Ove hẽ o Kuete ‘Ocituwa Coku Talamẽla?’

“Co sesameli okuti, kovimuenyo viene, vu kola kuenje vu sumbila Suku. Vu kala ndomo osimbu vu lavoka loku yayuisa etukuluko lieteke lia [Yehova] Suku.” ​—⁠2 PETULU 3:​11, 12.

1, 2. Ndamupi tu pondola oku lombolola ‘ocituwa coku talamẽla’ kueci catiamẽla keteke lia Yehova?

SOKOLOLA ndeci okuti epata limue li kasi oku lavoka akombe oco valie kumosi ondalelo konjo yavo. Owola ovo va sokiya yoku tambula akombe yi kasi ocipepi. Ukãi wa sakalala loku malusula oku simbula okulia. Ulume waye kumue lomãla, va sakalala loku kuatisa oco ovina viosi vi sukiliwa kondalelo vi sokiyiwe ciwa. Omanu vosi va sangiwa vepata va sakala. Ocili okuti, epata liosi lia sakalala loku lavoka akombe va kasi oku iya momo va kevelela okulia ondalelo yimue yiwa kuenda oku kuata ukamba umue uwa lakombe.

² Etu Tuakristão tu kasivo oku lavoka ocina cimue ci kuete esilivilo lia velapo. Nye tu kasi oku lavoka? Vosi yetu tu kasi oku lavoka “eteke lia [Yehova] Suku”! Osimbu handi eteke liaco ka lieyile, vosi yetu tu sukila oku kuama ongangu yuprofeto Mika wa popia hati: “Ame njimbila Yehova ovaso, nalamẽla Suku yeyovo liange.” (Mika 7:⁠7) Anga hẽ eci ci lomboloka okuti tu kuata owesi? Sio, hacoko. Kuli upange walua usukila oku lingiwa.

3. Ndomo elivulu lia 2 Petulu 3:​11, 12 li lombolola, ocituwa cipi Akristão va sukila oku kuata?

³ Upostolo Petulu o tu kuatisa oco tu kuate ocituwa ca sunguluka osimbu tu amamako oku talamẽla. Eye wa popia hati: “Co sesameli okuti, kovimuenyo viene, vu kola kuenje vu sumbila Suku. Vu kala ndomo osimbu vu lavoka loku yayuisa etukuluko lieteke lia [Yehova] Suku.” (2 Petulu 3:​11, 12) Kũlĩhĩsa okuti, olondaka evi vi lekisa upopi umue woku komõha. Upostolo Petulu olondaka viaye ka vi lekisa epulilo lieci catiamẽla kovituwa vietu. Lekuatiso liespiritu sandu vovikanda viaye vivali eye wa lombolola ndomo Akristão va sukila oku kala. Eye wa va vetiya oco vamameko loku ‘kola kuavo kuenda oku sumbila Suku.’ Ndaño okuti tunde eci Yesu a lomboluila kolondonge viaye eci catiamẽla ‘kondimbukiso yesulilo lioluali’ pa pitile ale eci ci soka 30 kanyamo, pole Akristão ka va liwekelepo oku lavulula. (Mateo 24:⁠3) Ovo va sukilile muẽle ‘oku lavoka’ oku iya kueteke lia Yehova.

4. Nye ca kongeliwa voku “lavoka . . . etukuluko lieteke lia [Yehova] Suku”?

⁴ Ondaka yo Helasi ‘oku yayuisa,’ yi lombolokavo “onjanga.” Ocili okuti, etu ka tu pondola oku “yayuisa eteke lia Yehova” momo ‘ka tua kũlĩhĩle owola’ Yesu Kristu akeya oku linga esombiso kovanyali va Isiaye. (Mateo 24:36; 25:13) Elivulu limue li lombolola okuti, ondaka ‘oku yayuisa’ yi lomboloka oku lupukisa ocina cimue kuenda ondaka yaco yitiamisiwilavo koku kuata ombili locina caco. Omo liaco, upostolo Petulu wa kala oku vetiya akamba vaye oco va kevelele lonjongole yocili okuiya kueteke lia Yehova. Ovo va tẽla oku ci linga poku ivaluka eteke liaco olonjanja viosi. (2 Petulu 3:12) Omo okuti “eteke linene lia Yehova, hailio li yokokisa” li kasi ocipepi, etu tu sukilavo oku lekisa ocituwa cimuamue.​—⁠Yoeli 2:⁠31.

