Olonumbi Viokaliye Vioku Kundila Volokololo

1. Ongangu yipi Yakristão vatete tu sukila oku kuama?

¹ Akristão kocita catete va enda oku kundila konjo lanjo kuenda volokololo. (Ovil. 20:20) Va enda oku kundilavo vonembele mua enda oku kala omanu valua. (Ovil. 5:42) Eci upostolo Paulu a kala ko Atenai, oloneke viosi wa kundila povitanda. (Ovil. 17:17) Koloneke vilo, tua velisapovo oku kundila omanu konjo lanjo. Tua siatavo oku kundila omanu kovitumãlo violomapalo, povitanda, volonjila mu pita omanu valua, kuenda kovitumãlo vikuavo ku sangiwa omanu. Omo liaco, akundi vosi, va vetiyiwa oku likolisilako oku kundila volokololo. Valua va ka kuata epuluvi lioku kuama aliangiliyo avali okaliye, oku kundila volokololo.

2. Eliangiliyo lipi lia fetika oku lingiwa kosãi ya Kuvala yunyamo wo 2011?

² Oku Kundila Volokololo Vio Volupale: Ulandu u sangiwa kemẽla 16 kuenda 17, vo Anuário yo 2013, u lekisa okuti, eliangiliyo liokaliye lioku eca uvangi volokololo, lia fetika kosãi ya Kuvala yunyamo wo 2011 Volupale luo Nova Yorke. Olomesa lovikanda kuenda alivulu a vetiya omanu, a sandekiwa kalimi alua, a kapiwa povitumãlo pa siata oku pita omanu valua. Oloneke viosi omanu valua, va siata oku pita povitumãlo viaco, ndeci vana va kasi kolosapalalo, kuenda ava okuti ka va sangiwa kolonjo viavo. Omanu vaco eci va mola alivulu etu va lekisa onjongole. Vokuenda kuosãi tua eca 3.797 kolorevista kuenda eci ci soka 7.986 kalivulu. Omanu valua poku pita volokololo, va enda oku pinga oco tu va longise Embimbiliya. Kuenje, vana va lekisa onjongole, va fetika oku lilongisa Embimbiliya, noke tua pinga ku vamanji va kala ocipepi lomanu vaco oco va va nyule kolonjo viavo.

3. Eliangiliyo liokaliye lioku kundila volokololo lia li sanduila ndati voluali luosi?

³ Omo okuti eliangiliyo liaco lieca onima yiwa, cilo lia sandekiwa voluali luosi kuenda kovitumãlo ku sangiwa omanu valua. Alupale a kasi ocipepi lo Betele a ka kuatisiwa leliangiliyo liaco. Valupale aco mu sangiwa omanu valua momo muli ovitumãlo vialua viupange, kuenda olosapalalo. O Betele yi ka linga eliangiliyo lioku eca olonumbi vi ka sukiliwa oco vi ka kuatise vamanji va ka linga esokiyo lioku ka kundila valupale aco. Noke kua nõliwa vamanji ndeci: Akundi votembo yosi, akundi valikasi ndaño okuti kovitumãlo vimue kua tumiwa akundi vasokamo oco va lingevo upange waco.

4. Upange woku kundila volokololo muli omanu valua u lingiwa ndati?

⁴ Ndomo Upange Waco wa Siata Oku Lingiwa: Vamanji poku kundila kovitumãlo ku sangiwa omanu valua, va ci linga poku kapa alivulu komesa ale oku talavaya lokangulu ka kasi ndopatilela yoku kapa alivulu. Eci omunu umue a pitĩla ponẽle yomesa yalivulu, vo sapuila oco a nõle elivulu a sola. Poku tambulula epulilo omunu a linga, vamanji va tukula ocinimbu cimue Cembimbiliya. Nda omunu o yongola oku ambata elivulu limue, vamanji ka vo sapuila okuti, citava oku eca ombanjaile. Pole, nda o yongola oku kũlĩha oku ku tunda olombongo vi kuatisa kupange waco, vamanji vo sapuila okuti, o pondola oku tuma ombanjaile yaye poku kuama onumbi yi sangiwa velivulu liaco. Noke, va pula omunu waco hati: “O yongola hẽ okuti o nyuliwa Lombangi yimue ya Yehova konjo yove?” Ale o linga epulilo likuavo ndoco: “Anga hẽ o yongola oku lilongisa Embimbiliya lekuatiso lielivulu eli?”

