Ekolelo​—Ocituwa Cimue ci tu Pamisa

EKOLELO li kuete unene walua. Ndaño okuti Satana o yongola oku nyõla ukamba tu kuete la Yehova, ekolelo li tu kuatisa “oku ima isongo viosi viondalu viondingaĩvi.” (Va Efe. 6:16) Ekolelo li tu kuatisa oku yula ovitangi vi sokisiwa ndolomunda vinene calua. Yesu wa sapuila olondonge viaye hati: “Nda wa kuateli ekolelo ndolumema wulemba, nda vu popia lomunda eyi, ‘Tunda palo sondolokela oko’ kuenda oyo yi sondoloka.” (Mat. 17:20) Omo okuti ekolelo li kuete unene woku tu pamisa kespiritu, tu sukila oku konomuisa apulilo akuaimo ndeci: Ekolelo li lomboloka nye? Oku timisila utima kovitangi vietu ci honguisa ndati ekolelo lietu? Tu pamisa ndati ekolelo lietu? Kuenda ku lie tu sukila oku kolela?—Va Rom. 4:3.

EKOLELO LI LOMBOLOKA NYE?

Ekolelo ka li lomboloka oku tava lika kovina Embimbiliya li popia, momo ndaño muẽle “olondele vi tavavo [okuti kuli Suku] kuenje vi luluma”. (Tia. 2:19) Oco hẽ, ekolelo li lomboloka nye?

Embimbiliya li lombolola ekolelo volonepa vivali. Tete, “ekolelo ociseveto covina vi lavokaiwa.” (Va Hev. 11:1a) Nda ove o kuete ekolelo, o tava okuti ovina viosi Yehova a popia viocili kuenda vi ka tẽlisiwa muẽle. Ndeci, Yehova wa sapuila va Isareli hati: “Nda vu tẽla oku imũla ocisila cange nda lisila lutanya, kuenda ocisila cange nda lisila luteke, okuti ka ku kala vali utanya, kuenda ka ku kala vali uteke kolotembo viaco, nda oco vu tẽla, nda ci tava okuti ocisila cange nda lisila lukuenje wange Daviti cimũha.” (Yer. 33:20, 21) Anga hẽ ove wa kuatele ale usumba wokuti ekumbu li liwekapo oku tunda kuenda oku iñila kuenje ka ku kala utanya ndaño uteke? Nda o tava okuti ovihandeleko vi lingisa okuti ongongo yi ñuala ñuala kekumbi, ku kukolela hẽ okuti Ululiki wovihandeleko viaco o pondola oku tẽlisa ondaka yaye? Ocili okuti o kolela!—Isa. 55:10, 11; Mat. 5:18.

Cavali, ekolelo “uvangi wovina ka vi molaiha.” Ekolelo lia tukuiwa okuti “uvangi wovina ka vi molaiha,” ale “uvangi wa koleliwa,” wovina ka vi muiwa lovaso etu pole viocili. (Va Hev. 11:1b; etosi.) Ndamupi? Sokolola okuti omõla umue oku pula ndoco, ‘Wa kũlĩha ndati okuti kuli ofela?’ Ndaño kua la mola ofela citava okuti o kuatisa omõla oku sokolola okuti kuli oku fuima, kuli oku sika kuofela kuenda ovina vikuavo. Eci omõla a tava okuti ovina evi viocili, eye o kuata elomboloko liokuti citava oku kolela kovina ka vi letiwe. Cimuamue haico okuti, ekolelo lia kunamẽla koku tava kovovangi ka a letiwe.—Va Rom. 1:20.

