Tua Tiamẽla Ku Yehova Omo Liohenda Yaye
“Etu tua tiamẽla ku Yehova.”—VA ROM. 14:8, NW.
1, 2. (a) Esumũlũho lipi etu tu kuete? (b) Apulilo api tu ka konomuisa?
YEHOVA wa ecele esumũlũho linene ku va Isareli eci a va sapuila hati: “Ene, wa nõliwi pokati kolofeka viosi, ha vu lingi omanu vange muẽle.” (Etu. 19:5, NW) Koloneke vilo, omanu va kasi vekongelo Liakristão va kuete esumũlũho lioku tiamẽla ku Yehova. (1 Pet. 2:9; Esit. 7:9, 14, 15) Esumũlũho liaco, li pondola oku tu kuatisa otembo ka yi pui.
2 Oku tiamẽla ku Yehova ka ci nena lika esumũlũho, pole ocikele cimue cinene. Olonjanja viala, vamue va lipula ndoco: ‘Anga hẽ ndi pondola muẽle oku linga eci Yehova a ndi yonguila? Nda eteke limue ndi linga ekandu, mbi eye o ka njanduluka? Anga hẽ oku tiamẽla ku Yehova ci njupa elianjo liange?’ Osimbu handi ka tua konomuisile apulilo a-a, tete tu kũlĩhisi lutate epulilo eli: Onima yipi yi iyilila koku tiamẽla ku Yehova?
Oku Tiamẽla ku Yehova ci Nena Esanju
3. Rahava wa kuatisiwa ndati omo lioku nõlapo oku vumba Yehova?
3 Omanu vana va tiamẽlele ku Yehova kosimbu va kuatisiwa ndati? Tu konomuisi ulandu wa pita la Rahava, ukãi umue ocipuepue wa kala vimbo lio Yeriko. Eye wa kulila pokati komanu va kuata ovituwa vĩvi, haivo va enda oku fendela olosuku vio vo Kanana. Kuenje eci a yeva eyulo Yehova a ecele ku va Isareli, wa limbuka okuti Yehova, eye Suku yocili. Eye wa teyuila omanu va Suku, kuenda wa kapele omuenyo waye kohele, momo wa kolelele okuti va ka popela omuenyo waye. Embimbiliya li popia ndoco: “Rahava hẽ, ka tendiwile ndukuesunga mekonda liovilinga, eci a yekisa olomunga, kuenje wa vi imba onumbi yonjila yiñi?” (Tia. 2:25) Sokolola ndomo a kuatisiwa eci eye a tiamẽla komanu va Suku, vana va kuamẽle efendelo liocili, haivo va tambowaile Ovihandeleko via Suku, loku endela vonjila yocisola lesunga. Hesanjukuolio a kuata omo lioku siapo omuenyo waye ũvi! Eye weya oku kuela ulume umue u Isareli yu wa cita laye omõla wulume o tukuiwa hati, Boasi, una weya oku soliwa calua la Suku.—Yeh. 6:25; Ruti 2:4-12; Mat. 1:5, 6.
4. Omo lioku nõlapo oku vumba Yehova, Ruti wa kuatisiwa ndati?
4 Omunu ukuavo wa nõlelepo oku vumba Yehova, Ruti. Citava okuti eci Ruti a kala ufeko, wa enda oku fendela osuku yimue yi tukuiwa hati, Kemosi kuenda olosuku vikuavo via va Moavi. Pole, eci a kuela ulume umue u Isareli wa tililile vofeka yavo omo lionjala, weya oku kũlĩha Suku yocili, Yehova. (Tanga Ruti 1:1-6.) Noke Ruti kuenda manjaye volohuela Arape, va yonguile oku enda kumue la ndatembo yavo Naomi, ko Beteleme. Pole, Naomi wa va kisika oku tiukila kimbo liavo, momo ka ca lelukile oku kala lakãi vaco vo Isareli. Kuenje Arape wa “tiukila kuvangandiaye kuenda kolosuku viaye.” Puãi Ruti ka tavele oku tiukila. Eye wa lekisa ekolelo kuenda wa kũlĩhile oku a yonguile oku tiamẽla. Eye wa sapuila Naomi hati: “Ku ka milike oku ku tunda hã si liweka oku ku kuama, momo oku wenda lamevo haiko ngenda, oku o ka sikĩla haiko ha sikĩlavo. Omanu vove va linga omanu vange, Suku yene o lingavo Suku yange.” (Ruti 1:15, 16) Omo lioku nõlapo oku vumba Yehova, Ruti wa kuatisiwa Locihandeleko Suku a ecele catiamẽla koku tata ovimbumba, olosuke kuenda ovingendeleyi. Omo wa vundile vavava a Yehova, eye wa kuata esanju, ombindikiyo, kuenda wa kolelepo.
