Momo Lie tu Sukilila Oku Eca Olopandu?

“Kukuetu wa soliwa londuko Raquel,

Ngeca olopandu omo lielembeleko wa nyĩha. Ndaño okuti pamue ove kua limbukile ndomo elembeleko liove lia ndi pamisa, olondaka viove, via ndi kuatisa calua.”​—⁠Jennifer.

ANGA hẽ eteke limue ove wa tambuile ale ukanda umue wolopandu? Nda oco, wa yeva esanju lialua kutima wove. Vosi yetu, tua siata oku yeva esanju eci tu limbuka okuti omunu umue o tu sole kuenda wa tu kapako.​—⁠Mateo 25:​19-23.

Olopandu vi pamisa ukamba womunu o vieca kuenda u o vi tambula. Handi vali, omunu wosi o yongola oku kala ondonge ya Yesu Kristu, o sukila oku lekisa olopandu kovina viosi vakuavo vo lingila.​—⁠Marko 14:​3-9; Luka 21:​1-4.

Koloneke vilo, omanu ka va kuete vali ocituwa coku eca olopandu, poku vangula ndaño poku soneha ovikanda. Embimbiliya li lekisa okuti “koloneke via sulako,” omanu vaka linga “vakualutukãi.” (2 Timoteo 3:​1, 2) Nda ka tua lungukile, tuka vetiyiwa locituwa caco ca siata ndeti koloneke vilo.

Ananga api olonjali vi pondola oku kuatisa lao omãla vavo oku eca olopandu? Ku velie tu sukila oku eca olopandu? Kuenda momo lie tu sukilila oku eca olopandu, ndaño okuti valua ka va ci lingi?

Vepata

Olonjali via siata oku talavaya calua oco vi tekule omãla vavo. Olonjanja vimue, olonjali vi limbuka okuti epata liavo ka lia kapeleko alikolisilo va siata oku linga. Nye ovo va sukila oku linga oco va potolole ocitangi caco? Va sukila oku kapako atosi atatu a kuete esilivilo lialua.

(1) Ongangu. Ocina ca velapo koku pindisa omãla, oku eca ongangu. Catiamẽla kakãi va enda oku talavaya calua oku tata epata liavo kotembo ya va Isareli, Embimbiliya li popia hati: “Omãla vaye vo pandula.” Pi omãla va lilongisila oku eca olopandu? Ocinimbu caco ceca etambululo poku popia hati: “Veyaye layevo u sivaya.” (Olosapo 31:​28) Olonjali vina vieca olopandu komunu lukuavo, vi lekisa komãla okuti oku ci linga ci sanjuisa u o vi tambula kuenda ci pamisa ukamba vepata loku lekisa olondunge.

Ulume umue o tukuiwa hati, Stephen wa popia ndoco: “Nda siata oku lekisa ongangu komãla poku eca olopandu kukãi wange eci a teleka okulia.” Onima yipi eye a kuata? Stephen wa popia hati: “Omo lielinga liaco, omãla vange vavali vafeko, va kuatisiwa oku lekisavo olopandu.” Nda ove wa kuela ale, wa siata hẽ oku eca olopandu kohueli yove eci a ku lingila ocina cimue? Wa siata hẽ oku eca olopandu komãla vove eci o va tuma oku linga upange umue?

(2) Epindiso. Oku eca olopandu, ci sokisiwa loku kũla olonelẽho. Ovio vi sukila oku vi tapela oco vi yove ciwa. Olonjali vi pondola oku kuatisa ndati omãla vavo oku kuata ocituwa coku eca olopandu? Soma Salomone wa tukula etosi lia velapo poku soneha hati: “Ondingesunga yi sokolola eci a tambulula.”​—⁠Olosapo 15:⁠28.

