Momo Lie Suku a Kuetele Ocisoko Cimue?

1. Momo lie Suku a nõlelele va Isareli kosimbu?

Suku wa nõlele ocitumbulukila ca Avirahama loku va lingisa ofeka kuenje wa va ĩha ovihandeleko. Eye wa va tukula hati, ofeka ya “Isareli” kuenje wa va ĩha ocikele coku teyuila efendelo liocili, kuenda ondaka yaye. (Osamo 147:19, 20) Omo liaco, omanu vakuapata osi nda va sumulũhĩla ku va Isareli.—Tanga Efetikilo 22:18.

Suku wa nõlele va Isareli oco va linge olombangi viaye. Ulandu wavo u lekisa ndomo omanu va pondola oku kuatisiwa poku pokola kovihandeleko via Suku. (Esinumuĩlo 4:6) Omanu vakuavo poku lilongisa ulandu wa va Isareli, nda ca va kuatisavo oku kũlĩha Suku yocili.—Tanga Isaya 43:10, 12.

2. Momo lie Akristão vocili va kasilili vomunga?

Vokuenda kuotembo, va Isareli va pumba ohenda ya Suku, kuenje Yehova wa nõla ekongelo Liakristão oco li piñainye ofeka ya Isareli. (Mateo 21:43; 23:37, 38) Koloneke vilo, Akristão vocili ovo olombangi via Yehova via piñainya va Isareli.—Tanga Ovilinga 15:14, 17.

Yesu wa sokiya ocisoko colondonge viaye oco va kunde loku longisa omanu vo kolofeka viosi. (Mateo 10:7, 11; 24:14; 28:19, 20) Koloneke vilo via sulako, upange waco u kasi oku pitila kesulilo. Yehova o kasi oku ongolola omanu vo kolofeka viosi oco va likongele kefendelo liocili. (Esituluilo 7:9, 10) Akristão vocili va kasivo vomunga yimuamue oco va likolise kuenda oku li kuatisa pokati. Koluali luosi va kuete esokiyo limuamue lielongiso Liembimbiliya kolohongele viavo.—Tanga Va Heveru 10:24, 25.

3. Ocisoko Colombangi Via Yehova ca fetika ndati kotembo yilo?

Oku upisa kunyamo wo 1870, ocimunga cimue citito comanu vakuakulilongisa Embimbiliya, ca fetika oku kũlĩhĩsa lutate alongiso Embimbiliya ana a siwilepo osimbu. Ovo va kũlĩhĩle okuti Yesu wa sokiyile ekongelo Liakristão oco li kunde olondaka viwa. Omo liaco, va fetikavo oku linga upange woku kunda Usoma koluali luosi. Kunyamo wo 1931, va nõlapo oku tukuiwa hati, Olombangi Via Yehova.—Tanga Ovilinga 1:8; 2:1, 4; 5:42.

4. Olombangi Via Yehova via sokiyiwa ndati?

Kocita catete, ekongelo Liakristão kolofeka vialua lia kuatisiwa losungu yakulu vana va tendele Yesu okuti eye Utue wekongelo. (Ovilinga 16:4, 5) Cimuamue haico koloneke vilo okuti, Olombangi Via Yehova koluali luosi via siata oku kuatisiwa Losungu Yolombangi Via Yehova okuti akulu vekongelo vana va loñoloha kespiritu. Ovo va songola olofiliale Violombangi Via Yehova vi pongolola alivulu kalimi akuavo kuenda oku va sandeka kueci ci soka 600 kalimi. Handi vali, Osungu Yolombangi Via Yehova yeca ekoliso Liovisonehua kuenda olonumbi kueci ci pitahãla 100.000 kakongelo a sangiwa koluali luosi. Vekongelo lekongelo muli alume va loñoloha kespiritu okuti, akulu vekongelo ale olomitavaso. Ovo va tata ocunda ca Suku locisola.—Tanga 1 Petulu 5:2, 3.

Olombangi Via Yehova, vi likuete omunga koku kunda olondaka viwa kuenda oku longisa omanu oco va linge olondonge. Etu tu kuãi ongangu yovapostolo yoku kunda konjo lanjo. (Ovilinga 20:20) Tua siatavo oku fetika alilongiso Embimbiliya lomanu va sole ocili condaka ya Suku. Pole, Olombangi Via Yehova ka vi lomboloka lika ocisoko cimue. Tu kasi ndepata limuamue kuenda tu kuete Isia umue yocisola. Tu kasi ndavamanji va likuatisa pokati. (2 Va Tesalonike 1:3) Omo okuti omanu va Yehova va likuete omunga oco va sanjuise Suku kuenda oku kuatisa vakuavo, va kasi ndepata limue lia sanjuka voluali.—Tanga Osamo 33:12; Ovilinga 20:35.