Yehova Eca ‘Espiritu Liaye Kuava Vo Pinga’
“Nda ene wa tuwi ale oku linga cĩvi, wa kũlĩhĩ oku eca oviali viwa komãla vene, Isiene ukuailu hẽ, ka velipo oku avela espiritu sandu kuava vo pinga?”—LUKA 11:13.
1. Vepuluvi lipi tu sukila ekuatiso liespiritu lia Yehova?
OMANU vamue, va siata oku popia hati: ‘Si tẽla oku liyaka lovitangi evi likawange. Espiritu li kola olio li ñuatisa oku pandikisa kovitangi viaco.’ Ove hẽ eteke limue wa popelevo olondaka ndevi? Akristão valua va siata oku popia olondaka viaco. Citava okuti wa popele ale olondaka evi, noke yoku limbuka okuti wa kuatiwa luvei umue u koka ohele. Pamue wa popia olondaka evi eci wa fisa ohueli yove. Handi vali, citava okuti wa popia olondaka viaco, eci wa liyaka locitangi cimue ca ku nenela esumuo. Pole, noke wa limbuka okuti, espiritu lia Yehova olio lia ku ĩha ‘unene wa piãla’ woku yula ovitangi viaco.—2 Va Korindo 4:7-9; Osamo 40:1, 2.
2. (a) Ovitangi vipi Akristão va siata oku liyaka lavio? (b) Apulilo api tu konomuisa vocipama cilo?
2 Omo okuti tulondonge via Kristu, tua siata oku liyaka lovitangi kuenda elambalalo voluali lulo luevĩho. (1 Yoano 5:19) Olondonge via Kristu, via siata oku lambalaliwa la Satana. Momo eye o kasi oku yaka la vana “va lava ovihandeleko via Suku, kuenje va imbila Yesu uvangi.” (Esituluilo 12:12, 17) Koloneke vilo, tu sukila ekuatiso liespiritu lia Yehova okuti kosimbu ci sule. Nye tu sukila oku linga oco tu limbuke okuti tu kasi oku kuatisiwa lespiritu lia Yehova? Momo lie tu kuetele ekolelo liokuti Yehova o tu pamisa eci tu liyaka lovitangi? Atambululo kapulilo ava, a sangiwa valusapo avali a Yesu.
Likutilila Olonjanja Viosi
3, 4. Olusapo lupi Yesu ata, kuenda wa lu tiamisila ndati kolohutililo?
3 Umue pokati kolondonge wa pingile ku Yesu hati: “A Ñala, tu longise oku likutilila.” (Luka 11:1) Yesu poku tambulula olondonge viaye, wata alusapo avali. Olusapo lua tete luatiamẽla kulume umue wa laleka akombe konjo yaye. Luavali, lua isia o yevela lutate omõlaye. Tu konomuisi alusapo aco.
4 Yesu wa popia hati: “Nda umue pokati kene o kuete ekamba kuenje enda kokuaye vokati kuteke oku popia laye hati, akamba, ngundike olombolo vitatu, momo ekamba liange wa enda ungende, weya konjo yetu, ame puãi si kuete eci ndu poka. Eye puãi o kumbuluila vokati hati: Ku ka nduahalise [ale ku ka ndi sakalaise]. Epito lia yikiwa, kuenda omãla vange vava kumue lame vula, oco si ci tẽla oku pasuka si ku ĩha. Mopia lene siti: Ndaño ka pasuka oku wĩha omo ekamba liaye, haimo o pasukila olupili luaye ha wiha viosi a suka.” Noke, Yesu poku lombolola ndomo olusapo olu lu tiamisiwila koku likutilila, wa popia hati: “Mopia lene siti: Pingi kuenje cu wihiwi, vanjiliyi kuenda vu sanga, totoli, kuenje vo yikuluili. Momo wosi o pinga, o tambula; u o vanjiliya, o sanga; u o totola, vo yikuluila.”—Luka 11:5-10.
