Longisa Lundunguluke Kuenda Luloño Wokutavisa

“Utima wukualondunge u longaisa omẽla waye, ho vokiya uloño [“wokutavisa NW”] kolondaka viaye.”−OLOSAPO 16:23.

1. Momo lie vokulongisa Ondaka ya Suku mukongelela calua okuti hokupitiyako lika ondaka?

OCIMÃHO cetu tualongisi Vondaka ya Suku hokumihilako lika olondunge violondonge vietu puãi okumihilavo ovitima viavo. (Va Efeso 1:18) Omo liaco, vokulongisa mukongela calua, hokupitiyako lika ondaka. Elivulu Liolosapo 16:23 liti: “Utima wukualondunge u longaisa omẽla waye, ho vokiya uloño [“wokutavisa, NW”] kolondaka viaye.”

2. (a) Nye cilomboloka okutavisa? (b) Citava ndati okuti Akristão vosi vakala alongisi vakuete uloño wokutavisa?

² Upostolo Paulu wakapeleko ocisonehua eci kupange waye wokulongsia. Eci eye akala ko Korindo, “asambata osi wa longaisaila vosunangonga, kuenje, . . . wa tavisa va Yudea la va Helasi.” (Ovilinga 18:4) Ndomo umue mbiali apopia, ondaka yo Helasi palo yapongoluiwa “okutavisa” yilomboloka “okunena limue epongoloko kovisimilo lokuvetiyiwa lalomboluilo alekisa esunga ale ukulihiso weko.” Lalomboluilo, atavisa, Paulu wapondola okuvetiya omanu okupongolola ovisimilo viavo viñi viñi. Uloño waye wokutavisa wapiãlele cocili okuti anyali vaye vaenda lokukuatela usumba.

Kala Onjeveleli Yiwa

3. Momo lie undunguluke usukiliwila calua eci tulongisa vakuetu, kuenda ndamupi tupondola okuveta kutima wondonge yikasi okulilongisa Embimbiliya?

³ Uloño watete wokulongisa, okuyevelela,hakuvangulako. Ndomo tuamõla kelivulu Liolosapo 16:23, oco tukale vakuoloño wokutavisa te tuakuata undunguluke. Yesu wakala ondunguluke lomanu aenda lokulongisa. Ocisonehua ca Yoano 2:25 cilombolola hati: “Eye muẽle wa kulih[ile] eci ci kasi vutima womunu.” Pole, ndamupi etu tupondola okukuliha eci cikasi vovitima viava tukasi okulongisa? Yimue onjila okukala onjeveleli yiwa. Tiago 1:19 hati: ‘Omunu omunu a kale ukuanjanga koku yevelela, puãi a livale koku popia.’ Ocili okuti, omanu havosiko valombolola ovisimilo viavo lulelu. Pole, eci olondonge vietu tukasi okulongisa Embimbiliya vilimbuka okuti tuvakuetele onjongole yokusapula ovisimilo viavo. Pole apulilo api hẽ okukulihisa apondola okutukuatisa okuveta kutima kuenda “[ok]upamo olondaka viavo.”−Olosapo 20:5.

4. Momo lie akulu vekongelo Akristão vasukilila okukala olonjeveleli viwa?

⁴ Capiãla enene Akristão okuti akulu vekongelo vasukila okukala olonjeveleli viwa. Oco lika vapondola ‘okukuliha ndomo va kumbulula ciwa omunu lomunu.’ (Va Kolosai 4:6) Elivulu Liolosapo 18:13 lilungula hati: “Nda umue o kumbulula osimbu ka yevele ciwa, wa linga uveke kuenje cu kutisa osõi.” Vamanji vamue vavali alume onjanja yimue vaeca alungulo lovisimilo viwa ku manji umue ukãi omo okuti walañele kolohongele vimue. Manji cosumuisile calua omo okuti ovo kavopulile momo lie eye akambelelele. Eye wakala lokutunda ndopo vokukaya kuopelasãu. Omo liaco, cikuete esilivilo liocili okuti, osimbu handi katuaecele elungulo, tuyevelela tete!

