ONEPA 7

Ndomo vu Pindisa Omõlene

“Olondaka evi ñasi loku ku sapuila etaili vi kale vutima wove, o longa lavio omãla vove.”—Esinumuĩlo 6:6, 7

Eci Yehova a lulika epata, wa sokiya okuti olonjali vi tata omãla vavo. (Va Kolosai 3:20) Ocikele cene vu lonjali, oku pindisa omãla vene oku sola Yehova oco okuti, eci va linga akulu va kuata olondunge. (2 Timoteo 1:5; 3:15) O sukila oku kũlĩha eci ci kasi vutima womõlove. Omo liaco, ongangu yove yi kuete esilivilo lia velapo. O pondola oku longisa ciwa Ondaka ya Yehova komõlove nda wa kapa tete olondaka viaco vutima wove.—Osamo 40:8.

1 ECELELA OMÕLOVE OCO A SAPELE LOVE

CECI EMBIMBILIYA LI POPIA: “Omunu lomunu a kale lutima woku yevelela, a livale oku popia.” (Tiago 1:19) O yongola okuti omãla vove va lianja oku sapela love. Ovo va sukila oku kũlĩha okuti o va yevelela eci va sukila oku sapela. Vepata mu sukila oku kuata ombembua oco omunu lomunu pokati kavo a ece ovisimĩlo viaye. (Tiago 3:18) Nda ovo va limbuka okuti o tema lonjanga, ale ukuakupisa vakuene, ka va ka situlula ovisimĩlo viavo. Lekisa epandi komãla vove oco va limbuke okuti, o va sole.—Mateo 3:17; 1 Va Korindo 8:1.

CECI O SUKILA OKU LINGA:

Olonjanja viosi va yongola oku sapela love, va yevelela
Sokiya otembo yoku sapela lomãla vene, ku ka ci linge lika eci kuiya ovitangi

2 KUATI ELOMBOLOKO LIECI VA YONGOLA OKU POPIA

CECI EMBIMBILIYA LI POPIA: “U o tava kondaka o sumũlũha.” (Olosapo 16:20) Olonjanja vimue, sanda oku kuata elomboloko liolondaka viomãla vene. Amalẽhe vamue, pamue va siata oku vangula ovina ka va yonguile oku popia, ale vievi ka vi kuete elomboloko liwa. “Nda umue o kumbulula osimbu ka yevele ciwa, wa linga uveke kuenje cu kutisa osõi.” (Olosapo 18:13) Ku ka teme lonjanga.—Olosapo 19:11.

A mother overreacts to what her daughter has said

CECI O SUKILA OKU LINGA:

Ndaño ovina omõlene a kasi oku popia ka vi kuete elomboloko, ku ko tete kondaka
Ivaluka otembo wa kuata utunga wavo, kuenda ovina wa tendele okuti ovio via kuatele esilivilo kokuove

3 LEKISI OKUTI U KUETE OVISIMĨLO VIMUAMUE

CECI EMBIMBILIYA LI POPIA: “Amõlange, tava kalungulo aso, ku ka sinile oku longa kua nyoho.” (Olosapo 1:8) Yehova wa eca ku isia la ina ocikele coku tata omãla. Vu sukila oku longisa omãla vene oku lekisa esumbilo, kuenda oku pokola kokuene. (Va Efeso 6:1-3) Omãla va pondola oku limbuka nda olonjali viavo ka vi likuete “omunga lutima umuamue lolondunge vimuamue.” (1 Va Korindo 1:10) Nda kueya ocitangi cimue, ka vu ka li hoyeli kovaso yomãla vene, momo ci va vetiya oku yuvula oku lekisa esumbilo kukuene.

A father privately disciplines his son while the mother and brother are in the next room

CECI O SUKILA OKU LINGA:

Sapeli loku sokiya ndomo vu pindisa omãla vene
Nda vu kuete ovisimĩlo via litepa vioku pindisa omãla vene, kũlĩhĩsi ovisimĩlo viene

4 LINGI ESOKIYO LIMUE

CECI EMBIMBILIYA LI POPIA: “Pindisa omõla vonjila yo sesamẽla, eci a kula ka yapukamo vali.” (Olosapo 22:6) Oku pindisa ciwa omãla vene ka kuiya ocipikipiki. Vu sukila oku linga esokiyo lioku eca epindiso, oku kongelamo oku longisa omãla vene. (Osamo 127:4; Olosapo 29:17) Voku pindisa omãla vene, ka mua kongelele lika oku va kangisa pole, mua kongela oku va kuatisa oco va kuate elomboloko lieci wa tumbikili ocihandeleko caco. (Olosapo 28:7) Longisivo omãla vene oku sola Ondaka ya Yehova kuenda oku kũlĩha olonumbi viaco. (Osamo 1:2) Nda wa ci lingi, ci ka va kuatisa oku kuata olondunge via pindisiwa.—Va Heveru 5:14.

CECI VU SUKILA OKU LINGA:

Kuatisi omãla vene oku limbuka okuti Suku Omunu kuenda citava okuti ovo va kolela kokuaye
Va kuatisi oku limbuka ovina ka via sungulukile, ca piãla enene ovipama vimue vi sangiwa vo Internet. Va longisa ndomo va pondola oku yuvula vana va kuete ocituwa coku kuata omãla oco va lipekele lavo

A boy is trained by his parents to serve Jehovah, from early childhood until baptism — “Pindisa omõla vonjila yo sesamẽla, eci a kula ka yapukamo vali”