Ukanda Wosungu Yolombangi Via Yehova
A manji wa soliwa:
Ndomo wa ci kũlĩha, Embimbiliya elivulu limue linene li lombolola ovina viatiamẽla komanu. Kua kala alume lakãi valua vakuekolelo va liyakavo lovitangi ndevi vietu. Ovo va kuata ‘ovituwa ndetu.’ (Tiago 5:17) Vamue va lemelelelue omo liovitangi kuenda asakalalo. Vakuavo va sumuisiwa la umue ukuepata ale manji vekongelo. Kulivo valua va livetela evelo omo liakulueya avo muẽle.
Anga omanu vaco va liwekapo muẽle oku vumba Yehova? Sio. Valua va kala ndukualosamo wa likutilila hati: “Nda tungayala ndomeme ya nyelela. Sandiliya ukuenje wove, momo si ivalako ovihandeleko viove.” (Osamo 119:176) Anga hẽ o sangiwavo vekalo ndeli?
Yehova lalimue eteke a ivalako afendeli vaye va tunda vocunda. Pole, eye o va sandiliya kuenda o ci linga lekuatiso liafendeli vaye vakuavo. Kũlĩhĩsa ndomo Yehova a kuatisa ukuenje waye Yovi, una wa liyaka lovitangi vialua, oku kongelamo ekambo liolombongo, olofa via vakuepata liaye, kuenda oku vela kua piãla. Yovi wa liyakavo lolondaka vi sumuisa via vana nda vo lembeleka. Pole, ka liwekelepo oku vumba Yehova, ndaño okuti okatembo kamue wa kuatele ovisimĩlo ka via sungulukile. (Yovi 1:22; 2:10) Yehova wa kuatisa ndati Yovi oku kuata ovisimĩlo via sunguluka?
Onjila yimue Yehova a kuatisa Yovi, vonduko yufendeli umue o tukuiwa Elihu. Eci Yovi a lombolola ovisimĩlo viaye, Elihu wa yevelela lutate kuenje wa vetiyiwa oku vangula. Nye eye a popia? Anga hẽ wa pisa Yovi ale wo kokisa oku sima okuti wa kuatele eko loku u kutisa osõi? Anga Elihu wa litendele okuti wa velapo, Yovi o sule? Hacoko a linga! Elihu wa vetiyiwa lespiritu lia Suku kuenje wa popia hati: “Ku Suku love lame tua lisoka. Lamevo nda munyuiwa kotuma ndove.” Noke wa kolisa Yovi hati: “Ñolele, ku ka njokokele, siu ku sindi enene.” (Yovi 33:6, 7) Elihu ka vokiyile ocilemo ku Yovi, pole, locisola wa eca elungulo kuenda elembeleko Yovi a sukilile.
Ombrochura yilo tua yi pongiyavo locimãho cimuamue. Tete tua yevelela lutate, noke tua kũlĩhĩsa ovitangi kuenda olondaka via valua va tunda vocunda. (Olosapo 18:13) Noke tua kũlĩhĩsa Ovisonehua, kuenje lolohutililo tua konomuisa ovolandu amue ndomo Yehova a kuatisa afendeli vaye kosimbu va liyakavo lovitangi ndevi. Oku sulako, tua sokisa ovolandu Ovisonehua lovolandu o koloneke vilo, oco tu pongiye ombrochura yilo. Lesanju lialua tu ku laleka oku yi konomuisa. Tu ku kuetele ocisola cocili.
Osungu Yolombangi Via Yehova