5. Ndamupi ohueli yimue ya kuatisiwa ndati lolonumbi viokaliye poku kundila omanu?

⁵ Oku kuama olonumbi viokaliye via tukuiwa ndeti ca siata oku nena esanju lialua. Manji umue lukãi waye, va soneha ndoco: “Oku kala pocitumãlo caco loku mola omanu valua va pita vokololo eteke leteke, ca vetiya utima wetu oku limbuka ndomo upange woku kuatisa omanu u kasi oku lingiwa voluali luosi. Poku mola omanu vaco, loku limbuka ndomo Yehova a kapako omunu lomunu, ca tu vetiya oku amamako kupange woku kunda. Omo liaco, tua limbuka ndomo Yehova a siata oku vetiya ovitima viomanu va pita vokololo tua kapa alivulu, oco va lekise onjongole. Omo liaco, tua limbuka ndomo ovangelo va siata oku tu kuatisa kupange waco.”

6. (a) Esokiyo lipi lioku kundila volokololo li kasi oku lingiwa vakongelo alua? Esokiyo liaco lia litepa ndati leli lia siata oku lingiwa valupale muli omanu valua? (b) Vamanji va pondola ndati oku talavaya poku kundila kovitumãlo ku sangiwa omanu valua?

⁶ Oku Sokiya Ciwa Upange Woku Kundila Kovitumãlo ku Sangiwa Omanu Valua: Ndaño okuti kua lingiwa eliangiliyo lioku kundila kovitumãlo ku sangiwa omanu valua, pole, akulu vekongelo va lingavo esokiso lioku kundila vovikanjo viakongelo avo. Esokiyo liaco, lia siata oku kuatisa akundi oku kapa alivulu komesa, ale va ci linga lokangulu ka kasi ndopatilela yoku kapa alivulu, vocikanjo cavo. Ovina viaco, via litepa loku kundila volokololo vina okuti mu sangiwa omanu valua. Momo poku linga upange waco, ku nõliwa vamanji vakongelo alua oco va kundile vovikanjo viaco via sokiyiwa lo Betele.—Tanga vo ka kasia losapi hati: “Esilivilo Lioku Talavayela Kumosi.”

7. Kovitumãlo kuna okuti ca sunguluka oku kundila volokololo, akulu vekongelo va sokiya ndati upange waco?

⁷ Akulu vekongelo va sukila oku kũlĩhĩsa olonumbi vi li kuata locikanjo cekongelo liavo, loku linga esokiyo nda citava oku kundila kovitumãlo ku sangiwa omanu valua. Kovitumãlo vimue vioku kevelela oviendelo, vioku linga olomapalo, povitanda, kolosikola, kocila colombalãu kuenda kovitumãlo kua siata oku lingiwila ovipito viunyamo, citava oku kunda poku kapa alivulu komesa ale lokangulu ka kasi ndopatilela yoku kapa alivulu. Kovitumãlo vimue oku kapa alivulu komesa olonjanja viosi poku kunda, ci kuete esilivilo. Ovolandu a lekisa okuti, oku kapa omesa yalivulu vokati kolovenda vinene, ceca onima yiwa okuti, oku yi kapa posamua ci sule. Momo omanu va iñila volovenda viaco, va tiamisila lika utima kovina va yongola oku landa, kuenje, ka va moli omesa yalivulu yi kasi posamua. Kovitumãlo vimue ku sangiwa omanu valua, ca leluka oku kundilako lokangulu kamue ka kasi ndopatilela yoku kapa alivulu. Akulu vekongelo citava okuti va tapa ovipama vimue vonumbi yetu yo Internet ndeci Utala Wondavululi, o Des­pertai! kuenda elivulu Embimbiliya li Longisa. Ovina viaco, via pongiyiwila locimãho coku kuatisa vamanji oku kundila volokololo. Vana va ka linga upange waco, va sukila oku kuama olonumbi vimuamue via eciwa la mitavaso o songuila upange woku kunda, momo olonumbi viaco, ovio via siata oku kuamiwa la vamanji va kundila kovitumãlo ku sangiwa omanu valua. Nda va sanga omunu wa lekisa onjongole, pole ka kasi vocikanjo cavo, va sukila oku soneha vo formuláriu Queira Visitar (S-43) kuenda oku yeca kumanji usonehi wekongelo.

