Sanjukila Upange Woku Longisa Omanu Oco Va Linge Olondonge

‘Kuendi, ka longisi omanu oco va linge olondonge.’​—⁠MAT. 28:⁠19.

1-3. (a) Nye vamanji vamue va siata oku yeva vutima poku longisa Embimbiliya komanu? (b) Apulilo api tu konomuisa vocipama cilo?

M ANJI umue ukãi kofeka yo Estados Unidos okuti o kasi vocimunga celilongiso kelimi lio Hindi, wa popia hati: “Vokuenda kueci ci soka 11 kolosemana nda siata oku songola elilongiso Liembimbiliya vepata limue va tunda kofeka yo Pakistão.” Eye wamisako hati: “Nda linga ekamba liavo. Pole, eci nda limbuka okuti va tiukila kofeka yavo, nda lila calua. Voku lila kuaco, mua kongela esumuo lioku litepa lavo, kuenda esanju lioku va longisa ocili catiamẽla ku Yehova.”

² Ove hẽ, o kuete ulandu ndowu wa manji wa tukuiwa ndeti okuti, wa kuata esanju omo lioku longisa Embimbiliya komunu umue? Yesu kumue lolondonge viaye viatete, va kuatele esanju kupange woku longisa omanu oco va linge olondonge. Ci soka 70 kolondonge via pindisiwa la Yesu, eci via tiuka lulandu wesanju, eye wa ‘kuata esanju liespiritu sandu.’ (Luka 10:​17-​21) Cimuamue haico ci kasi oku pita lomanu valua va siata oku kuata esanju kupange woku longisa omanu. Uvangi waco, tu u limbukila kupange wa lingiwa kunyamo wo 2007. Momo akundi va kuata esanju lialua, poku longisa ci pitãhala olohuluwa epandu komanu vokuenda kuosãi!

³ Akundi vamue, ka va kuete epuluvi lioku longisa Embimbiliya komanu. Vakuavo va kasi anyamo alua okuti, ka va songola elilongiso Liembimbiliya. Ovitangi vipi tu pondola oku liyaka lavio poku longisa Embimbiliya komanu? Tu vi yula ndati? Asumũlũho api tu pondola oku tambula nda tua pokola kondaka ya Yesu wa popia hati: ‘Kuendi, ka longisi omanu oco va linge olondonge’?​—⁠Mat. 28:⁠19.

Ovitangi vi Tepulula Esanju Lietu

4, 5. (a) Kolonepa vimue violuali, omanu va siata oku tenda ndati esapulo liusoma? (b) Ovitangi vipi akundi va siata oku liyaka lavio kovikanjo vimue?

⁴ Voluali luosi, omanu valua va siata oku tambula alivulu etu kuenda oku tava oku lilongisa Embimbiliya letu. Olohueli vimue via tunda kofeka yo Australia okuti, cilo vi kasi oku talavaya kofeka yo Zambia, via soneha hati: “Ulandu owu wocili. Vofeka yo Zambia, muli omanu valua va lekisa onjongole kesapulo tu va kundila. Omanu tu kundila volokololo, va siata oku lekisa onjongole! Vamue va siata oku iya kokuetu oku pinga Utala Wondavululi lo Despertai!” Vokuenda kunyamo umue wa pita ndopo, vamanji kofeka yo Zambia va longisa Embimbiliya kueci ci soka 200.000 komanu. Eci ci lekisa okuti, vofeka yaco muli upange walua woku kundila omanu.

⁵ Kolofeka vikuavo, akundi vamue va siata oku kuata ovitangi vioku eca Utala Wondavululi lo Despertai! kuenda oku songola elilongiso Liembimbiliya komanu. Momo lie? Momo olonjanja vimue, eci vamanji va totola kapito, pamue ka va sangi omanu kolonjo. Kuenje, vana va sangiwa kolonjo, ka va lekisa onjongole kesapulo tu va kundila. Momo ka va sole uhembi u kasi vatavo esanda. Omanu valua, va siata oku yapuisiwa lasongui vatavo esanda. (Mat. 9:​36) Omo liaco, valua pokati kavo, va kuete ohele yoku sapela catiamẽla Kembimbiliya.

