Adama la Eva ka va Pokuile ku Suku

Eteke limue eci Eva a kala lika liaye, onyõha yimue ya sapela laye. Oyo ya popia yiti: ‘Ocili Suku wa popia hati, ko ka li koviti viosi vio vocumbo?’ Eva wa tambulula hati: ‘Etu tu pondola oku lia kapako oviti viosi vio vocumbo te lika uti umosi owo okuti ka ci tava oku liako. Nda tua lia kepako liuti waco, tu fa.’ Onyõha ya popia yiti: ‘Oku fa ka vu fi. Momo nda wa li kuti waco, vu kala nda Suku.’ Anga hẽ olondaka viaco viocili? Sio, viuhembi. Pole, Eva wa tava kolondaka viaco. Osimbu Eva a kala oku vanja kepako, wa kuata onjongole yoku lia kepako liaco. Eva wa lia kepako kuenje wa li ecavo ku Adama. Adama wa kũlĩhĩle okuti wa laikele oku fa nda ka pokuile ku Suku. Pole, eye wa liavo kepako liaco.

Noke Yehova wa sapela la Adama kuenda Eva. Eye wa va pula esunga lieci ka va pokuilile kokuaye. Eva wa lundila onyõha kuenda Adama wa lundila Eva. Omo okuti Adama la Eva va lekisa esino, Yehova wa va tundisa vocumbo. Oco Yehova a lekise okuti lalimue eteke va ka tiukila vocumbo, wa kapa ovangelo kuenda osipata yondalu koku iñilila.

Yehova wa popia okuti una wa kemba Eva o sukilavo oku yambuiwa. Pole, onyõha hayoko ya sapela la Eva. Yehova ka lulikile olonyõha oco vi vangule. Ungelo ũvi eye wa lingisa okuti onyõha yi vangula. Eye wa ci lingila oco a seteke Eva. Ungelo waco o tukuiwa hati, Satana Eliapu. Kovaso yoloneke Yehova o ka kundula Satana oco ka ka yapuise vali omanu koku linga ovina vĩvi.