Helie Isiavo—avirahama Ale Eliapu?

Yesu handi o kasi vo Yerusalãi Kocipito Colosinge (ale Colombalaka) kuenda amamako oku longisa ocili. Vamue pokati ka va Yudea okuti va kasi pocipito caco, va popia vati: “Etu [tucitumbulukila ca] Avirahama kuenda ka tua la kala apika vomunu umue.” Yesu o va tambulula hati: “Nda kũlĩha okuti vucitumbulukila ca Avirahama. Pole, vu yongola oku njipa, momo ka vu tava kalongiso ange. Mopia ovina nda mola eci nda kala la Isiange, puãi ene vu linga ovina wa yevi ku isiene.”—Yoano 8:33, 37, 38.

Yesu o yongola oku popia okuti Isiaye ha umuamueko la isiavo. Va Yudea ka va kuata elomboloko liolondaka viaco kuenje va popia vali vati: “Isietu Avirahama.” (Yoano 8:39; Isaya 41:8) Ocili okuti, ovo ovitumbulukila via Avirahama. Omo liaco, va sima okuti va kuete ekolelo limuamue ndeli lia Avirahama, una wa kala ekamba lia Suku.

Yesu eca etambululo limue li va temisa poku popia hati: ‘Nda wa kaili omãla va Avirahama nda vu lingainga ovina via Avirahama.’ Ocili okuti omõla umue wocili, o setukula ongangu ya isiaye. Omo liaco, Yesu amisako ndoco: “Pole, vu yongola oku njipa, ame ndo sapuili ocili nda yeva ku Suku. Avirahama hacoko a lingile.” Noke Yesu o popia olondaka vimue via tatama hati: “Ene vu linga ovilinga via isiene.”—Yoano 8:39-41.

Va Yudea handi ka va kuete elomboloko liomunu Yesu a kasi oku popia. Ovo va popia okuti omãla vocili poku tambulula vati: “Ka tua citiwile vukahonga; tu kuete Isietu umuamue, okuti Suku.”Anga hẽ Suku eye muẽle Isiavo? Yesu o popia hati: “Nda Suku wa kaile Isiene nda wa ndi soli, momo nda tunda ku Suku kuenje ñasi palo. Sieyile locipango cange muẽle, pole Eye, eye wa numa.” Omo liaco, Yesu o linga epulilo limue okuti eye muẽle o li tambulula hati: “Momo lie ka vu kuetele elomboloko lieci mopia? Momo ka vu tẽla oku yeva ondaka yange.”—Yoano 8:41-43.

Yesu o lekisa ohele yi tundilila koku u likala. Pole, cilo o popia lonjila yimue yi teta onimbu hati: “Ene wa tundi ku isiene Eliapu, oco vu yonguila oku linga ocipango ca isiene.” Nye tua kũlĩha catiamẽla ku isiavo? Yesu o situlula ndomo isiavo a tuwa poku popia hati: “Eye omondi tunde kefetikilo, [kuenda] ka pandikisile vocili.” Yesu amisako ndoco: “U wa tiamẽla ku Suku, o yeva ondaka ya Suku. Ene ka vu [yi] yevi omo ka wa tiamẽli ku Suku.”—Yoano 8:44, 47.

Olondaka evi vi temisa calua va Yudea kuenje va popia vati: “Ka tua popele ocili eci tua popia tuti, ‘Ove vu Samaria kuenda o kuete ondele’?” Va Yudea poku tukula Yesu hati u “Samaria,” va lekisa etombo kokuaye. Pole, Yesu ka kapiko etombo liaco kuenje o va tambulula hati: “Si kuete ondele, pole nda sumbila Isiange, puãi ene ka wa ndi sumbili.” Tu limbuka esilivilo liolondaka viaco kohuminyo yi komõhisa a linga yokuti: “Nda umue o pokola [kolondaka viange], ka fi.” Yesu ka kasi loku popia okuti ovapostolo kuenda omanu vakuavo vana va kasi oku u kuama, lalimue eteke va ka fa. Pole, o kasi oku popia okuti ka va ka mola eyõleho ka li pui, “oku fa kuavali” okuti ka va kuata elavoko liepinduko.—Yoano 8:48-51; Esituluilo 21:8.

Pole, va Yudea ka va kuata elomboloko liolondaka via Yesu vupopi wocindekaise kuenje va popia vati: “Kaliye tua limbuka okuti o kuete ondele. Avirahama wa fa kuenda ovaprofeto, puãi o popia huti, ‘Nda umue o pokola kolondaka viange, ka fi.’ Anga wa velapo isietu Avirahama, una wa fa? . . . Ove o sima okuti ove elie?”—Yoano 8:52, 53.

Ocili okuti Yesu o kasi oku popia kueci catiamẽla koku kala Mesiya. Eye ka eci etambululo li teta onimbu, pole, o popia hati: “Nda ndi li muisa ame muẽle ulamba, ulamba wange hacimueko. Isiange eye o muisa ulamba, una vu tukula okuti Suku yene. Lopo ka wo kũlĩhĩli, puãi ame ndo kũlĩha. Nda nda popele okuti sio kũlĩhĩle, nda ndi hembi ndene.”—Yoano 8:54, 55.

Noke Yesu o tukula vali ongangu yiwa ya kukululu yavo ukuekolelo hati: “Avirahama isiene wa sanjukile calua omo lielavoko lioku mola eteke liange, wa li mola kuenje wa li sanjukila.” Avirahama wa kolelele kohuminyo ya Suku kuenje wa talamẽla loku lavoko okuiya kua Mesiya. Va Yudea ka va tava kolondaka viaco kuenje vo sapuila vati: “Ove ku kuete 50 kanyamo, lopo Avirahama wo mola?” Yesu o tambulula hati: “Ocili ndu sapuili siti, osimbu Avirahama ka citiwile ame nda kala ale komuenyo.” Yesu o kasi oku popia catiamẽla komuenyo waye kilu ndungelo umue ukuonene.—Yoano 8:56-58.

Olondaka via Yesu viokuti, osimbu Avirahama ka citiwile eye wa kala ale komuenyo, vi temisa calua va Yudea va yongola oku u sosola lovawe. Pole, Yesu o tila okuti ka vo lemẽha.