Oku Kevelela Loku ‘Lekisa Ovituwa Viwa’

5. Ndamupi tu pondola oku lekisa okuti tu kuete onjongole yocili yoku mõla ‘eteke lia Yehova Suku’?

⁵ Nda tu kuete onjongole yocili yoku puluka keteke lia Yehova, tuka tẽla oku ci ‘lekisila kovituwa viwa kuenda esumbilo liocili ku Suku.’ Ondaka ‘oku lekisa ovituwa viwa’ yi tu ivaluisa elungulo liupostolo Petulu wa popia hati: “Kali ndomãla va pokola okuti, ka vu pangisui loloñeyi vĩvi ndeci wa kaili koloneke vionumbi yene. Puãi, ndeci u wo kovongi a kola, lenevo koli kovilinga viene viosi. Momo ca sonehiwa hati, Omo ame ñola oco lenevo vu kola.”​—⁠1 Petulu 1:​14-16.

6. Nye tu sukila oku linga oco tu kale omanu vamue va kola?

⁶ Oco tu kale omanu vamue va kola, tu sukila oku liyelisa ketimba, kovisimĩlo, kekalo lietu kuenda oku liyelisa kespiritu. Anga hẽ tu kasi oku li pongiyila ‘eteke lia Yehova Suku’ poku kuata ovituwa viwa vi lekisa okuti tumanu vamue vambata onduko ya Suku okuti Yehova? Koloneke vilo, ka ca lelukile oku amamako loku liyelisa momo ovihandeleko viekalo lioluali lulo ka via sumbiwile vali. (1 Va Korindo 7:31; 2 Timoteo 3:13) Anga hẽ tu kasi oku limbuka oku litepa ku sangiwa pokati kovihandeleko vietu viekalo kuenda evi vi letiwe voluali lulo? Nda ka tua limbukile handi oku litepa kuaco, tu sukila oku sakalala londaka eyi. Anga hẽ ovituwa vietu vina via velapo, vi kasivo oku nyõleha ndeci ci kasi oku pita lovituwa violuali lulo? Nda vi kasi oku nyolẽha, tu sukila oku likolisilako oku linga eci ca sunguluka oco tu sanjuise Suku.

7, 8. (a) Ndamupi tu pondola oku siapo oku ‘lekisa ovituwa viwa’? (b) Nye ci sukiliwa oku lingiwa kueci catiamẽla kondaka eyi?

⁷ Omo okuti kaliye ca leluka oku talela vo Internet omanu vana va kasi epolõla, ndotolo umue wa lombolola hati: omanu vamue okuti tete ka va kuatele epondolo lioku tala ovina viaco, cilo va siata oku “sanga apuluvi alua atiamẽla kolonjila vioku lipekela.” Nda tua tala ovina viaco vo Internet, eci ci lekisa okuti, ka tu kasi oku pokola kolonumbi Viembimbiliya viatiamẽla koku yuvula ‘oku lamba kovina via vĩha.’ (Isaya 52:11) Anga hẽ tu kasi muẽle oku “lavoka . . . etukuluko lieteke lia [Yehova] Suku”? Ale tua ivalako loku sima okuti ndaño tu kasi oku yukisa vovitima vietu ovisimĩlo via vĩha viatiamẽla kukahonga, handi lopo tu kuete otembo yoku liyelisa kovina viaco? Nda tu kasi oku liyaka locitangi catiamẽla koku tala omanu vana va kasi epolõla, tu sukila oku yayulako loku likutilila ku Yehova oco a ‘tiule ovaso etu kovitalukilo viesanda okuti o tu lava loku endela volonjila viaye’!​—⁠Osamo 119:⁠37.

