Esilivilo Lioku Kala Ukuakuecela

Petulu wa yeva elungulo lia Yesu li lekisa ndomo ku tetuluiwa ovitangi vi pondola oku pita pokati ka vamanji poku seteka oku vi tetulula ovo muẽle. Pole, Petulu o yongola oku kũlĩha etendelo liolonjanja omunu a sukila oku ci linga.

Petulu o pula hati: “A Ñala, olonjanja viñami ngecela manjange eci a ndi lueyela? Olonjanja epanduvali?” Asongui vamue vetavo va siata oku longisa okuti omunu umue o sukila oku ecela olonjanja vitatu. Omo liaco, Petulu o sima okuti poku ecela manjaye “olonjanja epanduvali” nda wa kala ukuesunguluko.—Mateo 18:21.

Pole, ocituwa coku tenda olonjanja omunu vo lueyela, ka ci likuata lelongiso lia Yesu. Omo liaco, Yesu o pisa Petulu hati: “Si ku sapuila okuti olonjanja epanduvali, pole, 77 kolonjanja.” (Mateo 18:22) Volondaka vikuavo ci lomboloka okuti omunu o sukila oku ecela otembo yosi. Ka kuli etendelo limue lia suapo li lekisa olonjanja Petulu a sukila oku ecela manjaye.

Noke Yesu o tukula olusapo lumue ku Petulu kuenda komanu vakuavo oco a lombolole esilivilo lioku kala vakuakuecela. Olusapo luaco, luatiamẽla kupika umue ka setukula ongangu ya cime caye coku lekisa ohenda. Soma o yongola okuti apika vaye va feta olofuka va kuete. Upika umue o kuete ofuka yinene yi tẽla 10.000 kolotalendo okuti (60.000.000 kolodenariu) kuenje o tualiwa ku soma. Upika ka kuete epondolo lioku feta ofuka yaco. Kuenje soma o tuma okuti upika, lukãi waye kuenda omãla vaye, va landisiwa oco ku fetiwe ofuka. Omo liaco, upika o kekamẽla kolomãhi via cime caye loku livondela hati: “Pandikisa ño lame, ndi ka ku feta ovina viosi.”—Mateo 18:26.

Soma o kuatela ohenda upika kuenje ecela ofuka yaye. Noke upika o sanga upika ukuavo una wo levala 100 kolodenariu. Upika waco o kuata upika ukuavo kuenje o fetika oku u leka ekõle loku u sapuila hati: “Feta eci wa levala.” Pole, upika waco, u kekamẽla kuenda u livondela hati: “Pandikisa ño lame, ndi ka ku feta ofuka [ñasi layo].” (Mateo 18:28, 29) Pole, upika una wa eceliwa la soma, ka setukula ocituwa ciwa ca cime caye. Eye o tuma okuti upika una wo levala citito, o kapiwa vokayike toke eci a feta ofuka yaye.

Omo liaco, Yesu o popia okuti apika vakuavo va mola ndomo upika wa levalele soma ka lekisa ohenda kupika ukuavo kuenje va ci sapuila cime cavo. Noke ci temisa calua cime kuenje eye o tuma oku vilikiya upika waco. Soma u sapuila hati: “Wukuenje umue ũvi, nda ecela olofuka viove viosi eci wa livondelele kokuange. Ku pondola hẽ oku kuatelavo ohenda upika lukuele ndeci nda ku kuatelavo ohenda?” Omo okuti Soma wa tema calua, o kapa upika ũvi vokayike toke eci a feta ovina viosi a levalele. Yesu o malusula olusapo luaye ndoco: “Cimuamue haico Isiange o kasi kilu a ka linga lene nda omunu lomunu pokati kene ka ecela manjaye lutima wosi.”—Mateo 18:32-35.

Ocili okuti eyi ongangu yimue yiwa yoku ecela! Suku wa tu ecela ofuka yimue yinene okuti, akandu etu. Akandu osi manjetu Ukristão a tu lingila, atito calua oku a sokisa lakandu tu lingila Yehova Suku. Yehova ka tu ecela lika onjanja yimosi, pole, o tu ecela olonjanja vialua. Anga hẽ ka tu pondolavo oku ecela vamanjetu olonjanja vialua, ndaño tu kuete esunga? Vohundo Yesu a lingila Komunda wa longisa okuti, Suku ‘ecela akandu etu, ndeci tu ecaila ava va tu lueyela.’—Mateo 6:12.