Fendeli Yehova Kumosi Lepata

Ndomo wa lilongisa vombrochura yilo, Vembimbiliya mu sangiwa olonumbi vi ka ku kuatisa ove kumue lepata liove. Yehova o yongola okuti ove o kuata esanju. Eye wa likuminya okuti nda wa pitisa kovaso efendelo liaye, “ovina evi viosi viu vokiyiwi.” (Mateo 6:33) Yehova o yongola okuti, ove o kala ekamba liaye. Sanda apuluvi osi a ku kuatisa oku linga ukamba la Suku. Eli olio esumũlũho lia velapo omunu a pondola oku kuata.—Mateo 22:37, 38.

1 PAMISA UKAMBA WOVE LA YEHOVA

CECI EMBIMBILIYA LI POPIA: “Ndinga Isiene, lene vu linga omãla vange valume lomãla vange vakãi. Oco ca popia [Yehova].” (2 Va Korindo 6:18) Suku o yongola okuti, o kala ekamba liaye lia velapo. Ohutililo yi pondola oku ku kuatisa oku ci linga. Yehova o yongola okuti o kuata “ocituwa coku likutilila.” (1 Va Tesalonike 5:17) Eye o sanjukila oku yevelela ovisimĩlo, kuenda asakalalo ove. (Va Filipoi 4:6) Eci o likutilila kumue lepata liove, ovo va ka limbuka ukamba wocili o kuete la Suku.

Oco o sapele la Suku, ove o sukilavo oku u yevelela. O pondola oku ci linga poku lilongisa Ondaka yaye yi sangiwa Vembimbiliya, kuenda valivulu a sandekiwa locisoko caye. (Osamo 1:1, 2) Sokolola ovina wa lilongisa. (Osamo 77: 11, 12) Voku yevelela Suku mua kongelavo oku endaenda kolohongele Viakristão olonjanja viosi.—Osamo 122:1-4.

Oku sapela lavakuene catiamẽla ku Yehova, ocina ci kuatisavo oku pamisa ukamba wove laye. Nda wa li kolisilako oku ci linga, eye o ka kala ocipepi love.—Mateo 28:19, 20.

CECI U SUKILA OKU LINGA:

• Oloneke viosi sokiya otembo yoku tanga Embimbiliya kuenda oku likutilila

• Kumosi lepata liove, li kolisiliko oku pitisa kovaso ovina viespiritu okuti ovitalukilo kuenda epuyuko ci sule

2 SANJUKILI EFENDELO LIENE LIEPATA

CECI EMBIMBILIYA LI POPIA: “Ameli ku Suku kuenje eye amela kokuene.” (Tiago 4:8) O sukila oku linga esokiyo kuenda oku kuama ulandu waco kefendelo liepata. (Efetikilo 18:19) Kuli ovina vialua vi sukiliwa. Suku o sukila oku panga onepa komuenyo wove eteke leteke. Kuatisa epata liove oku pamisa ukamba wavo la Suku poku vangula lavo catiamẽla kokuaye “eci o tumãla vonjo yove, leci wenda vonjila, lo poku pekela, lo poku pasuka.” (Esinumuĩlo 6:6, 7) Kuata ocimãho ndeci ca Yehosua wa popia hati: “Ame kumue lonjo yange, tu vumba Yehova.”—Yehosua 24:15.

CECI U SUKILA OKU LINGA:

• Linga esokiyo lioku eca epindiso pole kapako ovina omunu lomunu vepata a sukila