Vetiya Olonjeveleli Kuenda Oku vi Kolisa

OVITANGI va liyaka lavio nda vie nda vie, ava va vumba Suku va sukila oku sanga ekoliso vekongelo lia Kristão. Oco eci ci tẽlisiwe, ca piãla enene akulu vekongelo va kuete oku kũlĩhĩsa okuti olohundo viavo kuenda alungulo avo, amue okuti a vetiya. Akulu vekongelo va kuete oku kala “ndocivundilo coku tila ofela pamue ndocipundo coku tila ombela . . . ndolondui viovava vekango, pamue ndulembo wewe linene vofeka yekavo.”​—Isa. 32:2.

Nda ove ukulu wekongelo, anga hẽ olohundo viove vi kolisa kuenda vi lembeleka? Anga hẽ vi vetiya vana va kasi oku likolisilako oku vumba Yehova locili? Vi eca hẽ ongusu yoku pandikisa koku linga ocipango ca Suku ndaño muẽle omanu ka va lekisa onjongole ale va tu lambalala? Oco hẽ nda pokati kolonjeveleli pali vamue va sumua, va kasi oku liyaka lovitangi vioku sanga eteku ale va liyaka lovitangi viuhayele okuti ka kuli handi ovihemba vi sakula uvei waco? Ove ci tava okuti o ‘kolisa vamanjove lolondaka viomẽla wove.’​—Yovi 16:5.

Upa esilivilo kepuluvi okuete lioku kala ohundi oco o kuatise vamanjove oku tiamisila elavoko liavo ku Yehova lokupa ongusu kokuaye kuenda kaliangiliyo eye a siata oku linga.​—Va Rom. 15:13; Va Efe. 6:10.

Sokoluisa Olonjeveleli Viove Eci Yehova a Siata Oku Linga. Onjila yimue yiwa yoku vetiya oku kuata utõi, oku lekisa ndomo Yehova a kuatisa omanu vaye kosimbu eci va pita lovitangi.​—Va Rom. 15:4.

Yehova wa handelekele Mose oco ‘a halise’ kuenda a ‘pamise’ Yehosua eci handi va Isareli ka va iñilile Vofeka Yohuminyo, okuti otembo yaco mua kala handi ovanyali. Ndamupi Mose a ci linga? Kovaso a Yehosua, Mose wa ivaluisa va Isareli vosi eci catiamẽla kovina Yehova a va lingila eci va tunda ke Egito. (Esin. 3:28; 2; 7:18) Mose wa va ivaluisavo eci catiamẽla kekuatiso Yehova a va ihĩle poku yula kuavo va Amori. Noke Mose wa vetiya Yehosua hati: “Kolisako, kuata utõi.” (Esin. 31:​1-8) Poku vetiya vamanji, anga hẽ wa siata oku va ĩha ongusu loku va sokoluisa eci Yehova a va lingila ale?

Vamue pamue omo lioku liyaka lovitangi via lua, va lipula nda eteke limue vaka kuata muẽle asumũlũho Usoma wa Suku. Va ivaluisa okuti olohuminyo via Yehova, vi tẽlisiwa muẽle.​—Yeh. 23:14.

Kolofeka vimue, vamanjetu va kasi oku liyaka lovihandeleko violombiali, vina okuti vi tateka upange woku kunda olondaka viwa. Konepa eyi, akulu vekongelo vakuacisola va kuete oku kuatisa vamanji okupa ongusu kueci ca pita lovapostolo va Yesu Kristu. (Ovil. 4:1–5:42) Oku lombolola ndomo Suku a potolola ovitangi ndevi via sonehiwa kelivulu lia Ester, ocili okuti ci kuatisavo vamanji oku kuata utõi.

Omanu vamue, va siata oku enda kolohongele pole ka vamiko kespiritu. Ovo pamue va sima okuti Suku lalimue eteke a ka va ecela omo liomuenyo ũvi va ambatele konyima. Ove pamue ci tava okuti o va lomboluila ndomo Yehova a linga la Soma Manase. (2 Asa. 33:​1-16) Ale ci tava okuti o lombolola eci catiamẽla ku va Korindo yosimbu, vana va pongolola omuenyo wavo, kuenje va linga Akristão, okuti va tendiwa la Suku nda vakuesunga.​—1 Va Kor. 6:​9-11.

Anga hẽ vamue va sima okuti, ovitangi va kasi oku pita lavio ci lekisa okuti Suku wa va yanduluka? Ci tava okuti o va ivaluisa eci ca pita la Yovi kuenda ndomo eye a sumũlũisiwa omo lioku pandikisa kuaye ku Yehova. (Yovi 1:1-22; 10:1; 42:12, 13; Osa. 34:19) Olondembeleki viesanda via Yovi via kala locisimĩlo cĩvi cokuti Yovi wa linga ekandu limue. (Yovi 4:7, 8; 8:5, 6) Ca litepa leci, upostolo Paulu la Barnaba eci va kolisa olondonge oco vi ‘lamẽlele ketavo’ va popia hati: “Ka tu iñila vusoma wa Suku te lohali ya alua.” (Ovil. 14:21, 22) Cimuamue haico etaili, ove ci tava okuti o kolisa vana va kasi oku liyaka lanyiko, loku popia okuti oku tamalãla kanyiko oco ci yonguiwa ka Kristão vosi kuenda ci kuete esilivilo linene kovaso a Suku.​—Olosap. 27:11; Mat. 24:13; Va Rom. 5:3, 4; 2 Tim. 3:12.

