Ove Hẽ Okamamako Oku Lekisa Esunguluko?

“Toke [eci ndi] fa si liweka kesunga liange.”​—⁠YOVI 27:⁠5.

1, 2. Ovina vipi tu sukila oku kapako poku linga esokiyo lioku tunga onjo, kuenda apulilo api tu konomuisa vocipama cilo?

KŨLĨHĨSA ndeci okuti, o kasi oku linga esokiyo lionjo ndomo yi tungiwa. O sanjukila esokiyo liaco. Momo onjo yaco, yika ku kuatisa ove kuenda epata liove. Pole, oco esokiyo liaco li kuate esilivilo, o sukila oku tunga onjo yaco, loku ilukilamo, kuenda oku yi tata.

² Cimuamue haico catiamẽla koku lekisa esunguluko. Momo li pondola oku tu kuatisa oku kuata ukamba lomanu vosi. Pole, tu sukila oku likolisilako oco tu amameko oku lekisa esunguluko. Koloneke vilo, ka ca lelukile oku tunga onjo. (Luka 14:​28, 29) Omo okuti esunguluko li kuete esilivilo, tu sukila oku likolisilako oku li lekisa. Omo liaco, tu konomuisi apulilo atatu ndeci: Tu pondola ndati oku kala vakuesunguluko? Tu amamako ndati oku lekisa esunguluko? Nye tu sukila oku linga nda umue ka lekisa esunguluko?

Tu Pondola Ndati Oku Kala Vakuesunguluko?

3, 4. (a) Yehova wa siata oku tu kuatisa ndati oco tu lekise esunguluko? (b) Tu pondola ndati oku kuama ongangu ya Yesu yatiamẽla koku lekisa esunguluko?

³ Vocipama catete, tua lilongisa okuti, Yehova wa tu ĩha elianjo lioku linõlela eci tu yongola oku linga, pole, tu sukila oku pokola kokuaye. Momo, espiritu liaye lia siata oku tu kuatisa oku kapako ovina tua lilongisa, kuenda oku limbuka ndomo tu lekisa esunguluko. (Luka 11:​13) Eye wa siatavo oku kuatisa omanu vaye volonjila via litepa.​—⁠Olosap. 2:⁠7.

⁴ Yehova wa tu longisa ndati oco tu amameko loku lekisa esunguluko? Wa ci linga poku tuma Omõlaye Yesu palo posi. Yesu wa kala omunu umue ukuepokolo. Eye “wa pokola toke kokufa.” (Va Fil. 2:⁠8) Yesu wa pokola ku Isiaye wokilu kovina viosi a linga, ndaño lelambalalo. Eye wa popia ku Yehova hati: “Ocipango cange ka ci ka lingiwe, te cove ci lingiwa.” (Luka 22:​42) Omo liaco, tu sukila oku li pula ndoco: ‘Anga hẽ, nda siata oku lekisa epokolo?’ Nda tua lekisa ocituwa caco, tu linga omanu vakuesunguluko. Tu konomuisi ovina vimue viatiamẽla komuenyo vi lekisa esilivilo lioku pokola.

5, 6. (a) Daviti wa lekisa ndati esilivilo lioku lekisa esunguluko eci a kala likaliaye? (b) Ovitangi vipi Akristão va siata oku liyaka lavio catiamẽla koku lekisa esunguluko eci va kasi likaliavo?

⁵ Tu sukila oku pokola ku Yehova ndaño tu kasi likalietu. Ukualosamo Daviti wa limbuka esilivilo lioku lekisa esunguluko eci a kala likaliaye. (Tanga Osamo 101:⁠2.) Omo okuti, Daviti wa kala osoma, olonjanja vimue wa enda oku kala lomanu valua. (Sokisa lelivulu Liosamo 26:12.) Eye wa sukilile oku lekisa esunguluko oco omanu va kuame ongangu yaye. (Esin. 17:​18, 19) Omo liaco, Daviti wa lilongisa okuti, eci a enda oku kala ‘vonjo’ likaliaye, wa sukilile oku lekisa esunguluko. Ulandu waye u tu longisa nye?