Ene alonjali, vu pondola oku kuatisa ndati omãla vene oku sokolola ovina viwa va siata oku tambula? Oku sokolola kuaco ku sokisiwa losi yiwa, kuenda olopandu, vi sokisiwa lolonelẽho. Ukãi umue o tukuiwa hati, Maria okuti o kasi oku tekula omãla vatatu lika liaye, wa popia ndoco: “Ci sukila oku sandiliya otembo yoku tumãla lomãla vove kuenda oku va lomboluila okuti nda omunu o ku ĩha ombanjaile momo wa ku kapako. Kuenje nda limbuka okuti oku likolisilako oku ci linga, ceca onima yiwa.” Ombangulo yaco ka yi kuatisa lika omãla oku kũlĩha eci ovo va sukilila oku eca olopandu, pole yi va kuatisavo oku kũlĩha momo lie va ci lingila.

Olonjali vi kuete olondunge, vi kuatisa omãla vavo oku yuvula ocisimĩlo cokuti ovina viwa va siata oku tambula vi kasi ndofuka.a Elungulo liatiamẽla koku pindisa apika okuti li pondolavo oku kuatisa omãla, li sangiwa kelivulu Liolosapo 29:​21, kuna tu tanga ndoco: “U o pindisa ukuenje waye lutate tunde kutila waye, kefulilo o sanga okuti wa linga ndomõlaye woku licitila.”

Ndamupi omãla vatito va pondola oku eca olopandu? Ukãi umue o tukuiwa hati, Linda o kuete omãla vatatu, wa popia ndoco: “Ame lulume wange, tua siata oku vetiya omãla vetu oku eca olopandu, eci tu va sonehẽla ovikanda vi kuete oviluvialuvia loku kapa onduko yomunu lomunu kukanda waye.” Ocili okuti ociluvialuvia ka ci kuete esilivilo lialua ndolondaka via sonehiwa, pole, ci pondola oku longisa omãla esilivilo lioku eca olopandu.

(3) Epandi. Vosi yetu tua citiwa locituwa coku kuata olutukãi, kuenje ocituwa caco, ci tu tateka oku eca olopandu. (Efetikilo 8:21; Mateo 15:​19) Embimbiliya li vetiya afendeli va Suku ndoco: “Kuati ovitima viokaliye okuti vu linga omanu vokaliye. Wali omunu wokaliye una wa tungiwa lesetahãlo lia Suku.”​—⁠Va Efeso 4:​23, 24.

Ndaño muẽle kolonjali vina vi kuete ukũlĩhĩso, ka ca lelukile oku kuatisa omãla oku ‘wala omunu wokaliye.’ Stephen, tua tukula ale vocipama cilo, wa popia hati, “Oku longisa omõlange wufeko oku eca olopandu ca ambata otembo yalua.” Pole Stephen lukãi waye ka va liwekelepo oku ci linga. Stephen, wa amisako hati: “Lepandi lialua, omõletu wa lilongisa ocina cimue ci kuete esilivilo. Kaliye tu kuete esanju momo eye wa siata oku lekisa olopandu ku vakuavo.”

Nye ci Popiwa Catiamẽla Kakamba Kuenda Ava tu Lisungue Lavo?

Olonjanja vimue, nda tu ivalako oku popia hati nda pandula, ka ci lomboloka okuti tu kuete olutukãi. Anga hẽ citava oku yeva esanju pole ka tu lekisa olopandu? Oco tu sange etambululo kepulilo eli, tu konomuisi eci ca pita la Yesu, kuenda alume vamue vakuavilundu.

Yesu osimbu a kala oku enda ko Yerusalãi, wa ñualehẽla lekũi lialume vakuavilundu. Embimbiliya li popia hati: “[Ovo] va vilikiya vati, A Yesu, a cime cetu, tu linge ohenda. Eci a va mola, wa popia lavo hati, Kuendi, ka lilekisi kovitunda. Oco, osimbu va enda va yelisua. Umue wavo, eci a mola okuti wa sakuiwa, wa tiuka loku sambiliya Suku lolukandi, kuenje, oku kekamela posi kolomãi via Yesu, wo panduila. Eye haeye u Samária.”​—⁠Luka 17:​11-16.

