Sanda Ekuatiso Lia Suku Oco o Kuate Esanju Volohuela

Yehovaa Suku eye wa sokiya olohuela viatete. Embimbiliya li tu sapuila okuti eye wa lulika ukãi watete “yu wo nena kulume.” Adama omo liesanju wa popia hati: “U ekepa liakepa ange, haeye ositu yositu yange.” (Efetikilo 2:22, 23) Toke cilo Yehova o yongola okuti olohueli vi kuata esanju.

Eci o kuela, o sima okuti ovina viosi vi ka enda ciwa volohuela. Ndaño ulume lukãi va lisole calua, va pondola oku kuata ovitangi. (1 Va Korindo 7:28) Vombrochura eyi, o ka sangamo olonumbi Viembimbiliya okuti, nda wa vi kapako, o pondola oku kuata esanju volohuela viove kuenda vepata.—Osamo 19:8-11.

1 TAVA KOCIKELE YEHOVA A KU ĨHA

CECI EMBIMBILIYA LI POPIA: Ulume eye utue wepata.—Va Efeso 5:23.

Nda ove ulume, Yehova o lavoka okuti o tata ciwa ukãi wove. (1 Petulu 3:7) Eye wo lulika ndoñuatisi yove kuenda o yongola okuti u tata lesumbilo kuenda locisola. (Efetikilo 2:18) Ove o sukila oku sola ukãi wove loku pitisa kovaso olonjongole viaye okuti viove ci sule.—Va Efeso 5:25-29.

Nda ove ukãi, Yehova o lavoka okuti o sumbila ulume wove loku u kuatisa oku tẽlisa ocikele caye. (1 Va Korindo 11:3; Va Efeso 5:33) Pokola kolonumbi viaye, kuenda lutima wosi u kuatisa oku tẽlisa olonjila viosi a nõla. (Va Kolosai 3:18) Nda wa cilinga, o ka posoka kovaso aye kuenda ku Yehova.—1 Petulu 3:1-6.

CECI O SUKILA OKU LINGA:

• Pulisa ohueli yove eci o sukila oku linga oco o kale ulume ale ukãi umue uwa. Yevelela lutate kuenda likolisilako oku linga apongoloko

• Kuata epandi. Oku lilongisa ndomo o sanjuisa ohueli yove, cambata otembo

2 OMUNU LOMUNU A KAPEKO OLONJONGOLE VIUKUAVO

CECI EMBIMBILIYA LI POPIA: O sukila oku kapako olonjongole viohueli yove. (Va Filipoi 2:3, 4) Tata ohueli yove ndocina cimue ca velapo loku ivaluka okuti Yehova o kisika afendeli vaye oku “omboka la vosi.” (2 Timoteo 2:24) ‘Olondaka viukãlu via soka ndokutoma kuosipata, elimi liukualondunge puãi li sakula.’ Omo liaco, nõla lutate olondaka viove. (Olosapo 12:18) Espiritu lia Yehova li pondola oku ku kuatisa oku vangula lombembua kuenda locisola.—Va Galatia 5:22, 23; Va Kolosai 4:6.

CECI O SUKILA OKU LINGA:

• Pinga ekuatiso vohutililo oco o yuvule onyeño loku vangula lumbombe osimbu ka wa fetikili oku sapela ovina viesilivilo lahueli yove

• Sokolola lutate ondaka o yongola oku popia kuenda ndomo o yi popia

3 KUATI OVISIMĨLO VIMUAMUE

CECI EMBIMBILIYA LI POPIA: Eci o kuela vu linga “etimba limuamue” lahueli yove. (Mateo 19:5) Pole, vumanu vavali va litepa kuenda vu kuete ovisimĩlo via litepa. Omo liaco, o sukila oku lilongisa oku kuata ovisimĩlo vimuamue, kuenda olonjongole vimuamue. (Va Filipoi 2:2) Oku likuata omunga poku nõla eci u yongala oku linga ci kuete esilivilo. Embimbiliya li popia hati: “Ovina viosi via sokiyiwa vi kolisua.” (Olosapo 20:18) Poku nõla ovina vimue viesilivilo vu yongola oku linga, eceleli oku songuiwa lolonumbi Viembimbiliya.—Olosapo 8:32, 33.

CECI O SUKILA OKU LINGA:

• Ku ka sapuile ño ohueli yove ovisimĩlo viove, pole u situluilavo olonjongole viove

• Osimbu kua tavele kondaka yimue, kũlĩhĩsa ocisimĩlo colohueli yove