⁸ Onepa yalua Yolombangi via Yehova amalẽhe kuenda akulu, va kasi oku likolisilako oku pokola kolonumbi via Suku via velapo kuenda oku yuvula ayonjo avĩha oluali lulo. Omo okuti ovo va kũlĩha onjanga yotembo yilo tu kasi ndeti kuenda oku kapako elungulo liupostolo Petulu wa popia hati, “eteke lia Ñala [Yehova] . . . liya ndocimunu,” ovo va kasi oku amamako oku ‘lekisa ovituwa viwa.’ (2 Petulu 3:10) Ovilinga viavo, vi lekisa okuti va kasi oku “lavoka . . . etukuluko lieteke lia [Yehova] Suku.” a

Oku Kevelela Loku ‘Lekisa Ovilinga Vioku Sumbila Suku’

9. Ovilinga vioku sumbila Suku vi tu vetiya oku linga nye?

⁹ ‘Ovilinga vioku sumbila Suku’ vi kuetevo esilivilo liocili nda tua kapako eteke lia Yehova. Voku ‘lekisa ovilinga viwa’ mua kongela oku lekisa esumbilo lietu ku Suku okuti tu vetiyiwa oku linga eci cu u sanjuisa. Epokolo ku Yehova li vetiyiwa lovilinga vina vioku lekisa esumbilo kokuaye. Yehova o yongola okuti, “omanu vosi va popeliwa ha veya kukũlĩhisio wocili.” (1 Timoteo 2:⁠4) Suku “ka yongola okuti umue o nyõleha, puãi o yongola okuti [omanu] vosi va likekembela akandu avo.” (2 Petulu 3:⁠9) Anga hẽ oku lekisa kuetu ovilinga viwa ku Suku ka ku tu vetiya oku likolisilako oku kuatisa omanu oku lilongisa eci catiamẽla ku Yehova oco va kuame ongangu yaye?​—⁠Va Efeso 5:⁠1.

10. Momo lie tu sukilila oku yuvula ‘eliaño liukuasi woluali’?

¹⁰ Etu tu pondola oku lekisa ovilinga vioku sumbila Suku nda tua pitisa kovaso Usoma wa Suku komuenyo wetu. (Mateo 6:33) Vovilinga viaco mua kongela oku ambata omuenyo umue wa pita ño pokati okuti tu yuvula oku sakalala lovokuasi oluali. Yesu wa lungula hati: “Lunguki kuenda liuviki kocipululu cosi, momo omunu, ndaño ohuasi enene, haimo omuenyo waye [ka u tundi kovina eye a kuete].” (Luka 12:15) Ndaño okuti ka ca lelukile kokuetu oku yuvula oku sola calua olombongo, pole tu linga ciwa poku kũlĩha okuti, ‘oku sakalala lovina violuali kuenda eliaño liukuasi’, ci pondola “oku totomisa ondaka” ya Suku. (Mateo 13:22) Citava okuti pamue ka ci leluka oku sanga eci omunu a sukila komuenyo. Kolonepa vimue violuali, omanu valua va siata oku sima okuti, oco omunu a kuate omuenyo umue uwa o sukila oku ilukila kolofeka vina kuli ovokuasi alua okuti o siapo epata liaye vokuenda kuanyamo amue. Omanu valua va Suku va siatavo oku kuata ovisimĩlo viaco. Poku ilukila kofeka yimue yikuavo, ovo ci tava okuti va pondola oku eca kepata liavo ovina va sukila okuti ovio via siata koloneke vilo. Oco hẽ konepa yespiritu nye ci pondola oku pita lepata lia siala konjo? Nda epata lia siala konjo ka li kuete u o li songuila lika pondola hẽ oku kuata eci va sukila kespiritu oco vaka puluke keteke lia Yehova?

11. Ndamupi ulume umue wa sandiliya upange kofeka yikuavo a limbuka okuti ovilinga vioku sumbila Suku via velapo ukuasi woluali lulo?

