Pi tu Pondola Oku Sanga Elembeleko Liocili? — OCISELEKO CALIVULU VO INTERNET Colombangi Via Yehova

Pi tu Pondola Oku Sanga Elembeleko Liocili?

“Suku, Isia ya Ñala yetu Yesu Kristu, . . . o tu lembeleka kohali yetu yosi.” —⁠2 VA KORINDO 1:3, 4.

1. Ovitangi vipi via siata oku vetiya omanu oku sandiliya elembeleko liocili?

ECI omunu umue a kuatiwa luveyi walua, ci tava oku sima hati, ekalo liomuenyo waye liosi lia nyolẽha. Ovilemaiwe, ahunguhungu ofela kuenda onjala, ovina vimue okuti vinena uhukũi komanu. Uyaki ci tava okuti u ponda vakuepata, u teya olonjo, ale pamue u kisika omanu oku siapo olonjo kuenda ovikuata viavo. Omo liekambo liesunga, omanu va pondola oku sima okuti, ka kuli ocitumãlo lacimue okuti oko tu pondola oku sanga ekuatiso. Omanu vosi vana va kasi oku liyaka lovitangi viaco, va sukila elembeleko liocili. Pi hẽ ku sangiwa elembeleko liaco?

2. Momo lie elembeleko li tunda ku Yehova olio lika li kuete esilivilo lia velapo?

² Omanu vamue kuenda ovisoko vikuavo va siata oku litumbika koku eca elembeleko. Olondaka vina vieciwa lesunguluko vi sanjuisa calua. Oku eca komunu ovina eye a sukila, ku pondola oku u kuatisa vokuenda kuotembo yimue yitito. Pole, Yehova Suku yocili, eye lika o kuete epondolo lioku tetulula ovitangi viosi kuenda oku eca ekuatiso liocili, momo ovitangi viaco lalimue eteke vikeya vali. Kueci catiamẽla ku Yehova, Embimbiliya li popia ndoco: “Suku, Isia ya Ñala yetu Yesu Kristu, a sivayiwe! Eye Isia yohenda, haeye Suku ukuakulembeleka pokati kovina viosi. O tu lembeleka kohali yetu yosi, okuti tu tẽlavo oku lembeleka ava va tala ohali lelembeleko Suku a tu lembelaka lalio.” (2 Va Korindo 1:3, 4) Ndamupi Yehova a tu lembeleka?

Oku Konomuisa Oku ku Tundilila Ovitangi

3. Ndamupi elembeleko lieciwa la Suku li pondola oku mãlako ovitangi viosi omanu va kasi oku liyaka lavio?

³ Apata osi omanu a piñala ekambo lioku lipua lina lia tunda kekandu lia Adama, kuenje eci oco ca nena ovitangi vi kasi oku tuala omanu vosi kolofa. (Va Roma 5:12) Ovitangi viaco via livokiya calua, momo Satana Eliapu eye “ombiali yoluali lulo.” (Yoano 12:31; 1 Yoano 5:19) Yehova wa linga eliangiliyo limue okuti ka li sokisiwa lesumuo lina omanu va kasi oku liyaka lalio cilo. Eye wa tuma Omõlaye wongunga oco a linge ocisembi coku yovola omanu. Handi vali, Yehova wa tu sapuila okuti, nda tua lekisa ekolelo Komõlaye Yesu, tu pondola oku yovoka kekandu tua piñala ku Adama. (Yoano 3:16; 1 Yoano 4:10) Suku wa popelevo hati, omo okuti Yesu Kristu wa tambula omoko yoku viala tunde oko kilu, toke palo posi, eye oka kundula Satana kuenda olondingaĩvi viosi vi kasi voluali lulo.—⁠Mateo 28:18; 1 Yoano 3:8; Esituluilo 6:2; 20:⁠10.

4. (a) Eliangiliyo lipi Yehova a linga oco li pamise ekolelo lietu kolohuminyo viaye vioku tu yovola? (b) Ndamupi Yehova a siata oku tu kuatisa oco tu limbuke otembo eyovo liaco li keya?

