Ndomo Yehova Atusonguila

“Songuile vonjila ya tapika.”−OSAMO 27:11.

1, 2. (a) Oloneke vilo hẽ ndamupi Yehova akasi loku songuila omanu vaye? (b) Nye ca kongela vokupa esilivilo liavelapo kolohongele?

YEHOVA EYE Ono yocinyi locili, ndomo tuacililongisa ale kocipama co konyima. Ondaka yaye yimihila vonjila yetu, osimbu tuendela vonjila ya tapika. Yehova otusonguila poku tu longisa olonjila viaye. (Osamo 119:105) Ndeci ukualosamo ukuasimbu alinga, etu tu tava lolopandu okuendisiwa la Suku kuenda tu likutililavo okuti: “Njimbe onumbi yelila liove, a Yehova. Songuile vonjila ya tapika.”−Osamo 27:11.

² Onjila yimue okuti oyo Yehova asiata oku kuma oco atusonguile oloneke vilo, olohongele Viakristão. Ove hẽ wasiata okupa esilivilo keliangiliyo eli liocisola, (1) loku endaenda kolohongele olonjanja viosi, (2), loku yevelela ciwa lutate ovipama vilomboluiwa vekongelo, kuenda (3), oku kuata onepa kovipama vina okuti mua kongela atambululo aeciwa lolonjeveleli? Anga hẽ, tu tava lolopandu eci tu tambula alungulo ana okuti a ka tu kuatisa oco tu tuihinye okuendela “vonjila ya tapika”?

Okuendaenda Kuove Kolohongele Kukasi hẽ Ndati?

3. Umue manji wa litumbika kupange wotembo yosi, wa fetika hẽ otembo yipi oku lekisa ocituwa cokuendaenda kolohongele viekongelo olonjanja viosi?

³ Akundi vamue Vusoma, vasiata okuendaenda kolohongele olonjanja viosi tunde vutila. Yimue Ombangi ya Yehova yalitumbika kupange woku kunda otembo yosi, yapopia hati: “Eci va mana yange kumue lame tua kala oku kula kunayamo wo 1930, ka casukalaile okuti tu pula kolonjali vietu, nda tuenda kolohongele viekongelo ale ka tuendi. Etu tua kulihile ale muẽle okuti tuenda, te lika nda tu vela oco lika tuakambalaile kolohongele. Epata lietu ka lia kambalaile kolohongele.” Manji u ndeti wa kala nduprofeto Ana, okuti “lalimue eteke a kambelele, NW” pocitumãlo coku fendela Yehova.−Luka 2:36, 37.

4-6. (a) Momo lie akundi vamue Vusoma ka vasiatelele okuendaenda kolohongele olonjanja viosi? (b) Momo lie cikuetele esilivilo liocili okuendaenda kolohongele?

⁴ Ove hẽ okasi pokati ka vana okuti vaendaenda kolohongele Viakristão olonjanja viosi, ale wendaendako ño lika olonjanja vimue? Akristão vamue okuti va kala oku sima hati vakasi okuenda ciwa, vanõlapo oku likulihisa ciwa ovo muẽle. Vokuenda kuolosemana vimue, vasoneha olohongele viosi vaendaile. Eci ovo vakulihisa emẽla vasoneha vokuenda kuotembo yimue, vakomõha calua omo valimbuka okuti valaña kolohongele vialua.

⁵ Umue pamue opopia hati: ‘Kacikomõhisa, momo, oloneke vilo omanu vakasi oku liyaka lovitangi vialua, kuenje ka calelukile okuti vaendaenda kolohongele viekongelo olonjanja viosi.’ Ocili okuti, tukasi muẽle kotembo yovitangi vialua. Kakuli atatahãi, okuti ovitangi vi ka livokiya vali calua. (2 Timoteo 3:13) Eci ka civokiya hẽ esilivilo, liokuendaenda kuetu kolohongele viekongelo olonjanja viosi? Nda ka tu lialia okulia kuespiritu kupamisa, ka tu katẽla oku tamalala kasipato oluali lulo Omo liaco, nda ka tua litokekele la vakuetu, citava okuti tu yapuka ‘vonjila yasunguluka’! (Olosapo 4:18) Ocili okuti, noke liupange umue walua, koñolosi eci tupitila konjo okuti tua kava calua, pamue ka tu kuata vali onjongole yoku enda kohongele. Pole, nda tuaenda kohongele ndaño tua kava calua, tu likuatisa etu muẽle, kuenda tukolisavo vakuetu Akristão Vonjango Yusoma.