6. Ovitangi vipi akundi vamue va kuete?

⁶ Akundi vamue, va siata oku liyaka lovitangi vi tepulula esanju liavo. Ndaño kosimbu va kuatele ombili yoku longisa omanu, pole cilo va kuete ovitangi vioku vela, ale vioku kuka. Tu konomuisi ovitangi vimue tu pondola oku liyaka lavio. Ove hẽ, wa siata oku sima okuti, ku tẽla oku songola elilongiso Liembimbiliya? Pamue o kuata ovisimĩlo ndevi via Mose, eci Yehova o tuma oku vangula la Fareo. Mose wa popia hati: “A [Yehova], ame singanjiko, omo ondaka yange ya lenda lelimi liange li lema.” (Etu. 4:​10) Eye wa simĩle okuti, ka tẽla oku linga upange waco. Pamue, tu sima okuti, omunu tu kasi oku longisa, kaka linga Ombangi ya Yehova, momo ka tu kuete uloño woku longisa ciwa. Kuenje, tu liwekapo oku linga elilongiso Liembimbiliya. Tu pondola ndati oku yuvula ovisimĩlo via tukuiwa ndeti?

Pongiya Utima Wove

7. Nye ca vetiya Yesu kupange waye woku kunda?

⁷ Catete, tu sukila oku pongiya utima wetu. Yesu wa popia hati: “Eci ce yuka vutima haico omẽla u popia.” (Luka 6:​45) Yesu kupange woku kunda, wa velisilepo ekalo liwa liomanu. Eci a mõla va Yudea va hongua kespiritu, “wa va kuatela ohenda.” Kuenje, wa sapuila olondonge viaye hati: “Okungula kua lua. [Omo liaco,]. . . pingi ku Cime cokungula oco a tume olondingupange koku ungula kuaye.”​—⁠Mat. 9:​36-38.

8. (a) Nye tu sukila oku sokolola eci tu enda kupange woku kunda? (b) Ulandu wa umue wa lilongisa Embimbiliya u tu longisa nye?

⁸ Eci tu enda kupange woku longisa omanu, tu sukila oku sokolola ndomo tua kuatisiwa omo liomunu umue wa tava oku lilongisa Embimbiliya letu. Tu sukilavo oku sokolola omanu tuka sanga kupange woku kunda, kuenda ndomo vaka kuatisiwa lesapulo tu va kundila. Ukãi umue wa sonehela ko filiale Yolombangi via Yehova vofeka a kasi, poku popia hati: “Ndi yongola oku ku sapuili esanju ndi kuete, omo Liolombangi Via Yehova via siata oku iya konjo yange oku ndi longisa Ondaka ya Suku. Nda kũlĩha okuti, oloneke vimue ovo va siata oku sumua lame omo lioku va pulisa ovina vialua. Pole, va siata oku pandikisa loku amamako oku ndi longisa ovina va kũlĩha viatiamẽla kondaka ya Suku. Omo liaco, ndeca olopandu ku Yehova kuenda ku Yesu omo lioku tuma omanu vaco konjo yange.”

9. Ovina vipi Yesu a velisilepo, kuenda tu kuama ndati ongangu yaye?

⁹ Omanu vamue ka va tavele kovina Yesu a longisa. (Mat. 23:​37) Vakuavo vo kuamẽle lika vokuenda kuotembo yimue, pole, noke, ka va tavele vali kelongiso liaye, kuenda ‘va liwekapo oku enda laye.’ (Yoa. 6:​66) Pole, Yesu ka simĩle okuti esapulo liaye ka li kuete esilivilo omo lia vana ka va kapeleko ovina a longisa. Ndaño ombuto Yesu a kũla ka ya imile apako, pole, wa kapeleko ovina viwa a kala oku linga. Eye wa limbukile okuti, ovikũla vovapia viayela, kuenda via sukilile oku viungula. Omo liaco, wa sanjukilile upange woku ungula. (Tanga Yoano 4:​35, 36.) Ndaño tu lete ombuto ka yimi apako omo liekambo liotulumu, pole, tu sukila oku lekisa ombili kupange woku ungula vocikanjo cetu. Omo liaco, tu konomuisi ndomo tu pondola oku lekisa ombili kupange woku kunda.

