Longisa Omãla Vove

Yesu wa Lilongisa Epokolo

ANGA hẽ olonjanja vimue, kokuove ca tĩla oku lekisa epokolo?—a Nda o kuete ocitangi caco, ku ka yokoke. Omanu vosi va siata oku liyaka locitangi caco. Ove wa kũlĩhĩle okuti Yesu wa sukililevo oku lilongisa epokolo?—

Ove hẽ, wa kũlĩha u omãla vosi va sukila oku pokola?— Tu sukila oku pokola ku isietu kuenda ku ina yetu. Embimbiliya li popia hati: “Pokoli kolonjali viene vu Kristu.” (Va Efeso 6:1) Helie isia ya Yesu?— Isiaye Yehova Suku, haeye Isietu. (Mateo 6:9, 10) Pole, nda wa popia hati, Yosefe eye wa kala isia ya Yesu kuenda Maria eye ina yaye, wa popia ciwa. Ove hẽ, wa kũlĩha ndomo va linga olonjali viaye?—

Ungelo Gabriele wa sapuila Maria ndomo a laikele oku linga onjali ndaño ka kũlĩhĩle handi ulume. Yehova eye wa linga ocikomo caco. Gabriele wa popia la Maria hati: ‘Unene wa Tõlo u ku tuvika. Oco omõla o citiwa o tukuiwa O kola, Eye Mõla a Suku.’—Luka 1:30-35.

Suku wa sondoluila omuenyo Womõlaye wa kala kilu vimo lia Maria. Kuenje wa kulila vimo liaye ndeci oloñaña vikuavo vi kulila vimo lia inavo. Eci pa pita olosãi ecea, Yesu wa citiwa. Noke Yosefe wa kuela Maria kuenje omanu valua va popia vati, Yosefe eye isia ya Yesu. Pole, Yosefe wa kala isia yokatumba. Omo liaco, Yesu wa kuata va isia vavali!

Eci Yesu a kuata anyamo 12, wa linga ocina cimue ca lekisa okuti wa solele calua Isiaye wo kilu, Yehova. Kotembo yaco, olonjali via Yesu via enda enda ko Yerusalãi, kofesta yo Pascoa. Eci va kala vonjila yoku tiukila ko Nasara, Yosefe la Maria va limbuka okuti Yesu ka kaile pokati kavo. Ove hẽ, wa kũlĩha esunga lieci vo wivalela?—

Otembo yaco, Yosefe la Maria, va kuatele ale omãla vakuavo. (Mateo 13:55, 56) Ovo citava okuti va kala oku enda kumosi la vangandiavo ndeci, Tiago, Yoano, kuenda isiavo Sebedeo kuenda inavo Salome, manji a Maria. Omo liaco, Maria wa simĩle okuti Yesu o kasi vendo liavo.—Mateo 27:56; Marko 15:40; Yoano 19:25.

Eci Yosefe la Maria va limbuka okuti Yesu ka kasi pokati kavo, va tiukila ko Yerusalãi. Va sandiliya omõlavo lesumuo lialua. Keteke liatatu, vo sanga vonembele. Maria wa popia laye hati: “Amõlange, nye wa tu ci lingila? Tala, ame la so tua ku sanda lohele ya lua.” Yesu wa kumbulula, hati: “Nye wa sandeli? Ka wa kũlĩhili okuti nda sesamela oku kala oku kuli ovina via Tate?”—Luka 2:45-50.

Ove hẽ, o sima okuti Yesu wa tambulula lãvi inaye?— Ocili okuti, olonjali via kũlĩhĩle okuti, eye wa solele oku kala vonjo ya Suku oku u fendela. (Osamo 122:1) Anga hẽ, ca sungulukile Yesu oku popia hati onembele oyo ocitumãlo catete va sukilile oku u sandiliya?— Maria wa amamako oku sokolola olondaka via Yesu.

Yesu wa tendele ndati Yosefe la Maria?— Embimbiliya li popia hati: “[Yesu] wa lokila kumue lavo, weya ko Nasara, kuenje wa pokoyola kokuavo.” (Luka 2:51, 52) Nye tu lilongisa kulandu wa Yesu?— Tu sukilavo oku pokola kolonjali vietu.

Yesu lalimue eteke a kuatele ocitangi coku lekisa epokolo— ndaño muẽle ku Isiaye wo kilu.

Yesu kuteke waye wa sulako osimbu handi ka file, wa pinga ku Yehova nda citava oku pongolola ovisimĩlo Viaye viatiamẽla kovina o tumile oku linga. (Luka 22:42) Pole, ndaño ca tĩlile Yesu wa pokola ku Suku. Embimbiliya li popia hati, “kohali yaye, wa lilongisa epokolo.” (Va Heveru 5:8) Ove hẽ, o sima okuti tu pondolavo oku kuama ongangu eyi?

[Atosi pombuelo yamẽla]

APULILO:

▪ Maria wa linga ndati ina ya Yesu, kuenda Yesu weya oku kuata ndati va isia vavali?

▪ Momo lie olonjali via Yesu ka via limbukilile okuti vo wivala?

▪ Kocitumãlo cipi Yesu a lavokaile okuti oko olonjali viaye nda vio sandiliya?

▪ Nye tu lilongisa kulandu wa Yesu?

[Elitalatu kemẽla 31]

Momo lie ove o simila okuti va sukilile oku sandiliya tete Yesu vonembele?