Elilongiso Lio Pokolika Li Tu Kuatisa Oku Kala Alongisi

“Kolisako oku lingainga ovina evi. Litumbika muẽle kokuavio, oco vosi va mole okuamako kuove. Lilava ove muẽle. Lavavo okulongisa kuove.” ​—⁠1 TIMOTEO 4:​15, 16.

1. Ndamupi hẽ ci popiwa catiamẽla koku sokiya otembo kuenda koku linga elilongiso lio pokolika?

EMBIMBILIYA kelivulu Liukundi 3:​1, li popia ndoco: ‘Ovina viosi vi kuete otembo yavio.’ Olondaka evi vi kuete esilivilo liocili kelilongiso lio pokolika. Omanu valua okuti ka ca va lelukilile oku sanda otembo yoku sokolola ovina viespiritu nda otembo yaco ka ya va sungulukilile, ale ocitumãlo cimue ciwa oco va lilongise. Ndeci, kesulilo lieteke liupange umue wa tĩla noke yoku lia ondalelo, anga hẽ o lekisa onjongole yoku lilongisa ca piãla vali enene nda wa tumãla komangu yove o sole calua kovaso yo Televisão? Sio, ku lekisa vali onjongole. Oco hẽ, nye tu sukila oku linga? Ocili okuti, tu sukila oku nõla otembo kuenda ocitumãlo tu lilongisila lonjongole yokupa ekuatiso liocili kelikolisilo lietu.

2. Yipi hẽ otembo yiwa okuti oyo ya sunguluka koku linga elilongiso lio pokolika?

² Omanu valua va limbuka okuti, oku linga elilongiso lio pokolika komẽle, oyo otembo ya sunguluka okuti, va pondola okupa esilivilo kueci va lilongisa. Omanu vakuavo, va siata oku linga elilongiso liavo kowola yina yepuyuko eci ekumbi li talama pongunji. Konomuisa atosi atiamẽla kesilivilo liotembo tu pesila kovopange espiritu ndomo a lekisiwa vovolandu a kuãimo. Daviti Soma ya va Isareli kosimbu wa soneha ndoco: “Omele njukise ocisola cove ka ci pui, momo nda ku kolela. Njimbe onumbi yonjila nda posokela oku endelamo, momo nda tiamisa utima wange kokuove.” (Osamo 143:⁠8) Uprofeto Isaya wa lekisavo esanju limuamue eci a popia hati: “Ñala Yehova wa nyĩha elimi liuloño ndokuti nẽla oku kolisa lolondaka u wa kava. Omẽle komẽle o pasola, o pasola etuĩ liange okuti njeva ndu o longisiwa.” Etosi lia velapo lieli okuti, tu sukila oku lilongisa kuenda oku kuata ukamba wocili la Yehova eci tu luluvalela kelilongiso lietu cikale kutanya ale kuteke.​—⁠Isaya 50:​4, 5; Osamo 5:3; 88:⁠13.

3. Nye ci sukiliwa oco elilongiso lietu lio pokolika liende ciwa?

³ Onjila yimue yikuavo yecelela oku lilongisa ciwa yeyi yokuti, tu sukila oku yuvula oku tumãla komangu yina okuti ka yi tu ecelela oku lilongisa ciwa. Nda tua tumãla komangu yaco, ci tu tateka okupa esilivilo liocili kelilongiso lietu. Eci tu lilongisa, utima wetu te u vetiyiwa lonjongole yocili poku tumãla komangu yimue okuti, tu tambula ekuatiso liocili kueci tu lilongisa. Oco elilongiso lietu liende ciwa, okuti tu sokolola eci tua lilongisa, tu sukila oku lilongisila pocitumãlo cimue okuti ka pali la cimue ci tu tateka. Oku lilongisa locisanji ca yuluiwa, o Televisão ale onjuela yomãla, cika ku tateka okupa esilivilo liocili kelilongiso. Otembo yimue eci Yesu a yonguile oku sokolola, wa endele pocitumãlo cimue okuti ka pali lacimue ci yuela. Eye wa lombololavo esilivilo lioku sandiliya ocitumãlo cimue co pokolika okuti pa tulumũha.​—⁠Mateo 6:6; 14:13; Marko 6:​30-32.

Elilongiso Lio Pokolika li tu Kuatisa Koku Eca Atambululo

4, 5. Kovina vipi ombrochura Suku Oyongola yi pondola oku tu kuatisa?