5. Nye ove wa siata oku mola komanu vana va kasi oku vumba Yehova lekolelo?
5 Pamue ove wa kũlĩha omanu vamue va litumbika ku Yehova kuenda va kasi oku u vumba lekolelo vokuenda kuanyamo alua. Va pulisa ndomo va kuatisiwa poku u vumba. Ndaño okuti valua pokati kavo va kuete ovitangi, lopo va sanjuka ndukualosamo wa popia hati: “Omanu vana okuti, Suku yavo Yehova, va sumũlũha cocili!”—Osa. 144:15, NW.
Yehova ka tu Kisika Oku Linga Eci ka tu Tẽla
6. Momo lie ka tu sukilila oku kuata ohele yokuti ka tu ka tẽla oku linga eci Yehova a lavoka kokuetu?
6 Pamue ove o sima okuti ku tẽla oku linga ovina Yehova a lavoka kokuove. Ci kuete esunga komunu una o yongola oku vumba Suku loku kuama ovihandeleko viaye, oku kuata ohele yoku vangula vonduko yaye. Mose wa kuatavo ohele cina a tumiwile oku ka vangula la va Isareli kuenda Soma yo Kegito, momo wa simĩle okuti ka loñolohele. Pole Suku ka kisikile Mose oku linga eci ka tẽla. Yehova ‘wo longisa ndomo a ponduile oku ci linga.’ (Tanga Etundilo 3:11; 4:1, 10, 13-15.) Omo Mose wa tava kekuatiso a tambula, wa kuata esanju lioku tẽlisa ocipango ca Suku. Eci ci lekisa okuti Yehova ka tu kisika oku linga eci ka tu tẽla. Omo wa kũlĩha okuti ka tua lipuile kuenda o yongola oku tu kuatisa. (Osa. 103:14) Oku vumba Suku ndolondonge via Yesu ci kavuluisa, momo oku ci linga ci pondola oku kuatisa omanu kuenda ci sanjuisa utima wa Yehova. Yesu wa popia hati: “Enjui kokuange, . . . kuenje ndu kavuluisi. Likapi okanga yange kuenda lilongisi kokuange, momo ndonjuka, haime nda liketisa vutima.”—Mat. 11:28, 29.
7. Momo lie wa kolelela okuti Yehova o ka ku kuatisa oku linga eci a ku pinga?
7 Nda olonjanja viosi tu kolela Yehova, eye o ka tu ĩha elembeleko tu sukila kuenda o ka tu pamisa. Eci Yehova a nõla Yeremiya oku linga uprofeto Waye, Yeremiya omo liusumba wa popia hati: “Avoyo we! A Ñala Yehova, ame oku popia si ci tẽla, momo ndimõla.” Noke wa amisako hati: “Si imbi vali owanji vonduko yaye.” (Yer. 1:6; 20:9, NW) Pole lekuatiso lia Yehova, Yeremiya wa kuata utõi woku kunda esapulo limue okuti ka lia soliwile lomanu vokuenda kueci ci soka 40 kanyamo. Olonjanja vialua, Yehova wo kolisa lolondaka viokuti: “Ame ñasi love oku ku silamẽla.”—Yer. 1:8, 19; 15:20.
