Ondaka ya Yehova yi Kasi Lomuenyo

Atosi Avelapo Vonepa Yavali Yelivulu Liesituluilo

NYE cika pita lafendeli va Yehova Suku, kuenda vana ka vo fendela? Satana kumue lolondele viaye va lavoka nye? Asumũlũho api vakuepokolo vaka tambula vokuenda Kuohulukãi Yanyamo Yuviali wa Kristu? Atambululo kapulilo ava, a sangiwa kelivulu Liesituluilo 13:1–22:21.a Vovinimbu viaco mu sangiwa ovinjonde ecea, via sulako upostolo Yoano a mola kesulilo liunyamo watete.

Yoano wa soneha hati: “U o tanga olondaka viowanji ulo, lava vi lomboloka ... va pokola kuevi via sonehiwamo.” (Esit. 1:3; 22:7) Oku tanga ovina vi sangiwa velivulu Liesituluilo loku vi kapako, ci pamisa ekolelo lietu ku Suku, Komõlaye Yesu Kristu, kuenda ci tu ĩha elavoko liomuenyo ko pui.b—Va Hev. 4:12.

ATIYELA EPANDUVALI ONYEÑO YA SUKU A PESIWA

(Esit. 13:1–16:21)

Elivulu Liesituluilo 11:18, li popia hati: “Olofeka via fungula puãi onyeño yove [a Suku] yeya, kuenda eteke lioku ... nyõla ava va nyõla ilu lieve.” Uvangi woku iya kuonyeño ya Suku u sangiwa vocinjonde cecelãla ci lekisa ovina vi lingiwa ‘locinyama ci kuete ekũi liolombinga lovitue epanduvali.’—Esit. 13:1.

Vocinjonde cecea, Yoano wa mola ‘Kameme o tãi komunda Siono, o kasi locita lakũi akuãla la vikuãla kolohulukãi viomanu.’ Ovo, va ‘yovuiwa komanu.’ (Esit. 14:1, 4) Noke, kua yevala esapulo lia eciwa lungelo. Voncinjonde cikuavo, Yoano wa mola “ovangelo epanduvali vambata afengi epanduvali.” Noke, Yehova wa tuma ovangelo vaco oco va ‘pesile kilu lieve atiyela aco epanduvali onyeño ya Suku,’ kolonepa viosi violuali lua Satana. Atiyela aco, a kuete esapulo kuenda elungulo liatiamẽla keyambulo Suku aka nena kolondingaĩvi. (Esit. 15:1; 16:1) Pole, ovinjonde viaco vivali, vi tiamisiwila kesombiso lika lingiwa Lusoma liatiamẽla kohali yatatu kuenda oku sikiwa kualumbeta epanduvali.—Esit. 11:14, 15.

Atambululo Kapulilo Embimbiliya:

13:8—‘Elivulu liomuenyo lia Kameme,’ li lomboloka nye? Velivulu liaco liocindekaise, mu sangiwa lika olonduko via vana vaka viala la Kristu Vusoma waye kilu. Mu sangiwavo olonduko Viakristão olombuavekua via siala palo posi okuti, vi kuete elavoko lioku enda kilu.

13:11-13—Ocinyama colombinga vivali, ci lekisa ndati ovituwa ndevi viocinyoha cinene ci lokisila ondalu posi? Ocinyama colombinga vivali, ci lomboloka Uviali wo Amerika kuenda wo Bretanya. Olombiali viaco, vi lekisa ovituwa ndevi viocinyoha cinene, poku kisika omanu oco va tave kuviali wavo. Ocinyama caco, ci lokisila ondalu posi, poku li sokisa nduprofeto wocili o popia hati, wa yula ovoyaki avali a pita voluali okupisa kunyamo wo 1914. Kuenda wa yula olombiali viosi via siata oku kisika omanu oku kuata lika ovina vimuamue.

16:17—‘Ofela’ mua pesiwila atiyela epanduvali yi lomboloka nye? Yi lomboloka ‘ovisimĩlo via vĩha via Satana, momo wa siata oku vetiya omanu oku lekisa esino.’ Vosi va panga onepa koluali lua Satana, va kasi oku fuima ofela yaco ya vĩha.—Va Efe. 2:2.

