Rebeka wa Yonguile Oku Sanjuisa Yehova

Rebeka wa kala ukãi umue wa solele Yehova. Onduko yulume waye Isake. Eye wa solelevo Yehova. Rebeka wa li sanga ndati la Isake? Wa lekisa ndati okuti wa yonguile oku sanjuisa Yehova? Tu konomuisi ovina viatiamẽla kokuaye.

Avirahama la Sara, va kala olonjali via Isake. Ovo va kala vofeka yo Kanana okuti, omanu vaco ka va fendelele Yehova. Pole, Avirahama wa yonguile okuti, omõlaye o kuela ukãi umue o fendela Yehova. Citava okuti, wa tuma ukuenje waye Eliesere, oco a sandele ukãi Isake, kofeka yimue yi tukuiwa hati Harane, kuna kua kala epata lia Avirahama.

Eliesere wa linga ungende lakuenje vakuavo va Avirahama. Wa kala ungende umue unene. Va linga ungende waco lolongamelo kuna va ambatele okulia kuenda olombanjaile. Eliesere wa nõla ndati ukãi oco a kueliwe la Isake? Eci Eliesere kumue lakuenje vakuavo va pitĩla ko Harane, va talama pocisimo. Momo, Eliesere wa kũlĩhĩle okuti, omanu va laikele oku iya oco va tape ovava. Eye wa likutilila ku Yehova hati: ‘Nda ufeko ndi pinga ovava wa tava, ckuenje o popia hati, citava oku nyuako kuenda o nyuisavo olongamelo viange, ndi limbuka okuti, eye ukãi ove wa nõla.’

Noke, Rebeka weya pocisimo. Embimbiliya li tu sapuila okuti, ufeko waco wa posokele calua. Eliesere wa pinga ovava kokuaye, kuenje, eye wa popia hati: ‘Citava. Ndi kopa ovava oco onyue, kuenda nyuisavo olongamelo viove.’ Sokolola upange akuata woku eca ovava! Rebeka wa sukilile oku tiukila olonjanja vialua pocisimo, oco olongamelo viosi vi nyue ovava. O lete hẽ, elitalatu li lekisa upange a kasi oku linga?—Eliesere wa komõha ndomo Yehova a tambulula ohutililo yaye.

Eliesere wa eca ku Rebeka olombanjaile vialua via posoka. Eye wa laleka Eliesere kuenda akamba vaye oco va ende konjo yolonjali viaye. Eliesere wa lombolola esunga lieci Avirahama o tumĩla, kuenda ndomo Yehova a tambulula ohutililo yaye. Epata lia Rebeka lia kuata esanju lialua, poku ecelela okuti, o kueliwa la Isake.

Ove hẽ, o sima okuti Rebeka wa yonguile oku kueliwa la Isake?— Rebeka wa kũlĩhĩle okuti Yehova eye wa tuma kokuaye Eliesere. Eci olonjali viaye vio pula nda o yongola oku enda ko Kanana oco a kueliwe la Isake, Rebeka wa tambulula hati: ‘Ndi yongola oku enda.’ Omo liaco, wa enda la Eliesere. Eci va pitĩla ko Kanana, wa kueliwa la Isake.

Omo okuti Rebeka wa linga ovina via sunguluka, Yehova wo sumũlũisa. Noke lianyamo alua, Yesu weya oku oku citiwila vepata liaye! Nda wa sanjuisa Yehova ndeci Rebeka a linga, Eye o ku sumũlũisavo.