OCIPAMA 7
Eteke Limue wa Limbukile hẽ Okuti o Kasi Likaliove Kuenda wa Kuata Usumba?
Tala umalẽhe o kasi velitalatu. Ove hẽ, o tava okuti o kasi likaliaye, kuenda o kuete usumba, ale sio? Ove hẽ, eteke limue wa kuatelevo usumba?— Vosi yetu olonjanja vimue, tua siata oku kuata usumba. Embimbiliya li lombolola eci catiamẽla kakamba vamue va Yehova okuti, va kuatelevo usumba, omo lioku kala likaliavo. Umue pokati kavo Eliya. Tu konomuisi ulandu waye.
Isevele wa yonguile oku ponda Eliya
Eliya wa kala ko Isareli vokuenda kuotembo yalua, eci Yesu ka citiwile handi. Ahava, soma ya va Isareli, ka kalele ufendeli wa Yehova, Suku yocili. Ahava kumue lukãi waye Isevele va kala afendeli va Baale, suku yesanda. Kuenje, omanu valua vo ko Isareli, va fetikavo oku fendela Baale. Nasoma Isevele wa kala ongangala, kuenda wa yonguile oku ponda afendeli vosi va Yehova, oku kongelamo Eliya! Ove hẽ, wa kũlĩha eci Eliya a linga?—
Eliya wa tila! Kuenje, wa endele vekalasoko, muna a salama veleva. Ove hẽ, wa kũlĩha esunga lieci a tilila?— Wa tila omo liusumba. Pole, Eliya ka sukilile oku kuata usumba. Momo lie? Momo, wa kũlĩhĩle okuti, Yehova o pondola oku u kuatisa. Yehova wa lekisile ale unene waye ku Eliya, kuenda wa tambuluile ohutililo ya Eliya poku tuma ondalu ya tunda kilu. Omo liaco, Yehova wa kuatisa Eliya!
Yehova wa kuatisa ndati Eliya?
Osimbu Eliya a kala veleva, Yehova wo pula hati: ‘Nye o kasi oku linga veleva?’ Eliya wa tambulula hati: ‘Pokati kafendeli vove, ame lika nda supapo. Ndi kasi likawange, kuenda ndi kuete usumba wokuti va ka ndi ponda.’ Eliya wa simĩle okuti, afendeli vakuavo va Yehova va pondiwa ale. Pole, Yehova wa sapuila Eliya ndoco: ‘Sio, eci haciliko. Handi kuli 7.000 viomanu va kasi oku ndi fendela. Kuata utõi. Ndi kuete upange walua o sukila oku linga!’ Ove hẽ, o sima okuti, eci Eliya a yeva ondaka yaco wa kuata esanju?—
Ulandu wa pita la Eliya u ku longisa nye?— Ku ka sime okuti, o kasi likaliove, kuenje, o kuata usumba. O kuete akamba va sole Yehova, kuenda va ku solevo. Yehova o kuete unene walua, kuenda o ku kuatisa olonjanja viosi! Ove hẽ, o sanjukila oku kũlĩha okuti ku kasi likaliove?—