5. Olusapo lulume wamamako loku totola kepito lu tu longisa nye catiamẽla koku likutilila?
5 Olusapo lulume wa lipilika, lu lekisa okuti, tu sukila oku amamako oku likutilila. Yesu wa lombolola okuti, ulume wa tambula eci a sukilile omo lioku pinga ‘lolupili.’ (Luka 11:8) Ondaka “olupili,” ya tukuiwa lika onjanja yimosi Vembimbiliya. Ondaka yaco, yopiwa kelimi lio Helasi, yi lomboloka ‘oku yuvula oku kuata osõi.’ Olonjanja vimue, oku yuvula oku kuata osõi, ocituwa cimue ka ca sungulukile. Pole, nda ocituwa caco ci lekisiwa lonjila yimue ya sunguluka, ci taviwa. Eci oco ca pita lulume una wa yekisile ukombe. Eye ka kuatele osõi yoku pinga okulia a sukilile. Olusapo lua Yesu luatiamẽla kulume wa pinga lolupili okulia a sukilile, lu tu ĩha ongangu yoku amamako oku likutilila. Yehova o yongola okuti, tu ‘amamako oku pinga, loku sandiliya, kuenda oku totola.’ Nda tua ci linga, eye o tu tambulula kuenda ‘o tu ĩha espiritu liaye.’
6. Koloneke via Yesu omanu va tendele ndati ocituwa coku yekisa akombe?
6 Yesu ka lekisile lika ndomo tu likutilila lolupili, pole wa lekisa esunga lieci tu sukilila oku ci linga. Oco tu kuate elomboloko liaco, tu sukila oku konomuisa eci catiamẽla ku vana va yevelela olusapo lua Yesu luatiamẽla kulume wa pinga lolupili eci a sukilile. Kuenda tu sukilavo oku konomuisa ndomo va tendele ocituwa coku yekisa akombe. Embimbiliya li kuete ovolandu alua a lekisa okuti, kosimbu omanu va kapeleko ocituwa coku yekisa akombe, ca piãla enene afendeli va Yehova. (Efetikilo 18:2-5; Va Heveru 13:2) Omanu vana ka va kuatele ocituwa coku yekisa akombe, va enda oku lekisa etombo. (Luka 7:36-38, 44-46) Omo liaco, tu konomuisi olusapo lua Yesu.
7. Momo lie ulume wa tukuiwa volusapo lua Yesu ka kuatelele osõi yoku pasula ekamba liaye?
7 Ulume wa tukuiwa volusapo lua Yesu, wa tambuile ukombe vokati kuteke. Eye, wa yonguile oku eca okulia kukombe waye, pole, ‘ka kuatele eci o poka.’ Kuenje, wa sukilile oku linga cimue lonjanga oco a sange ombolo yoku eca kukombe. Omo liaco, wa endele lonjanga oku pasula ekamba liaye. Noke wa popia hati: “Akamba, ngundike olombolo vitatu.” Ulume waco, wamamako loku totola kepito toke eci a tambula olombolo a sukilile. Eye wa linga lika onjekisi yiwa yakombe, noke yoku tambula olombolo.
Tuamamiko Loku Likutilila
8. Nye ci tu vetiya oku likutilila olonjanja viosi oco tu tambule espiritu lia Yehova?
8 Olusapo lua Yesu lu lekisa nye catiamẽla kueci tu sukilila oku likutilila olonjanja viosi? Ulume wa lipilikile loku pinga, wa kũlĩhĩle okuti, wa sukilile oku kuata olombolo oco a linge onjekisi yiwa yakombe. (Isaya 58:5-7) Nda ka tambuile olombolo, nda ka tẽlisile ocikele caye. Olusapo olu lu lekisa okuti, etu Tuakristão tu sukila ekuatiso liespiritu lia Yehova oco tu tẽlise upange wetu woku kunda. Omo liaco, tu sukila oku amamako oku likutilila ku Yehova oco a tu ĩhe espiritu liaye. (Sakariya 4:6) Nda ka tua tambuile espiritu Liaye, tu wila veyonjo. (Mateo 26:41) Ove hẽ wa limbuka elomboloko liolusapo olu? Tu sukila oku tenda espiritu lia Yehova ndocina cimue tu sukila. Nda tua ci linga tu kuata onjongole yoku amamako oku likutilila oco li tu kuatise.