⁶ Elivulu Liosamo 101:​3, li lekisa olondaka via Daviti wa popia hati: “Si kapi cimue cĩvi kovaso ange.” Koloneke vilo, tu pondola oku tala ovina vialua vĩvi osimbu tu kasi likalietu. O Televisãu ya siata oku lekisa ovina vialua via vĩha. Vovina viaco, mua kongela oku tala omanu va kasi epolõla. Anga hẽ, nda tua tala omanu vaco tu kasi oku lekisa epokolo ku Suku wa vetiya Daviti oku soneha olondaka viaco? Oku tala omanu va kasi epolõla, ci vetiya olonjongole vĩvi, ci nyõla olohuela, kuenda ci nena esumuo.​—⁠Olosap. 4:23; 2 Va Kor. 7:1; 1 Va Tes. 4:​3-5.

7. Onumbi yipi yi pondola oku tu kuatisa oku lekisa esunguluko nda tu kasi likalietu?

⁷ Pokati kafendeli va Yehova, lomue o kasi lika liaye. Isietu wokilu o lete ovina viosi tua siata oku linga. (Tanga Osamo 11:⁠4.) Yehova o sanjuka calua eci a limbuka okuti, tu kasi oku tamãlala kayonjo! Nda tua ci linga, tu kasi oku pokola kelungulo lia Yesu li sangiwa kelivulu lia Mateo 5:28. Omo liaco, tu yuvuli oku tala oviluvialuvia vi vetiya oku linga eci cĩvi. Ka tuka nyõli esunguluko lietu omo lioku tala omanu va kasi epolõla!

8, 9. (a) Ovitangi vipi Daniele kumue lakamba vaye va liyaka lavio catiamẽla koku lekisa esunguluko? ( b) Amalẽhe Akristão va pondola ndati oku sola Yehova kuenda vamanji?

⁸ Tu pondola oku kala vakuesunguluko poku pokola ku Yehova eci tu kala lomanu ka va lilongisa Embimbiliya. Tu sokololi ulandu wa Daniele lakamba vaye vatatu okuti, eci va kala amalẽhe, vambatiwile kumandekua ko Bavulono. Ovo va kala pokati komanu ka va kũlĩhĩle Yehova, kuenda va kisikiwile okulia ovina via pisiwile Locihandeleko ca Suku. Ovo va limbukile ovina vĩvi va sukilile oku yuvula oco va sanjuise Yehova. Pole, ovitunda vinene ka via tẽlele oku limbuka ovina amalẽhe va kala oku linga. Helie wa limbuka ovina viaco? Yehova eye lika wa vi limbuka. Omo liaco, ovo va nõlapo oku pokola ku Suku, ndaño omuenyo wavo wa kala kohele.​—⁠Dan. 1:​3-9.

⁹ Koloneke vilo, amalẽhe vana okuti Olombangi Via Yehova, va siata oku kuama ongangu yakuenje vakuãla, poku pokola kolonumbi via Suku kuenda oku yuvula oku tamãlala lakamba vãvi. Nda ove umalẽhe o likala oku sipa eliamba, ukahonga, lovina vikuavo via vĩha, ci lekisa okuti o kasi oku pokola ku Yehova, kuenda oku lekisa esunguluko kayonjo aco. Nda wa ci linga, ci ku kuatisa oku sola Yehova kuenda vamanji!​—⁠Osa. 110:⁠3.

10. (a) Ovisimĩlo vipi vĩvi viatiamẽla kukahonga via siata oku nyõla esunguluko liamalẽhe vamue? (b) Esunguluko li tu kuatisa ndati oku kapako ohele yoku wila vukahonga?

