A Vamanji wa Soliwi

Dear Fellow Believers:

Omo okuti tuafendeli va Yehova, tu sole Ondaka yaye Embimbiliya. Tua kolela okuti Vembimbiliya mu sangiwa ovolandu asuapo, olonumbi vi songuila omuenyo kuenda uvangi wocisola Yehova a kuetele epata liomanu. (Osamo 119:105; Luka 1:3; 1 Yoano 4:19) Tu yongola oku kuatisa lutima wosi omanu, oco va lilongise ocili ci sangiwa Vondaka ya Suku. Omo liaco, tua sanjuka calua oku sandeka elivulu lilo losapi hati: “Ovolandu o Pondola Oku Lilongisa Vembimbiliya.” Eceleli okuti, tu lombolola ovina vimue viatiamẽla kelivulu lilo.

Onepa yalua yelivulu lilo, ya pongiyiwila oku kuatisa omãla. Pole, olio li pondolavo oku kuatisa akulu vana va yongola oku lilongisa ovina vialua viatiamẽla Kembimbiliya. Omo okuti Embimbiliya elivulu limue li tiamisiwila komanu vosi, tua kolela okuti vosi yetu tu ka vetiyiwa lovolandu a pondola oku tu kuatisa oku kuata esanju liocili.

Poku kuama asapulo a sangiwa Vembimbiliya, elivulu lilo li lombolola eci catiamẽla kovolandu apata omanu tunde kefetikilo lioku lulikiwa kuoluali. Kua lingiwa alikolisilo alua oco ovolandu Embimbiliya a lomboluiwe lonjila yimue ya suapo, ya leluka kuenda ndomo ovolandu aco a likuãi.

Elivulu lilo, ka li lombolola lika ovolandu Embimbiliya, pole, mu sangiwavo atosi akuavo. Ovolandu kuenda oviluvialuvia viaco, via pongiyiwa lonjila yimue okuti vieca elomboloko liwa liovolandu Embimbiliya kuenda ekalo liomanu va tukuiwa.

Elivulu lilo, li tu kuatisa oku limbuka okuti Embimbiliya elivulu limue li lombolola eci catiamẽla komanu vana va pokola ku Yehova kuenda vana ka va pokuile. Kuenje eci ci tu vetiya oku lilongisila kovolandu avo. (Va Roma 15:4; 1 Va Korindo 10:6) Elivulu lilo, lia tepiwa volonepa vi soka 14. Kefetikilo lionepa lonepa, ku sangiwa elomboluilo liovolandu amue tu pondola oku lilongisa.

Nda ove unjali, o sukila oku tanga ulandu umue lomõlove kuenda oku sapela laye eci catiamẽla koviluvialuvia. Noke kavali kene vu pondola oku tanga ovisonehua Viembimbiliya vi sangiwa vulandu waco. Kuatisa omõlove ulume ale ukãi oco a sokise ovina a tanga Vembimbiliya lulandu u sangiwa velivulu. Cimuamue haico o sukila oku linga lomunu umue okuti ukulu, oco u kuatise oku kuata elomboloko liwa liesapulo Liembimbiliya.

Tu lavoka okuti elivulu lilo, li ka kuatisa vosi vakuavitima via sunguluka, amalẽhe lakulu oco va lilongise Ondaka ya Suku kuenda oku kapako ovolandu aco. Kuenje ovo va pondolavo oku fendela Yehova loku tiamẽla kepata liaye li soliwe.