⁴ Elilongiso lietu lio pokolika ci tava okuti li tu nenela esanju nda tu kuete alivulu akuavo a pondola oku tu kuatisa kelomboloko liondongosi. Pole, tu kuatisiwa vali calua eci tu eca atambululo lesunguluko liocili ku umue o linga apulilo. (1 Timoteo 1:4; 2 Timoteo 2:23) Omo liaco, omanu valua va fetika ndopo oku lilongisa Embimbiliya, va siata oku fetikila vombrochura Suku Oyongola Nye Kokuetu?,a okuti cilo ya pongoluiwa ale kueci ci soka 261 kalimi. Ombrochura yaco ya leluka calua haiyo yi kuatisa cocili, yi lombolola eci ci sangiwa Vembimbiliya. Oyo, yi pondola oku kuatisa omanu oku kuata lonjanga elomboloko lieci Suku a yonguila kefendelo liocili. Pole, ombrochura yaco ka yangiliyiwile oco yi lombolole atosi aco osi ulandu Wembimbiliya. Omo liaco, ci tava okuti vokuenda kuelilongiso ondonge yi votola apulilo atiamẽla katosi amue Embimbiliya. Oco hẽ, ndamupi ove oka tẽla oku sandiliya elomboloko liaco Liembimbiliya lina lika ku kuatisa oku tambulula apulilo aco?

⁵ Omanu vana okuti va kuete o Watchtower Library on CD-ROM kelimi liavo, ci tava okuti yi va kuatisa oku sanga olonumbi vikuavo vo komputador. Ci popiwa hẽ ndati catiamẽla komanu vana okuti ka va kuete o Watchtower Library on CD-⁠ROM lo komputador yaco? Tu konomuisi olosapi vivali vi lomboluiwa vombrochura Suku Oyongola, oco tu vokiye elomboloko lietu okuti tu tẽla oku eca etambululo liasuapo eci ku votuiwa apulilo ndeci, Suku Helie? kuenda ndamupi Yesu a kala?​—⁠Etundilo 5:2; Luka 9:​18-20; 1 Petulu 3:⁠15.

Suku Helie?

6, 7. (a) Apulilo api a siata oku votuiwa kueci catiamẽla ku Suku? (b) Oku lueya kupi ulume umue ukuetavo a linga vohundo yaye?

⁶ Ocipama 2 vombrochura Suku o Yongola, ci tambulula epulilo liokuti, Suku Helie? Eli etosi limue lia velapo kelongiso, momo omunu ka pondola oku fendela Suku yocili nda okuti ka kũlĩhĩle oku tuwa Kuaye, ale pamue o tatãla nda okuti kuli Suku. (Va Roma 1:​19, 20; Va Heveru 11:⁠6) Pole, omanu valua voluali luosi va kuete ovisimĩlo via litepa viatiamẽla ku Suku. (1 Va Korindo 8:​4-6) Omanu vosi vakuetavo okuti olonoño, va kuete atambululo a litepa kueci catiamẽla kondaka yoku lekisa helie Suku. Akristão vosi vesanda, va tenda Suku okuti suku umosi Muvatatu. Umue usongui wetavo wo kofeka yo Estados Unidos, wa linga ohundo yimue losapi yokuti: “Ove hẽ wa Kũlĩha Suku?” Pole, vokuenda kuohundo yaye ka tukuile onduko ya Suku, ndaño okuti vohundo yaye wa tukula Ovisonehua vio Heveru olonjanja vialua. Ocili okuti, eye wa tanga Vembimbiliya lina okuti li tukula ño onduko “Ñala,” pole ka li tukula Yehova.

⁷ Ulume waco ukuetavo vohundo yaye, wa ivalako oku tukula etosi limue lia velapo eci a lombolola elivulu lia Yeremiya 31:​33, 34 hati: “‘Lomue omunu oka longisa u a lisungue laye, ale pamue oku longisa manjaye loku popia hati, kũlĩha Ñala,” okuti [Kelimi lio Heveru, “Yehova”]. Vosi yavo vaka ndi kũlĩha Ame, tunde komunu o sule pokati kavo toke ku wa velapo pokati kavo,’ oco ca popia Ñala, [Kelimi lio Heveru, “Yehova”]. Vembimbiliya eye a tanga, ka mu sangiwa onduko yi kola okuti, Yehova.​—⁠Osamo 103:​1, 2.