OCO TU KUATE EKOLELO TU SUKILA OKU KAPAKO OCILI

Omo okuti ekolelo lia kunamẽla koku tava kovovangi ka a letiwe, oco omunu a kuate ekolelo tete o sukila oku kuata “ukũlĩhĩso wa suapo wocili.” (1 Tim. 2:4) Pole, oku kuata ukũlĩhĩso ka ci tẽla. Upostolo Paulu wa soneha hati: “lutima omunu o lekisa ekolelo.” (Va Rom. 10:10) Omunu umue ka tava lika kocili, pole, o ci kapako. Eye o vetiyiwa oku lekisa ekolelo loku lekisa ovilinga vi sanjuisa Suku. (Tia. 2:20) Omunu nda ka velisilepo ocili, ka tava ndaño muẽle kovovangi a letiwe, nda o kakatela kovisimĩlo ka via sungulukile, ale o lisandela esunga omo liolonjongole viaye muẽle. (2 Pet. 3:3, 4; Yuda 18) Kosimbu ndaño okuti omanu va mola ovikomo via lingiwa havosiko va kolelele. (Ate. 14:11; Yoa. 12:37) Espiritu lia Suku li kuatisa omunu una o sole ocili.—Va Gal. 5:22; 2 Va Tes. 2:10, 11.

DAVITI WA KUATA EKOLELO LIA PAMA

Pokati komanu vana va kuata ekolelo liocili, pa sangiwa Soma Daviti. (Va Hev. 11:32, 33) Pole, havosiko vakuepata lia Daviti va kuata ekolelo liaco. Ndeci, eteke limue Eliava kota ya Daviti wa lekisa ekambo liekolelo eci a lungula Daviti catiamẽla koku liyaka la Goliata. (1 Sam. 17:26-28) Lomue o citiwa lekolelo, ale pamue oku li piñala kolonjali vietu kuenje, ekolelo Daviti a kuata lia tunda kukamba a kuata la Suku.

Kosamo 27 Daviti, wa lombolola ndomo a kuata ekolelo liaco lia pama. (Ocin. 1) Daviti wa enda oku sokolola kulandu waye wo kosimbu kuenda ndomo Yehova o teyuila peka liovanyali vaye. (Ovin. 2, 3) Eye wa sanjukilile eliangiliyo lia Yehova lioku u fendela. (Ocin. 4) Daviti wa fendela Suku vonembele kumue lafendeli vakuavo. (Ocin. 6) Eye wa enda oku likutilila ku Yehova lutima wosi. (Ovin. 7, 8) Daviti wa yonguile oku songuiwa la Yehova. (Ocin. 11) Omo okuti ekolelo lia kuata esilivilo lialua ku Daviti, eye wa lipula hati: “Nda nda kala pi nda sia kuatele ekolelo?”​—Ocin. 13.

NDOMO O PAMISA EKOLELO LIOVE

Ove o pondola oku kuata ekolelo ndeli lia Daviti nda wa setukula ovisimĩlo kuenda ovituwa via tukuiwa Kosamo 27. Omo okuti ekolelo lia kunamẽla kukũlĩhĩso wasuapo, nda wa tanga calua Embimbiliya kuenda alivulu etu ci leluka oku kuata ekolelo li panga onepa kepako liespiritu lia Suku. (Osa. 1:2, 3) Sanda otembo yoku sokolola eci o tanga. Nda wa lekisa ocituwa coku sokolola, ombili o kuetele Yehova yi ka livokiya. Osimbu ombili o kuetele Yehova yi li vokiya o pondolavo oku pamisa ekolelo liove koku u fendela kolohongele kuenda koku sapula elavoko liove ku vakuene. (Va Hev. 10:23-25) Handi vali, tu lekisa okuti tu kuete ekolelo eci tu ‘likutilila olonjanja viosi, okuti ka tu liwekapo.’ (Luka 18:1-8) Omo liaco, noke lioku ‘likutilila olonjanja viosi,’ kolela okuti Yehova ‘oku tata.’ (1 Va Tes. 5:17; 1 Pet. 5:7) Ekolelo li tu kuatisa oku kuata ovilinga viwa kuenje ovilinga vietu viwa vi pamisa ekolelo.—Tia. 2:22.