Tu Kundi Locimãho Coku Fetika Elilongiso Liembimbiliya

10, 11. Nye o sukila oku linga oco amameko lesanju?

¹⁰ Nda ongunja ya kũla ombuto, yi lavoka okungula. Cimuamue haico tu sukila oku linga poku kunda, locimãho coku fetika elilongiso Liembimbiliya. Nda wa siata oku pesila otembo yalua kupange woku kunda, pole, ku sangi omanu valua konjo, anga hẽ, o kuata owesi woku linga apasu? Citava okuti, o sumua omo liocituwa caco. Anga hẽ, o liwekapo oku kundila konjo lanjo? Sio, ku liwekapo. Tunde kosimbu, Olombangi Via Yehova via siata oku kundila omanu kolonjo viavo loku kuama onjila yaco.

¹¹ Anga hẽ, o pondola oku vokiya upange wove woku kunda poku kuama olonjila via litepa vioku sanga omanu oco o kuate esanju? Wa siata hẽ oku kundila omanu volokololo, ale kovopange avo? O pondola hẽ, oku va kundila vo telefone, ale oku tambula etendelo lio telefone ya vana wa kundila esapulo Liusoma oco o linge apasu? Nda tua lekisa epandi kupange woku kunda, tuka sanga omanu vaka tava kesapulo Liusoma, kuenje tu kuata esanju lialua.

Ndomo tu Yula Ocitangi Coku Kundila Vana ka va Lekisa Onjongole

12. Nye tu sukila oku linga nda omanu vocikanjo cetu ka va lekisa onjongole kolondaka viwa?

¹² Nye tu sukila oku linga nda vocikanjo cetu omanu ka va yongola oku sapela catiamẽla ketavo? O pondola hẽ, oku kuama onjila yikuavo yoku fetika ombangulo oco o vetiye onjongole yomanu vaco? Upostolo Paulu wa sonehela vamanji ko Korindo hati: ‘Ku va Yudea nda linga lavo ndu Yudea. Kuava ka va kolela kovihandeleko nda linga lavo ndu ka kolela kovihandeleko ndaño si kasi kovihandeleko via Suku.’ Nye ca vetiya Paulu? Eye wamisako hati: “Nda linga lomanu vosi ndukuavina viosi okuti mopela vamue.” (1 Va Kor. 9:​20-​22) Anga hẽ, olondaka evi vi tiamisiwila komanu va kasi vocikanjo cetu? Valua ka va tiamẽlele ketavo va yongola okuti, apata avo a kuata esanju. Ovo, va kasi oku sandiliya esilivilo liomuenyo. Anga hẽ, tu pondola oku va kundila oco va tave kesapulo Liusoma?

13, 14. Tu pondola ndati oku vokiya esanju kupange woku longisa omanu?

¹³ Ndaño vovikanjo vimue omanu ka va lekisa onjongole, pole, vamanji valua va siata oku kuata esanju kupange woku longisa omanu. Nye ca siata oku va kuatisa? Va ci linga poku lilongisa elimi li vanguiwa vocikanjo cavo. Manji umue lukãi waye va kuete ci pitahãla 60 kanyamo, va limbuka okuti, olondonge vialua vio ko China kumue lapata avo, va sangiwa vocikanjo cimue va kala oku kundila. Manji ulume wa popia hati: “Tua vetiyiwa oku lilongisa elimi lio China oco tu kuatise omanu vocikanjo cetu. Ndaño tua pesela otembo yalua loku lilongisa elimi liaco, pole, tua kuatisa omanu valua oku lilongisa Embimbiliya.”

