ale yika kuatisa omunu oku pandikisa locitangi caco, cina okuti ka ci tẽliwa oku ci tetulula voluali lulo. Oku ci popia mumue muiñi, kũlĩhĩsa ciwa okuti oku lombolola kuove Embimbiliya kueca ociseveto kocisimĩlo o yongola oku pitila. Nda hacoko, onjila o lekisa komunu okuti oyo yoku mãlako ocitangi caco, ka yi ka molẽha ndu okuti ya suñama ciwa kokuaye.

Ulala wesinimuĩlo. Ovipama vimue vi lekisiwa ale vulala wa sunguluka watiamẽla kotembo ovina viaco via pita. Ndeci kelivulu Lietundilo, Afengi Ekũi, a lekisiwa vulala ndomo a tẽlisiwa. Kelivulu lia va Heveru ocipama 11, upostolo Paulu wa tukula alume lakãi vakuangangu yiwa yekolelo loku lekisa otembo omunu lomunu pokati kavo a kala komuenyo.

Nda o sinumũla cimue ca pita kosimbu loku lekisa ndomo ovina viaco via tẽlisiwa, cika kuatisa olonjeveleli viove oku kuata elomboloko ndomo ovina viaco via pita. Eci ci kapiwako cikale poku sinumũla eci ca pita kotembo yilo ale ceci ca pita kosiãhulu. Omo liaco, ci tava oku tokekisa esinumũlo liocina cimue ndomo ca pita, kumosi lelomboluilo liesunga lieci cimue ca pitila kuenda eci ceyililako. Nda wa sokiya oku ka sinumũla eci Embimbiliya li popia okuti oco cika pita koloneke viya kovaso, loku lekisa ndomo ovina viaco vika tẽlisiwa, cika leluka vali kolonjeveleli viove oku kuama elomboluilo liaco kuenda oku li patekela.

Oku lombolola ocipama cove loku kuama ulala wesinumũilo, ka ci sukila okuti otembo yosi te wa fetikila kefetikilo. Olonjanja vimue, ceca vali onima yiwa oku fetika ulandu umue loku lekisa etosi lia velapo liulandu waco. Nda o kasi loku sapula eci ca pita la umue, ci tava okuti o nõlapo oku vangula eci catiamẽla kotembo eci ekolelo liaye ku Suku lia nyikiwa. Pana okuti wa vetiyila ale onjongole yomanu kulandu waco, ci tava okuti o fetika oku sinumũla etosi letosi lieci ca koka okuti omunu waco o pitila petosi liaco.

Sinumũla Lika Eci ci Kuete Esilivilo. Nda ocipama cove o ci sokiya ndati nda ndati, kuata utate woku lombolola lika cina ci kuete esilivilo. Osapi yohundo yove te oyo yiku kuatisa oku nõla. O sukilavo oku kapako omanu va sangiwa pokati kolonjeveleli viove. Kolonjeveleli vimue, etosi limue pamue li silivila cocili, pole omanu vakuavo pamue va li tenda ndu okuti ka li kuete esilivilo. O sukilavo oku kũlĩhĩsa okuti ovipama viosi wa nõla vika ku kuatisa oku tẽlisa ocimãho cove. Nda hacoko, elomboluilo liove, ci tava okuti lika kala liwa, pole ka lika vetiya.

Poku konomuisa, pamue o sanga ovipama vialua viwa viatiamẽla kosapi yocipama cove. Viñami hẽ pokati kovipama viaco oka kongela vohundo yove? Nda weyukisa olonjeveleli lalomboluilo akahandangala, oka lueya koku tẽlisa ocimãho cove. Atosi amue ño atito a lomboluiwa, a ivalukiwa vali lonjanga okuti ovisimĩlo vialua vi lomboluiwa ño lonjanga yalua, ci tĩla calua oku vi ivaluka. Eci ka ci lomboloka okuti ka ci tava oku kongela atosi amue awa vocipama cove. Pole ku ka ecelele okuti atosi aco a uvalisa ocimãho cove. Kũlĩhĩsa ndomo atosi aco a kongeliwa lutate Vembimbiliya kelivulu lia Marko 7:3, 4 kuenda Yoano 4:1-3, 7-9.

Poku tunda ketosi limue oku enda ketosi likuavo, kuata utate oco ku ka ci linge ño enene lonjanga yalua okuti olonjeveleli vi nyelela kocisimĩlo. Oco ovisimĩlo vi talavayele ciwa pamosi, ove o sukila oku kapa elitokeko limue pokati kocisimĩlo cimue la cikuavo. Elitokeko liaco, ci tava okuti li kala ondaka yimue ale ulala umue wolondaka u lekisa elitokeko li kasi pokati kovisimĩlo. Valimi alua okuti, ku tukuiwa olondaka vimue ño via leluka vietokekiso poku lekisa elitokeko liocisimĩlo cokaliye leci ca lomboluiwa ale.

Sinumũla lika eci ci kuete esilivilo, kuenda sokiya ocipama lesuñamẽlo liwa, eci cika ku kuatisa oku tẽlisa ocimãho cove.