8. Nye ci lekisa esilivilo lioku tukula onduko ya Suku?

⁸ Elivulu Liosamo 8:​9, li lekisa esilivilo lieci tu sukilila oku tukula onduko Yehova. Olio li popia ndoco: “A Yehova, Ñala yetu, onduko yove ya kemala cimue kuosi kilu lieve.” Tu sokisi olondaka via tukuiwa ndeti levi viokuti: “A Ñala, a Ñala yetu, onduko yove ya kemãla calua voluali luosi.” (Sociedades Bíblicas Unidas, kelimi Liumbundu kuenda Embimbiliya João Ferreira de Almeida, kelimi Lioputu). Pole, ndomo ca lomboluiwa ale vocipama co konyima, tu pondola oku kuata “ukũlĩhiso wa Suku,” nda tua ecelela okuti Ondaka yaye yi tu milihĩla kespiritu. Oco hẽ, ekuatiso lipi lielilongiso Liembimbiliya, tu pondola oku kuama oco li tu kuatise koku eca atambululo atiamẽla konduko ya Suku?​—⁠Olosapo 2:​1-6.

9. (a) Elivulu lipi li pondola oku tu kuatisa koku lombolola esilivilo lioku tukula onduko ya Suku? (b) Ndamupi vamue vakuaku pongolola alimi va siata oku lekisa etombo konduko ya Suku?

⁹ Tu pondola oku tala velivulu Ukũlĩhĩso Utuala Komuenyo Ko Pui, okuti lia pongoluiwa ale kueci ci soka 154 kalimi.b Kocipama ci tukuiwa okuti: “Helie Suku Yocili,” kombuelo yosapi yokuti, “Suku Yocili Okuete Onduko,” (kemẽla 24), ku lombolola ciwa Olomalaka Vikuãla kelimi lia va Heveru (okuti, kelimi lio Helasi vi lomboloka “ololetala vikuãla”) vi molẽha eci ci soka 7.000 kolonjanja vovisonehua viosimbu via va Heveru. Pole, asongui vakuetavo lia va Yudea kuenda Akristão vesanda vakuaku pongoluisa alimi, Vambimbiliya avo onduko ya Suku va yupamo kocipango.c Ndamupi ovo va popia hati, va kũlĩha Suku kuenda va kuete ukamba wocili laye, osimbu okuti va likala oku tukula Suku konduko yaye? Onduko yaye yocili, oyo yi yulula onjila yoku kuata elomboloko liocipango caye kuenda oku tuwa kuaye. Yesu poku eca ongangu yoku likutilila wa popia hati: “A Isietu o kasi kilu. Onduko yove yi sumbiwe.” Oco hẽ, ohutililo yaco eyi yi kuete esilivilo lipi, nda onduko ya Suku ka yi tukuiwa?​—⁠Mateo 6:9; Yoano 5:43; 17:⁠6.

Yesu Kristu Helie?

10. Olonjila vipi tu pondola oku kuama oco tu kuate elomboloko liasuapo liatiamẽla komuenyo wa Yesu kuenda kupange waye woku kunda?

¹⁰ Ocipama 3, vombrochura Suku Oyongola, ci kuete osapi yokuti, “Yesu Kristu Helie?” Ovinimbu epandu vi lombolola ulandu umue wonimbu watiamẽla ku Yesu, ndeci, oku Eye a tundilila, kuenda esunga lieci eyilila palo posi. Omo liaco, nda ove o yongola oku kũlĩha ulandu wasuapo watiamẽla komuenyo wa Yesu, ciwa okuti o tanga Avanjeliu a lekisa ulandu waye, u sangiwa velivulu, O Maior Homem Que Já Viveu, okuti lia pongoluiwa ale kueci ci soka 111 kalimi.* Elivulu eli, li lombolola ulandu wasuapo womuenyo wa Kristu kuenda elongiso liaye li sangiwa Vavanjeliu akuãla. Elivulu eli, li kuete eci ci soka 133 kovipama vi lombolola ovolandu atiamẽla komuenyo wa Yesu kuenda upange waye. Oco o kuate elomboloko likuavo liatiamẽla kokuaye, tanga velivulu Estudo Perspicaz, Volume 2 kosapi ya linga hati, “Yesu Kristu.”

11. (a) Nye ci lekisa oku litepa Kuolombangi via Yehova kueci vi tava catiamẽla ku Yesu? (b) Ovinimbu vipi Viembimbiliya vi patãla ondotilina ya Suku Umosi Muvatatu? Kuenda ombrochura yipi yi pondola oku tu kuatisa kelomboloko liondaka yaco?