9, 10. (a) Lombolola esunga lieci tu sukilila oku likutilila olonjanja viosi loku pinga espiritu lia Yehova. (b) Epulilo lipi tu sukila oku linga kuenda momo lie?
9 Poku tiamisila olusapo lua Yesu koloneke vilo, sokolola ndeci okuti, umue vepata liove wa kuatiwa loku vela vokati kuteke. Anga hẽ kuka pasula ondotolo oco yece ovihemba kombei? Nda omunu waco ka vela calua ka sukila ovihemba. Pole, nda wa kuatiwa luvei wutima, ove ku kuata osõi yoku vilikiya ondotolo. Momo lie? Momo ombei yi sukila oku tambula lonjanga ovihemba. Ove o limbuka okuti, ekuatiso liondotolo li sukiliwa. Nda kua vilikiyile lonjanga ondotolo, ombei yi fa. Cimuamue haico Akristão va sukila oku linga koloneke vilo. Momo Satana o kasi “ndohosi yi koma,” yi yongola oku tu lia. (1 Petulu 5:8) Oco tu kuate ukamba la Yehova, tu sukila oku pinga ekuatiso liespiritu liaye, nda ka tua ci lingile, tu kuata ovitangi. Omo liaco, tu sukila oku amamako oku pinga espiritu lia Yehova. (Va Efeso 3:14-16) Nda tu ci linga, tu pandikisa toke kesulilo lioluali lulo.—Mateo 10:22; 24:13.
10 Olonjanja vimue, tu sukila oku lipula ndoco: ‘Anga hẽ, nda siata oku likutilila olonjanja viosi?’ Eci tu limbuka okuti tu sukila ekuatiso lia Suku, ci tu vetiya oku amamako loku likutilila oco tu tambule espiritu liaye.
Nye ci tu Vetiya Oku Likutilila Lekolelo?
11. Olusapo lua isia lomõla, Yesu wa lu tiamisila ndati koku likutilila?
11 Olusapo lua Yesu luatiamẽla kulume wa likutilila lolupili, lu lekisa ocituwa coku likutilila lekolelo. Olusapo lukuãimo, lu lombolola eci catiamẽla ku Yehova ukuakuyevelela olohutililo. Yesu wa pula hati: “Pokati kene isia yipi o kasi lomõla, nda o pinga olusi o wiha onyõha, olũsi haluoko? Pamue nda o pinga esala, o wiha enyenya?” Noke, Yesu wamisako loku lombolola olusapo luaye hati: “Nda ene wa tuwi ale oku linga cĩvi, wa kũlĩhĩ oku eca oviali [ale ovina] viwa komãla vene, Isiene ukuailu hẽ, ka velipo oku avela espiritu sandu kuava vo pinga?”—Luka 11:11-13.
12. Olusapo luonjali yi yevelela kepingilo liomõlaye lu lekisa ndati onjongole ya Yehova yoku tambulula olohutililo vietu?
12 Olusapo lua Yesu luonjali yeca komõla eci a sukila, lu lekisa okuti, Yehova o tambulula vana va likutilila kokuaye. (Luka 10:22) Catete, tu konomuisi alusapo ava avali. Ulume wa tukuiwa volusapo luatete wa litepa la Yehova, momo, ka tavele oku eca lonjanga ekuatiso kekamba liaye. Pole, Yehova o sokisiwa lonjali yeca lonjanga ekuatiso komãla vaye eci vo pinga. (Osamo 50:15) Noke, Yesu wa lombolola onjongole Yehova a tu kuetele, poku u sokisa lonjali yimue. Eye wa popia hati, nda onjali ka yalipuile yeca ovina viwa komõlaye, Yehova eca espiritu liaye kafendeli vaye!—Tiago 1:17.
