Nye ci Kuatisa Epata Oku Kuata Esanju?

CECI EMBIMBILIYA LI POPIA

“Va sumũlũha vana va yeva ondaka ya Suku kuenje va yi kapako!”—Luka 11:28, Embimbiliya li Kola—Epongoluilo Lioluali Luokaliye.

CECI CI PONDOLA OKU LOMBOLOKA KOKUOVE

Sanga ocisola cocili.—Va Efeso 5:28, 29.

Sanjukila esumbilo liocili.—Va Efeso 5:33.

Sanjukila oku kolapo kuocili.—Marko 10:6-9.

TU SUKILA MUẼLE OKU TAVA KUECI EMBIMBILIYA LI POPIA?

Oco, omo liasunga avali a kuãimo ndeci:

• Suku eye Usovoli wepata. Embimbiliya li popia hati, “apata osi . . . a kasilili mekonda liaye.” (Va Efeso 3:14, 15) Volondaka vikuavo, tu popia tuti, kuli apata omo Yehova eye wa a lulika. Momo lie ci kuetele esilivilo oku ci kũlĩha?

  Sokolola ndoco: Ove wa lia okulia kumue ku pepa, kuenje o yongola oku kũlĩha ovina via kapiwa vokulia kuaco. Nda wa pula helie? Ocili okuti, o pulisa omunu wa teleka okulia kuaco.

  Cimuamue haico, oco tu kũlĩhe eci ci pondola oku kuatisa epata oku kuata esanju, tu sukila oku sanda olonumbi via Yehova Usovoli wepata.—Efetikilo 2:18-24.

• Suku wa ku kapako. Apata a lekisa olondunge poku sanda alungulo a Yehova a sangiwa Vondaka yaye. Momo lie? “Momo eye o vu tati.” (1 Petulu 5:6, 7) Yehova wa ku kapako kuenda alungulo aye otembo yosi a ku kuatisa!—Olosapo 3:5, 6; Isaya 48:17, 18.