¹¹ Vokuenda kuovita vianyamo, Akristão vesanda va siata oku kuata atatahãi atiamẽla ku Yesu nda eye “Omõla a Suku,” kuenda haeye “Suku Omõla.” Handi vali, atatahãi aco, a sangiwavo Vondotilina Yetavo Liokatolika, yi popia okuti, Suku Umosi Muvatatu, “ondaka yimue yi tatãliwa calua kekolelo” Liavo muẽle haico ca linga onumbi. Ca litepa letavo Liakristão vesanda ceci okuti, Olombangi via Yehova vi tava okuti, Yesu wa lulikiwa la Suku, pole eye hayeko Suku. Ulandu waco owu u sangiwa vombrochura yi kuete osapi ya linga hati, Deve-se Crer na Trindade?, ya sandekiwa ale kueci ci soka 95 kalimi.d Pokati kovinimbu vialua Viembimbiliya vi patãla ondotilina ya Suku Umosi Muvatatu pali ovinimbu vimue ndeci: Marko 13:32; kuenda 1 Va Korindo 15:​24, 28.

12. Epulilo lipi tu sesamẽla oku konomuisa lutate wocili?

¹² Ovolandu a lomboluiwa ndeti atiamẽla ku Suku kuenda ku Yesu, ci tava okuti a tu kuatisa kelilongiso lietu lio pokolika. Lonjila eyi, tu pondola oku kuatisa omanu vana ka va kuete elomboloko liocili Cembimbiliya oco va kuate ukũlĩhĩso wasuapo. (Yoano 17:⁠3) Ci popiwa hẽ ndati catiamẽla komanu vana va kasi ale vekongelo Liakristão vokuenda kuanyamo alua? Omo liukũlĩhĩso walua Wembimbiliya ovo va kuete ale, anga hẽ ka va sukila vali oku linga elilongiso liavo lio pokolika Liondaka ya Yehova?

Momo Lie ‘tu Sukilila Oku Lunguka’?

13. Ovisimĩlo vipi via penga vamue va siata oku kuata kueci catiamẽla kelilongiso lio pokolika?

¹³ Kuli vana va kasi ale vekongelo Liakristão vokuenda kuanyamo alua okuti pamue va siata oku kuata ocituwa coku kolela kukũlĩhĩso Wembimbiliya ovo va lilongisa ale vanyamo atete komuenyo wavo, eci va linga Olombangi via Yehova. Ca leluka omunu oku popia eye muẽle hati: “Si sukila vali oku lilongisa calua Embimbiliya ndeci ava va fetika ndopo va kasi oku linga. Ocili okuti, nda konomuisa ale etendelo liolonjanja nda siata oku tanga Embimbiliya lalivulu a lombolola eci ci kasi Vembimbiliya vokuenda kuanyamo alua.” Ovisimĩlo evi vi sokisiwa loku popia ndoco: “Si sukila oku sakalala leci ndilia cilo, omo liovikulia nda lia ale vokuenda kuanyamo a pita.” Tua kũlĩha ciwa okuti, etimba lietu li sukila oku litekula olonjanja viosi lokulia kuwa oco tu kuate uhayele okuti tu pama ciwa. Omo liaco, ca sungulukavo okuti tu amamako loku tambula ciwa okulia kuespiritu oco tu kuate uhayele kespiritu okuti tu pama ciwa.​—⁠Va Heveru 5:​12-14.

14. Momo lie tu sukilila oku lilava ciwa etu muẽle?

¹⁴ Ocili okuti, vosi yetu cikale vana va fetika osimbu oku lilongisa Embimbiliya ale sio, tu sukila oku pokola kelungulo upostolo Paulu a eca ku Timoteo una wa loñolohele calua kespiritu okuti wa kala ukulu wekongelo. Eye wa popia hati: “Lilava ove muẽle. Lavavo okulongisa kuove. Pandikisa lovina evi, omo, nda o ci linga, [oka] lipopela ove muẽle [kuenda oka] popelavo ava va ku yeva.” (1 Timoteo 4:​15, 16) Momo lie tu sukilila oku pokola lutima wetu wosi kelungulo liupostolo Paulu? Ivaluka okuti eye wa popiavo hati, tu sukila oku yaka “latutu Eliapu,” kuenda ‘aspiritu ãvi o kilu.’ Handi vali, upostolo Petulu wa lungulavo hati, Eliapu li kasi ‘oku sandiliya omunu umue a yongola oku yapuisa vonjila ya Suku,’ kuenda ‘omunu waco,’ ci tava okuti umue pokati ketu. Ovisimĩlo vioku tẽlisa olonjongole vietu, ci tava okuti ovio Satana a kasi loku sandiliya.​—⁠Va Efeso 6:​11, 12; 1 Petulu 5:⁠8.

