Ondaka ya Yehova yi Kasi Lomuenyo Atosi
Avelapo Vovikanda Via Yoano, Kuenda wa Yuda
OVIKANDA vitatu viupostolo Yoano, via sonehiwa kunyamo wo 98 ko Efeso, kuenda vi sangiwa valivulu a sulako Vembimbiliya. Ovikanda vivali viatete, vi vetiya Akristão oku amamako oku endela vocinyi kuenda oku yuvula oku tomba ovihandeleko via Suku. Vukanda watatu, Yoano wa popia eci catiamẽla koku amamako vocisoko ca Yehova, kuenda oku pamisa vamanji.
Ukanda a soneha kunyamo wo 65 ko Palestina, u lekisa okuti Yuda manji a Yesu, wa vetiya Akristão catiamẽla kevĩho lia kala vekongelo. Eye wa va vetiyavo oco va limbuke ndomo va pondola oku yuvula akamba vãvi. Omo liaco, oku kapako alungulo a sangiwa vovikanda vitatu via Yoano kuenda wa Yuda, ci pamisa ekolelo lietu ndaño lovitangi tu liyaka lavio.—Va Hev. 4:12.
TU AMAMIKO OKU ENDELA VOCINYI LOKU LEKISA OCISOLA KUENDA EKOLELO
Vukanda watete Yoano a tuma kakongelo osi, wa lungula Akristão oco va yuvule ukamba la vana va liwekapo oku fendela Suku. Pole, wa va vetiya oku pamisa ekolelo liavo kuenda oku lekisa esunga. Eye wa lombolola esilivilo lioku amamako oku endela vocinyi loku lekisa ocisola kuenda ekolelo.
Yoano wa soneha hati: “Nda tu endaila vocinyi, ndeci [Suku] a kasi vocinyi, tu kuete ongongela pokati ketu.” Ocili okuti, Suku eye Ono yocisola. Omo liaco, upostolo wa popia hati: “Tu lisoli pokati.” Omo okuti, ‘ocisola tu kuetele Suku’ ci tu vetiya oku ‘pokola kovihandeleko viaye,’ ‘ekolelo’ tu kuetele Yehova Suku, Ondaka yaye, kuenda Omõlaye, li tu kuatisa oku yula oluali.—1 Yoa. 1:7; 4:7; 5:3, 4.
Atambululo Kapulilo Embimbiliya:
2:2; 4:10—Yesu wa linga ndati “ocitundasonde” cakandu etu? Ondaka ocitundasonde, yi lomboloka “ombembua.” Yesu wa eca omuenyo waye ndocitundasonde cakandu. Poku ci linga, wa tẽlisa onumbi ya lipua. Omo liocilumba caco, Suku o lekisa ohenda komanu, kuenda ecela akandu a vana va lekisa ekolelo ku Yesu.—Yoa. 3:16; Va Rom. 6:23.
2:7, 8—Ocihandeleko cipi ‘cosimbu,’ Yoano a tukula hati, “cokaliye”? Yoano wa tukula ocihandeleko coku lisola pokati. (Yoa. 13:34) Ocihandeleko caco wa ci tukula hati, ‘cosimbu,’ momo tunde eci Yesu a ceca, papitile 60 kanyamo, osimbu Yoano ka sonehele ukanda waye watete. Akristão vocili, va tava kocihandeleko caco ‘tunde eci’ va iñila vocisoko ca Yehova. Ocihandeleko caco ci tukuiwavo hati, “cokaliye,” momo ci vetiya omunu oku ‘sola vakuavo.’—Ovis. 19:18; Yoa. 15:12, 13.
3:2—Ovina vipi ‘ka via molehele handi’ Kakristão olombuavekua, kuenda helie oka mõla ‘ndomo vi kasi’? Ovina viosi ka via molehele handi kokuavo, vaka vi mõla eci vaka kala kilu noke lioku pinduiwa letimba liespiritu. (Va Fil. 3:20, 21) Ovo va kũlĩha okuti, eci ‘Suku aka tukuluka, vaka lisetahala laye momo vaka mõla ndomo a kasi’ okuti, “Espiritu.”—2 Va Kor. 3:17, 18.