⁶ Kelivulu lia Va Heveru 10:25, kusangiwavo esunga lieci tukuetele okuendaenda kolohongele viekongelo olonjanja viosi. Kelivulu eli, upostolo Paulu wa lungula vakuavo vakalavo Akristão oco vakuate ocituwa coku liongolola, ‘capiãla vali enene eci ovo valimbuka okuti eteke liesulilo likasi ocipepi.’ Oco muẽle, lalimue eteke ka tu kavailiko okuti, “eteke lia Yehova” likasi muẽle ocipepi. (2 Petulu 3:12, NW) Nda tua sima okuti eteke liesulilo handi likasi ocipãla, tu ka fetika oku pitisa kovaso ovopange ana ka akuete esilivilo lialua, kuenje ovopange espiritu, ndeci okuendaenda kolohongele tu a kapa konyima. Omo liaco, Yesu wa lungula hati, ‘eteke liaco citava okuti liuwiyilili ocipikipiki ndulivi.’−Luka 21:34.

Kuata Ocituwa Coku Yevelela Ciwa Lutate

7. Nye hẽ cikuetele esilivilo liocili okuti omãla va yevelela ciwa lutate kolohongele?

⁷ Katusukila lika okuendaenda kolohongele, pole tukuetevo oku yevelela ciwa lutate eci cipopiwako. (Olosapo 7:24) Omãla vetu te vayevelelavo lutate. Olonjali vi kevelela okut, omõla wavo eci votuma kosikola oyevelela lutate cosi ulongisi waye olongisa, ndaño okuti ovina ivmue kavisole, ale pamue handi ka viulomboloka ciwa. Ulongisi wa kuliha okuti, nda omõla olikolisilako oku yevelela ciwa lutete, okopa limue ekuatiso kueci volongisa. Ka casungulukilevo hẽ okuti, omõla okasu vutuna woku lilongisa kosikola, oyevelelavo ciwa lutate kelongiso lieciwa vekongelo, okuti onjali yaye ka yuwecelela okuti opekela eci ohongele yifetika? Ocili okuti, pokati kolondaka viocili visangiwa Vembimbiliya, ‘pali ovina vimue okuti viatila calua oku kuata elomboloko liavio.’ (2 Petulu 3:16) Pole, kacitava okuti tu sima hati, omõla handi kapitilile vutunga woku kuata elomboloko lieci ayeva. Suku kalingi ndoco. Vokuenda kuotembo Embimbiliya liasonehiwa, eye wa tuma omanu vaye amãlẽhe, oco ‘va yevelele loku lilongisa ku sumbila Yehova, Suku yavo, okuti va tẽlisa lutate olondaka viosi viocihandeleko.’ (Esinumuilo 31:12; cisokisa Lovisila 18:1–30.) Yehova hẽ ka kevelela cimuamue komãla voloneke vilo?

8. Olonjila vipi olonjali vimue viasiata oku kuama, oco vikuatise omãla vavo oku yevelela ciwa lutate volohongele?

⁸ Olonjali Akristão viakuliha okuti onepa yimue yovina omãla vavo vasukila kespiritu vitẽlisiwa leci valilongisa volohongele. Omo liaco, olonjali vimue via siata oku sokiya okuti, evi handi ka viaendele kohongele, omãla vavo va pekelapo kamue, oco okuti eci vapitila Vonjango Yusoma kavasuñila vali, kuenje va yevelela ciwa lutate eci cilongisiwa. Olonjali vimue, eteke liokuenda kohongele, ka viecelela okuti omãla vavo vapita otembo yosi loku tala o televisão. (Va Efeso 5:15, 16) Kuenje olonjali ka viecelela okuti omãla vavo va taluka lovina vikuavo, pole va va vetiya oco va yevelele ciwa lutate. Hacoko ño, olonjali vikapakovo utunga womõla lomõla, kuenda epondolo liavo lioku yevelela.−Olosapo 8:32.