15. Ovimalẽho vipi etu tu kuete konepa yespiritu, kuenda ndamupi tu pondola oku amamako loku vi tata?

¹⁵ Oco hẽ, ovimalẽho vipi etu tu kuete? Upostolo Paulu o tu ivaluisa ndoco: “Malehi ovimaleho viosi via Suku okuti veteke lĩvi vu tẽla oku yaka, okuti ndaño ovanyali va tamalala enene haimo vu yula.” (Va Efeso 6:13) Oco tu liteyuile kespiritu, ka tu sukila lika oku kuatisiwa leci tua lilongisa kefetikilo, pole tu sukilavo oku amamako loku tata ciwa ovimalẽho viaco. Vovimalẽho viaco via suapo vi tunda ku Suku, mua kongela oku tambula olonjanja viosi veteke leteke ukũlĩhĩso Wondaka ya Suku. Eci ci lomboloka okuti, tu sukila oku amamako loku kuata elomboloko liatiamẽla kocili cina Yehova a kasi oku tu situluila lekuatiso Liondaka yaye yeciwa lukuenje wa kolelua haeye wa lunguka. Tu sukila oku linga elilongiso lietu Liembimbiliya pokolika kuenda oku tanga alivulu a lombolola eci ci sangiwa Vembimbiliya oco tu amameko loku teyuila ciwa ekalo lietu kespiritu.​—⁠Mateo 24:​45-47; Va Efeso 6:​14, 15.

16. Nye tu pondola oku linga oco tu tale nda ‘ociyepelo cetu cekolelo’ ca pama?

¹⁶ Upostolo Paulu wa tukula ocimalẽho cikuavo coku liteyuila okuti, “ociyepelo cekolelo,” cina ci pondola oku tu kuatisa koku yuvula ovilondokua viosi via Satana lalundi aye kuenda alongiso uhembi a vana va siapo etavo liocili. (Va Efeso 6:16) Omo liaco, tu sukila oku kũlĩhĩsa ciwa ndomo okupama kuociteyuilo cekolelo lietu ku kasi, okuti tu limbuka eci tu sukila oku linga oco tu amameko loku tata kuenda oku pamisa ciwa ociyepelo caco. Ocili okuti, o pondola oku lipulisa ove muẽle ndoco: ‘Ndamupi nda siata oku pongiya ocipama celilongiso Liutala Wondavululi tu lilongisa osemana losemana? Anga hẽ, nda siata oku lipongiya ciwa oco ndi tẽle ‘oku livetiya pokati, locisola’ poku eca atambululo awa vokuenda kuohongele? Nda siata hẽ, oku yulula Embimbiliya liange kuenda oku tanga ovinimbu vimue Viembimbiliya vina ka via sonehĩwile? Nda siata hẽ oku livetiya pokati la vakuetu poku linga olonepa viange lesanju liocili?’ Omo okuti okulia kuetu kespiritu kua pama, tu sukila oku sokolola ciwa eci tua lilongisa oco tu tambule ekuatiso liocili.​—⁠Va Heveru 5:14; 10:⁠24.

17. (a) Olonjanjo vipi Satana a siata oku kuama oco a seteke oku nyõla ekalo lietu kespiritu? (b) Nye tu sukila oku linga oco tu yuvule olonjanjo via Satana?

¹⁷ Satana wa kũlĩha ciwa ekambo lioku lipua kuetu tumanu, kuenje eye o kuama olonjanjo viñi viñi vioku tu yapuisa. Eye wa siata oku yapuisa Akristão poku va vetiyila koku tala omanu va kasi epolõla va lekisiwila ndeci, vo Televisão, vo Internet, volo video, kuenda valivulu. Akristão vamue va siata oku ecelela okuti, olosinema viaco evi vĩvi vi nyõla ovisimĩlo viavo via pindisiwa Lembimbiliya, kuenje valua va siata oku upiwa ovikele viavo vekongelo kuenda vamue va siata oku pita lovitangi vialua. (Va Efeso 4:​17-19) Nye tu sukila oku linga oco tu yuvule olonjanjo viosi via Satana? Tu sukila oku yuvula oku kuata owesi woku linga elilongiso lietu lio pokolika, oku yuvula oku laña oku endaenda kolohongele vietu Tuakristão, okuti tu malẽha ovimalẽho viosi vi tunda ku Suku. Ovimalẽho viaco evi, vi pondola oku tu ĩha uloño woku tepisa pokati keci ciwa leci cĩvi kuenda oku yuvula ovina viosi Suku a nyãle.​—⁠Osamo 97:10; Va Roma 12:⁠9.