8. Tu lekisa ndati okuti tua kolela Yehova?
8 Ndeci Yehova a kuatisa Mose la Yeremiya, eye o kuatisavo Akristão vosi koloneke vilo, oku linga upange waye. Ocina ca velapo, oku kolela Suku. Embimbiliya li popia ndoco: “Kolela Yehova lutima wove wosi. Ku ka tiamẽle kolondunge viove muẽle. U sumbila kolongenda viove viosi, kuenje eye o suñamisa olonjila viove.” (Olosap. 3:5, 6) Etu tu lekisa okuti tua kolela Yehova, eci tu upa esilivilo kekuatiso a tu ĩha Londaka yaye kuenda vonduko yekongelo. Nda tu ecelela okuti Yehova o suñamisa olongenda vietu, ka kuli lacimue ci ka tateka ekolelo tu u kuetele.
Yehova o Tata Afendeli Vaye Omunu Lomunu
9, 10. Ndomo ca lekisiwa Kosamo 91, Suku o tu teyuila konepa ye?
9 Vamue eci va sokolola oku litumbika ku Yehova, va fetika oku sima okuti nda eteke limue va linga ekandu, ka va ka taviwa vali la Yehova. Pole, Yehova o tu ĩha ovina vi tu kuatisa oku teyuila ukamba wetu laye. Tu konomuisi ndomo Osamo 91, yi lombolola ondaka yaco.
10 Ukualosamo wa fetika lolondaka evi: “U wa tunga vociwundilo ca Fũ, eye o tumala vulembo wa Tõlo. Nukula Yehova siti, Eye ocikolo cange, haeye ombonge yange. Eye Suku yange, ndu kolela. Momo o ku popela konjanjo yukuakutela olonjila.” (Osa. 91:1-3) Ivaluka okuti Suku wa likuminya oku teyuila vana vo sole, haivo vo kolela. (Tanga Osamo 91:9, 14.) Eye o va teyuila ndati? Kosimbu, Yehova wa teyuila omanu vaye konepa yetimba, poku amamako oku lava ocitumbulukila cavo otembo yalua toke koku iya kua Mesiya. Pole, alume vamue vakuekolelo, va kapiwa vokayike, va tipuiwa, vakuavo va pondiwa kuenda vamue va tatiwa lungangala wa piãla oco va liwekepo oku kolela Suku. (Va Hev. 11:34-39) Ovo va pandikisa lutõi, momo Yehova wa va teyuila konepa yespiritu, oco ka va ka liwekepo oku kakatela kesunga liavo. Ndomo ca lekisiwa Kosamo 91, Suku o pondolavo oku tu teyuila konepa yespiritu.
11. ‘Ociwundilo ca Fũ’ ci lomboloka nye, kuenda omanu vapi Suku a teyuila?
11 ‘Ociwundilo ca Fũ’ ca tukuiwa ndeti lukualosamo, ocitumãlo cocindekaise, muna Suku a teyuila omanu vaye konepa yespiritu. Wosi o linga ukombe vonjo ya Suku, o sanga ocitililo kuenda ka kuli lacimue ci pondola oku honguisa ekolelo liaye locisola a kuetele Suku. (Osa. 15:1, 2; 121:5) Ocitumãlo caco ci kasi ndocivundilo, momo vana ka va kuete ekolelo ka va pondola oku ci mola. Vocitumãlo caco omo Yehova a teyuila omanu vaye, kuenje omunu lomunu o pondola oku popia hati: ‘Ove, ove wu Suku yange nda ku kolela.’ Nda tu amamako oku kala vocivundilo caco, ka tu ka yokokela cimue, ci yongola oku tu nyẽha ohenda ya Suku, ndaño onjanjo ya Satana ‘ukuakutela olonjila’ ka yi tu kuata.