5:5-8—Ovava losonde kuenda espiritu, vi eca ndati uvangi wokuti, “Yesu eye Omõla a Suku?” Ovava a eca uvangi eci Yesu a papatisiwa volui, momo Yehova wa lekisa okuti, wa tava Omõlaye. (Mat. 3:17) Osonde ya Yesu ya “yovola omanu vosi,” kuenda ya eca uvangi wokuti, Yesu Omõla a Suku. (1 Tim. 2:5, 6) Espiritu sandu lia eca uvangi wokuti, Yesu Omõla a Suku eci lio wila poku papatisiwa. Kuenje, lio kuatisa oku “linga [ovina viwa] loku sakula vosi va kuetiwe lunene Weliapu.”—Yoa. 1:29-34; Ovil. 10:38.
Ceci tu Lilongisilako:
2:9-11; 3:15. Nda tua ecelela okuti, omunu umue o nyõla ocisola tu kuetele vamanji, ci lekisa okuti, tu kasi oku endela vowelema kespiritu, kuenda ka tua kũlĩhĩle oku tua loña.
TU AMAMIKO ‘OKU ENDELA VOCILI’
(2 Yoa 1–13)
Yoano wa fetika ukanda waye wavali loku popia hati: “Ame ndukulu, ndi sonehela [Ukãi] wa noliwa kuenda omãla vaye.” Eye wa kuata esanju eci a limbuka okuti, ‘vamue pokati komãla vaye va kasi oku endela vocili.’—2 Yoa. 1, 4.
Yoano noke yoku vetiya vamanji oco va li sole pokati, wa soneha hati: ‘Ocisola ci lomboloka okuti, tu pokola kovihandeleko viaye.’ Yoano wa lungulavo eci catiamẽla “[kondimbiki], haeye antikristu.”—2 Yoa. 5-7.
Atambululo Kapulilo Embimbiliya:
1, 13—‘Ukãi wa nõliwa’ o lomboloka nye? Catete, Yoano citava okuti, wa tukula ukãi umue o tukuiwa hati, Kyria okuti ondaka yaco kelimi lio Helasi yi lomboloka ‘ukãi.’ Cavali, citava okuti, onduko yaco vupopi wocindekaise, wa yi tiamisila kekongelo limue, oco ka vaka sangiwe lovanyali vavo. Nda tua nõlapo onjila yavali, ci lekisa okuti, omãla vukãi va lomboloka vamanji vekongelo limue. Pole, ovimumba viukãi waco, vi lomboloka vamanji va kasi vekongelo likuavo.
7—‘Okuiya’ kupi kua Yesu Yoano a tukula, kuenda olohembi “ka vi tava” ndati kokuaye? Olondaka evi, ka vi lomboloka okuti omanu ka va moli ‘okuiya’ kua Yesu. Pole, vi lomboloka oku citiwa kuaye, kuenda eci a linga ombuavekua okuti, Kristu. (1 Yoa. 4:2) Olohembi ka vi tava okuti, eci a citiwa wa muiwa lomanu. Ovo, ka va tavavo okuti, wa kala palo posi, kuenda wa wavekiwa lespiritu sandu.
Ceci tu Lilongisilako:
2, 4. Oco tu popeliwe, tu sukila oku kũlĩha alongiso osi a sangiwa Vembimbiliya.—3 Yoa. 3, 4.
8-11. Nda ka tu yongola oku pumba ‘ocali, ohenda, lombembua yi tunda ku Suku Isia, kuenda ku Yesu Kristu,’ lukamba wetu la vamanji, tu sukila oku ‘lava’ ekalo lietu kespiritu. Tu sukilavo oku yuvula vana ka va pokola ‘kovilongua via Kristu.’—2 Yoa. 3.
‘TU TALAVAYELI PAMOSI VUPANGE WOCILI’
Ukanda watatu Yoano a soneha, wa u tuma kekamba liaye Gaiu. Eye wa soneha hati: “Ka kuli esanju lia velapo, okuti eli lioku yeva okuti omãla vange va kasi loku endaila vocili li sule.”—3 Yoa. 4.
Yoano wa tuma Gaiu oku nyula vamanji kuenda oku va “kuatisa.” Upostolo wa popia hati: “Ocikele cetu oku linga onyima yomanu ndava, okuti lovo letu tu talavayela pamosi vupange [wocili].”—3 Yoa. 5-8.
Atambululo Kapulilo Embimbiliya:
11—Momo lie vamue va siatela oku ambata omuenyo umue wa vĩha? Vana ka va kapeleko ovina viespiritu, ka va kuete elomboloko liatiamẽla ku Suku. Omo okuti, ka va pondola oku mõla Suku, va linga ovina via vĩha kuenda va sima hati, ka va letiwe laye.—Esek. 9:9.