18. Ndamupi tu pondola oku kuatisiwa ‘losipata yespiritu’ kuyaki wetu wekolelo?

¹⁸ Nda tu amamako locituwa cetu coku linga elilongiso Liembimbiliya pokolika, tuka pama calua kuenda tuka tẽla oku liteyuila lukũlĩhĩso Wondaka ya Suku. Handi vali, tuka kuatavo uloño woku liteyuila ‘losipata yespiritu okuti oyo Ondaka ya Suku.’ Ondaka ya Suku “ya tua enene, okuti omoko ya tua olonele vivali yi sule. Ondaka yaco yi toma muẽle toke kutima, kuenda yi pitila toke vasokoluilo lupuma, haiyo yi limbukisa ovisimĩlo locipango cutima.” (Va Efeso 6:17; Va Heveru 4:​12, NW) Nda tua loñoloha koku talavaya ‘lomoko’ yaco eci tu sangiwa layonjo, tuka tẽla oku limbuka ovina viosi vi molẽha soketi viwa, kuenje tuka yuvula olonjanjo viaco vi tuala kolofa vi vetiyiwa la Satana. Ukũlĩhĩso wetu Wembimbiliya kuenda elomboloko tu kuete, uka tu kuatisa koku yuvula cosi cĩvi kuenda oku linga eci ciwa. Ocili okuti, vosi yetu tu sukila oku lipulisa etu muẽle ndoco: ‘Anga hẽ, nda kolela omoko yange, ale yakuna? Ndi kuete hẽ atatahãi oku ivaluka ovinimbu Viembimbiliya vina vi pondola oku ndi kuatisa koku tamalãla leci cĩvi?’ Omo liaco, tu amamiko lovituwa vietu viwa vioku linga elilongiso Liembimbiliya pokolika oco li tu kuatise oku yuvula olonjanjo Vieliapu.​—⁠Va Efeso 4:​22-24.

19. Ekuatiso lipi tu pondola oku tambula, nda tu amamako loku linga elilongiso lietu lio pokolika?

¹⁹ Upostolo Paulu wa soneha ndoco: “Ovisonehua vi kola viosi ovitumasuku, kuenje vi silivila [koku] longisa, loku lungula, loku pindisa, loku ikisa esunga, okuti omunu wa Suku o loñoloha, haeye angiliyiwila ovopange osi awa.” Nda tua pokola kolondaka upostolo Paulu a sonehela Timoteo, tu pondola oku pamisa ekolelo lietu kuenda upange wetu woku kunda uka enda ciwa. Akulu vekongelo kuenda oloñuatisi viakulu vekongelo, va pondola oku kuatisa calua ekongelo. Omo liaco, vosi yetu tu pondola oku amamako loku pamisa ekolelo lietu.​—⁠2 Timoteo 3:​16, 17; Mateo 7:​24-27.

[Atosi pombuelo yamẽla]

Handi Ocivaluka?

• Nye ci pondola oku tu kuatisa oco elilongiso lietu lio pokolika liende ciwa?

• Ocina cipi cĩvi ca lingiwa la vakuaku pongolola alimi kueci catiamẽla konduko ya Suku?

• Ovinimbu vipi Viembimbiliya ove o pondola oku kuama oco o yuvule ondotilina ya Suku Umosi Muvatatu?

• Nye tu sukila oku linga oco tu liteyuile kolonjanjo via Satana, ndaño okuti tu kasi ale loku fendela Yehova vokuenda kuanyamo alua?

[Elitalatu kemẽla 25]

Oco elilongiso liove lio pokolika liende ciwa, o sukila oku sandiliya ocitumãlo cimue culika okuti pa tulumũha

[Elitalatu kemẽla 29]

Anga hẽ, ove wa kolela ‘omoko’ yove, ale yakuna?