12. Ovina vipi vi pondola oku kapa kohele ukamba wetu la Suku?
12 Ovina vipi vi pondola oku kapa kohele ukamba wetu la Suku? Pokati kovina vialua ukualosamo a tukula, pa sangiwa ‘efengi li endaila vowelema kuenda ekundu li kundola ekumbi pongunji.’ (Osa. 91:5, 6) ‘Ukuakutela olonjila’ o yapuisa valua lonjongole yoku li tumĩla ovo muẽle. (2 Va Kor. 11:3) Eye o yapuisa omanu poku va vetiya oku kuata epela locipulu cukuasi. Wa siatavo oku kemba omanu lovilongua viesanda, ndeci oku sivaya ofeka, elongiso liokuti ovina via tukuluka ovio muẽle kuenda etavo liesanda. (Va Kol. 2:8) Vamue va siata oku yonjiwa lukahonga. Efengi liaco kespiritu, lia siata oku kokela olohuluwa viomanu oku siapo oku sola Suku.—Tanga Osamo 91:7-10; Mat. 24:12.
Teyuila Ocisola o Kuetele Suku
13. Yehova o tu teyuila ndati kovina vi kapa kohele ekalo lietu kespiritu?
13 Yehova o teyuila ndati omanu vaye kovina vi kapa kohele ekalo liavo kespiritu? Ukualosamo wa popia hati: “[Eye] o ku kundika kovangelo vaye, ha va ku lavi kolonjila viove viosi.” (Osa. 91:11) Ovangelo kilu, va tu songuila loku tu teyuila eci tu enda kupange woku kunda esapulo liwa. (Esit. 14:6) Tu kuetevo akulu vekongelo va tu teyuila, momo poku longisa va kakatela Kovisonehua, oco ka tu ka yapuisiwe lovisimĩlo viesanda. Nda omunu umue vekongelo o liyaka lovitangi, ovo va eca ekuatiso kokuaye. (Tito 1:9; 1 Pet. 5:2) Handi vali, “ukuenje wa kolelua” wa siata oku eca eteku li tu teyuila kelongiso liokuti ovina via tukuluka ovio muẽle, lo kovina vi vetiya oloñei vĩvi, loku sandiliya ovokuasi, ekemãlo, kuenda koloñei vikuavo. (Mat. 24:45) Nye ca siata oku ku kuatisa oku tamãlala lovina viaco vi kapa ekalo liove kohele?
14. Ndamupi tu pondola oku kuatisiwa laliangiliyo a Suku o ku tu teyuila?
14 Nye tu sukilila oku linga oco tu kale “vocivundilo” ca Suku? Ndeci tua siata oku liteyuila kovina vi kapa kohele uhayele wetu, kovitangi, kungangala, pamue kovovei a sambuka, cimuamue haico, tu sukilavo oku liteyuila kovina vi kapa kohele ekalo lietu kespiritu. Olonjanja viosi, tu sukila oku upa esilivilo kolonumbi Yehova a siata oku tu ĩha valivulu a sandekiwa lukuenje wa kolelua, kolohongele viekongelo kuenda kolohongele vinene. Tu sukila oku tava kalungulo a eciwa lakulu vekongelo. Anga hẽ ka tua siatelevo oku kuatisiwa lovituwa viwa via vamanji alume lakãi vekongelo? Ocili okuti ukamba wetu la vamanji, u tu kuatisa oku kala vakualondunge.—Olosap. 13:20; tanga 1 Petulu 4:10.
15. Momo lie wa kolelela okuti Yehova o ku teyuila kovina viosi vi pondola oku ku pumbisa oku taviwa laye?
15 Ka tu kuete atatahãi okuti Yehova o pondola oku tu teyuila kovina vi tu kokela oku pumba ohenda yaye. (Va Rom. 8:38, 39) Eye o teyuila ekongelo, kefendelo liesanda, kovanyãli vakuapulitika, vana va yongola oku tu tindula ku Suku yetu o kola. Ohuminyo eyi ya Yehova, yokuti “lacimue ocimãlẽho va ci telela oku yaka love ci ku linga cimue,” yocili.—Isa. 54:17.
Helie o tu Ĩha Elianjo?