5. Akulu vekongelo vasukila okutetulula ndati olonamãlala viya pokati kavamanji?

⁵ Kakulu vekongelo, vokulongisa olonjanja vialua mukongela okueca alungulo ku vakuavo. Konepa eyi layovo, cisilivila cocili okukala onjeveleli yiwa. Okuyevelela kusukiliwa calua enene eci peya olonamãlala pokati Kakristão. Noke yokuyevelela, oco lika akulu vekongelo vapondola okusetukula ‘Isietu otetuluila vosi omunu omunu ndovilinga viaye, okuti ka kuete ocame.’ (1 Petulu 1:17) Eci peya olonamãlala viaco, okulihoyisa kuasiata okupiãla, kuenje ukulu wekongelo osukila okuivaluka elungulo lisangiwa kelivulu Liolosapo 18:17 liti: “U wa livanga londaka yaye o mõlẽhaa ndukuesunga toke ukuavo iya oku u moñolola.” Ulongisi waloñoloha oyevelela olonepa viaco viosi vivali. Lokulinga ohutililo, eye ovakuatisa okutulumuha kuenda okutumbika ekalo liombembua. (Tiago 3:18) Nda onjuela yapiãla calua, eye citava okuti opinga omunu lomunu pokati kavamanji okuti osuñamisa asakalalo aye kokuaye, kuenje kaecelela okuti kavalikavo valiyuelisa omunu lukuavo. Lokulinga apulilo amue asunguluka, ukulu wekongelo citava okuti otetulula ondaka yaco yikasi okusokiyiwa. Olonjanja vialua okuti kapali uvi laumue, puãi ekambo ño liokulivanguisa lombembua olio lipongoloka ema. Pole nda ovihandeleko Viembimbiliya ovio vialueyiwa, ulongisi ukuacisola citava okuti wayevelela ale olonepa viaco vivali.

Esilivilo Liokuleluisa

6. Paulu la Yesu vaeca ndati ongangu yiwa yokulongisa lulelu?

⁶ Okuleluisa ovina onepa yimue yikuavo yuloño wokulongisa yikuete esilivilo liocili. Ocili, etu tuyongola okuti olondonge Viembimbiliya vikuata “unene woku kulihila kumue lolosandu upati lusovi lokulepa . . . lokulonga” kuocili. (Va Efeso 3:18) Kuli olonepa vimue violondotilina vio Vembimbiliya okuti vialeluka calua pole vimue viatila. (Va Roma 11:33) Haimo, eci Paulu a kundila va Helasi, eye walekisa okuleluka kuondaka ya “Kristu, u wa valeliwa [kuti, NW].” (1 Va Korindo 2:1, 2) Cimuamue haico, Yesu wakunda olondaka vialomboloka havio vivetiya. Eye wavangula upopi umue waleluka Kohundo yaye yo Komunda. Pole, ohundo yaco yikuete vimue pokati kolondaka Vialonga viocili okuti ovio viavelapo pokati kolondaka viosi viapopia ale.−Mateo, okapitulu 5–7.

7. Tupondola okuleluisa ndati ovina eci tusongola alilongiso Embimbiliya?

⁷ Etu tusukilavo okuleluisa ovina eci tulongisa kalilongiso Embimbiliya. Ndamupi? Lokulimbuka “ovina via velapo.” (Va Filipoi 1:10) Eci tulombolola ocipama cimue catila, tusukila okuseteka okucilombolola volondaka vietu muẽle vialeluka. Tusukila okulavulula ovisonehua, vina okuti ovio osapi yondaka okuti katuseteka okutanga kuenda okulombolola atukulo osi ovipama Viembimbiliya atukuiwa velivulu. Eci cisukila okuti te tualipongiya ciwa. Tusukila okuyuvula okuyukisa ondonge lalomboluilo akahandangala, oco okuti katupambuka ño lovina kavikuete esilivilo lialua. Nda okuti ondonge yikuete limue epulilo kaliatiamẽlele kocipama cikasi okulongisiwa, citava okuti lutate walua tupopisa okuti likatambuluiwa eci tumalusula ocipama.

