Ndi Kasi hẽ Oku Linga Ovina Ndi Tẽla Kupange Woku Kunda?
1. Asakalalo api Ukristão a pondola oku kuata olonjanja vimue?
1 Ove hẽ wa lipulile ale ndoco? Citava okuti kua siatele oku talavaya vali calua kupange woku kunda omo lioku kuka, oku vela, ale evokiyo liovikele vepata. Kuenje, ovina viaco vi ku kokela esumuo. Manji umue ukãi o kuete omãla vatatu wa soneha okuti, wa siata oku li vetela evelo omo otembo yina nda a pesila kupange woku kunda, o yi pesila koku tata epata liaye. Nye ci pondola oku tu kuatisa oku lekisa esunguluko kovina viaco?
2. Yehova o yongola nye kokuetu?
2 Ceci Yehova a Yongola Kokuetu: Ocili okuti, vosi yetu tu kuete onjongole yoku talavaya calua kupange woku kunda. Pole, ovina tu yongola oku linga, via litepa levi tu tẽla oku linga. Oku kuata onjongole yoku talavaya calua, ci lekisa okuti, ka tu kuete owesi. Tu sukila oku ivaluka okuti, Yehova wa kũlĩha ahonguo etu, kuenda ka tu kisika ovina ka tu tẽla oku linga. (Osa. 103:13, 14) Yehova o yongola nye kokuetu? Eye o yongola okuti, tu u vumba lutima wetu wosi kuenda oku u lingila ovina tu tẽla.—Va Kol. 3:23.
3. Tu tenda ndati alikolisilo etu kupange woku kunda?
3 Nye ci tu kuatisa oku limbuka ovina via sunguluka kokuetu? Tu sukila oku pinga ku Yehova oco a tu kuatise oku kũlĩhĩsa ovisimĩlo vietu. (Osa. 26:2) Ekamba limue Ukristão tua kolela calua okuti wa tu kũlĩha ciwa, haeye ka kuete ohele yoku tu sapuila apongoloko tu sukila oku linga, o pondola oku tu kuatisa. (Olosap. 27:9) Omo okuti ovina vi pongoloka vokuenda kuotembo, olonjanja vimue tu sukila oku kũlĩhĩsa ekalo lietu.—Va Efe. 5:10.
4. Tu pondola oku tenda ndati olonumbi Viembimbiliya viatiamẽla kupange woku kunda?
4 Ndomo tu Tenda Olonumbi Viupange Woku Kunda: Omanu vana va tala vakuakulupuka va siata oku va vetiya oco va amameko. Ovo va ci lingila oco vakuakulupuka va tẽlise ovimãho viavo, okuti ka va sumua. Etu tua siatavo oku tambula evetiyo li tunda Vembimbiliya, olonumbi vi eciwa kolohongele, kuenda vina vi sangiwa valivulu etu okuti, vi tu vetiya ‘oku kunda lonjanga.’ Olonumbi viaco, vi eciwila oku tu kuatisa, pole, ka ci lomboloka okuti, alikolisilo etu ka a kuete esilivilo. (2 Tim. 4:2) Tua kolela okuti, osimbu tu likolisilako oku linga ovina tu tẽla, tu limbuka okuti, Yehova ka ‘ivalako ocisola tua lekisa kupange waye.’—Va Hev. 6:10.