⁴ Oco tu pamise ekolelo lietu kolohuminyo via Suku, eye wa eca ovovangi alua a lekisa okuti, ovitumasuku viaye viosi vika tẽlisiwa. (Yehosua 23:14) Yehova wa kapa Vembimbiliya ovina viosi a siata oku linga oco a yovole omanu vaye kovitangi vina vi molẽha okuti ka vi tẽliwa oku vi tetulula. (Etundilo 14:4-31; 2 Olosoma 18:13–19:37) Lekuatiso lia Yesu Kristu, Yehova wa lekisa okuti, vocipango caye mua kongelavo oku sakula “ovoveyi osi” omanu kuenda oku pindula omanu kolofa. (Mateo 9:35; 11:3-6) Oco hẽ, otembo yipi olohuminyo viaco vika tẽlisiwa? Embimbiliya lieca etambululo poku lombolola ovolandu alua a lekisa okuti, tu kasi koloneke via sulako violuali lulo kuenda oluali lulo ndopo muẽle luka piñanyiwa lilu liokaliye lia Suku kuenda oluali luokaliye. Ovitangi Yesu a lombolola, vi lekisa otembo tu kasi.—⁠Mateo 24:3-14; 2 Timoteo 3:1-5.

Elembeleko Komanu Vana va Kasi Oku Tala Ohali

5. Kosimbu eci Yehova a eca elembeleko ku va Isareli, ovina vipi eye a va ivaluisa?

⁵ Poku ivaluka onjila Yehova a kuama eci a kuatisa va Isareli kosimbu, tu pondola oku lilongisa ndomo eye a va lembeleka kotembo yohali. Suku wa va ivaluisa ndomo Eye a tuwa. Eci ca pamisa ekolelo liavo kolohuminyo viaye. Yehova wa ecelela okuti ovaprofeto vaye va lombolola oku litepa ku kasi pokati kaye okuti eye lika Suku yocili haeye ukuamuenyo okuti ka sokisiwa loviteka vina ka vi pondola oku li kuatisa ovio muẽle loku kuatisavo vana va vi fendela. (Isaya 41:10; 46:1; Yeremiya 10:2-15) Eci Isaya a popia hati, “Lembi, lembi omanu vange,” Yehova wa vetiya uprofeto waye oku linga ovindekaise kuenda oku lombolola ovopange Aye atiamẽla kovina viosi a lulika oco unene Waye u limbukiwe okuti eye lika Suku yocili.—⁠Isaya 40:1-31.

6. Ovovangi api Yehova a ecele komanu vaye olonjanja vimue osimbu handi eyovo liavo ka lieyile?

⁶ Otembo yimue Yehova wa ecele elembeleko poku tukula otembo yimue yitito ale otembo yalua yatiamela ko kuyovuiwa kuomanu vaye. Eci va Isareli va kala ocipepi loku yovuiwa peka lia va Egito, Yehova wa va sapuila hati: “Mbandekako vali eyambulo limosi ku Fareo loke Egito, noke o weci ho tundiko.” (Etundilo 11:⁠1) Eci olofeka vitatu via lundula va Yuda koloneke via Soma Yehosafata, Yehova wa va sapuila okuti, Eye oka va yovola “hela.” (2 Asapulo 20:1-4, 14-17) Kueci catiamẽla koku yovuiwa kuavo peka lia va Bavulono, ca sonehiwile ale la Isaya eci ci soka 200 kanyamo konyima. Kuenje, olonumbi vikuavo via kongelamo, via sonehiwile luprofeto Yeremiya osimbu kua kambele ocita canyamo konyima eci otembo yoku yovuiwa kuavo ka ya pitĩlilepo handi. Ovitumasuku evi, via pamisa calua omanu va Suku eci otembo yavo yoku yovuiwa ya pitilapo!—⁠Isaya 44:26–45:3; Yeremiya 25:11-14.

