Kuli Elavoko Liokuti Ava va fa Vaka Pinduiwa

1-3. Unyali upi okasi oku tu lambalala? Kuenda momo lie oku konomuisa eci Embimbiliya lilongisa ci tu lembelekela?

SOKOLOLA okuti o kasi oku tila unyali umue wa tema calua. Eye wa pama kuenda o lupuka vali okuti ove ci sule. Ove wa kũlĩha okuti eye ka kuete ohenda. Momo wa ponda ale vamue akamba vove. Ove o likolisilako oku u tila. Pole, lopo o limbuka okuti okukuãi. Kuenje ku kuata vali elavoko lalimue lioku puluka. Pole, vocipikipiki, o limbuka okuti kueya umue upopeli. Upopeli waco wa pama vali okuti unyali wove o sule. Kuenje o likuminya oku ku kuatisa. Eci hẽ nda ka ca ku tulumuile utima?

² Eci ca lomboluiwa ndeti, oco muẽle ci kasi oku pita letu. Vosi yetu tu kasi oku lambalaliwa lunyali umue wa tema calua. Ndomo tua lilongisa ale vocipama ca pita, Embimbiliya li tukula kufa hati, unyali. Lomue pokati ketu o tẽla oku tila unyali waco ale oku yaka laye. Valua pokati ketu tua mola ale ndomo unyali waco ambata omuenyo womanu tua solele calua. Pole, unene wa Yehova wa velapo vali okuti wa kufa u sule. Yehova eye upopeli wetu. Eye wa lekisa ale okuti o tẽla oku yula unyali waco. Kuenda wa likuminya oku nyõla unyali waco, okuti, lalimue eteke aka kalako vali. Embimbiliya li popia hati: “Unyali o sulako oku imuha kufa.” (1 Va Korindo 15:26) Eli esapulo limue liwa.

³ Tu sokololi handi ndomo tu liyeva eci kufa a veta umue ngandietu. Oku ci linga, cika tu kuatisa oku kuata elomboloko liocina cimue cika tu lembeleka. Yehova wa likuminya okuti ava va fa vaka kala vali lomuenyo. (Isaya 26:19) Eci ci lomboloka okuti vaka pinduiwa.

CECI UMUE NGANDIETU A FA

4. (a) Evalo lioku fisa Yesu a yeva li tu longisa nye catiamẽla ku Yehova? (b) Yesu wa kala ekamba lielie?

⁴ Anga hẽ wa fisile ale umue ngandiove? Evalo, upongo, kuenda ulika ka vi tendiwa! Kapuluvi aco tu sukila oku lupukila Vondaka ya Suku oco tu sange elembeleko. (Tanga 2 Va Korindo 1:3, 4.) Embimbiliya li tu kuatisa oku limbuka ndomo Yehova la Yesu va liyeva eci umue a fa. Yesu eci a kala palo posi, wa setukula ciwa Isiaye. Eye wa yevailevo evalo lioku fisa. (Yoano 14:9) Yesu eci a endaile ko Yerusalãi, wa solaile calua oku enda ko Betania oku ka pasuisa Lasaru la vamanjaye Maria la Marta. Ovo va kala akamba vocili. Embimbiliya li popia hati: “Yesu wa so[lele] Marta la manjaye kuenda Lasaru.” (Yoano 11:5) Ndomo tua ci lilongisa ale vocipama ca pita, noke Lasaru weya oku fa.

5, 6. (a) Yesu wa liyeva ndati eci a lisanga lepata lia Lasaru lia kala loku lila? (b) Oku lila kua Yesu ku tu ĩha elembeleko lie?

