Anga hẽ Citava Oku Kuata Elomboloko Liembimbiliya?
“Osemana Losemana, Calumingu, tua enda oku tanga Embimbiliya vepata. Ndaño sia solele oku ci linga, nda kolele okuti Embimbiliya Ondaka ya Suku. Pole, sia kuatele elomboloko liovisonehua nda enda oku tanga.”—Steven, kofeka yo Grã-Bretanya.
“Eci nda tẽlisa 17 kanyamo, nda setekele oku tanga Embimbiliya. Puãi nda liwekapo, momo ca tĩlile calua oku kuata elomboloko lialio.”—Valvanera, kofeka yo Espanya.
“Onjanja yimue nda tanga Embimbiliya loku sima okuti omo ndu Katolika, nda sukilile oku ci linga. Oco ndi malusule oku li tanga, nda pita anyamo atatu! Pole sia kuatele elomboloko lalimue.”—Jo-Anne, kofeka yo Australia.
EMBIMBILIYA olio elivulu lia kũlĩhĩwa vali calua pokati kalivulu osi a sangiwa voluali. Koloneke vilo, Embimbiliya lia siata oku sandekiwa valimi añi añi, kuenda lia pangiwa volonepa via litepa okuti kosimbu ci sule. Pole, omanu valua ndaño va kuete Embimbiliya, ka va kuete elomboloko lialio. Anga hẽ eci ca siatavo oku pita love?
Anga hẽ Usovoli Walio o Yongola Okuti tu Kuata Elomboloko Liondaka Yaye?
Embimbiliya li popia hati: “Ovisonehua vi kola viosi ovitumasuku.” (2 Timoteo 3:16) Ocili okuti, Yehova Suku, Eye Usovoli Wembimbiliya. Anga hẽ eye o yongola okuti tu kuata muẽle elomboloko Liondaka yaye? Ale wa sovola Embimbiliya locisimĩlo cokuti ovitunda kuenda olonoño ovio lika vi kuata elomboloko lialio, okuti omanu vaño sio?
Konomuisa ovinimbu vimue Viembimbiliya vi kuãimo:
“Ocihandeleko cilo ñasi loku ku ĩha etaili ka ca ku kãlẽlẽle, ka ci kasi kupãla.”—Esinumuĩlo 30:11.
“Elomboluilo liolondaka viove li eca ocinyi, kuenje li loñoluisa olonjambawa.”—Osamo 119:130.
“Kola yaco Yesu we yukililua lesanju li’espiritu sandu, wa popia hati, Pandu, pandu kokuove, a Tate, a Ñala yokilu loposi, omo wa sitikila ovina evi kolonoño kuenda ku vakualondunge, kuenje wa vi situluila koloñaña.”—Luka 10:21.
Usovoli Wembimbiliya, o yongola okuti ove o kuata elomboloko Liondaka yaye! Pole, kuli omanu valua ka va kuete elomboloko lielivulu liaco. Nye ci pondola oku va kuatisa? Vovipama vi kuãimo mu sangiwa olonumbi vitatu vi pondola oku kuatisa omanu oku kuata elomboloko Liembimbiliya.