7. Nye ca kongelele vohuminyo yatiamẽla koku yovuiwa kuenda ndamupi va Isareli vakuekolelo va kongeliwamo?

⁷ Ocili okuti, vohuminyo ya Suku yoku eca elembeleko komanu vaye mua kongelavo ulandu una u lombolola eci catiamẽla ku Mesiya. (Isaya 53:1-12) Ovolandu aco vokuenda kuotembo a eca elavoko liocili komanu vana vakuekolelo osimbu vamamako oku liyaka lovitangi vialua. Kelivulu lia Luka 2:25, tu tangako ndoco: “Vo Yerusalãi mua kala ulume [umue] onduko yaye Simeone, eye ukuesunga, haeye ukuakusumbila Suku, kuenje wa lavoka okulembelekua kua Isareli. Espiritu sandu [lia Suku lia] kala laye.” Simeone, wa kuatelele elavoko ku Mesiya lina lia sonehiwa Vembimbiliya kuenje, elavoko lioku tẽlisiwa kuocitumasuku caco lia pongolola omuenyo waye. Eye ka kuatele elomboloko lia suapo liatiamẽla koku tẽlisiwa kuovitumasuku viaco kuenda ka muĩle oku tẽlisiwa kuovitumasuku viatiamẽla koku yovuiwa. Pole eye wa sanjukile calua eci a limbuka una okuti vokuaye omo Suku aka ecela ‘epopelo komanu.’—⁠Luka 2:⁠30.

Elembeleko Lia Eciwa la Kristu

8. Ndamupi ekuatiso lia eciwa la Yesu li sokisiwa la lina omanu vamue va yonguile oku tambula?

⁸ Osimbu Yesu a kala palo posi oku tẽlisa ocikele caye cupange woku kunda, eye ka ecele ekuatiso liosi omanu va yonguile oku tambula. Omanu vamue va kala oku lavoka okuti kuiya Mesiya umue o va yovola kuviali wa va Roma. Pole, Yesu ka litengele vovitangi violuali. Eye wa va sapuila hati: “Evi via Kaisare vi eci ku Kaisare.” (Mateo 22:21) Vocipango ca Suku ka mua kongelele lika oku yovola omanu kuviali umue woluali, pole mua kongelele ovina vialua. Omanu va yonguile oco Yesu a kale osoma, pole eye wa va sapuila hati, ‘oka eca omuenyo waye ndocimuenyo coku yovola omanu valua.’ (Mateo 20:28; Yoano 6:15) Yesu wa kũlĩhĩle okuti otembo yaye yoku tambula usoma kuenda omoko yoku viala, ka ya pitĩlilepo handi. Eye wa kũlĩhĩlevo okuti omoko yaco yoku viala Yehova eye wa yeca kokuaye kuenda ka yeciwa lomanu vana vakuesakalalo.

9. (a) Esapulo lipi lielembeleko Yesu a sandeka? (b) Ndamupi Yesu a lekisa elomboloko liesapulo liaye komanu vana va kala oku liyaka lovitangi? (c) Upange wa Yesu woku kunda wa eca elavoko lie?

⁹ Elembeleko Yesu a eca liatiamẽlele koku kunda ‘olondaka viwa viusoma wa Suku.’ Eli olio esapulo Yesu a sandeka kovitumãlo viosi eye a endele. (Luka 4:43) Eye wa vetiya elomboloko liesapulo liaco komanu vana va kala lovitangi, poku lombolola eci eye aka lingila omanu lekuatiso Liuviali waye wa Mesiya. Yesu wa ecavo ekuatiso komanu vana va kala oku tala ohali poku va lingila ovina viwa ndeci: Oku sakula olomeke lovitende, (Mateo 12:22; Marko 10:51, 52), oku sakula ovilema (Marko 2:3-12), oku sakula va Isareli vana va kala lovoveyi a linga usumba (Luka 5:12, 13) kuenda oku va sakula kovoveyi akuavo. (Marko 5:25-29) Yesu wa eca ekuatiso liocili kapata a kala lovitangi vialua poku pindula omãla vavo kolofa. (Luka 7:11-15; 8:49-56) Yesu wa lekisavo uloño waye woku tulumũla ahunguhungu ofela kuenda oku eca eteku kowiñi walua womanu va kala onjala. (Marko 4:37-41; 8:2-9) Handi vali, Yesu wa va longisavo olonumbi viekalo, vina via va kuatisa koku tetulula ovitangi viavo kuenje eci ceya oku sanjuisa calua omanu momo va kuata esanju liocili lelavoko liuviali umue wesunga wendisiwa la Mesiya. Osimbu Yesu a kala oku tẽlisa upange waye woku kunda, eye wa eca elembeleko komanu vana va kala oku u yevelela lekolelo. Handi vali, eye wa kolisavo omanu kueci cika lingiwa kotembo yo kovaso vokuenda kuohũlũkãi yanyamo.