⁵ Yesu wa liyeva ndati eci kamba liaye a fa? Ulandu waco u tu sapuila okuti Yesu wa ka li sangele lavakuepata lia Lasaru kuenda akamba vavo va kala loku lila olofa viaye. Eci Yesu a va mola, wa va kuatela ohenda. Kuenje “wa tokotelua.” Ulandu waco wamisako hati: “Yesu wa lila.” (Yoano 11:33, 35) Anga hẽ oku lila kua Yesu kua lekisa okuti eye ka kuatele elavoko? Sio. Yesu wa kũlĩhĩle okuti oka linga ocikomo. (Yoano 11:3, 4) Pole, lopo wa yeva evalo lioku fisa.

⁶ Oku lila kua Yesu ku tu lembeleka. Momo ku lekisa okuti, Yesu la Isiaye Yehova, ka va sanjukila olofa. Pole, Yehova o tẽla oku yula unyali waco. Tu konomuisi unene Suku a eca ku Yesu.

“A LASARU, TUNDAMO”

7, 8. Momo lie omanu ka va kuatelele vali elavoko lalimue ku Lasaru? Pole nye Yesu a linga?

⁷ Lasaru vo langekele veleva. Kuenje Yesu wa pinga okuti ewe lia kapiwile kuvelo waco liupiwako. Marta wa popia hati, cilo wa futa ale momo tunde eci a fa pa pita ale oloneke vikuãla. (Yoano 11:39) Oku ci tiamisila kovisimĩlo viomanu, ka kua kaile vali elavoko lalimue.

⁸ Ewe liopiwako. Kuenje Yesu wa vilikiya lolukandi hati: “A Lasaru, tundamo.” Noke omunu “wa file wa tundamo.” (Yoano 11:43, 44.) O tẽla oku sokolola esanju omanu va kalapo va yeva? Ci kale vamanjaye, ci kale vakuepata liaye, ci kale akamba, lava va lisunguile laye, vosi va kũlĩhĩle okuti Lasaru wa fa muẽle. Pole, va limbuka okuti Lasaru wa kala vali pokati kavo. Ovo va komõha calua! Kuenda va yolela Lasaru. Eci ca lekisa okuti kufa o tẽliwa oku u yula.

9, 10. (a) Yesu wa lekisa okuti helie wo wĩha unene woku pindula Lasaru? (b) Nye tu lilongisila kovolandu a sangiwa Vembimbiliya atiamẽla kepinduko?

⁹ Ocikomo eci, Yesu ka ci lingile longusu yaye muẽle. Vohutililo a linga eci handi ka vilikiyile Lasaru, eye wa lekisa okuti Yehova eye wa eca unene woku u pindula. (Tanga Yoano 11:41, 42.) Eyi hayoko onjanja yatete Yehova a eca unene woku pindula. Epinduko lia Lasaru olio liecea pokati kapinduko a lingiwa la Yesu a sonehiwa Vembimbiliya.a Oku tanga ovolandu aco ci lembeleka calua. Ovolandu aco a tu longisa okuti Suku ka kuete ocame. Momo, wa pindula amalẽhe lakulu kuenda alume lakãi. Wa pindulavo va Isareli la vana ka va kaile va Isareli. Hesanjukuolio omanu va yeva omo liepinduko lia vangandiavo! Eci Yesu a pindula kafeko umue, olonjali viaye via ‘saluka ca lua.’ (Marko 5:42) Yehova wa va ĩha esanju limue okuti lalimue eteke lia va limbile.

¹⁰ Ocili okuti vana Yesu a pinduile veya oku fa vali. Eci ci lomboloka hẽ okuti apinduko aco ka a kuatele esilivilo? Ocili okuti a kuata. Ovolandu aco a tu ĩha elavoko liasuapo.