¹⁴ Ndaño ku tẽla oku lilongisa elimi likuavo, o pondola oku kundila omanu vaco, lekuatiso liokalivulu losapi hati: Boas Novas para Pessoas de Todas as Nações. O pondolavo oku tambula alivulu kelimi likuavo oco o kuatise omanu vocikanjo cove. O sukila oku sokiya otembo loku likolisilako oco o sapele lomanu va vangula elimi likuavo okuti, va kuete ovituwa via litepa. Pole, o sukila oku ivaluka onumbi Yondaka ya Suku yi popia hati: “U o kũla calua, ungulavo ca lua.”​—⁠2 Va Kor. 9:⁠6.

Vosi Yetu Tua Kongeliwa Kupange Waco

15, 16. (a) Momo lie ekongelo liosi li kuetele ocikele coku longisa omanu? (b) Vamanji va kuka va kuete ocikele cipi vekongelo?

¹⁵ Upange woku longisa omanu, ka u kasi peka liomunu umosi. Pole, vamanji vosi vekongelo va kuetevo ocikele caco. Yesu wa popia hati: “Kokulisola kuene pokati oko omanu vosi va limbukila okuti vulondonge viange.” (Yoa. 13:​35) Omanu tu longisa Embimbiliya, eci va fetika oku endaenda kolohongele, va komoha calua ocisola ci kasi pokati ketu. Ukãi umue o lilongisa Embimbiliya, wa soneha hati: “Nda sanjuka calua omo lioku endaenda kolohongele. Omanu vosi va ndi yolela!” Yesu wa popia hati, vosi va linga olondonge viaye, citava okuti, va suvukiwa lepata liavo. (Tanga Mateo 10:​35-37.) Pole, wa va likuminya hati, vekongelo va pondola oku sanga ‘vamanji valua kespiritu, vamukãi vavo, la va ina yavo, kuenda omãla.’​—⁠Mar. 10:⁠30.

¹⁶ Vamanji va kuka, va siata oku kuatisa calua vana va fetika ndopo oku lilongisa Embimbiliya oco va kule kespiritu. Va siata oku va kuatisa ndati? Ndaño vamanji vamue ka va pondola oku endisa elilongiso Liembimbiliya omo lioku kuka, pole, atambululo avo kolohongele, a pamisa ekolelo lia vana vava yevelela. Ovolandu avo oku endela ‘vonjila ya sunguluka,’ a nena esanju vekongelo, kuenda a vetiya afendeli va Suku.​—⁠Olosap. 16:⁠31.

Ndomo tu Yula Usumba Lomanu

17. Nye tu sukila oku linga nda tua limbuka okuti, ka tu tẽla oku songola elilongiso Liembimbiliya?

¹⁷ Nye o sukila oku linga nda wa limbuka okuti, ku tẽla oku songola elilongiso Liembimbiliya? Ivaluka okuti, espiritu sandu lia Yehova lia kuatisa Mose la Arone koku tẽlisa ovikele viavo. (Etu. 4:​10-​17) Yesu wa likuminyile okuti, espiritu lia Suku li tu kuatisa kupange woku kunda. (Ovil. 1:⁠8) Omo liaco, Yesu wa tumĩle ovapostolo vaye oku enda vavali, vavali koku kunda. (Luka 10:⁠1) Nda o kuete ocitangi coku sanga umue o longisa Embimbiliya, o sukila oku pinga espiritu lia Suku oco o kuate uloño woku ci linga. Noke, talavaya la manji umue wa loñoloha kupange woku kunda oco aku kuatise. Ivaluka okuti, Yehova wa nõla “ovina via leñela,” oco a tẽlise upange waye.​—⁠1 Va Kor. 1:​26-29.