¹⁰ Tu sukila oku lekisa epokolo poku sapela la vamanji alume ale akãi. Momo Ondaka ya Suku yi pisa ukahonga. Pole, ndaño tua siata oku pokola, tu pondola oku lekisa esino. Amalẽhe vamue va kuete ocituwa coku iñisa ocimatamata cavo cuyali ketundisilo liukuavo, kuenda oku tukusa kocimatamata cukuavo cuyali toke eci va tẽlisa oloñeyi viavo. Ovo, va siata oku sima hati, ovituwa viaco, ka vi lomboloka “oku lipekela.” Kuenda ka va pokola kondaka ukahonga ya tukuiwa Vembimbiliya okuti, mua kongela ovituwa vĩvi vi pondola oku tuala omunu koku tundisiwa vekongelo.a Ovo ka va kapeleko esilivilo lioku lekisa esunguluko. Omo okuti, tu likolisilako oku lekisa esunguluko, tu sukila oku yuvula oku tala ovina via vĩha. Lomue o linga ekandu okuti, ka yambuiwa. Tu sukila oku pokola kelungulo tua siata oku tambula vekongelo. Tu sukilavo oku linga ovina vi sanjuisa Yehova, kuenda oku yuvula ovina viu sumuisa. Tu yuvuli ovina vi vetiya oku wila vekandu, kuenda tu “tili ukahonga.” (1 Va Kor. 6:​18) Nda tua ci linga, tu eca uvangi wokuti tu kasi oku lekisa esunguluko.

Tu Amamako Ndati Loku Lekisa Esunguluko?

11. Momo lie oku lekisa epokolo kovina vitito, ci kuetele esilivilo? Lombolola ulandu waco.

¹¹ Oco tu amameko lepokolo, tu sukila oku lekisa esunguluko. Eci tu lekisa epokolo kovina vitito, tu sima okuti epokolo liaco, ka li kuete esilivilo. Pole, epokolo li pondola oku pamisa esunguluko lietu. Tu konomuisi ulandu umue: Pamue tua siata oku sima okuti, ondopi yimosi ka yi kuete esilivilo. Pole, nda tua yi kogela lolondopi vikuavo, tu pondola oku tunga onjo yimue ya posoka. Omo liaco, oku amamako loku pokola, ci tu kuatisa oku lekisa esunguluko.​—⁠Luka 16:⁠10.

12. Ongangu yipi Daviti a tu sila yoku amamako loku lekisa esunguluko ndaño lelambalalo?

¹² Tu pondola oku lekisa esunguluko eci tu liyaka lovitangi, elambalalo, kuenda ekambo liesunga. Tu konomuisi ulandu wa Daviti. Eci a kala umalẽhe, wa lambalaliwa la Soma Saulu una wa yonguile oku viala vonduko ya Yehova. Omo okuti, ka taviwile la Yehova wa fetika oku suvuka Daviti, momo eye wa nõliwile la Yehova Suku. Pole, Saulu wa viala vokuenda kuotembo yimue, noke wa tuma olohoka via va Isareli oco va sandiliye Daviti. Yehova wa ecelela okuti, uviali waco wungangala, wamamako vokuenda kuotembo yimue. Anga hẽ, Daviti wa sumuilile Suku? Wa simĩle hẽ okuti, ka sukilile oku lekisa esunguluko? Sio, hacoko. Omo okuti, Saulu wa nõliwile la Suku, Daviti wamamako oku lekisa esumbilo kokuaye, ndaño wa kuatele epuluvi lioku ponda Saulu.​—⁠1 Sam. 24:​2-7.

13. Nda manji umue wa tu popia ondaka yimue yĩvi, tu lekisa ndati esunguluko?

¹³ Ongangu ya Daviti, yi kuete esilivilo kokuetu! Momo, ndaño tu kasi vocisoko ca Yehova, citava okuti manji umue o tu lueyela omo liekambo lioku lipua. Tua sanjuka calua omo lioku limbuka okuti, lacimue ci tẽla oku tateka omanu oku vumba Yehova. (Isa. 54:​17) Tu tambulula ndati nda umue wa tu popia lãvi? Nda tua sumua omo lia manji umue wa tu popia ondaka yimue yĩvi, esunguluko lietu ku Suku li kala kohele. Ka tuka eceleli okuti, ovituwa vĩvi via vakuetu vi tu tateka oku lekisa ekolelo ku Suku. (Osa. 119:165) Oku lekisa ekolelo ku Suku eci tu liyaka lovitangi, ci tu kuatisa oku amamako loku lekisa esunguluko.

