Anga hẽ o Pondola Oku Linga Apongoloko?

1. Apongoloko a siata voluali a tu vetiya oku linga apongoloko api?

¹ Embimbiliya kelivulu lia 1 Va Korindo 7:31, li sokisa oluali lembumbua ku lingiwila olomapalo okuti omanu vaco va lipongolola. Apongoloko oluali a kisika okuti, olonjanja vimue, tu linga apongoloko ndomo tua siata oku kundila omanu, kesokiyo lietu, kuenda ovina tu popia. Anga hẽ o pondola oku linga apongoloko?

2. Momo lie tu sukilila oku linga apongoloko oco tu kuame ongendo yocisoko?

² Olonjila o Kuama Poku Kunda: Akongelo Akristão, olonjanja vialua a siata oku linga apongoloko. Eci Yesu a tuma olondonge viaye, tete wa vi sapuila oco ka vi ka ambate okulia vovipete viavo, ndaño olombongo. (Mat. 10:9, 10) Pole, noke wa pongolola olonumbi viaye omo lielambalalo olondonge via laikele oku liyaka lalio poku kundila kovikanjo vikuavo. (Luka 22:36) Vokuenda kueci ci pitahãla ocita canyamo a pita, ocisoko Colombangi Via Yehova ca enda oku kuama olonjila via litepa poku kundila omanu, ndeci: ovicapa vioku eca uvangi, ovingungu viasapulo, lakãlu ovileñi, ndomo ci likuata lekalo kuenda esukila lio kotembo yaco. Koloneke vilo, omo okuti omanu kolonepa vialua ka va sangiwa kolonjo viavo, kua siata oku eciwa evetiyo lialua lioku pongolola oku kundila konjo lanjo okuti ku vokiyiwa upange woku eca uvangi ka wa sokiyiwile volokololo. Tu vetiyiwavo oku kundila konjo lanjo koñolosi omo omanu kutanya va sangiwa kupange. Omo okuti ekãlu lia Yehova lia siata oku linga apongoloko, ove hẽ o ka kuama ongendo yalio?—Esek. 1:20, 21.

3. Oku linga apongoloko ci tu kuatisa ndati oku kuata onima yiwa poku kundila omanu vocikanjo?

³ Ceci o Popia: Ovina vipi vi sakalaisa omanu pocitumãlo cove? Anga hẽ va sakalala lovokuasi? Lepata? Kuenda uyaki? Ci kuatisa calua oku kũlĩha ovitangi kuenda ovina via siata vocikanjo cetu, kuenje, tu lipongiya oco tu tukule ovina viaco. (1 Va Kor. 9:20-23) Nda omunu o tukula ovina viu sakalaisa, ka tu wĩha etambululo lionimbu loku amamako oku tukula ondaka tua pongiya, pole tu tiamisila ondaka yetu kesakalalo liaye.

4. Momo lie tu sukilila oku linga apongoloko lonjanga?

⁴ Ndopo ‘ekalo’ lioluali lulo li sulila, kuenda ohali ya piãla yi fetika. ‘Oloneke via kambako, vimbumbulu.’ (1 Va Kor. 7:29) Omo liaco, oku linga apongoloko okuti ka tu cilua, loku tẽlisa upange wetu votembo ya kambako, ci kuete esilivilo lialua!