Vokiya Apuluvi oku Sivaya Yehova
1. Esokiyo lipi lia lingiwa li tu kuatisa oku “sivaya Yehova”?
1 Kefetikilo liosãi Yelombo esokiyo liokaliye, lia kuata onima yiwa poku eca kakundi epuluvi lioku litumbika kupange wakundi va sokamo okuti va linga 30 kolowola vokuenda kuosãi Yelombo leyi ya Kupupu kuenda osãi yina mitavoso a nyula ekongelo. Nda epasu lia mitavaso li ka lingiwa kovaso yolosãi vivali, akundi citava oku nõla oku talavaya 30 kolowola kupange wakundi va sokamo. Akundi va sokamo citava oku kala kohongele yosi mitavaso o nyula akongelo a ka linga lakundi votembo yosi kuenda ava valikasi. Eci ci lekisa okuti, nda omunu lomunu pokati ketu eca 50 kolowola via kisikiwa, tu ka “sivaya Yehova” kupange wakundi va sokamo okuti tu ci linga olonjanja vikuãla vokuenda kunyamo poku eca 30 kolowola via kisikiwa!—Osa. 109:30; 119:171.
2. Esumũlũho lipi vamanji va ka litumbika kupange wakundi va sokamo kepasu lia mitavaso o nyula akongelo va ka kuata?
2 Vokuenda Kuepasu Lia Mitavaso o Nyula Akongelo: Kaliye valua va pondola oku litumbika kupange wakundi va sokamo vosãi va pasuisiwa la mitavaso o nyula akongelo kuenda oku likolisa pokati, poku talavaya kumue laye kupange woku kunda. (Va Rom. 1:11, 12) Akundi va sokamo okuti va talavaya kupange woku sanda eteku, va pondola oku pinga ku mitavaso o nyula akongelo nda citava oku talavaya laye vo Casapalo ale Calumingu. Valua va ka sanjukila oku nõla eteke limue vosemana oco va talavaye laye. Oku kala kohongele mitavaso a ka linga lakundi votembo yosi kumue lava valikasi ci vetiya akundi va sokamo!
3. Momo lie osãi yonjivaluko epuluvi liwa lioku talavaya kupange wakundi va sokamo?
3 Kosãi Yelombo Kuenda ya Kupupu: Vamanji vana va linga esokiyo lioku talavaya osãi yimosi kupange wakundi va sokamo vokuenda Kuonjivaluko violofa via Yesu va sukila oku likolisilako oku eca eci ci pitahãla 30 kolowola oco va ece ‘ocilumba cavo cesivayo’! (Va Hev. 13:15) Osãi Yelombo kuenda ya Kupupu, olosãi viwa vioku vokiya upange wetu poku litumbika kupange wakundi va sakamo. Vepuluvi liaco liunyamo, tu ka litumbika kupange woku laleka omanu oco va ende konjivaluko yolofa via Yesu. Omo lioku livokiya kupange wetu woku kunda, vokuenda kuosãi Yonjivaluko violofa via Yesu, tu pondola oku talavaya lakundi valua. Noke, tu sukila oku laleka vana va kala konjivaluko oco va endevo oku ka yevelela ohundo yilikasi. Anga hẽ o ka kuata esanju omo lioku litumbika kupange wakundi va sokamo?—Luka 6:45.