¹¹ Ulume umue wa tunda kofeka yo Filipina omo lioku sandiliya upange kolofeka vikuavo, weya oku lilongisa Embimbiliya Lolombangi via Yehova vio kofeka yo Japão. Omo lioku lilongisa Vembimbiliya eci catiamẽla kocikele cusongui wepata, eye weya oku limbuka okuti wa sukilile oku kuatisa epata liaye oco va kale afendeli va Yehova. (1 Va Korindo 11:⁠3) Ukãi waye weya oku suvuka calua etavo liokaliye liulume waye, momo wa yonguile okuti ulume waye o kala muẽle kofeka yaco loku u tumisa lika olombongo okuti ka tiukila vali konjo oco ka ka longise epata liaye ocili ci sangiwa Vembimbiliya. Omo okuti ulume wa limbuka onjanga yotembo kuenda ocisola a kuatela epata liaye, eye wa tiukila konjo. Omo liepandi eye a lekisa kepata liaye, weya oku tambula onima yocili. Vokuenda kuotembo, epata liaye liosi lieya oku linga afendeli vocili va Yehova kuenje ukãi waye wa litumbika kupange wakundi votembo yosi.

12. Momo lie tu sukilila oku pitisa kovaso ovina viespiritu komuenyo wetu?

¹² Ekalo lietu ci tava okuti li sokisiwa lomanu vamue va kasi vosapalalo yimue yi kasi oku timihĩwa. Anga hẽ ca sunguluka oku enda vosapalalo yaco oco tupemo ovikuata vietu vi kasi kohele? Ka ca velelepo hẽ oku yovola omuenyo wetu muẽle lowu wepata lietu kuenda womanu vakuavo va kasi vosapalalo yaco? Ocili okuti, oluali lulo lua vĩha lupanda kenyolẽho kuenda omuenyo womanu u kasi kohele. Omo lioku ci limbuka, tu sukila oku pitisa kovaso ovina viespiritu kuenda oku litumbika kupange woku yovola ovimuenyo viomanu poku va kundila esapulo Liusoma.​—⁠1 Timoteo 4:⁠16.

Tu Sukila Oku Yuvula ‘Eliño Lioluali’

13. Ekalo lipi tu sukila oku kuata eci eteke lia Yehova liya?

¹³ Poku lombolola esilivilo lioku kuata ocituwa coku talamẽla, upostolo Petulu wa popia hati: ‘A vakuacisola, omo vu lavoka ovina evi, kolisiko okuti eci vu sangiwa laye, vu kala lombembua, ka vu kuata eliño lioluali ndaño atime.’ (2 Petulu 3:14) Handi vali, kelungulo liaye liatiamẽla koku lekisa ovituwa viwa kuenda ovilinga vioku sumbila Suku, upostolo Petulu wa lombololavo esilivilo lioku sangiwa la Yehova okuti omunu lomunu wa yelisiwa vosonde ya Yesu. (Esituluilo 7:​9, 14) Poku ci linga, omunu o sukila oku lekisa ekolelo liocili kocilumba cosonde ya Yesu kuenda oku litumbika loku papatisiwa loku kala ondingupange ya Yehova.

14. Nye ca kongeliwa voku yuvula ‘eliño lioluali’?

¹⁴ Upostolo Petulu o tu vetiya oco tu likolisileko oku ‘yuvula eliño lioluali.’ Etu hẽ tu kasi oku tata ciwa uwalo wetu kespiritu poku lekisa ovituwa viwa loku yuvula eliño lioluali okuti ka tu yonjiwa loluali? Eci tu limbuka okuti vuwalo wetu mua wila eliño limue, vonjanja yaco haico tu yayulako oku liupamo. Nda eliño liaco lia lokila vuwalo una tu sole vali calua, etu tu likolisilako loku sukula eliño liaco toke eci li tunda vuwalo waco. Anga hẽ tu kuamavo onjila yimuamue nda tua limbuka okuti tua fetika oku vĩhisa ovituwa vietu kespiritu omo liocina cimue cĩvi tua linga?

15. (a) Momo lie va Isareli va tongelele olonjenje kasũsu uwalo wavo? (b) Momo lie koloneke vilo omanu va Yehova va litepela loluali lulo?

¹⁵ Va Isareli va ‘tongelele olonjenje kasũsu uwalo wavo’ kuenda ‘oku tongihinya kolonjenje viaco ukolo umue u kuete evala livumbula.’ Momo lie? Ovo va ci lingilile oco va ivaluke ovihandeleko via Yehova poku pokola kokuavio okuti va tendiwa ‘ndomanu vamue va kola’ kovaso a Suku yavo. (Atendelo 15:​38-40) Koloneke vilo, etu tumanu va Yehova tua litepavo loluali lulo omo lioku pokola kuetu kovihandeleko via Suku. Handi vali, tu kuete ovituwa vimue viwa, tua sumbila calua osonde momo yi kola kuenda tu yuvulavo ovina viosi viatiamẽla koviteka. (Ovilinga 15:​28, 29) Omanu valua va siata oku tu sumbila calua omo lioku yuvula kuetu eliño lioluali.​—⁠Tiago 1:⁠27.