10. Ocina cipi ca lingiwa omo liocilumba ca Yesu?

¹⁰ Eci papita cimue ci pitahãla 60 kanyamo tunde kotembo Yesu a eca omuenyo waye ndocilumba kuenje wa pinduka oco a kuate omuenyo wokilu, upostolo Yoano wa vetiyiwa oku soneha ndoco: “Atumãla tuange, ñasi loku vu sonehela ovina evi okuti ka vu lingi vali akandu. Puãi, nda umue o linga ekandu tu kuete oñuatisi yi tu livondelela kovaso a Isia, eye Yesu Kristu ukuesunga. Eye ocitundasonde cakandu etu, puãi akandu etu ha-oko lika, te la-a oluali luosi.” (1 Yoano 2:1, 2) Omo liekuatiso liocilumba ca lipua ca Yesu, etu tu pondola oku tambula elembeleko liocili. Tua kũlĩha okuti, tu pondola oku tambula ongecelo yakandu, oku kuata utima walipua, lukamba wocili la Suku kuenda oku kuata elavoko liomuenyo ko pui.—⁠Yoano 14:6; Va Roma 6:23; Va Heveru 9:24-28; 1 Petulu 3:⁠21.

10. Ocina cipi ca lingiwa omo liocilumba ca Yesu?

Elembeleko Lieciwa Lespiritu Sandu

11. Eliangiliyo lipi likuavo liatiamẽla kelembeleko Yesu a likuminya osimbu handi ka file?

¹¹ Eci Yesu a kala kondalelo ya sulako lolondonge viaye osimbu handi ka file, eye wa tukula eliangiliyo likuavo okuti olio Isiavo wokilu a va lembeleka lalio. Yesu wa popia hati: ‘Ndi pinga ku Isia okuti o wihi espiritu sandu liaye oco liu ku kuatisi otembo yosi.’ Yesu wa li kuminyavo olondonge viaye hati: “Oñuatisi yaco okuti espiritu sandu . . . lika ku longisi ovina viosi kuenda lika ku ivaluisi ovina viosi nda popia lene.” (Yoano 14:16, 17, 26, NW) Ndamupi espiritu sandu lia nena elembeleko kokuavo?

12. Ekuatiso lipi lia siata oku eciwa lespiritu sandu oco olondonge via Yesu vi sokolole eci eye a va longisa oco va ece elembeleko komanu valua?

¹² Ovapostolo va tambula elongiso liocili ku Yesu. Ndaño okuti ovo lalimue eteke nda va ivalako eci va lilongisa, anga hẽ va tẽla oku ivaluka cosi Yesu a va sapuilile? Ovo hẽ nda va ivalako ovina vi kuete esilivilo va lilongisa omo liekambo liavo lioku lipua? Yesu wa va likuminyile okuti, espiritu sandu lika va kuatisa ‘oku ivaluka ovina viosi eye a va longisa.’ Eci papita ci soka anyamo ecelãla tunde kotembo Yesu a fa, Mateo weya oku soneha Evangeliu liatete muna a kapa ulandu wosi Yesu a linga Vohundo yaye yo Komunda. Vulandu waco wa kongelamovo alusapo osi atiamẽla Kusoma kuenda ovina vikuavo eye a lombolola viatiamẽla kondimbukiso yoku tukuluka kuaye. Eci papita ci pitahãla 50 kanyamo, upostolo Yoano weya oku soneha ulandu una u kuete elomboluilo liatiamẽla koloneke via sulako komuenyo wa Yesu palo posi. Koloneke vilo, tu pondola okupa esilivilo liocili kovolandu aco a sonehiwa!