KOLELA KU YESU

Yesu kuteke wa sulako osimbu ka file, wa sapuila ovapostolo vaye hati: “Koleli Suku; ñolelivo ame.” (Yoa. 14:1) Omo liaco, ka tu kolela lika Yehova, pole, tu kolelavo Yesu. Tu pondola oku lekisa ndati ekolelo ku Yesu? Tu kũlĩhĩsi olonjila vitatu vioku ci linga.

Tete, tenda ocisembi ndombanjaile Suku a eca kokuove. Upostolo Paulu wa popia hati: ‘Omuenyo ñasi lawo ndu u kuetele omo nda kolela Komõla a Suku, una wa ndi sola kuenje wa lieca olumue mekonda liange.’ (Va Gal. 2:20) Nda wa kolela ku Yesu, o ka limbuka okuti ocisembi ci tiamisiwilavo kokuove, akandu ove a pondola oku ecelua, ci ku ĩha elavoko liomuenyo ka upui kuenda ci lekisa okuti Suku o ku sole. (Va Rom. 8:32, 38, 39; Va Efe. 1:7) Nda wa kolela okuti ocisembi ci ku kuatisa, ove ku ka livetela evelo, ale oku sumua.—2 Va Tes. 2:16, 17.

Vali, tu pondola oku amẽla ku Yehova pocakati cohutililo omo liocisembi ca Yesu. Omo liaco, tu pondola oku likutilila ku Yehova “lutõi woku vangula, oco tu tambule ocali kuenda oku sanga ohenda ya piãla eci tu sukila ekuatiso.” (Va Hev. 4:15, 16; 10:19-22) Oku likutilila ci tu kuatisa oku amamako oku yuvula oku linga ekandu.—Luka 22:40.

Tatu, pokola ku Yesu. Upostolo Yoano wa soneha hati: “Wosi o kolela Mõla o kuete omuenyo ko pui; puãi wosi ka pokola ku Mõla ka kuata omuenyo, pole onyeño ya Suku yi kala ño laye.” (Yoa. 3:36) Limbuka eci Yoano a lombolola catiamẽla ketepiso li kasi pokati koku lekisa ekolelo lekambo liepokolo. Tu lekisa ekolelo ku Yesu poku pokola kokuaye. O pokola ku Yesu poku “tẽlisa ocihandeleko ca Kristu,” eci ci lomboloka oku kuama alongiso aye kuenda ovina a tuma oku linga. (Va Gal. 6:2) O pokolavo ku Yesu poku kapako olonumbi eye a eca pocakati ‘cukuenje wa kolelua haeye wa lunguka.’ (Mat. 24:45) Omo lioku pokola ku Yesu o ka kuata ongusu yoku pandikisa kovitangi.—Luka 6:47, 48.

‘LIPAMISI LEKOLELO LIENE LI KOLA’

Eteke limue, ulume umue wa sapuila Yesu hati: “Ñuete ekolelo! Nda nda kamba ekolelo ñuatise!” (Mar. 9:24) Eye wa kuatele ale ekolelo, pole, ulume lumbombe wa limbuka okuti wa sukilile oku vokiya ekolelo liaye. Ndeci ulume u a linga, vosi yetu tu sukila oku vokiya ekolelo lietu. Vosi yetu tu sukila oku pamisa ekolelo lietu cilo. Ndomo ca lekisiwa, tu pamisa ekolelo lietu poku lilongisa Ondaka ya Suku kuenda oku sokolola kovina tu tanga ci vokiya olopandu vietu ku Yehova. Handi vali, ekolelo lietu lipama eci tu liongolola la vamanji oku fendela Yehova, oku sapuilako omanu catiamẽla kelavoko lietu kuenda oku amamako oku likutilila. Kuenje eci tu pamisa ekolelo lietu, tu kuata asumũlũho alua. Ondaka ya Suku yi tu sapuila hati: “A vamanji wa soliwi, osimbu vu lipamisa lekolelo liene li kola . . . kali vocisola ca Suku.”—Yuda 20, 21.