Tu Sukila Oku Yuvula “Atime” Oluali

16. Nye ca kongela kokuetu oku yuvula oku kuata “atime” oluali?

¹⁶ Upostolo Petulu wa popia hati, tu sukila oku yuvula oku kuata “atime” oluali. Ndamupi eci ci tẽliwa? Etime ci tava okuti li sukuiwa lovava, pole nda etime liaco lialua, handi pa siala ondimbukiso yetime liaco. Omo liaco, eci ci lomboloka okuti etime ocina cimue cimue cĩvi. Upostolo Paulu wa lungula Akristão vo ko Filipoi hati: “Cosi vu linga ci lingi loku yuvula oku lisiõsiõla kuenda olonatoma, okuti vu linga omãla va Suku ve lipua, haene vu pua etondelo, kuenje vu kala pokati kocitumbulukila cilo cevĩho loku tatama ndomanu va pua eko. Voluali lulo luowelema vu tua ndolombungululu.” (Va Filipoi 2:​14, 15) Nda tua pokola kelungulo liaco, tuka yuvula oku lisiõsiõla loku kuata olonatoma kuenda tuka vumba Suku lesunguluko liocili. Tuka lekisa ocisola ku Yehova kuenda komanu vana va kasi posongo yetu poku va kundila ‘olondaka viwa viusoma.’ (Mateo 22:​35-40; 24:14) Handi vali, tuka kuata onjongole yoku amamako oku sandeka olondaka viwa viusoma ndaño okuti omanu valua ka va kuata elomboloko lieci tu pesilila otembo yetu koku kuatisa vakuetu oku lilongisa eci catiamẽla ku Suku kuenda Kondaka Yaye yi sangiwa Vembimbiliya.

17. Ovisimĩlo vipi tu sukila oku kuata eci tu tambula ocikele cimue cupange vekongelo?

¹⁷ Omo okuti tu yongola oku yuvula oku kuata “atime” oluali, tu sukila oku li konomuisa etu muẽle kolonepa viosi viomuenyo wetu. Etu tua siapo ovituwa viosi viatiamẽla koku tẽlisa lika olonjongole vietu ndeci oku sandiliya ovokuasi oluali ale oku livelisapo etu muẽle. Nda tu likolisilako oku tambula ovikele viupange vekongelo, ci tava okuti tu kuata ovisimĩlo via sunguluka kuenda olonjanja viosi tu ka vetiyiwa oku lekisa ocisola ku Yehova kuenda komanu. Ci nena esanju lialua oku mõla vamanji alume va loñoloha kespiritu poku lekisa kuavo ‘onjongole yoku kala akulu vekongelo’ omo liumbombe wavo woku linga akuenje va Yehova kuenda oku kuatisa vakuavo vekongelo. (1 Timoteo 3:1; 2 Va Korindo 1:24) Omo liaco, alume vosi va loñoloha koku kala akulu vekongelo, va “lava ocunda ca Suku . . . hamekondako liocipululu conganyo te lutima wombili ndeci Suku a va yonguila, haloku tulamelako ava va kundikiwa [kokuavo] te oku eca ongangu kocunda.”​—⁠1 Petulu 5:​1-4.

Tu Sukila Oku Kala ‘Lombembua’