16. Momo lie oluali ka lu tẽlela oku tu ĩha elianjo?
16 Anga hẽ oku tiamẽla ku Yehova ci tateka elianjo tu kuete? Sio. Puãi eci ci tateka elianjo lietu, oku tiamẽla koluali. Oluali lua tinduka ku Yehova kuenda lu kasi oku vialiwa longangala yi kasi oku fukĩlisa omanu. (Yoa. 14:30) Oluali lua Satana lu vetiya omanu oku sandiliya ovokuasi ana a nyana elianjo liavo. (Ci sokisa Lesituluilo 13:16, 17.) Ekandu li kuete unene woku fukĩlisa omanu. (Yoa. 8:34; Va Hev. 3:13) Vana ka va kuete ekolelo va siata oku kemba omanu lalongiso a litepa lolohuminyo via Yehova, pole alongiso aco, a fukĩlisa ño omanu okuti va linga apika vekandu.—Va Rom. 1:24-32.
17. Yehova o tu ĩha elianjo lipi?
17 Nda tu kolela Yehova, eye o tu ĩha elianjo li tu teyuila kovina viosi vĩvi. Ekalo lietu li kasi ndeli liomunu o vela okuti osimbu a kasi oku tatiwa la ndotolo, eye o kuata lika elianjo litito. Vosi yetu ka tu kuete elianjo lia suapo omo tua piñala ekandu. Pole, nda tu kolela Yehova, vonduko yocisembi ca Kristu, tu pondola oku puluka kovitangi vi iyilila kekandu kuenje tu kala otembo ka yi pui. (Yoa. 3:36) Ndeci tu kolela ndotolo poku u kũlĩha ciwa vokuenda kuotembo, cimuamue haico, ekolelo tu kuetele Yehova, li kula osimbu tu amamako oku lilongisa ovina via tiamẽla kokuaye. Omo liaco, tu amamiko oku lilongisa lutate Ondaka ya Suku, momo yi tu kuatisa oku sola Yehova kuenda oku yuvula ovina vi tu tateka oku tiamẽla kokuaye.—1 Yoa. 4:18.
18. Vana va tiamẽla ku Yehova va ka tambula onima yipi?
18 Yehova eca komanu vosi elianjo lioku li nõlela ovo muẽle eci va panga. Ondaka yaye yi popia ndoco: “Oco, nõla omuenyo, okuti ove lombuto yove vu kala lomuenyo, kuenje vu sola Yehova, Suku yove.” (Esin. 30:19, 20) Eye o yongola okuti tu lekisa ocisola kokuaye poku nõlapo oku u vumba. Oku tiamẽla ku Suku una o tu sole, ka ci tateka elianjo lietu pole, ci tu ĩha esanju liocili.
19. Momo lie tu popela okuti oku tiamẽla ku Yehova esumũlũho limue linene?
19 Omo okuti etu tuakuakandu, ka tua sesamẽlele oku tiamẽla ku Suku wa lipua. Eci ci tẽliwa lika omo liocali ca Suku ka ci tendiwa. (2 Tim. 1:9) Eli olio esunga lieci Paulu a popela hati: “Nda tu kasi lomuenyo, tu u muila ku Yehova, nda tu fa, tu fila ku Yehova. Oco, ndaño tu kasi lomuenyo, ndaño tu fa, lopo tua tiamẽla ku Yehova.” (Va Rom. 14:8, NW) Ocili okuti, lalimue eteke tu ka livela omo lioku tiamẽla ku Yehova.
O Tambulula Ndati?
• Onima yipi yi tunda koku tiamẽla ku Yehova?
• Momo lie tu ponduila oku linga ovina Suku a lavoka kokuetu?
• Yehova o teyuila ndati omanu vaye?
[Elitalatu kemẽla 8]
Pulisa vakuene ndomo va kuatisiwa omo lioku tiamẽla ku Yehova
[Elitalatu kemẽla 10]
Volonjila vipi Yehova a siata oku tu teyuila?