OKU LILONGISILA KOVOLANDU EPINDUKO

11. Ulandu wepinduko lia Lasaru u lekisa ndati uvangi weci ca sonehiwa kelivulu Liukundi 9:5?

¹¹ Embimbiliya li longisa okuti ava va fa “lacimue va kũlĩha.” (Ukundi 9:5) Ovo ka va kasi lomuenyo kuenda ka va kũlĩhile cimue. Epinduko lia Lasaru li lekisa uvangi waco. Eci Lasaru a pinduka ka sapuilile vangandiaye okuti wa endele kilu. Kuenda ka va sapuililevo okuti wa endele vifelu oku ka talisiwa ohali. Embimbiliya ka li tu sapuila lacimue ca soka ndeci okuti oco ca pita la Lasaru. Voloneke vikuãla eye a file, ‘lacimue a kũlĩhĩle.’ Lasaru wa pekelele otulo tuoku fa.​—Yoano 11:11.

12. Nye tu kolelela okuti Lasaru wa pinduiwa muẽle?

¹² Ulandu wepinduko lia Lasaru u tu longisavo okuti ava va fa, vaka pinduiwa muẽle. Huhembiko. Eci Yesu a pindula Lasaru omanu valua va kalapo. Ndaño muẽle asongui vetavo vana va suvukile Yesu, ka va tẽlele oku patãla ocikomo caco. Toke muẽle va popia hati: ‘Tu linga nye? Momo omunu u [Yesu] o kasi oku linga ovilimbu via lua.’ (Yoano 11:47) Kua kala valua va endele oku ka tala Lasaru wa pinduka. Kuenje valua pokati kavo va kolela Yesu. Ovo va limbuka okuti epinduko lia Lasaru lia kala uvangi wokuti Yesu wa tumiwa la Suku. Uvangi waco wa muiwa lomanu vosi. Kuenje asongui vamue va Yudea va yonguile oku ponda Yesu kuenda Lasaru.​—Yoano 11:53; 12:9-11.

13. Uvangi upi tu kuete u lekisa okuti Yehova o tẽla muẽle oku pindula ava va fa?

¹³ Anga hẽ ca sunguluka oku sima okuti ka kuka kala epinduko? Sio, ka ca sungulukile. Momo Yesu wa longisa okuti, kuka kala eteke limue okuti “vosi va kasi vayambo” vaka pinduiwa. (Yoano 5:28) Yehova eye Ululiki womuenyo. Anga hẽ eye ka kuete unene woku lulika vali omunu wa fa? Ocili okuti okuete. Yehova eye wa kũlĩha ava va kasi vovisimĩlo viaye. Anga hẽ eye o tẽla oku ivaluka vangandietu va fa? Ocili okuti o ci tẽla. Momo kilu kuli olombungululu vialua, pole Suku viosi o vi tukula olonduko viavio! (Isaya 40:26) Omo liaco, Yehova Suku o tẽla oku ivaluka cosi catiamẽla ku vangandietu va fa. Kuenje oka va nena vali komuenyo.

14, 15. Ndomo Yovi a ci popia, Yehova o liyeva ndati oku pindula ava va fa?

¹⁴ Oco hẽ, Yehova o liyeva ndati poku pindula ava va fa? Embimbiliya li longisa okuti Eye o yongola muẽle oku pindula ava va fa. Ukuekolelo Yovi onjanja yimue wa pulile hati: “Omunu nda o fa o kala vali lomuenyo?” Yovi wa yonguile oku vundisiwa vonjembo toke eci Suku o wivaluka. Eye wa popia hati: ‘Ove o mbilikiya, kuenje ame nambulula. Ove o kuatela upange wovaka ove ongeva.’​—Yovi 14:13-15.

¹⁵ Sokolola ño handi! Yehova o yongola oku nena vali komuenyo vana va fa osimbu. Ka ci tu sanjuisa hẽ oku kũlĩha okuti Yehova o kuete onjongole yoku pindula ava va fa? Oco hẽ velie vaka pinduiwa? Kuenda vaka pinduiwila pi?