13. Ndamupi espiritu sandu lia kuatisa Akristão kocita catete?

¹³ Espiritu sandu ka lia kuatisile lika olondonge oku ivaluka olondaka via Yesu, pole lia va longisa loku va songuila oco va kuate elomboloko lia suapo liatiamẽla kocipango ca Suku. Osimbu handi Yesu a kala lolondonge viaye palo posi, eye wa vi sapuila ovina vimue okuti ka via va lombolokele ciwa. Pole, lekuatiso liespiritu sandu ovapostolo ndeci: Yoano, Petulu, Tiago, Yuda kuenda Paulu, veya oku soneha ovina vikuavo viatiamẽla koku amamako loku kuata elomboloko liocipango ca Suku. Omo liaco, espiritu sandu lia va longisa kuenda lia va ĩha elomboloko liokuti va kala oku songuiwa la Suku.

14. Ndamupi espiritu sandu lia kuatisa omanu va Yehova?

¹⁴ Espiritu sandu, lia va kuatisavo oku kuata elomboloko liokuti, esumũlũho lina Suku a ecele ku va Isareli, wa li sondoluila kekongelo Liakristão. (Va Heveru 2:⁠4) Ovo va sukilile oku lekisa apako espiritu komuenyo wavo momo apako aco a kuatele esilivilo liocili koku limbuka omanu vana va kala olondonge viocili via Yesu. (Yoano 13:35; Va Galatia 5:22-24) Espiritu sandu lia pamisavo omanu vosi vatiamẽla kekongelo Liakristão oco va pondole oku eca uvangi wocili.—⁠Ovilinga 4:⁠31.

Ekuatiso Lieciwa Eci Kuiya Ovitangi

15. (a) Ovitangi vipi Akristão va siata oku liyaka lavio tunde kosimbu kuenda koloneke vilo? (b) Momo lie vamanji vana va siata oku eca ekuatiso olonjanja vimue va sukililavo oku tambula ekuatiso liaco?

¹⁵ Omanu vosi va litumbika ku Yehova lepokolo liocili kokuaye, va lavoka elambalalo. (2 Timoteo 3:12) Kuli Akristão valua okuti va siata oku pita lelambalalo lialua. Koloneke vilo, vamanji vamue va siata oku lambalaliwa lovanyãli kuenda va siatavo oku tualiwa kovitumãlo vioku kangisiwa, volokayike kuenda oku va kapa kupange una ka wa sungulukile. Olombiali, via siata oku vetiya elambalalo ale oku ecelela okuti ovisoko viomanu vana olongangala va lambalala Akristão, pole olongangala viaco ka vi kangisiwa. Akristão va siata oku liyaka lovitangi vialua viatiamẽla kuhayele ale ovitangi vikuavo viepata. Akristão vana okuti va loñoloha kespiritu, haivo va siata oku eca ekuatiso ku vakuavo oco va tẽle oku yula ovitangi, va siatavo oku liyaka lelambalalo. Omo liaco, olonjanja vimue, manji una eca ekoliso, o sukilavo oku kolisiwa.

16. Eci Daviti a pita lelambalalo ndamupi eya oku tambula ekuatiso?

¹⁶ Eci Soma Saulu a kala oku lambalala Daviti oco o ponde, Daviti wa pinga ku Suku Oñuatisi yaye poku lisiõsiõla hati: ‘A Suku, yeva okulikutilila kuange. Ndi vunda vulembo wavava ove.’ (Osamo 54:2, 4; 57:⁠1) Anga hẽ Daviti wa tambula ekuatiso? Ocili okuti, eye wa tambula ekuatiso. Vokuenda kuotembo yaco, Yehova wa tuma uprofeto Gati la Aviyatare ocitunda oco va ece olonumbi ku Daviti kuenda Eye wa tumavo Yonatão omõla wa Saulu oco a pamise ekolelo lia Daviti. (1 Samuele 22:1, 5; 23:9-13, 16-18) Handi vali, Yehova wa ecelelavo okuti va Filisiti va linga uyaki vofeka kuenje Saulu weya oku liwekapo oku sandiliya Daviti.—⁠1 Samuele 23:27, 28.