13. Ekolelo lipi tu kuata poku likutilila ku Yehova?
13 Nye tu lilongisa volusapo olu? Tu pondola oku kolela okuti, Yehova okuete onjongole yoku tu ĩha espiritu Liaye li kola, eci tu likutilila Kokuaye. (1 Yoano 5:14) Eci tu lipilika, Yehova ka tu tambulula hati: ‘Kuka ndi sakalaise. Epito lia yikiwa.’ (Luka 11:7) Pole, Yesu wa popia hati: “Pingi kuenje cu wihiwi, vanjiliyi kuenda vu sanga, totoli, kuenje vo yikuluili.” (Luka 11:9, 10) Omo liaco, eci tu vilikiya, Yehova o ‘tu tambulula.’—Osamo 20:9; 145:18.
14. (a) Nye vamue va siata oku sima eci va liyaka lovitangi? (b) Momo lie tu sukilila oku likutilila ku Yehova eci tu liyaka lovitangi?
14 Olusapo lua Yesu, lu lekisa okuti, ocisola ca Yehova ca velapo ocisola ci lekisiwa lonjali. Nda tu liyaka lovitangi, ka tuka simi okuti, Yehova eye o kasi oku tu vi kokela omo ka tu sole. Unyali wetu Satana, eye o tu vetiya oku kuata ovisimĩlo viaco vĩvi. (Yovi 4:1, 7, 8; Yoano 8:44) Ovisimĩlo viokuti Yehova ka tu sole, ka vi sangiwa Vembimbiliya. Momo, Yehova ka tu seteka ‘lovina vĩvi. (Tiago 1:13) Isietu Yehova, ka tu kokela ovitangi vi lumana ndonyoha ale ndenyenya. Pole, ‘eca ovina viwa kuava vo pinga.’ (Mateo 7:11; Luka 11:13) Nda tua limbuka ovina viwa Yehova a siata oku tu lingila, tu kuata onjongole yoku likutilila kokuaye olonjanja viosi. Nda tu amamako oku likutilila, tu kuatavo ovisimĩlo ndevi viukualosamo wa popia hati: “Suku puãi wa njeva ocili, wa tava kondaka yohutililo yange.”—Osamo 10:17; 66:19.
Ndomo Espiritu Lia Yehova li tu Kuatisa
15. (a) Ohuminyo yipi Yesu a linga yatiamẽla kespiritu lia Yehova? (b) Espiritu lia Yehova li tu kuatisa ndati?
15 Osimbu handi Yesu ka file, wa pitulula ohuminyo a lingile yatiamẽla kalusapo aye. Poku lomboluila olondonge viaye eci catiamẽla kespiritu li kola wa popia hati: “Ndi pinga ku Isia okuti, u wihi oñuatisi yikuavo yi kala ño-o hũ lene.” (Yoano 14:16) Yesu wa likuminyile oku eca espiritu likola kolondonge viaye oco li va kuatise. Cimuamue haico a kasi oku linga koloneke vilo. Eci cikuete esilivilo koloneke vietu, momo espiritu likola lia siata oku tu kuatisa oku pandikisa kovitangi. Li tu kuatisa ndati? Upostolo Paulu, omo liovitangi a liyaka lavio, wa sonehela Akristão vo ko Korindo, Poku va lomboluila ndomo espiritu lia Yehova lio kuatisa. Omo liaco, tu konomuisi ovina Paulu a soneha vukanda waye.