Okulinga Apulilo Asunguluka

8. Yesu walingaile ndati ciwa apulilo?

⁸ Uloño ukuavo wokulongisa okulinga apulilo asunguluka. Yesu Kristu walingaile apulilo olonjanja vialua kokulongisa kukaye. Ndeci, Yesu wapulile Petulu hati: “A Simono, wa soka ndati, olosoma viokilu lieve vi tambola kulie owombo lulambu, komãla vavo muẽle ale, ele komanu vaiñi? Simono wa kumbulula hati, Vi tambola komanu vaiñi. Oco Yesu wa popia laye hati, Ca lomboloka okuti omãla vavo muẽle ka va feti.” (Mateo 17:24–26) Omo okuti Yesu Omõla wongunga wa Una wakala lokufendeliwa vonembele, kakale lekisiska liokufeta elisimu lionembele. Pole Yesu wasapula ocili eci lokulinga apulilo amue asunguluka. Ndoco Yesu wakuatisa Petulu okukkuata elomboloko liasuapo liatiamẽla kalomboluilo eyey akulihile ale.

9. Ndamupi etu tupondola okulinga apulilo vokuenda kualilongisa Embimbiliya?

⁹ Etu citava okuti tulinga apulilo awa vokuenda kualilongiso Embimbiliya. Nda ondonge yaeca etambululo limueokuti halioko, pamue tuyeva ekisika liokuseteka okueca etambululo liasuapo, pole ndoco eye okuata elomboloko? Ciwa okuseteka okutuala ondonge kelomboloko liwa lokulinga apulilo. Ndeci, nda eye okukete ocitangi cokukuata elomboloko lia momo lie eye asukilila oku tukula onduko ya Suku, citava okuti tu u pula ndoco, ‘onduko yove yikuete esilivilo lialua kokuove? . . . Momo lie? . . . Nda waliyeva ndati, nda okuti umue olikala oku kutukula onduko yove? . . . Kacasungulukile hẽ okuti Suku oyongolavo okuti etu tu tukula onduko yaye?’

10. Akulu vekongelo vapondola okulinga ndati apulilo eci vakuatisa omunu lomunu okukete apute esumuo kutima?

¹⁰ Akulu vekongelo citava okuti valingavo ciwa apulilo pokutata olomeme. Vekongelo valua okuti vakukete apute kutima omo lieci oluali lua Satana lu avalinga kuenje vafetika okusima okuti kavasoliwe. Umue ukulu wekongelo citava okuti ovangula lomunu waco okuti: ‘Ndaño ove okasi lokupopia hati oliyevite okuti ukueviho kuenda kusoliwe, Yehova hẽ oliyevite ndati love? Nda okuti Isietu ukuacisola wokilu waecelela Omõlaye oco afe alinge ocilumba cicisembi kokuove, kacilomboloka okuti Suku okusole?’−Yoano 3:16.

11. Apulilo ka a tambuluiwa a lingiwila nye, kuenda citava oku alinga ndati pokulinga ohundo yowiñi?

¹¹ Apulilo Ana okuti ka a tambuluiwa, onepa yimue yikuavo yuloño wokulongisa. Olonjeveleli kavitambulula apulilo ac pole vakuatisiwa okusokolola ondaka yaco. Aprofeto kosiahulu vaenda lokulingaapulilo asoka ndava kolonjeveleli viavo oco va vakuatise okusokolola londongosi. (Yeremiya 18:14, 15) Yesu walingale ciwa apulilo Ana ka a tambuluiwa.(Mateo 11:7–11) Apulilo aco awa calua pokulinga ohundo yowiñi. Ndeci hambi yokupopisa ño olonjeveleli okuti ovov te va vumba Yehova lomuenyo wavo wosi oco vosanjuise, casunguluka vali nda wapula hati, ‘Nda etu katualingile muẽle ocili upange wetu lomuenyo wetu wosi, anga Yehova cusanjuisa?’

12. Esilivilo lie apulilo okukulihisa a kuete?

¹² Apulilo akukulihisa alingiwila okutala nda ondonge Yembimbiliya yitava muẽle kueci yikasi okulilongisa. (Mateo 16:13–16) Ondonge citava okuti yitambulula muẽle ciwa okuti ukahonga ekandu. Puãi momo lie katukuamẽla eci calomboluiwa konano lokulinga apulilo ndeci ava Ndamupi ove oliyeva lovihandeleko via Suku viokukala lovituwa viasunguluka? Osima okuti ovio vikupika ño enene? Opopia okuti kacikuete esilivilo nda tukuama ale katukuama ovihandeleko via Suku?

