Olondaka Viwa vi Lomboloka Nye?

1. Olondaka viwa Via tunda ku Suku vi lomboloka nye?

Suku o yongola okuti tu kuata omuenyo wesanju palo posi. Eye omo liocisola a kuetele omanu, wa lulika ongongo kuenda ovina vikuavo vi kasimo. Ndopo o ka lekisa unene waye oco a nene ekalo liwa komanu vosi va tunga kilu lieve. Eye o ka yovola omanu kovina viosi vi nena ohali.—Tanga Yeremiya 29:11.

Ka kuli uviali wa tẽla oku malako ungangala, uvei, kuenda oku fa. Pole, kuli olondaka viwa vi lekisa okuti, ndopo uviali wa Suku u ka piñainya ovoviali osi oluali. Kuenje olonungi viuviali waco vi ka kuata ombembua kuenda uhayele uwa.—Tanga Isaya 25:8; 33:24; Daniele 2:44.

2. Momo lie olondaka viwa vi sukilila onjanga?

Eci Suku a ka yovola oluali kolondingaĩvi, oco lika ohali yi ka pua. (Sofoniya 2:3) Otembo yipi ci ka lingiwa? Ondaka ya Suku ya lomboluile ale ovitangi omanu va kasi oku liyaka lavio koloneke vilo. Ovitangi viaco vi eca uvangi wokuti otembo ya Suku yoku malako ovitangi viaco, yi kasi ocipepi.—Tanga 2 Timoteo 3:1-5.

3. Nye tu sukila oku linga?

Tu sukila oku lilongisa ovina viatiamẽla ku Suku vi sangiwa Vondaka yaye, Embimbiliya. Olio li kasi ndukanda tua tambula ku isia ukuacisola. Embimbiliya li tu sapuila ndomo tu pondola oku kuata esanju komuenyo cilo, kuenda ndomo tu ka tambula omuenyo ko pui kovaso yoloneke palo posi. Eci omanu va ka mola okuti ove o kasi oku kuatisiwa oco o kũlĩhe ciwa Embimbiliya, citava okuti va ka ku suvuka. Pole, poku kũlĩha ovina viwa Suku a tu likuminya, ka tu ecelela okuti vakuetu va tu tateka oku lilongisa catiamẽla kovina viaco.​—Tanga Olosapo 29:25; Esituluilo 14:6, 7.