‘VOSI VA KASI VAYAMBO ONJIVALUKO VAKA PINDUIWA’

16. Ava va fa vaka pinduiwila vekalo lipi?

¹⁶ Ovolandu epinduko a sangiwa Vembimbiliya a tu sapuila calua catiamẽla kepinduko li laika oku iya. Omanu vana va pinduiwile kosimbu palo posi, va li sangele la vangandiavo. Kepinduko likeya kovaso, cika kalavo cimuamue. Pole, lika velapo vali. Ndomo tua lilongisa Vocipama 3 celivulu lilo, ocipango ca Suku ceci okuti oluali luosi lu posoka. Omo liaco, ava va fa, ka vaka pinduiwila voluali lueyuka uyaki, ungangala, lovovei. Ovo vaka kuata epuluvi lioku kala otembo ka yi pui kulo kilu lieve, lombembua kuenda esanju.

17. Velie vaka pinduiwa?

¹⁷ Velie vaka pinduiwa? Yesu wa popia hati, ‘vosi va kasi vayambo onjivaluko vaka yeva ondaka yaye, kuenje va tundamo.’ (Yoano 5:28, 29) Elivulu Liesituluilo 20:13, li popiavo hati: “Okalunga ka eca ava va fa va kalamo. Kufa la Njembo va eca ava va fa va kalamo.” ‘Onjembo’ yi lomboloka oku kua siata oku enda omanu vosi va fa. (Tala Alomboluilo a Vokiyiwako kemẽla 212-213.) Ayambo osi aka kala upolokoso. Olohuluwa viomanu va kasimo, vaka pinduiwa. Upostolo Paulu wa popia hati: ‘Ñuete elavoko ku Suku hailio ovo va kuetevo, okuti kuka kala epinduko lia vakuesunga lava havakuesungako.’ (Ovilinga 24:15) Eci hẽ ci lomboloka nye?

18. Velie va kongeliwa pokati ka “vakuesunga” vaka pinduiwa?

¹⁸ Pokati ka “vakuesunga” vaka pinduiwa, pa ka kala vana tua siata oku tanga Vembimbiliya va kala komuenyo eci handi Yesu keyile palo posi. Ndeci Noha, Avirahama, Sarai, Mose, Ruti, Ester, kuenda vakuavo. Vamue pokati kalume lakãi vaco vakuekolelo, va tukuiwa kocipama 11 celivulu lia Va Heveru. Pole, pokati ka “vakuesunga” vaka pinduiwa, pa ka kalavo vana va fa okuti va vumba Yehova lekolelo koloneke vilo. Omo lielavoko liepinduko, etu ka tu kueta usumba lawumue woku fa.​—Va Heveru 2:15.

Kuenda elavoko liaco li ku kuatisa konepa yipi?

19. Velie “havakuesungako”? Kuenda epuluvi lipi Yehova aka va ĩha?

¹⁹ Oco hẽ omanu vana okuti eci va fa, ka va vumbile Yehova omo okuti ka va kũlĩhĩle lacimue catiamẽla kokuaye, vaka pinduiwavo? Olohuluwa viomanu vana okuti “havakuesungako” ka vaka ivaliwa. Ovo vaka pinduiwavo. Kuenje vaka ĩhiwa otembo yoku lilongisa eci catiamẽla ku Suku yocili oco vo vumbe. Vokuenda kuohulukãi yanyamo, ava va fa vaka pinduiwa. Kuenje vaka kuata epuluvi lioku likongela ku vakuesunga oku vumba Yehova. Tu lavoka otembo yimue yiwa. Otembo yaco, yina Embimbiliya li tukula hati Eteke Liekanga.b