14. Omunu ukuesunguluko o pokola ndati kapongoloko a siata oku lingiwa vocisoko ca Yehova?

¹⁴ Tu pondolavo oku lekisa esunguluko poku yuvula oku popia lãvi vakuetu okuti, ka tu kapiko ovina vĩvi va tu lingila. Nda tua ci linga, ci lekisa okuti tu kasi oku pokola ku Yehova, wa siata oku eca asumũlũho alua komanu vaye. Efendelo liocili, li kasi oku amamako voluali luosi. (Isa. 2:​2-4) Eci ku lingiwa apongoloko olonumbi vimue Viembimbiliya, tu sukila oku tava kolonumbi viaco. Tua sanjuka calua, poku limbuka okuti, ocinyi cespiritu ci kasi oku amamako loku tua. (Olosap. 4:​18) Nda ka tu kuete elomboloko liepongoloko limue lia lingiwa, tu sukila oku pinga ekuatiso ku Yehova oco tu kuate elomboloko liaco. Omo liaco, tu lekisi epokolo loku amamako oku lekisa esunguluko.

Nye tu Sukila Oku Linga Nda Umue ka Lekisa Esunguluko?

15. Helie o pondola oku nyõla esunguluko liove?

¹⁵ Anga hẽ, epulilo eli ka li tu vetiya oku sokolola? Ndomo tua lilongisa vocipama catete, esunguluko li kuete esilivilo. Nda ka tua lekisile esunguluko, ukamba wetu la Yehova u tepuluka, kuenda ka tu kuata elavoko liomuenyo ko pui. Kapako olondaka vi popia hati: Kuli lika omunu umosi o pondola oku nyõla esunguluko liove. Omunu waco, ove. Yovi wa kuatele elomboloko liolondaka viaco. Eye wa popia hati: “Toke [eci ndi] fa si liweka kesunga liange.” (Yovi 27:⁠5) Nda wa nõlapo oku kuama ongangu yaye loku kuata ukamba la Yehova, oka tẽla oku amamako loku lekisa esunguluko.​—⁠Tia. 4:⁠8.

16, 17. (a) Nda vamue va linga ekandu linene, va siata oku yuvula oku linga nye? (b) Onjila yipi ya sunguluka va sukila oku kuama?

¹⁶ Omanu vamue ka va siatele oku amamako loku lekisa esunguluko. Kotembo yovapostolo, vamue va lingile ekandu linene. Nda wa pitile locitangi caco, anga hẽ ku kuete elavoko? Sio, o kuete. Nye o sukila oku linga? Tu konomuisi ovina o sukila oku yuvula. Omanu vamue nda va linga ekandu, ka va siatele oku sapuilako epata liavo, vamanji, kuenda akulu vekongelo. Pole, tu sukila oku ivaluka onumbi Yembimbiliya yi popia hati: “U o limbika akandu aye ka tẽla oku sumũlũha, puãi u o litavela kuenje o tindukako eye o sanga ohenda.” (Olosap. 28:​13) Ka ca sungulukile oku limbika ekandu, momo Suku o lete ovina viosi. (Tanga Va Heveru 4:13.) Vamanji vamue va yongola oku vumba Yehova, ndaño vambata ovimuenyo vivali loku linga ekandu. Vana va kuete ocituwa caco, ka va kasi oku lekisa esunguluko. Yehova ka sanjukila efendelo lia vana va limbika akandu anene. Eye o sumua lovituwa viomanu vaco.​—⁠Olosap. 21:27; Isa. 1:​11-16.