9. Nye cipondola oku tu kuatisa oco tu kuate ocituwa coku yevelela ciwa lutate?

⁹ Yesu wa lungula akulu eci apopia hati: “Lunguki ndeci vu yeva.” (Luka 8:18) Ocili okuti, oloneke vilo, eci caleluka vali oku ci vangula, pole oku cisuisapo catila. Tu tava okuti, oku kuata ocituwa coku yevelela ciwa lutate catila calua, pole citava okuti tu likolisilako oku cikuata. Osimbu okasi oku yevelela ciwa lutate ohundo Yopiwa Vembimbiliya, ale onepa yimue yilingiwa vohongele, seteka oku tepisa ovisimilo vimue viavelapo. Livanga oku sima eci manji okasi loku linga ohundo aka vangula noke. Nõlapo atosi ana okuti oka a kuama kupange woku kunda, ale aka ku kuatisa komuenyo wove. Pitulula atosi avelapo osimbu hundi akasi oku a situlula. Poku Soneha atosi amue oyongola tera onimbu.

10, 11. Olonjali vimue viasiata oku kuatisa ndati omãla vavo oco vayevelele ciwa lutate, kuenda olonjila vipi ove wa sanga okuti viasiata oku ku kuatisa?

¹⁰ Ocituwa coku yevelela ciwa lutate, caleluka vali oku ci li longisa vutila. Omãla vamue eci handi kavaiñilile kosikola, okuti otembo yaco handi ka va citẽla oku soneha ndaño oku tanga, vakuatisiwa lolonjali viavo akuti vokuenda kuohongele vasoneha “atosi” amue. Olonjali vipongiya opapelo yimue, noke va yeca komãla vavo kuenje eci olondaka va kuliha ndeci, “Yehova,” “Yesu” ale “Usoma,” vitukuiwa lamanji okasi oku linga ohundo ovo va taya olondaka viaco vopapelo. Lonjila eyi, omãla citava okuti va lilongisa ocituwa coku yevelela ciwa lutate eci cikasi oku lomboluiwa kembumbua.

¹¹ Ndaño muẽle omãla vamue okuti va kula ale va sukilavo oku vavetiya oco vayevelele ciwa lutate. Umue Isia eci alimbuka okuti omõla waye okuete 11 kanyamo kakasi oku yevelela ciwa lutate eci cikasi oku lomboluiwa vohongele yinene Yakristão, wowiha Embimbiliya kuenda wa vangula laye oco akuame ovinimbu viosi vitukuiwa la manji wa kala oku linga ohundo. Isia wa kala loku soneha atosi avelapo, wa kala loku lavulula omõla waye nda okasi oku kuama muẽle Embimbiliya. Noke, kakuenje wa kuama ovipama viosi viohongele lesanju lialua vali enene.

Ondaka Yove Yiyeviwe

12, 13. Momo lie cikuetele esilivilo oku kuata onepa kokuimba ovisungo vekongelo?

¹² Soma Daviti waimba ocisungo hati: “Ñuala utala wove, a Yehova. Njimba lolukandi ocisungo colupandu.” (Osamo 26:6, 7) Volohongele Violombangi via Yehova tu sanga epuluvi liwa lioku lekisa ekolelo lietu lolukandi. Eci tu cilinga pokuimba ovisungo vekongelo. Onepa yaco eyi, yikuete esilivilo liocili kefendelo lietu, pole citava okuti onepa yaco eyi omanu vamue ka vayikapiko.