14—Velie va tukuiwa hati, “akamba”? Vondaka “akamba,” mua kongela ovina vialua okuti, ukamba tu kuete la vakuetu u sule. Ondaka yaco, Yoano wa yi tiamisila Kakristão vosi.
Ceci tu Lilongisilako:
4. Vamanji va loñoloha kespiritu, va sanjuka calua eci va limbuka okuti, amalẽhe va kasi oku ‘endela vocili.’ Olonjali vi sanjukavo eci vi limbuka onima yelikolisilo liavo lioku kuatisa omãla vavo oku kula kespiritu!
5-8. Vamanji vakuakunyula akongelo, olomisionaliu, vana va talavaya ko Betele, kuenda akundi votembo yosi, va siata oku lekisa ocisola ku Yehova, kuenda ku vamanji omo liupange va kasi oku linga. Omo liaco, tu sukila oku kuama ongangu yavo, loku va kuatisa kovopange aco.
9-12. Tu sukila oku kuama ongangu ya Demétrio kuenda oku yuvula oku lekisa ovituwa ka via sungulukile via Deotrefe.
TU “KALI VOCISOLA CA SUKU”
Yuda wa lombolola eci catiamẽla komanu vamue va iñila vekongelo okuti va kuata ocituwa coku “[ñuñuna], haivo vakuakulisiõsiõla. Va kuama kuama oloñeyi viavo.” Ovo va “popia popia oku lipanda.”—Yuda 4, 16.
Akristão va pondola ndati oku yuvula ovina vĩvi? Yuda wa soneha hati: “A vakuacisola, ivaluki olondaka via popiwa lovapostolo va Ñala yetu Yesu Kristu.” Kuenje, wamisako hati: “Kali vocisola ca Suku.”—Yuda 17-21.
Atambululo Kapulilo Embimbiliya:
3, 4—Momo lie Yuda a vetiyila Akristão oco va ‘yakele ekolelo’? Momo ‘omanu vakuakutomba Suku, va iñila vekongelo.’ Omanu vaco, ‘va litumbika koku linga upuepue, kuenje va likala ocali ca Suku.’
20, 21—Tu pondola ndati ‘oku kala vocisola ca Suku’? Tu ci linga poku kapako atosi atatu ndeci: (1) tu sukila oku pamisa ekolelo lietu “li kola,” poku lilongisa Ondaka ya Suku, kuenda oku lekisa ombili kupange woku kunda. (2) Oku pinga ‘espiritu sandu’ vohutililo, kuenda oku kapako ovina tu pinga. (3) Oku lekisa ekolelo kocisembi ca Yesu Kristu, ca yulula onjila yoku kuata omuenyo ko pui.—Yoa. 3:16, 36.
Ceci tu Lilongisilako:
5-7. Anga hẽ, olondingaĩvi vika puluka keteke lionyeño ya Yehova? Ndomo Yuda a ci popia valungulo atatu, olondingaĩvi ka vika puluka.
8-10. Tu sukila oku kuama ongangu yungelo unene, Mingeli, kuenda oku lekisa esumbilo ku vamanji va kuete ocikele coku songuila akongelo.
12. Tu sukila oku yuvula ukamba la vana va liwekapo oku fendela Suku okuti, va likembisa oku lekisa ocisola, oco ka vaka tu yapuise. Momo va kasi ndovawe a petuiwa kosi yovava okuti, eci ocimbaluko ci litusulamo ci nyõleha. Alongisi vesanda va siata oku lilekisa ndavakuacisola, pole, ka va kuete ukũlĩhĩso wocili. Ovo va kasi ndoviti ka vi kuete apako okuti, pokuenye vi kukuta. Kuenda va lavoka enyõleho nduti umue ka u tatiwa. Omo liaco, tu amamiko oku yuvula vana va liwekapo oku fendela Suku.
22, 23. Akristão vocili, va yuvula eci cĩvi. “Vakuatatahãi pokati kavo,” va lavoka enyõleho ka li pui. Pole, akulu vekongelo va kuete ocikele coku va kuatisa oco va pame kespiritu.
[Elitalatu kemẽla 28]
Ovava losonde kuenda espiritu, vi eca uvangi wokuti, “Yesu eye Omõla a Suku”