18. Ovituwa vipi via kũlĩhĩwa ciwa okuti ovio Olombangi via Yehova via siata oku lekisa?

¹⁸ Poku sulako, upostolo Petulu o tu lomboluila hati tu sukila oku kala ‘lombembua.’ Oco tu pokole kelungulo eli, tu sukila oku kala lombembua la Yehova kuenda la vakuetu tu lisungue lavo. Upostolo Petulu wa lombolola esilivilo lioku ‘lekisa ocisola cocili ku vakuetu’ kuenda oku kala lombembua la vakuetu Akristão. (1 Petulu 2:17; 3:​10, 11; 4:8; 2 Petulu 1:​5-7) Oco tu amameko lombembua, tu sukila oku lekisa ocisola ku vakuetu. (Yoano 13:​34, 35; Va Efeso 4:​1, 2) Ocisola cetu lombembua, ca siata oku limbukiwa eci ku lingiwa olohongele viofeka okuti vamanji va tunda kolofeka viñi viñi va liongoluila pocitumãlo cimuamue. Kohongele yimue yofeka ya lingiwila kofeka yo Kosta Rika kunyamo wo 1999, umue wa siata oku landisila kocila colombalãu wa sumuile calua omo okuti Olombangi via Yehova vio vofeka yavo eci via endele kocila caco colombalãu oku ka tambula akombe, via kala kovaso yocitumãlo caye coku landisila. Pole, keteke liavali, omunu waco ukuakulandisa, wa limbuka ocisola lombembua ya lekisiwa Lolombangi via Yehova poku tambula akombe lonjolela ndaño okuti ovo ka va li kũlĩhĩle lakombe vaco. Keteke lia sulako lioku tambula akombe, omunu una ukuakulandisa wa li kongelavo kendo Liolombangi via Yehova via kala oku tambula akombe kuenje noke eye wa pinga elilongiso Liembimbiliya.

19. Momo lie ci kuetele esilivilo oku kala lombembua la vamanjetu Akristão?

¹⁹ Ocili cetu coku lekisa ombembua ku vamanjetu kespiritu owo uvangi u lekisa onjongole yetu osimbu tu amamako oku lavoka eteke lia Yehova oco tu kale voluali luokaliye luna eye a tu likuminya. (Osamo 37:11; 2 Petulu 3:13) Sokolola ndeci nda tu kuete ocitangi la manji umue Ukristão okuti ka ca tu lelukilile oku kala lombembua laye. Tu pondola hẽ oku sokolola ndomo tuka kala lombembua lamanjaco Voluali Luokaliye? Nda tu kuete ocitangi la manji umue, tu sukila oku yayulako oco ‘tu li sunguluise laye.’ (Mateo 5:​23, 24) Ci kuete esilivilo liocili oku ci linga nda tu yongola oku kuata ombembua la Yehova.​—⁠Osamo 35:27; 1 Yoano 4:⁠20.

20. ‘Ocituwa coku talamẽla’ ci limbukiwila konepa yipi?

²⁰ Anga hẽ etu muẽle tu kuete onjongole yoku “lavoka . . . etukuluko lieteke lia [Yehova] Suku”? Onjongole yetu yoku tala esulilo liovina viosi vĩvi yi limbukiwila koku amamako kuetu oku yuvula ovina viosi via vĩha violuali lulo. Handi vali, onjongole yetu yoku pitila kueteke lia Yehova oco tu kale vemẽhi liuviali Wusoma, yi limbukiwila kovilinga vietu vioku sumbila Suku. Elavoko lietu lioku kala lombembua voluali luokaliye olio li tu vetiya oku kuata ombembua cilo la vamanjetu tu fendelela lavo kumuamue. Poku ci linga, ci lomboloka okuti tu kasi oku lekisa ‘ocituwa coku talamẽla’ osimbu tu amamako oku “lavoka . . . etukuluko lieteke lia [Yehova] Suku.”

[Etosi pombuelo yemẽla]

Handi Ocivaluka?

• Oku “lavoka . . . etukuluko lieteke lia [Yehova] Suku” ci lomboloka nye?

• Ndamupi ‘ocituwa coku talamẽla’ ci lekisiwila kovilinga vietu?

• Momo lie ‘ovilinga vioku sumbila Suku’ vi kuetele esilivilo?

• Nye tu sukila oku linga oco ‘Yehova a tu sange lombembua okuti ka tu kuete eliño lioluali ndaño atime’?

[Picture on page 11]

‘Ocituwa coku talamẽla’ ci limbukiwila koku lekisa ovilinga viwa

[Picture on page 12]

Upange woku kunda Usoma owo u yovola ovimuenyo viomanu

[Picture on page 14]

Osimbu tu lavoka eteke lia Yehova, tu amamiko oku kala lombembua la vakuetu