¹⁷ Embimbiliya li kuete olonumbi vi pondola oku kuatisa vana va linga ekandu linene. Yilo oyo otembo yoku sandiliya ekuatiso liakulu vekongelo. Yehova wa nõla akulu vaco oco va kuatise vana va hongua kespiritu. (Tanga Tiago 5:14.) Kuka kuate usumba woku tambula epindiso oco o kuatisiwe kespiritu. Anga hẽ, omunu ukualondunge o yuvula oku pelaliwa oco a kuate uhayele?​—⁠Va Hev. 12:⁠11.

18, 19. (a) Ongangu ya Daviti yi lekisa ndati okuti, tu sukila oku lekisa esunguluko? (b) Nye o sukila oku linga oco amameko lesunguluko?

¹⁸ Anga hẽ, vana va lueya va pondola oku tiuka vekongelo? Citava hẽ okuti, va lekisa esunguluko? Tu konomuisi ulandu wa Daviti. Eye wa lingile ekandu linene. Noke yoku linga uvasi lukãi wamãle, wa nõlapo oku ponda ulume waco. Ka calelukile oku sokolola ekandu Daviti a linga, momo wa kala omunu ukuesunguluko. Anga hẽ, ka kuatele vali elavoko? Daviti wa sukilile oku tambula epindiso. Omo lioku likekembela, Yehova wa lekisa ohenda kokuaye. Epindiso a tambula lio kuatisa oku amamako loku lekisa esunguluko, kuenda oku pokola ku Suku. Ulandu wa Daviti, u sokisiwa lolondaka vi sangiwa kelivulu Liolosapo 24:​16, li popia hati: “Ukuesunga o kupuka olonjanja epanduvali kuenje o votoka vali.” Nye ceyililako? Tu konomuisi olondaka Yehova a sapuila Salomone viatiamẽla ku Daviti osimbu handi ka file. (Tanga 1 Olosoma 9:⁠4.) Suku wo sapuila okuti, Daviti wa kala omunu ukuesunguluko. Yehova o pondola oku tu ecela ndaño tua linga akandu anene.​—⁠Isa. 1:⁠18.

¹⁹ O pondola oku kala ukuesunguluko poku lekisa epokolo. Amamako oku lekisa ekolelo, loku likekembela lutima wosi eci o linga ekandu. Esunguluko lietu li kuete esilivilo lia velapo! Omo liaco, tu kuami ongangu ya Daviti wa popia hati: “Ame puãi ngendaenda lesunga liange.”​—⁠Osa. 26:⁠11.

[Etosi pombuelo yemẽla]

O Tambulula Ndati?

• O pondola ndati oku kala omunu ukuesunguluko?

• Kovina vipi o pondola oku lekisa esunguluko?

• O pondola ndati oku lekisa esunguluko?

[Okakasia kemẽla 8]

‘WA LINGA OCINA CIMUE CIKOMÕHISA’

Olondaka evi via popiwa lukãi umue wa tẽlisa olosãi vitãlo vioku mina, omo liepandi ufeko umue a lekisa kokuaye. Eci a kala oku yuvila okafe vonjo yimue va siata oku landisa okulia kuapia, poku tunda wa ivalako ekolombele liaye mua kala olombongo vi soka 1.290 euros. Omo liaco, wa lombolola ocitangi caco vukanda wasapulo, kuenje wa popia hati: “Nda sumua calua.” Eci ufeko umue a sanga ekolombele liaco, wa likolisilako oku sandiliya omunu waco. Omo okuti ko sangele, ekolombele liaco wa lieca kolosipayu. Noke olosipayu via sanga ukãi waco. Omo liaco, wa eca olopandu loku popia hati: “Wa linga ocina cimue cikomõhisa.” Momo lie ufeko a tiuwiyila olombongo viaco? Ukanda wasapulo wa lombolola okuti, ufeko waco omo lioku kala Ombangi ya Yehova, “wa lekisa epandi kuenda wa pokola kovina a lilongisa vetavo liaye tunde vutila.”

[Elitalatu kemẽla 9]

Amalẽhe va pondola oku lekisa esunguluko eci va pita voseteko

[Elitalatu kemẽla 10]

Daviti onjanja yimue wa liwekelepo oku lekisa esunguluko, pole noke wa likekembela