18. Tu yuvula ndati usumba woku sima okuti, ka tu tẽla oku kuatisa vana tu longisa Embimbiliya?

¹⁸ Tu yuvula ndati usumba woku sima okuti, ka tu tẽla oku kuatisa vana tu longisa Embimbiliya? Tu sukila oku ivaluka okuti, oku longisa omanu, ka ku sokisiwa lukuakuteleka okuti, pamue o teleka okulia kupepa, ale sio. Pole, voku longisa omanu, mua kongela elikolisilo lia vamanji valua. Yehova wa siata oku eca ekuatiso liavelapo, momo o kokela omanu kokuaye. (Yoa. 6:​44) Vosi yetu tu sukila oku lekisa uloño woku longisa, oco vana va fetika ndopo oku lilongisa Embimbiliya va kule kespiritu. (Tanga 2 Timoteo 2:15.) Pole, olondonge vi sukila oku kapako ovina va lilongisa. (Mat. 7:​24-​27) Nda umue wa liwekapo oku lilongisa Embimbiliya, tu sumua calua. Momo, tu yongola okuti, o nõla onjila ya sunguluka, pole, ‘omunu lomunu oka lilombolola ku Suku.’​—⁠Va Rom. 14:⁠12.

Onima Yipi tu Lavoka?

19-21. (a) Asumũlũho api tu pondola oku tambula nda tua longisa Embimbiliya komanu? (b) Yehova wa siata oku tenda ndati vana va kasi oku kunda olondaka viwa?

¹⁹ Oku longisa Embimbiliya, ku tu kuatisa oku pitisa kovaso Usoma wa Suku. Ci tu kuatisavo oku kuata ukũlĩhĩso wasuapo Wondaka Yaye. Momo lie? Manji umue ukundi wotembo yosi o tukuiwa hati Barak, wa popia hati: “Oku longisa Embimbiliya, ci kuatisa oku loñoloha kelilongiso Liondaka ya Suku. Nda limbuka okuti, ndi sukila oku pamisa ovisimĩlo viange, osimbu sia fetikile oku longisa umue.”

²⁰ Nda ku kasi oku longisa umue Embimbiliya, ci lomboloka hẽ okuti, upange wove ka u kuete esilivilo ku Suku? Sio, hacoko! Yehova o sanjukila alikolisilo etu oku eca esivayo kokuaye. Vosi va litumbika kupange woku kunda, va linga ‘olondingupange via Suku.’ Omo liaco, oku longisa Embimbiliya ci nena esanju, osimbu tu amamako oku limbuka ndomo Suku a siata oku kulisa ovina. (1 Va Kor. 3:​6, 9) Manji umue ukundi wotembo yosi, o tukuiwa hati, Amy, wa popia hati: “Nda wa limbuka okuti omunu umue o longisa Embimbiliya o kasi oku kula kespiritu, eca olopandu ku Yehova waku kuatisa oku u longisa oco a kuate elavoko liomunyo ko pui.”

²¹ Nda tua likolisilako oku longisa Embimbiliya komanu, ci tu kuatisa oku amamako oku vumba Suku cilo, kuenda ci pamisa elavoko lietu lioku iñila voluali luokaliye palo posi. Lekuatiso lia Yehova, tu pondola oku longisa vana va tu yevelela oco va popeliwe. (Tanga 1 Timoteo 4:16.) Nda tua ci linga, tu kuata esanju lialua!

Ivaluka Eci Tua Lilongisa?

• Ovitangi vipi via siata oku tateka vamue oku longisa Embimbiliya komanu?

• Nye tu sukila oku linga nda omanu vocikanjo cetu ka va lekisa onjongole?

• Onima yipi tu lavoka nda tua longisa Embimbiliya komunu umue?

[Elitalatu kemẽla 9]

Wa siata hẽ oku kuama olonjila via litepa poku kundila vakuavitima via sunguluka?