¹³ Omãla vamue okuti handi ka vatẽla oku tanga, osemana losemana valikolisilako oku patekela ovisungo vikaimbiwa Vonjango Yusoma. Ovo vasanjuka calua, okuimbila kumue ovisungo lakulu. Pole, eci omãla vafetika oku kula, pamue ka valekisa vali onjongole yalua yokuimba ovisungo viusoma. Akulu vamue, pamue vakuata osõi yokuimba ovisungo volohongele. Pole, tu sukila okuivaluka okuti, cikale okuimba ovisungo ale oku kuata onepa kupange woku kunda, olonepa viaco viosi evi, viatiamẽla kefendelo lietu. (Va Efeso 5:19) Tuasiata oku likolisilako oku sivaya Yehova vupange wetu woku kunda. Ka tu u sivaya hẽ loku votola olondaka vietu lolukandi−cikale okuti tuimba ciwa ale sio, cinene ño okuti tueca esivayo liocili?−Va Heveru 13:15.

14. Momo lie ovipama tu kalilongisa kohongele visukilila oku vipongiya tete ciwa?

¹⁴ Etu tu sivayavo Suku, eci tueca atambululo avetiya volohongele vietu, eci kulingiwa onepa yimue yilingiwa lapulilo kuenda atambululo. Eci cisukila oku lipongiya ciwa. Kuenda cisukilavo oku sokiya otembo yoku lilongisa muẽle ciwa ovina vialonga Viondaka ya Suku. Upostolo Paulu omo okuti walitumbikile calua kelilongiso Liembimbiliya, walimbukile esilivilo liaco. Eye wasoneha ndoco: “Wa longa nye! Ukuasi lolondunge lukulihiso wa Suku!” (Va Roma 11:33) Alonjali, ene u sukila oku kuatisa ocimatamata locimatamata cepata liene loku konomuisa uloño wa Suku, ndomo wasituluiwa Vembimbiliya. Eci ulinga elilongiso lepata, sokiyi otembo yimue yoku lombolola atosi ana okuti ka alombolokele ciwa, oco ukuatisi vakuepata liene oku angiliya ovipama viokolohongele.

15. Olonumbi vipi citava okuti vikuatisa umue oyongola okueca atambululo kovipama vieciwa volohongele?

¹⁵ Nda oyongola okuti olonjanja viosi weca atambululo kolohongele, nye hẽ kupongiyila eci oka tambulula? Kacisukila okuti, opongiya etambululo limue muakongela olondaka vialua. Ndaño muẽle oku tanga ño ciwa ocinimbu cimue Cembimbiliya ale okueca etambululo volondaka vimue via sunguluka kuenda vionimbu cikasoliwavo. Akundi vamue vasiata oku vangyula lamanji endisa elilongiso liocipama cimue vohongele, okuti volekisa ocinimbu eci vayongola okueca etambululo, kuenje, loku kuama onjila eyi, ovo kavakambi epuluvi lioku lekisa ekolelo liavo.

Omunu Kaloñolohele Olinga U Waloñoloha

16, 17. Elungulo lipi ukulu wekongelo aeca koñuatisi yakulu vekongelo, kuenda momo lie liaecela olonima viwa?

¹⁶ Kolohongele Violombangi via Yehova, tuasiata okuivaluisiwa olonjanja vialua okuti tusukila oku tanga Ondaka ya Suku eteke leteke. Oku kuama onjila eyi, cika tu kuatisa. Eci ci tu kuatisavo oku nõla lolondunge onjila tu kuama, kuenda oku siapo ovituwa vivi, loku tamãlala kayonjo, kuendavo nda tua kuamele onjila yimue yivi, citukuatisavo okuti tu yisiapo kuenje tu kala vali ciwa konepa yespiritu.−Osamo 19:7.