Ceci tu Lilongisilako:

13:1-4, 18. “Ocinyama” cinene, ca “tunda vokalunga,” ci lomboloka olombiali via siata oku vetiya ungangala pokati komanu. (Isa. 17:12, 13; Dan. 7:2-8, 17) Omo okuti ocinyama caco ca tambula unene ku Satana, ci kuete etendelo 666 okuti, li lomboloka ekambo lioku lipua. Oku kuata elomboloko liatiamẽla kocinyama caco, ci tu kuatisa oku yuvula oku ci lulumila, kuenda oku ci fendela, ndomo omanu vamue va siata oku ci linga.—Yoa. 12:31; 15:19.

13:16, 17. Ndaño tua siata oku liyaka lovitangi vieteke leteke, ndeci ‘oku landa ale oku landisa’ ovina vietu, ka tuka eceleli oku yapuisiwa lolombiali violuali lulo. Nda tua tava ‘oku kapiwa ondimbukiso yocinyama peka lietu, ale pupolo,’ ci lekisa okuti, tu kasi oku yapuisiwa lolombiali violuali lulo.

14:6, 7. Esapulo liovangelo, li tu vetiya oku amamako oku kunda lonjanga olondaka viwa Viusoma wa Suku. Omo liaco, tu sukila oku kuatisa olondonge vietu oco vi loñolohe kespiritu, kuenda oku eca esivayo ku Yehova Suku.

14:14-20. ‘Okunguiwa kuovikulia kilu lieve,’ ku lomboloka oku kongeliwa kuomanu vaka popeliwa. Pole, eci okungula kuaco ku tẽlisiwa, ungelo oka kongela “ovisiakata viayuva o kilu lieve,” kuenje, oka vi “kapa vocikoselo cinene conyeño ya Suku.” Olombiali violuali lua Satana kumue lomanu vana va lomboloka ‘ovisiakata viayuva’ ãvi, vaka nyõliwa. Omo liaco, tu sukila oku yuvula oku yapuisiwa lomanu vaco.

16:13-16. ‘Olondaka vĩvi’ via tukuiwa vovinimbu evi, vi lomboloka uhembi wolondele, oco olosoma violuali lulo ka vika tave okuti, vi kasi oku yapuisiwa latiyela epanduvali vonyeño ya Suku. Pole, olombiali via siata oku vetiyiwa oco vi linge ovanyãli va Yehova.—Mat. 24:42, 44.

Omo okuti esulilo lioluali lulo li kasi ocipepi, vesapulo lia Yehova lioku nyõla oluali lua Satana, mua kongela oku sapuila komanu ovina viatiamẽla kesombiso lia Suku, ndeci ci pita lovava a pongoloka ocikokoto. Pole, ndaño lesapulo liaco, omanu vaka amamako oku pembula Suku.

SOMA WA YULA

(Esit. 17:1–22:21)

‘O Bavulono Yinene,’ okuti uviali wocisoko catavo esanda, ci panga onepa koluali lua Satana. Ocinjonde cekũi lamosi, ci lombolola ‘ukãi ocipuepue, wa tumala kocinyama ci kusuka ngẽ.’ Ukãi waco, oka nyõliwa locinyama ci kuete ‘ekũi liolombinga,’ kuna a tumala. (Esit. 17:1, 3, 5, 16) Ndaño ukãi waco o sokisiwa ‘lolupale lunene,’ pole, ocinjonde cikuavo, ci lekisa oku nyõliwa kuaye. Omo liaco, afendeli va Suku va sukila oku tila ‘volupale luaco.’ Omanu valua vaka sumua omo lioku nyõliwa kuolupale luaco. Pole, ovangelo vokilu va sanjuka calua omo ‘liuvala wa Kameme.’ (Esit. 18:4, 9, 10, 15-19; 19:7) Ocinjonde cekũi latatu, ci lekisa ungelo endela ‘kokavalu kayela,’ oco a linge uyaki lolofeka. Noke, oka nyõla oluali lua Satana.—Esit. 19:11-16.

Nye cika pita ‘la Satana Eliapu,’ onyoha yosiahũlu? Otembo yipi aka “imbiwa vociva condalu lofuofuo”? Atambululo aco a sangiwa vocinjonde cekũi lakuãla. (Esit. 20:2, 10) Ovinjonde vivali via sulako, vi lombolola ovina vika pita vokuenda Kuohulukãi Yanyamo yuviali wa Kristu. Kesulilo ‘liesituluilo’ liaco, Yoano wa mõla ‘olui luovava omuenyo lu pita vokati kokololo yimbo.’ Kuenje, vosi ‘va kuete enyona,’ va lalekiwa okunyua kovava aco.—Esit. 1:1; 22:1, 2, 17.