17. Eci Yesu a pita velambalalo lialua, pi eye a lupukila oco a tambule ekuatiso?

¹⁷ Eci Yesu Kristu a kala oku pitĩla kesulilo liomuenyo waye palo posi, wa pitavo velambalalo lialua. Eye wa kũlĩhĩle ciwa ndomo ocituwa caye ci pondola oku tiamisiwila konduko ya Isiaye wokilu kuenda ndomo ci tiamisiwilavo kelavo liomanu liatiamẽla kotembo yo kovaso. Eci Yesu a likutilila calua, “asangu a witaila.” Kuenje, Suku wa ecelela okuti, Yesu o tambula ekuatiso lina a sukilile vokuenda kuotembo yohali.—⁠Luka 22:41-44.

18. Elembeleko lipi Suku a ecele Kakristão vo kocita catete eci va liyaka lelambalalo lialua?

¹⁸ Noke yoku tumbikiwa kuekongelo Liakristão kocita catete, ovo veya oku pita lelambalalo lialua. Omo liaco, omanu vosi va kala vekongelo ko Yerusalãi veya oku tilila kolofeka vikuavo pole, ovapostolo ovo lika va sialelemo. Alume lakãi va kokiwa volonjo viavo. Elembeleko lipi Suku a va ĩha? Ekoliso lia tunda Kondaka Yaye lieli liokuti, ovo ‘va kuete ovikuata via velapo haivio ka vi pui,’ okuti ocipiñalo cimue ka ci pui cokilu kumosi la Kristu. (Va Heveru 10:34) Osimbu ovo vamamako kupange wavo woku kunda, veya oku limbuka okuti, espiritu sandu lia Suku lia kala lavo kuenda ovitangi viosi va liyaka lavio via va ĩha esunga lioku kuata esanju liocili.—⁠Mateo 5:11, 12; Ovilinga 8:1-40.

19. Ndaño okuti upostolo Paulu wa tala ohali yalua lelambalalo, ndamupi eye a tenda elembeleko lina lia eciwa la Suku?

¹⁹ Ocili okuti, Saulu (ale upostolo Paulu), una wa lambalalele calua Akristão, weyavo oku pita velambalalo lialua eci a linga Ukristão. Vofeka yo Kupro, mua kala omunu umue onganga okuti wa setekele oku tateka upange wupostolo Paulu, poku u lundila eci ka lingile. Ko Galatia, upostolo Paulu vo wasa lovawe kuenda wa puluka kolofa. (Ovilinga 13:8-10; 14:19) Kofeka yo Makedonia, upostolo Paulu wa tipuiwa lolohava. (Ovilinga 16:22, 23) Noke yelambalalo lialua ko Efeso, eye weya oku soneha ndoco: “[Ohali tua tala] ya tu lema muẽle ca piãla, okuti ka tua sokele layo, kuenje tua kala lohele yomuenyo wetu. Ocili [okuti], tua simile tuti, Tu fa.” (2 Va Korindo 1:8, 9) Pole, vukanda waco, upostolo Paulu wa sonehamo olondaka vielembeleko vina via tukuiwa kocinimbu cavali vocipama cilo.—⁠2 Va Korindo 1:3, 4.

20. Nye tuka lilongisa vocipama cikuãimo?

²⁰ Ndamupi ove o pondola oku eca ekuatiso liove lielembeleko? Koloneke vilo kuli omanu valua okuti eci va pita lovitangi, va sukila ekuatiso omo liovitangi via siata oku veta omanu valua pokati kavo. Vocipama ci kuãimo tuka lilongisa ndomo omanu vaco va pondola oku tambula elembeleko.

Handi Ocivaluka?

• Momo lie elembeleko li tunda ku Suku li kuetele esilivilo liocili okuti eli li tunda komanu li sule?

• Elembeleko lipi lia eciwa la Kristu?

• Elembeleko lipi lia eciwa lespiritu sandu lia Suku?

• Lombolola ulandu welembeleko lia eciwa la Suku eci omanu vaye va pita lovitangi.