Omanu Ecelãlã va Popeliwa Oco va Kale Voluali Lumue ka Muli Olondingaĩvi

Noha kumue lepata liaye kuenda ovinyama va iñila vocimbaluku. Yehova wa yika epito kuenje ombela ya fetika oku loka. Ombela ya loka calua okuti ocimbaluku ca fetika oku telela kilu liovava. Omo liaco, ongongo yosi yeyukile lovava. Omanu vosi okuti olondingaĩvi vana va kala kosamua yocimbaluku, va fa. Pole, Noha kumue lepata liaye va popeliwa. O pondola hẽ oku sokolola esanju ovo va yeva vutima omo lioku pokola ku Yehova?

Ombela ya loka eci ci soka 40 kovotanya kuenda 40 kovoteke noke ya liwekapo oku loka. Ovava a fetika oku tepuluka kamue kamue. Kuenje ocimbaluku ca saka kolomunda. Pole, handi kua kala ovava amue kolonepa viosi viongongo kuenje Noha kumue lepata liaye ka va ponduile oku tunda vocimbaluku.

Kamue kamue, ovava a takata. Noha kumue lepata liaye va kala vocimbaluku eci ci pitahãla unyamo umosi. Noke Yehova wa va sapuila oco va tunde vocimbaluku okuti, va kala voluali lumue ka muli olondingaĩvi. Ovo va eca olopandu ku Yehova omo a va popela ketande kuenda va ci lekisila poku eca ocilumba cimue kokuaye.

Yehova wa sanjukila calua ocilumba caco. Eye wa likuminya okuti lalimue eteke a ka kundula vali ovina vi sangiwa vongongo letande. Yehova wa lekisa ondimbukiso yohuminyo yaco, poku lekisa kilu olukongolo onjanja yatete. Ove hẽ wa muile ale olukongolo?

Noke Yehova wa sapuila Noha kumue lepata liaye oco va cite omãla kuenda oku yukisa oluali.