16. Ovitangi tu liyaka lavio cilo, vi sokisiwa ndati levi via Paulu?
16 Tete, Paulu wa sapuila kolondonge viaye hati, wa liyaka lovitangi vi kasi ‘ndosongo ya kapiwa vetimba liaye.’ Noke wamisako hati: ‘Nda likutilila olonjanja vitatu ku Yehova okuti osongo yaco yi nunda.’ (2 Va Korindo 12:7, 8) Ndaño okuti Paulu wa pinga ku Yehova oco ovitangi viaye vi pite, pole viamamako. Koloneke vilo, ci tava okuti ove o liyakavo lovitangi ndevi via Paulu. Pole, o sukila oku likolisilako oku likutilila oco ovitangi viove vi pite. Ndaño wa likutilila olonjanja viosi, citava okuti, ovitangi viaco viamamako. Eci hẽ ci lomboloka okuti, Yehova ka kasi oku tambulula olohutililo viove kuenda espiritu liaye ka li kasi oku ku kuatisa? Sio, hacoko. (Osamo 10:1, 17) Tu konomuisi olondaka Paulu a popia noke.
17. Yehova wa tambulula ndati olohutililo via Paulu?
17 Yehova poku tambulula ohutililo ya Paulu wo sapuila hati: “Ocali cange cu ku tẽla, momo unene wange u loñolohela poku pekengua.” Noke, Paulu wa popia hati: [“Ndi] sole cimue oku lipandela okupekengua kuange okuti unene wa Kristu u mbuila.” (2 Va Korindo 12:9; Osamo 147:5) Ovolandu a lekisa okuti, ekuatiso Paulu a tambula ku Suku vonduko ya Kristu, lio teyuila ndosinge yi teyuila omunu kutanya. Koloneke vilo, Yehova wa siata oku tambulula olohutililo vietu lonjila yimuamue. Afendeli vaye, wa siata oku va teyuila ndosinge yi teyuila omunu kutanya.
18. Momo lie tu kuetele epondolo lioku pandikisa?
18 Ocili okuti, osinge ka yimula ombela ale ofela. Pole, yi teyuila omanu va kasimo. Cimuamue haco ci pita ‘lunene wa Kristu,’ okuti ka u maliko ovitangi tu liyaka lavio cilo. Pole, u tu teyuila kolonjanjo violuali lulo lua vialiwa la Satana. (Esituluilo 7:9, 15, 16) Nda ove o kasi oku liyaka lovitangi vimue okuti viamamako, kolela okuti, Yehova wa vi kũlĩha. Kuenda ‘o yevelela olohutililo viove.’ (Isaya 30:19; 2 Va Korindo 1:3, 4) Paulu wa popia hati: “Suku wa kolelua, kuenje ka tava okuti wu yonjiwa te leli wu tẽla, puãi kumuamue leyonjo u muisavo evelo lioku puluka okuti vu soka lalio.”—1 Va Korindo 10:13; Va Filipoi 4:6, 7.
19. Nye wa nolapo oku linga kuenda momo lie?
19 Ocili okuti, ‘koloneke vilo via sulako,’ oluali lulo lue yuka ovitangi vialua. (2 Timoteo 3:1) Pole, omanu va Yehova va kũlĩha okuti, citava oku vi yula. Momo lie? Momo, Yehova eca espiritu liaye ku vana vamamako oku u pinga lekolelo. Omo liaco, tu amamiko oku lilutilila oco tu tambule espiritu lia Yehova.—Osamo 34:6; 1 Yoano 5:14, 15.
O Tambulula Ndati?
• Nye tu sukila oku linga oco tu tambule espiritu lia Yehova?
• Momo lie tu kuetele ekolelo liokuti Yehova o tambulula olohutililo vietu lekuatiso liespiritu li kola?
• Espiritu lia Yehova li tu kuatisa ndati oku pandikisa kovitangi?
[Elitalatu kemẽla 13]
Olusapo lua Yesu luatiamẽla kulume wa totola kepito lolupili lu lomboloka nye?
[Elitalatu kemẽla 15]
Ove hẽ wa siata oku pinga ku Yehova espiritu liaye?
[Elitalatu kemẽla 16]
Nye tu lilongisa volusapo luatiamẽla ku Yehova o kasi ndonjali yi kuatisa omõlaye?