¹⁷ Vakongelo musangiwa akulu vekongelo valoñoloha, okuti va lekisa onjongole yoku tuiha alungulo asangiwa Vovisonehua oco atukuatise kueci tusukila. Vosi yetu tu sukila ‘okupa’ vutima wetu cosi cisangiwamo eci tuenda kokuavo oco va tu kuatise lalungulo asangiwa Vembimbiliya. (Olosapo 20:5) Eteke limue, ukuenje umue okuti oñuatisi yakulu vekongelo, wa pula kukulu wekongelo eci eye asukila oku linga oco akuate vali ovikele vekongelo. Omo okuti, ukulu wekongelo wa kulihile ciwa ukuenje waco, wo yuluila Embimbiliya liaye kelivulu lia 1 Timoteo 3:3, oku lilekisa okuti ulume onõliwa te lika u ‘wonjuka.’ Lutate walua, ukulu wekongelo wa lekisa ndomo ukuenje apondola oku sunguluka lavakuavo. Manji u umãlẽhe wa sumua hẽ omo lielungulo liocili a tambula? Sio, kasumuile! Eye wapopia hati: “Omo okuti ukulu wekongelo wa kuama Embimbiliya, ame ndalimbuka okuti elungulo liaco liatunda muẽle ku Yehova.” Umãlẽhe u okuti oñuatisi yakulu vekongelo, wa tava elungulo lolopandu viocili , kuenda okasi lokuamamako kespiritu.

18. (a) Nye cakuatisa ufeko umue Ukristão oco atamãlale kayonjo a tunda ku vakuavo kosikola?(b) Ovisonehua vipi Viembimbiliya ove wasita okuivaluka eci oliyaka layonjo?

¹⁸ Ondaka ya Suku yipondolavo oku kuatisa akuenje lafeko, oco ‘vayuvule oloñeyi viamãlehe.’ (2 Timoteo 2:22) Ufeko umue Ombangi ya Yehova okuti ndopo amãla oku lilongisa kosikola yavelapo, otembo akala oku lilongisa wa tamãlala kayonjo atundilila kuvakuavo, momo wa sokolola ovipama vimue alilongisa Vembimbiliya, kuenda wa vikuama. Eye olonjanja viosi wa kuama elungulo lisangiwa kelivulu Liolosapo 13:20, oku lipopia ndoco: “U endaenda la vakualondunge o lingavo ukualondunge.” Luloño wocili, eye wanõla lika akamba vana okuti vasumbila ovihandeleko Viembimbiliya. Eye waenda lokusima ndoco: “Ame savelelepo vakuetu, omo liaco, nda ndalikongela lakamba vãvi, ndikayongola oku va sanjuisa, kuenje, eci ci ka ndinenela ovitangi.” Elungulo lia Paulu liasonehiwa kelivulu lia 2 Timoteo 1:8, liokuatisavo. Paulu wasoneha ndoc: “Ku ka kuate osõi eci wimbila Ñala yetu uvangi. puãi tava ño, oku tala ohali yi ku iyilila oku kunda ondaka yiwa.” Ndomo elungulu eli lilekisa, olonjanja viosi eci eye aenda oku sanga epuluvi, waenda loku sapuilako vakuavo eci alilongisa Vembimbiliya. Olonjanja viosi eci eye aenda loku tambula ocipama kosikola oco acitambuluile kovaso ya vakuavo, luloño wocili, vetambululo liaye waenda oku tengamo uvangu watiamẽla Kusoma wa Suku.

19. Momo lie umãlẽhe umue ukuenje katẽlele oku tamãlala kayonjo oluali lulo, pole, nye hẽ ceya oku wiha vali ongusu konepa yespiritu?