20. Ongehena nye? Kuenda helie endamo?

²⁰ Eci ci lomboloka hẽ okuti omanu vosi va fa vaka pinduiwa? Sio, hacoko. Embimbiliya li tu sapuila okuti vamue va fa, va kasi Vongehena. (Luka 12:5) Ongehena ya kala ocitunu cimue va kapaile ovinene ko Yerusalãi yosimbu. Ovivimbi lovinene, omo via enda loku yokiwila. Ovivimbi via enda loku imbiwamo, vina va Yudea va sokisiwile okuti ka vi sesamẽla oku kendiwa. Omo liaco, Ongehena ocindekaise coku nyõliwa elisi. Wosi wa imbiwa Vongehena ka kuete vali elavoko liepinduko. Ndaño okuti Yesu oka linga onganji yava va kasi lomuenyo lava va fa, Yehova eye Onganji ya velapo. (Ovilinga 10:42) Eye kaka pindula vana va sokisiwa okuti olondingaĩvi ka vi pongoloka.

OKU PINDUIWILA KILU

21, 22. (a) Kuli epinduko lipi likuavo? (b) Helie tete wa tambula epinduko liomuenyo wespiritu?

²¹ Embimbiliya li tukulavo epinduko limue likuavo. Epinduko liaco lia vana va kuete elavoko lioku enda kilu. Umue o tukuiwa Vembimbiliya okuti eye wa pita vepinduko liaco, Yesu Kristu.

²² Eci Yesu a pondiwa, Yehova ka ecelelele okuti Omõlaye o kala veyambo otembo yalua. (Osamo 16:10; Ovilinga 13:34, 35) Suku wa pindula Yesu. Pole, ko pinduile letimba liositu. Upostolo Petulu wa popia hati, Kristu “wa pondiwa vetimba puãi wa kuata vali omuenyo vespiritu.” (1 Petulu 3:18) Eci ca kala ocikomo cimue cinene! Yesu weya oku kala vali lomuenyo vetimba liespiritu. (Tanga 1 Va Korindo 15:3-6.) Yesu eye tete wa tambula epinduko liaco pole, hayeko lika wa tambula epinduko liaco.​—Yoano 3:13

23, 24. Velie vatiamẽla ‘kokacunda’ kolomeme via Yesu? Kuenda va soka vañami?

²³ Eci Yesu a kala loku lavoka oku tiukila kilu, wa sapuila olondonge viaye hati, “ngenda oku vu angiliyila ocitumalo.” (Yoano 14:2) Vana va kuete elavoko lioku enda kilu, Yesu wa va tukula hati, ‘okacunda.’ (Luka 12:32) Oco hẽ vañami vatiamẽla kocimunga eci citito Cakristão? Kelivulu Liesituluilo 14:1, tu sangako olondaka viupostolo Yoano wa popia hati: “Nda vanja vali kuenje nda mola Kameme o tãi Komunda Siono. Ci soka 144.000 viava va kuete onduko yaye londuko ya Isiaye via sonehiwa kovipolo viavo va tãi kumue laye.”

²⁴ Akristão va soka 144.000, oku kongelamo ovapostolo va Yesu, va pinduiwila komuenyo wokilu. Oco hẽ otembo yipi ovo va pinduiwa? Upostolo Paulu wa sonehele hati, epinduko liaco lika lingiwa ketukuluko lia Kristu. (1 Va  Korindo 15:23) Ndomo oka ci lilongisa Kocipama 9 celivulu lilo, tu kasi ale kotembo yaco. Omo liaco, vana vatiamẽla ko 144.000, eci va fa, haico va pinduiwila komuenyo wokilu. (1 Va  Korindo 15:51-55) Pole, onepa yalua yomanu, yi kuete elavoko lioku pinduiwila palo posi, voluali luokaliye.

25. Nye tuka lilongisa vocipama cikuãimo?

²⁵ Yehova oka yula unyali wetu kufa. Kuenje lalimue eteke kuka kala vali okufa. (Tanga Isaya 25:8.) Ove pamue o lipula okuti, ‘oco hẽ ava vaka pinduiwila kilu vaka lingako nye?’ Ovo vaka viala Vusoma wa Suku kilu. Pole, ondaka eyi tu ka yi lilongisa vocipama cikuãimo.