Atambululo Kapulilo Embimbiliya:

17:16; 18:9, 10—Momo lie “olosoma viokilu lieve,” vika sumuila eci vika nyõla Ombavulono Yinene? Ovio, vika sumua. Momo, noke yoku nyoliwa kuo Bavulono Yinene, olosoma violuali vika limbuka ekuatiso o Bavulono ya enda oku eca omo liukamba wa kala pokati kavo. O Bavulono Yinene ya kuatisavo olombiali koku kuata amalẽhe oco va ende kusualali. Oyo, ya vetiyavo omanu oco va pokole kolombiali.

19:12—Ndamupi okuti Yesu eye lika wa kũlĩha onduko yaye yina ka ya tukuiwile? Onduko yaco citava okuti yi lomboloka ocikele caye cavelapo kuenda esumũlũho lia lomboluiwa kelivulu lia Isaya 9:6 lina a kuete vokuenda kueteke lia Ñala. Yesu eye lika wa kũlĩha onduko yaco, kuenda eye lika wa kũlĩha esumũlũho liaye li likasi lesunga lieci a kuetele ocikele caco cavelapo. Pole, wa ecavo esumũlũho liaco kocisoko caye colombuavekua, poku va ‘soneha onduko yaye yokaliye.’—Esit. 3:12.

19:14—Velie vaka kuama Yesu kuyaki wo Harmagedo? Muka kongela ‘olohoka viokilu,’ vika kuatisa Yesu vuyaki Suku aka linga, kuenda olombuavekua via tambula onima yavo kilu.—Mat. 25:31, 32; Esit. 2:26, 27.

20:11-15—Velie olonduko viavo vi sonehiwa ‘velivulu liomuenyo’? Velivulu liaco, mua sonehiwa olonduko Viakristão olombuavekua, vaka kuata omuenyo ko pui kilu. Muka sonehiwavo olonduko viowiñi wakahandangala, kuenda via ‘vakuesunga vaka pinduiwa.’ (Ovil. 24:15; Esit. 2:10; 7:9) Vana okuti ‘halondingesungako, noke lioku pinduiwa,’ olonduko viavo, vika sonehiwa lika ‘velivulu liomuenyo,’ nda va pokola kolonumbi vi sangiwa ‘velivulu liaco’ lika yikuiwa vokuenda Kuohulukãi Yanyamo. Pole, ka ci lekisa okuti, olonduko viavo ka ci tava oku viupa velivulu liaco. Olonduko violombuavekua, ovio lika ka viupiwa velivulu liomuenyo, omo lioku lekisa epokolo toke kolofa. (Esit. 3:5) Omo liaco, olonduko via vana vaka kala palo posi, vika amamako lika velivulu liaco, noke lioseteko ya sulako yika lingiwa kesulilo liohulukãi yanyamo yuviali wa Kristu.—Esit. 20:7, 8.

Ceci tu Lilongisilako:

17:3, 5, 7, 16. “Olondunge viokilu” vi tu kuatisa oku kuata elomboloko liasuapo liatiamẽla ‘kelumbu liukãi wa kusuka ngẽ, kuenda liocinyama kuna a tumala.’ (Tia. 3:17) Vupopi wocindekaise, ocinyama caco, tete ca lombolokele o Liga das Nações. Noke ceya oku tukuiwa hati, Nações Unidas. Oku situlula ulandu waco, ci tu vetiya oku kuata ombili kupange woku kunda olondaka viwa Viusoma, kuenda oku sapuila komanu eteke lionyeño ya Yehova Suku.

21:1-6. Tua kolela okuti, ovina viosi Yehova a likuminya lekuatiso Liusoma waye, vika tẽlisiwa. Momo lie? Momo catiamẽla kovina viaco, Suku wa popia hati, ‘vika tẽlisiwa!’

22:1, 17. “Olui luovava omuenyo,” lu lomboloka esokiyo Yehova a siata oku linga oco a yovole afendeli vaye kekandu kuenda kolofa. Koloneke vilo, ovava aco a kuete esilivilo. Omo liaco, tu tava kelaleko lioku ‘tambula ocali ovava omuenyo,’ kuenda tu laleka vakuetu oco va nyuevo kovava aco!

[Atosi pombuelo yamẽla]

[Elitalatu kemẽla 5]

Lekuatiso Liusoma wa Suku, omanu vaka tambula asumũlũho ka a pui!