Esituluilo ku Yoano

Eci Upostolo Yoano a kala vokayike vocifuka co Patmo, Yesu wo lekisa ovinjonde ale ovisetahãi vi soka 16 viovina via laikele oku pita kovaso yoloneke. Ovinjonde viaco via situlula ndomo onduko ya Yehova ya laikele oku sumbiwa, ndomo Usoma waye wa laikele oku iya kuenda ndomo ocipango caye ca laikele oku lingiwa posi ndeci ci lingiwa kilu.

Vocinjonde cimue, Yoano wa mola Yehova kocalo caye culamba kilu okuti, wa ñualiwa leci ci soka 24 kakulu va wala uwalo u yela kuenda kovitue viavo kua kala akolowa ulu. Kocalo kua tunda oviliakulo kuenda ovileñi viovilemĩlo. Ci soka 24 kakulu va kekamẽla Yehova kuenje vo fendela. Vocinjonde cikuavo, Yoano wa mola owiñi wakahandangala wa vana va fendela Yehova okuti wa tunda kolofeka viosi, komanu vosi kuenda kalimi osi. Kameme okuti Yesu wa linga ungombo wavo kuenda o va songuila kovava omuenyo. Noke vocinjonde cikuavo, Yesu wa fetika oku viala Ndosoma kilu leci ci soka 24 kakulu. Vocinjonde ca kuamamo, Yoano wa mola Yesu okuti, o kasi oku liyaka locinyoha okuti Satana kumue lolondele viaye. Yesu wa va tundisa kilu kuenje wa va imba palo posi.

Noke Yoano wa mola ocisetahãi cimue ca fina ca Kameme kumue leci ci soka 144.000 okuti va tãi Komunda Siono. Eye wa molavo ungelo umue wa kala oku palãla vokati kilu lieve okuti, wa kala oku sapuila komanu oco va sumbile Suku loku eca Kokuaye ulamba.

Vocinjonde cikuavo, uyaki wo Harmagedo u kasi oku lingiwa. Vokuenda kuyaki waco, Yesu lolohoka viaye va kasi oku yula oluali lua vĩha lua Satana. Vocinjonde ca sulako, Yoano wa mola elitokeko lia lipua li sangiwa kilu kuenda palo posi. Satana kumue locitumbulukila caye vosi va kunduiwa. Ci kale oko kilu, ci kale omanu palo posi vosi va kasi oku tenda onduko ya Yehova okuti yi kola kuenda va fendela lika eye.