Alusapo Aveta Kutima

13, 14. (a) Oku ta olusapo luocina cimue cilomboloka nye? (b) Momo lie alusapo awa akuetele esilivilo liocili?

¹³ Onepa yikuavo yokuveta kutima wolonjeveleli kuenda wolondonge Viembimbiliya okulinga alusapo awa. Ondaka yo Helasi yapongoluiwa “alusapo” yilomboloka “okukapa ponele yo ale oku kapa kumosi lo.” Omo liaco eci o ta alusapo, okasi okulombolola cimue ‘lokucikapa ponele yo’ cina cimue calisoka. Ndeci, Yesu wapuala hat: “Usoma wa Suku, tu u sokisa ndati, tu u tela olusapo lue?” Vetambululo, Yesu watukula ombuto yulemba okuti yakulihiwile calua.−Marko 4:30–32.

¹⁴ Aprofeto va Suku valingaile alusapo alua ondongosi. Eci va Asuria, va vumba ndocikuata ca Suku cokuyambula va Isareli, veya okulinga ungangala wapaiãla, Isaya wamõlehisa okulituna kuavo lolusapo olu: “Ondaiviti, hẽ, yi lipandela u o timbula layo? Oselalo hẽ, yi livelisapo okuti u o talavaya layo o sule?” (Isaya 10:15) Eci Yesu alongaisa vakuavo, layevo waenda lokulingaalusapo alua. Kuasapuiwa okuti “ka va longisile cimue, te lalusapo.” (Marko 4:34) Alusapo asunguluka awa momo aveta kolondunge lokutima. Ovo aecelela olonjeveleli okukkuata lonjanga elomboloko lialomboluilo okaliye, lokusokisa alusapo aço lovina vakuliha ale.

15, 16. Nye cilingisa alusapo okukuata vali esilivilo? Lekisa yimue ongangu.

¹⁵ Tupondola ndati okuta alusapo Ana okuti aveta muẽle ocili kutima? Catete, olusapo te lualisoka locina cikasi okulomboluiwa. Nda okuti eci cikasi okusokisiwa kacalisokele leci cikasi okulomboluiwa, olusapo luaco luka talula ño olonjeveleli kavakopako ekuatiso. Yimue ohundi yamia onjanja yimue yaseteka okusokisa okupokolakuolombuavekua ku Yesu Kristu ndokambua kapokola. Anga okusokisa kuaco oku kuokumamõha kuasunguluka muẽle? Embimbiliya lilombolola ocisimilo calisoka leci, polé licilombolola mumue muiñi muasunguluka vali kuenda lilekisa esumbilo. Olio lisokisa 144.000 koloñame via Yesu olombuavekua “ndondombua ya liposuisila veyaye.”−Esituluilo 21:2.

¹⁶ Alusapo akuete vali esilivilo eci alombolola eci catiamẽla komuenyo womanu. Olusapo lua Natana wokameme komange kapondiwa, luaveta kutima wa Soma Daviti omo eye wasolale calua olomeme, kuenda wakala ungombo wolomeme eci akala umãlẽhe. (1 Samuele 16:11–13; 2 Samuele 12:1–7) Nda olusapo luakale luongombe yonui, nda ka luakuatele ño enene esilivilo. Cimuamue haico, alusapo atiamẽla kovoloño ale kalusapo ka a lombolokele ño enene ka akuata enene esilivilo lialua kolonjeveleli vietu. Yesu waenda lokutiamisila alusapo aye komuenyo weteke leteke. Eye wavangowale ovina viasiata ndeci ondiyelo, olonjila kuenda oloneleho. (Mateo 5:15, 16; 6:26, 28) Olonjeveleli via Yesu cavalelukile calua okusapula ovina viaco.

17. (a) Kovina vipi tusukila okutiamisila alusapo etu? (b) Ndamupi tupondola okutiamisila alusapo asangiwa valivulu etu kekalo liondonge yetu?