Yesu wa tenda ndati alume vakuavo ka va lekisile olopandu? Ulandu wamisako hati: “Oco Yesu wa popia hati, Hekuiko hẽ va yelisua? Ecea liaco li kasi pi? Ka kuli vali umue ukuavo o tiuka oku tumbangiya Suku, te lika ukuafeka yiñi?”​—⁠Luka 17:​17, 18.

Ocili okuti, alume ecea vakuavilundu, ka va kuatele olutukãi. Momo ovo va lekisa okuti va kolela Yesu kuenda va pokola konumbi yaye yoku enda ko Yerusalãi oku ka lilekisa kovitunda. Pole, ovo ka va lekisile esanju liavo ku Yesu momo ka va endele kokuaye oku u pandula. Elinga liavo, lia sumuisa Kristu. Oco hẽ, nye ci popia kokuetu? Eci omunu umue a tu tata ciwa, tua siata hẽ oku u sapuila okuti, nda pandula kuenda oku lekisa esanju poku u sonehẽla ukanda wolopandu?

Embimbiliya li lekisa okuti, ocisola “ka ci lisandela ovina viaco muele.” (1 Va Korindo 13:⁠5) Omo liaco, oku eca olopandu loku lekisa esanju handimbukisoko ño yovituwa viwa, pole ondimbukisovo yocisola. Ulandu wa pita lalume vakuavilundu, u tu longisa okuti wosi o yongola oku sanga ohenda ya Kristu, o sukila oku sola omanu vakualofeka viosi, vakuapata osi, ale vakuetavo liñi.

Li pula ove muẽle ndoco: ‘Eteke lipi nda lisula oku eca olopandu komunu o lisungue lame, kekamba liokupange, kosikola, kosipitali, ku vakuakulandisa, ale komunu ukuavo wa ndi kuatisa?’ Momo lie vokuenda kueteke limosi ale avali ku sonehẽla olonjanja ove wa eca olopandu? Oku ci linga, ci pondola oku ku kuatisa oku limbuka apa ove o sukila oku linga apongoloko.

Omunu wa velapo okuti eye o sesamẽla olopandu vietu, Yehova Suku. Eye, Ukuakueca “ocali cosi ciwa longavelo yosi ya kanguka.” (Tiago 1:​17) Otembo yipi ove wa lisula oku eca olopandu ku Suku omo liocina cimue ciwa a ku lingila?​—⁠1 Va Tesalonike 5:​17, 18.

Momo Lie tu Lekisila Olopandu Ndaño Vakuetu ka va ci Lingi?

Ndaño tua siata oku lekisa olopandu ku vakuetu, pamue ovo ka va ci lingi. Oco hẽ, momo lie tu sukilila oku lekisa olopandu ndaño vakuetu ka va ci lingi? Tu konomuisi esunga liaco.

Poku lingila eci ciwa komanu vana ka va lekisa olopandu, tu kasi oku setukula Ululiki wetu, Yehova Suku. Ndaño okuti omanu valua ka va lekisa olopandu kocisola Yehova a va kuetele, eye ka liwekapo oku va lingila eci ciwa. (Va Roma 5:8; 1 Yoano 4:​9, 10) Eye “o tundasaila ekumbi liaye kolondingaiwa lo kolondingaĩvi; kuenje o lokasaila ombela vakuesunga la vakuevĩho.” Nda tu likolisilako oku eca olopandu, ndaño tu kasi pokati komanu vakualutukãi, tuka linga “omãla va [Isietu] o kasi kilu.”​—⁠Mateo 5:⁠45.

[Etosi pombuelo yemẽla]

[Etosi lia velapo kemẽla 15]

Vokuenda kueteke limosi ale avali soneha olonjanja ove wa eca olopandu

[Elitalatu kemẽla 15]

Lekisa ongangu komãla vove koku eca olopandu

[Elitalatu kemẽla 15]

Omãla va sukila oku pindisiwa oco va ece olopandu