Ocimbulu ca Baliame ci Vangula

Va Isareli va kala vekalasoko ci soka 40 kanyamo. Ovo va yula alupale alua a pama. Omo okuti va tunga ovilombo kanyala a Moavi kutundilo Wolui Yordão, ya kala otembo yoku iñila Vofeka Yohuminyo. Balaka soma yo Moavi, wa kuatele usumba wokuti va Isareli va tambula ofeka yaye. Kuenje wa laleka ulume umue o tukuiwa hati, Baliame oco a ende ko Moavi oku siñala va Isareli.

Pole, Yehova wa sapuila Baliame hati: ‘Ku ka siñale va Isareli.’ Kuenje Baliame wa likala oku enda. Soma Balaka wo laleka vali onjanja yavali kuenda wa likuminya oku wĩha ovina viosi eye a yongola. Lopo Baliame wa likala epingilo liaco. Omo liaco, Suku wa popia hati: ‘Kuende, pole, ondaka mopia love oyo lika o vangula.’

Baliame wa tikula ocimbulu caye kuenje wa enda kombuelo yo Moavi. Eye wa sokiya oku siñala va Isareli ndaño okuti Yehova wo sapuila oco ka ka ci linge. Ungelo wa Yehova wa molẽha vonjila olonjanja vitatu. Baliame ka tẽlele oku mola ungelo, pole, ocimbulu caye ca mola ungelo. Tete ocimbulu ca tunda vonjila kuenje ca yapukila vusenge. Noke ocimbulu ca likuanga vocimbaka kuenje ca punyula omãhi ya Baliame kocimbaka caco. Oku sulako, ocimbulu ca kupukila posi vokati konjila. Olonjanja viaco vitatu, Baliame wa veta ocimbulu lombueti.

Noke yonjanja yatatu, Yehova wa ecelela okuti ocimbulu ci vangula. Ocimbulu ca pula Baliame citi: ‘Momo lie o kasilili oku amamako oku ndi veta?’ Baliame wa kumbulula hati: ‘Momo wa nomba. Nda nda kaile losipata peka nda nda ku ponda.’ Ocimbulu ca kumbulula citi: ‘Nda ku ambataile anyamo alua. Nda ku ci lingile ale?’

Kuenje Yehova wa ecelela okuti Baliame o mola ungelo. Ungelo wa popia hati: ‘Yehova wa ku lungula oco ku ka siñale va Isareli.’ Baliame wa tambulula hati: ‘Nda linga ekandu. Kaliye ndi tiukila konjo.’ Pole, ungelo wa popia hati: ‘Citava oku enda ko Moavi, pole, ondaka Yehova a vangula love oyo lika o popia.’

Anga hẽ Baliame wa lilongisila kulandu owu? Sio. Noke Baliame wa seteka oku siñala va Isareli olonjanja vitatu, pole, olonjanja viosi Yehova wa lingisa okuti Baliame o sumũlũisa va Isareli. Oku sulako va Isareli va liyaka la va Moavi kuenje Baliame wa pondiwa. Anga hẽ nda Baliame wa pokuile ku Yehova konjanja yatete nda ka kuatisiwile?