¹⁷ Vupange wetu wokukunda, tukuete apuluvi alua okulinga alusapo aleluka polé akuate esilivilo liocili. Kala ukuakulavulula. (Ovilinga 17:22, 23) Olusapo citava okuti lutiamisiwila komãla vomunu tukasi okuvangula laye, konjo, kupange, ale kovitalukilo viaye. Ale citava okuti tukuama eci tuakuliha catiamẽla ku ndonge oco tukapeko alusapo asangiwa vocipama cetu celilongiso. Ndeci, tala olusapo luwa lusangiwa kocipama 8 kocinimbu 14 velivulu Ukulihiso Utuala Komuenyo Ko Pui. Owo ulombolola eci catiamẽla kunjali umue ukuacisola olundiliwa la umue ukuavo posongo. Citava okuti tueca cimue ocisimilo cilekisa ndomo olusapo luaco lukapiwako landonge okasi okulilongisa Embimbiliya omo okuti eye layevo onjali.

Okutanga Ovisonehua Leloñoloho

18. Momo lie tusukilila okulikolisilako okukala vakuakutanga ciwa?

¹⁸ Paulu wavetiya Timóteo hati: “Kolisako oku tangela omanu ondaka ya Suku, lokuk kunda, loku longisa.” (1 Timoteo 4:13) Omo okuti Embimbiliya olio ono yalongiso etu, cikuete esilivilo liocili okuti tulitanga ciwa. Va Lewi vakala lesumuluho liokutangela omanu va Suku Ocihandeleko ca Mose. Anga hẽ ovo Vanda loku lilondoka pokutanga ale vatangale locileñi cimue okukti kacipongoloka? Sio, Embimbiliya kelivulu lia Nehemiya 8:8 lilombolola okuti: “Va tanga lutate velivulu liovihandeleko via Suku. Eci va tanga haico va lombolola okuti ci va lomboloka.”

19. Tupondola ndati okumioñolola okuktanga kuetu Ovisonehua?

¹⁹ Vamue Akrisão alume okuti olohundi viamia vasokulueyapo kamue eci vatanga. Vapondola ndati okumioñoloha? Vacilinga lokulikolisilako okulikisa okutanga ciwa. Pokutanga lolukandi olonjanja vialua toke eci vatẽla okucilinga ciwa. Nda okuti kuli olokasete Viembimbiliya viokuyevelela velimi liove, ciwa okuti oyevelela eci u okasi lokutanga akasi okutõlisa ondaka kuenda okuvombisa ondaka pana okuti pasukila okuvombisa olondaka vina okuti kaviasiatele ño enene vitukuiwa. Vana vakuete o Tradução do Novo Mundo velimi liavo citava okuti vopa esilivilo katukulo akuatisa olio likuete.−Isaya 8:1.

20. Ndamupi ‘tulava okulongisa kuetu’?

²⁰ Hesumuluhokuolia etu tumanu va Yehova tukuete liokukala alongisi! Omo liaco omunu lomunu pokati ketu akuate ocikele eci lombili yocili. ‘Loku lilava etu muẽle kuenda okulavavo okulongisa kuetu.’ (1 Timoteo 4:16) Etu citava okuti tukala alongisi vawa lokukkala olonjeveleli viwa, lokulelula ovina, lokulinga apulilo asunguluka, loku ta alusapo akuete esilivilo liocili, kuenda lokutanga ovisonehua leloñoloho. Vosi yetu tusukila okupa ekuatiso kelongiso likasi okukeciwa la Yehova pokati kocisoko caye, momo olio litukuatisa okukuata “elimi liuloño.” (Isaya 50:4) Lokupa ekuatiso liocili kovimãleho viosi viasiata okupangiwila upange wetu, ndeci olombrochura, olokasete viokuyevelela, olokasete viokutala, etu tukalilongisa okulongisa lundunguluke kuenda luloño wokutavisa.

Ove Ocivaluka?

◻ Okukala onjeveleli yiwa kutukuatisa ndati kokulongisa kuete?

◻ Tupondola okusetukula ndati Paulu la Yesu kokulongisa lulelu?

◻ Apulilo api tupondola okulinga eci tulongisa vakuetu?

◻ Etu tua kuakutangela powiñi tupondola ndati okumioñolola okutanga kuetu?

[Elitalatu kemela 15]

Ulongisi uwa oyevelela tete oco apondole okukuata undunguluke

[Elitalatu kemela 16]

Yesu waenda lokutiamisila alusapo aye komuenyo weteke leteke