¹⁹ Nda eteke limue tua yapuka ‘vonjila yasunguluka,’ Ondaka ya Suku yipondola oku tu kuatisa oco tu pengulule olomãhi vietu. (Olosapo 4:18) Ukuenje umue okasi vocifuka co Afrika weya oku limbuka okuti eci ocili omo lioseteko yimue a pila layo. Eci yimue Ombangi ya Yeyova yopasuisa, eye wa tava oku lilongisa Embimbiliya. Eye wasanjukile calua leci a kala loku lilongisa Vembimbiliya, pole noke, weya oku likongela lakamba vãvi kosikola. Eci papita otembo yimue, eye waeila vukahonga. Noke weya oku popia hati: “Utima wange wa kala loku nditukoka calua, omo lioku liwekako okuendaenda kolohongele.” Umãlẽhe u ukuenje, wavokiyako olondaka viokuti: “Ndalimbuka okuti, eci candikokela ovitangi viaco, ekambo lioku litekula lokulia kuespiritu. Ndaliwekelepo oku linga elilongiso lio pokolika. Eli olio esunga lieci siatẽlele oku tamãlala kayonjo. Noke, ndafetika oku tanga Utala Wondavululi lo Despertai! Naito la naito, ndafetka oku kuata vali ongusu konepa yespiritu, kuenda ndayelisa omuenyo wange. Eci cakala uvangi wocili kuava vamõla apongoloko ndalinga. Noke nda papatisiwa, kuenda kaliye nda sanjuka calua.” Nye he caeca ongusu kukuenje u oco asiepo ovituwa viaye vivi? Eye weya oku kuata vali ongusu konepa yespiritu omo lioku linga elilongiso liaye Liembimbiliya pokolika olonjanja viosi.

20. Omunu una okuti umãlẽhe otẽla hẽ ndati oku tamãlala kolonjanjo via Satana?

²⁰ Ene akuenje lafeko Wakristão, oloneke vilo ukasi pokati kayonjo! Nda uyongola oku tamãlala kolonjanjo via Satana, ukuete oku litekula lokulia kuespiritu olonjanja viosi. Umue ukualosamo okuti wa kalavo umãlẽhe, eci colombolokele calua ciwa. Eye wa pandula Yehova, omo aeca Ondaka yaye, oco ‘ukuenje a tẽle oku tata onjila yaye okuti yi yela.’−Osamo 119:9.

Kuosi Suku Atusonguila Oko Tuenda

21, 22. Momo lie ka casungulukile oku sima okuti onjila yocili yatila calua?

²¹ Yehova wasonguila epata lia va Isareli eci avopa ko Egito oco avatuale Kofeka avalikuminyile. Onjila eye a valekisa, kokuavo yavalingilile soketi yalikonda. Yehova kasonguilile omanu vaye konjila yamõlehele soketi yaleluka vali haiyo yonimbu yipita konele yo Kalunga ko Mediterrâneo, puãi wa va songuila konjila yatatama yipita vekalasoko. Pole, eci cakala ohenda konepa ya Suku. Ndaño onjila yaco eyi yakala yonimbu, nda ya tuala va Isareli kofeka ya va Filisiti ovanyãli. Poku nõla onjila yikuavo Yehova wayovola omanu vaye kokuliyaka la va Filisiti. Yehova wanõla onjila yikuavo, momo kayonguile okuti omanu vaye valiyaka la va Filisiti.

²² Cimuamue haico oloneke vilo, okusonguiwa la Yehova pamue cikala soketi catila ño enene. Osemana losemana etu Tuakristão tukete ovopange alua okuti muakongela okuendaenda kolohongele vekongelo, oku linga elilongiso liopokolika, kuenda oku kuata onepa kupange woku kunda. Olonjila vikuavo vimõleha soketi viasunguluka vali. Pole, nda tua tava okusonguiwa la Yehova, oco lika tu ka pitila vofeka yelau tukasi oku talavayela ndeti otembo yilo. Omo liaco, tuamamiko loku tambula elongiso litunda ku Yehova, kuenda tutuihinyi okuendela “vonjila ya tapika” okuti oyo muẽle tukuama otembo yenda hu!

Opondola hẽ Oku Tambulula?

• Nye tusukilila oku limbuka esilivilo liokuendaenda kolohongele olonjanja viosi?

• Nye hẽ olonjali vipondola oku linga oco vikuatise omãla vavo oku yevelela ciwa lutate kolohongele?

• Nye cakongela voku yevelela ciwa lutate?

• Nye cipondola oku tu kuatisa oco tuece atambululo volohongele?

[Elitalatu kamela 16, 17]

Okuendaenda kolohongele olonjanja viosi, citukuatisa okuivaluka eteke lia Yehova

[Alitalatu kemela 18]

Kuli olonepa viñi viñi vioku sivaya Yehova volohongele Viakristão