Tu “Kuami Ovina vi Koka Ombembua”

NDA onjila yimue ya pangiwa ciwa, ka yi koki ohele oku pitamo. Pole, vokuenda kuotembo, yi fetika oku kuata ovikulungu. Omo liaco, yi sukila oku semuluiwa oco yi kale ciwa.

Cimuamue haico ci pondola oku pita lukamba wetu la vakuetu okuti, pamue tu kuata ovitangi. Upostolo Paulu wa kũlĩhĩle okuti, Akristão vo ko Roma va kuatele ovisimĩlo via litepa. Omo liaco, wa va lungula hati: “Tu kuami ovina vi koka ombembua haivio vi koka utima woku likuatisa pokati.” (Va Rom. 14:​13, 19) Momo lie ci kuetele esilivilo oku ‘kuama ovina vi koka ombembua’? Tu pondola ndati oku kuata utõi poku sanda ombembua?

Momo Lie tu Sukilila Oku Sanda Ombembua?

Ocili okuti, ovikulungu vitito vi pondola oku li vokiya, kuenje vi nena ovitangi komanu. Cimuamue haico ci pondola oku pita letu okuti, nda ka tua tetuluile lonjanga ovitangi, ukamba wetu u nyõleha. Upostolo Yoano wa soneha hati: “Umue nda o popia hati, ‘Ndi sole Suku,’ kuenje o suvuka ukuavo, ohembi, momo u ka sole ukuavo a lete ka tẽla oku sola Suku ka lete.” (1 Yoa. 4:​20) Nda ocitangi cimue ka ca tetuluiwile, ci pondola oku vetiya manji oku suvuka ukuavo.

Yesu Kristu wa popia hati, nda ka tua sandele ombembua la vakuetu, efendelo lietu ka li taviwa la Yehova. Omo liaco, wa longisa olondonge viaye hati: “Osimbu o kasi loku lumbila ocilumba cove kutala, nda wivaluka okuti ukuẽle o kasi love londaka, oco, siapo ocilumba cove putala, kuende, ka lisunguluise handi lukuẽle, oco noke wiye, o lumbe ocilumba cove.” (Mat. 5:​23, 24) Omo liaco, tu sukila oku sanda ombembua, oco tu ece esivayo ku Yehova Suku.a

Vamanji va kala vekongelo lia va Filipoi va sukilile oku sanda ombembua. Omo liocitangi ca kala pokati ka Euodia la Suntuke, ekongelo ka lia kuatele ombembua. (Va Fil. 4:​2, 3) Nda ovitangi ka vi tetuluiwa, vi kũlĩhĩwa lomanu vosi. Onjongole yoku teyuila ocisola lelitokeko vekongelo, yi tu vetiya oku sanda ombembua la vamanji.

Yesu wa popia hati: “Ava va koka ombembua va sumũlũha.” (Mat. 5:⁠9) Oku sanda ombembua, ci nena esanju. Nda tua sanda ombembua, tu kuata uhayele, momo ‘nda utima wa tula, etimba li kala ciwa.’ (Olosap. 14:​30) Pole, ocikumbiti ci tepulula uhayele wetu.

Ndaño oku sanda ombembua ci kuete esilivilo, pole, tu sukila oku kũlĩha ndomo tu tetulula ovitangi. Omo liaco, tu konomuisi ovinimbu Viovisonehua vi pondola oku tu songuila.

Oku Tetulula Ovitangi Lesunguluko ci Nena Ombembua

Nda vonjila muli ovikulungu vitito, tu sukila oku vi lembika oco ka vika nene ovitangi. Anga hẽ, tu pondola oku ecela vamanji va tu lueyela okuti, ka tu ivaluka vali ovitangi viaco? Nda tua ci linga, ci tu kuatisa oku tetulula ovitangi ndomo upostolo Petulu a popia hati: “Ocisola ci tuvika akandu a lua.”​—⁠1 Pet. 4:⁠8.

Olonjanja vimue, tua siata oku liyaka lovitangi okuti, ka ca lelukile oku vi tetulula. Omo liaco, tu kũlĩhĩsi ulandu wa va Isareli osimbu ka va pitilile Vofeka Yohuminyo. Osimbu omãla “va Ruvene la va Gadi lonepa yepata lia Manase,” ka va yokele Olui Yordão, va tunga ‘utala unene okuti, oku u vanja u tunguisa ovaso.’ Apata akuavo ava Isareli va simĩle okuti, utala waco woku fendela olosuku vikuavo, kuenda va kapeleko ocitangi caco. Omo liaco, va li pongiya oco va liyake lavo.​—⁠Yeh. 22:​9-12.

Va Isareli vamue va limbukile okuti, va kuata ovitangi vialua kuenda va simĩle okuti, nda va linga uyaki, valua pokati kavo vaka pondiwa. Omo liaco, va nõlapo oku yuvula uyaki, kuenje, apata a kala konano yolui Yordão va tuma vamue pokati kavo oco va tetulule ocitangi caco. Kuenje, va pula hati: “Nye wa pambukili koku kuama Yehova etaili, yu wa litungili utala, ho ñualelapo Yehova etaili?” Epata lia tunga utala ka lia tombele olonumbi via Suku. Pole, va tenda ndati alundi aco? Anga hẽ, va sukilile oku yaka la vana va linga alundi, ale oku yuvula oku sapela lavo? Epata va lundila, lia tambulula lumbombe hati, va tunga utala omo lionjongole yoku vumba Yehova. Etambululo liavo, lia pamisa ukamba wavo la Suku, kuenda va popela omuenyo wavo. Esunguluko, li kuatisa oku tetulula ovitangi, kuenda oku sanda ombembua.​—⁠Yeh. 22:​13-34.

