Paulu o Tumiwa ko Roma

Ungende watatu wa Paulu woku kunda wa sulila vo Yerusalãi. Volupale luaco eye wa kuatiwa kuenje wa kapiwa vokayike. Vokuenda kuteke, vocinjonde cimue Yesu wo sapuila hati: ‘Ove enda ko Roma kuenje oko o ka kundila.’ Paulu wopiwa ko Yerusalãi kuenje wa tualiwa ko Kaisarea kuna a kala anyamo avali vokayike. Eci a kala oku sombisiwa kovaso a nguluvulu Festo, Paulu wa popia hati: ‘Ngecelele oku sombisiwa la Kaisare, ko Roma.’ Festo wa popia hati: “Omo wa tukula Kaisare; wenda ku Kaisare.” Paulu wa kapiwa vonaviyu oco ambatiwe ko Roma kuenda vamanji vavali Akristão okuti Luka la Aristarko va enda kumue laye.

Vokalunga, va tatekiwa lehunguhungu limue linene liofela, lia kala vokuenda kuoloneke vialua. Omanu vosi va kala oku sima okuti va laika oku fa. Pole, Paulu wa popia hati: ‘Ene alume, ungelo umue wa ndi sapuila vonjoi yimue hati: “Ku ka kuate usumba, a Paulu. Ove o ka pitĩla ko Roma kuenda omanu vosi va kasi oku endela kumue love vonaviyu ka va fi.” Omo liaco, kuati utõi! Ka tu fi.’

Ehunguhungu lia kala eci ci soka 14 koloneke. Noke ongongo ya molẽha. Ca kala kocifuka co ko Melita. Onaviyu ya saka okuti ka yi lisengi kuenda ya teka teka, pole, ci soka 276 komanu va kala vonaviyu, va pitĩla ciwa kongongo. Vamue va liteva kuenda vakuavo va kuatelela kovikuata vionaviyu kuenje vosi va pitĩla kongongo. Omanu ko Melita va va kuatisa kuenda va va siakalẽla ondalu oco va yote.

Noke yolosãi vitatu, asualali vambata Paulu ko Roma lonaviyu yikuavo. Eci a pitila, vamanji veya oku lisanga laye. Kuenje Paulu poku mola vamanji, wa pandula Yehova kuenda wa kuata utõi. Ndaño okuti Paulu wa kala omandekua, pole, vo wecelela okuti o kala konjo yimue ya lukaliwa osimbu a laviwa lesualali limue. Eye wa kala konjo yaco ci soka anyamo avali. Omanu va enda oku iya kokuaye kuenje wa enda oku va kundila Usoma wa Suku loku va longisa ovina viatiamẽla ku Yesu. Paulu wa sonehelavo ovikanda kakongelo o ko Asia Menor kuenda o ko Yudea. Ocili okuti Yehova wa vetiya Paulu oku sandeka olondaka viwa ku vakualofeka.