Vetiya olonjeveleli oku sokolola ndomo Yehova a siata oku tẽlisa olohuminyo viaye vovimuenyo viavo. Poku va ivaluisa, ovo va pondola oku limbuka ndomo Yehova a va kuatisa ale, ndeci eye a likuminyile. Kelivulu Liosamo 32:​8, tu tangako hati: “Hu longisa, hu imbaimba onumbi yonjila wend[el]a. Hu lungula, hu imba ovaso.” Poku kuatisa olonjeveleli oku ivaluka ndomo Yehova a siata oku va songuila loku va ĩha ongusu, ove o pondola oku va kuatisa omunu lomunu oku limbuka okuti Yehova o va kuetele ocikembe kuenda okuti oka va kuatisa oku liyaka lovitangi viosi pamue viya vomuenyo wavo.​—Isa. 41:10, 13; 1 Pet. 5:7.

Sanjuka Leci Suku a Kasi Loku Linga. Poku likolisilako oku vetiya vamanji, tiamisila ovisimĩlo viavo kueci Yehova a kasi loku linga cilo. Oku vangula eci catiamẽla kovina evi locituwa cimue ci lekisa okuti ove wa vi sanjukila, ci ka vetiyavo olonjeveleli viove oku kuata ovisimĩlo vimuamue.

Lombolola ndomo Yehova a siata oku tu kuatisa oku liyaka lovitangi viomuenyo. Yehova o tu lekisa onjila yiwa yoku kala komuenyo. (Isa. 30:21) Eye o lombolola esunga lieci ku kasilili ungangala, ekambo liesunga, uhukũi, ovoveyi, olofa, kuenda o tu sapuilavo ndomo a ka malãko ovina evi. Eye o tu nena vongongela ya vamanji vakuacisola. Eye o tu ĩha esumũlũho lioku amẽla kokuaye vohutililo kuenda lioku kala Olombangi viaye. Eye o tu kuatisa oku limbuka okuti Kristu wa vialekiwa ale Kusoma oko kilu, kuenda o tu kuatisa oku limbukavo okuti oloneke via sulako violuali lulo vi kasi ale oku pitila kesulilo.​—Esit. 12:1-12.

Kasumũlũho ava, vokiyako oku tukula eci catiamẽla kolohongele vietu viekongelo, kolohongele vimbo, kuenda kolohongele viofeka. Eci o vangula eci catiamẽla kaliangiliyo aco lonjila yimue yi lekisa okuti wa a sanjukila, cika pamisa onjongole yolonjeveleli oco ka va ka liweke oku likongela lamanjavo.​—Va Hev. 10:23-25.

Ovolandu a lekisa asumũlũho a Yehova kalikolisilo etu kupange woku kunda, a pondolavo oku kala ono yekoliso. Kocita catete, eci upostolo Paulu la Barnaba va kala lokuenda ko Yerusalãi, ovo va kokela ‘esanju lialua vamanji vosi,’ poku va lomboluila eci catiamẽla komanu vakualofeka va tava kocili. (Ovil. 15:3) Ove ci tava okuti o sanjuisavo vamanji loku va sapuilako ovolandu a kolisa.

Omanu va vetiyiwa vali calua, eci va limbuka esilivilo lieci va kasi loku linga. Va pandiya omo lioku linga kuavo onepa kupange woku kunda. Pandiyavo vamanji vana okuti omo lia lima avo alua ale omo lioku vela, kava tẽla oku linga calua kupange woku kunda, pole va kasi oku pandikisa cocili. Va sapuilavo okuti Yehova lalimue eteke a ka ivalako ocisola ovo va lekisa konduko yaye. (Va Hev. 6:10) Ekolelo lianyikiwa [uwa umue wa soliwa]li kuete esilivilo lia velapo. (1 Pet. 1:6, 7) Vamanjetu va sukila oku va ivaluisa eci catiamẽla kondaka eyi.

Vangula Lonjongole Yovutima Eci Catimẽla Kelavoko Liokovaso. Olohuminyo via Suku viatiamẽla kovina vi laika oku iya kovaso, ovio ono yekoliso lia velapo komanu vosi vana va kuetele ocisola Suku. Valua pokati kolonjeveleli pamue va siata ale oku yeva eci catiamẽla kolohuminyo viaco. Pole, oku popia kuove olohuminyo viaco lesanju, ci pondola oku lingisa okuti olohuminyo viaco vi kuata vali ongusu. Kuenda ci kuatisa olonjeveleli oku kuata ekolelo liokuti vika tẽlisiwa muẽle, kuenje va yeva esanju vovitima viavo. Oku kapako eci wa siata oku lilongisa Kosikola Yupange Wakristão, ci pondola oku ku kuatisa oku ci linga.

Yehova eye ono ya velapo yevetiyo haeye ukuakueca ongusu komanu vaye. Pole, ove ci tava okuti o likuata omunga laye koku pitiya asumũlũho aco ku vakuẽle. Eci o vanguila kovaso yekongelo, upa esilivilo kepuluvi liaco oco o ci linge.