Osimbu handi va Isareli ka va nõlele onjila va sukilile oku kuama, va tetulula ovitangi viavo poku sapela lepata lia Ruvene, leli lia Gadi, kuenda lia Manase. Ondaka ya Suku yi popia hati: “Ku ka teme lonjanga, momo [oku tema] kua tunga volonulo viaveke.” (Uku. 7:⁠9) Oku kuama olonumbi Viovisonehua, ci tu kuatisa oku lekisa esunguluko kuenda utõi poku tetulula ovitangi. Nda tua kuatela ocikumbiti omunu wa tu lueyela, ka tu tambula asumũlũho a Yehova.

Nye tu sukila oku linga nda manji umue wa tu lundila? Embimbiliya li popia hati: “Etambululo liombembua li tulumũla ocikumbiti.” (Olosap. 15:⁠1) Apata a va Isareli a lundiliwa va lekisa umbombe, pole, va lombolola esunga liavo, kuenje va tetulula ovitangi via kala pokati kavo. Nda tua nõlapo oku sapela la manji oco tu tetulule ocitangi cimue, ale eye o sapela letu, tu sukila oku li pula ndoco: ‘Olondaka vipi tu sukila oku popia oco tu sande ombembua?’

Kuata Olondunge Poku Sapela

Yehova wa kũlĩha okuti, tu sukila oku lombolola ovitangi vietu. Nda ka tu tẽla oku vi tetulula, tu pondola oku vi lomboluila manji umue oco a tu kuatise. Pole, nda ka tua ci lingile, tu vetiyiwa oku popia lãvi vakuetu. Elivulu Liolosapo 11:​11, li lombolola eci catiamẽla koku vangula ovina ka via sungulukile. Olio li popia hati: “Lomẽla wolondingaĩvi [imbo] li papuluka.” Cimuamue haico ci pondola oku pita letu okuti, nda tua kuatela ocikumbiti manji umue, tu nyõla ombembua vekongelo.

Nda tu kuete ocituwa coku popia lãvi vamanjetu, ci lekisa okuti, ka tu kasi oku sanda ombembua. Upostolo Paulu wa lungula Akristão hati: “Vovimela viene ka mu ka tunde ombangulo yĩvi.” Noke wamisako hati: “Mu tunde puãi olondaka vi kuatisa, haivio via soka lotembo yaco, kuenje vi sumũluisa ava va vi yeva. . . . Liombokeli pokati loku lilinga ohenda loku liecela pokati.” (Va Efe. 4:​29-​32) Nda wa sandiliya manji umue wa sumua omo liolondaka vĩvi wa popele, o sukila oku u pinga ongecelo kuenda oku sandiliya ombembua. Momo citava okuti, eye wa siata oku sapela la vakuene ovina viwa viatiamẽla kokuove. Nda tua vangula ovina viwa viatiamẽla ku vamanji, ci tu kuatisa oku tumbulula ombembua eci pokati ketu peya ovitangi.​—⁠Luka 6:⁠31.

Tu Vumbi Suku “Lutima Umuamue”

Ekandu tua piñala, li pondola oku tu vetiya oku yuvula oku kala la vana va tu lueyela, kuenda oku tepa ukamba lavo. Pole, tu sukila oku yuvula ocituwa caco. (Olosap. 18:⁠1) Omo okuti tu likuete omunga, kuenda tu vilikiya onduko ya Yehova, tua nõlapo oku “u vumba lutima umuamue.”​—⁠Sof. 3:⁠9.

Ka tuka eceleli okuti, ovituwa vĩvi via vakuetu vi tu vetiya oku tepulula ombili yetu kefendelo liocili. Osimbu handi Yesu ka ecele omuenyo waye ndocilumba oco ci piñale ovilumba via enda oku eciwa noke yoku pisa vakuavisonehua, wa mõla ukãi umue ocimbumba haeye ohukũi wa imba vokasia yonembele “cosi a kala laco.” Anga hẽ, Yesu wa tateka ukãi waco oku eca ocilumba? Sio, ka ci lingile. Pole, wa popia hati, ukãi waco wa eca ekuatiso liaye vekongelo lia Yehova. (Luka 21:​1-4) Ovituwa vĩvi via vakuavo ka via tatekele ukãi waco oku tẽlisa ocikele caye coku kuatisa efendelo lia Yehova.

Nda tua limbuka okuti manji umue wa tu lueyela, nye tu sukila oku linga? Anga hẽ, tu ecelela okuti ovina viaco vi tateka upange tu kasi oku lingila Yehova? Ale tu sapela laye okuti tu tetulula ocitangi caco, oco vekongelo lia Suku mu kale ombembua?

Ovisonehua vi tu lungula hati, “ndeci ca soka locikele cene, kali lombembua lomanu vosi.” (Va Rom. 12:​18) Omo liaco, tu nõlipo oku endela vonjila yi tuala komuenyo.

[Etosi pombuelo yemẽla]

[Elitalatu kemẽla 17]

Euodia kuenda Suntuke va sukilile oku sanda ombembua

[Elitalatu kemẽla 18]

Olondaka vipi tu sukila oku popia oco tu sande ombembua?