8. Nda vekongelo liene ka mua lingiwile esokiyo lioku kundila povitumãlo viowiñi, onjila yipi o kuama yoku kundila volokololo oco o kuate onima yima?

⁸ Oku Kundila Volokololo Viocikanjo Cove: Nda vocikanjo cekongelo ka muli ovitumãlo kua siata oku kala omanu valua, citava okuti poku kunda ka tu kapi alivulu komesa ale lokangulu ka kasi ndopatilela yoku kapa alivulu. Poku enda kupange woku kunda vamanji vamue va vetiya akundi oco va kũlĩhĩse ndomo va pondola oku kundila volokololo. Anga hẽ vocikanjo cene muli olovenda vinene, levi vitito ale ovitumãlo vikuavo? Vocikanjo cene muli hẽ ocitumãlo cimue omanu va siata oku lingila olomapalo? Muli hẽ ovitumãlo vimue omanu va siata oku lingila ovipito viunyamo? Nda wa ci linga o kuata esanju omo lioku kundila volokololo.

9. Momo lie tu sukilila oku likolisilako oco tu kundile omanu kovitumãlo viosi va sangiwa?

⁹ Yehova o yongola okuti ‘omanu vosi va kuata ukũlĩhĩso wocili, oco va popeliwe.’ (1 Tim. 2:4) Omo liaco, tu sukila oku likolisilako oku kundila esapulo Liusoma komanu vosi osimbu esulilo ka lieyile. (Mat. 24:14) Kovitumãlo vimue ka ca lelukile oku sanga omanu kolonjo viavo. Nda ka va sangiwa kolonjo viavo oco tu sapele lavo, tu pondola oku va kundila eci tu lisanga lavo volokololo. Pole, oku kundila volokololo hayoko lika onjila yi tu kuatisa oku sapela lomanu catiamẽla kolondaka viwa viusoma. Omo liaco, tu sukila oku likolisilako oco tu tẽlisa ciwa upange wetu woku kunda loku sanda omanu kovitumãlo viosi va sangiwa.—2 Tim. 4:5.

[Okakasia 5]

Esilivilo Lioku Talavayela Kumosi

Kua lingiwa esapulo liokuti akundi vovakongelo alua poku kundila volokololo va siata oku kala povitumãlo vimuamue ndeci: Kovitumãlo vioku kevelela oviendelo, vioku linga olomapalo ale povitanda. Akundi vamue va tunda vakongelo a litepa va enda oku eca olorevista komanu vana okuti va tambula ale olorevista kakundi vakuavo va pita povitumãlo vimue ndeci: Volonjo vioku tata esinga, povitumãlo vioku talamẽla oviendelo, kuenda povitumãlo violomĩlu. Poku ci linga, ca siata oku temisa vakualomĩlu kuenda omanu vakuavo va lisungue lavo, ndaño pamue vamanji ka va kundila pocitumãlo caco vepuluvi limuamue. Omo liaco, ca sunguluka okuti, vamanji va sangiwa vakongelo a litepa, va kundila vocikanjo ca eciwa kokuavo, oco va yuvule ombuanja.

Nda vamanji vamue va yongola oku kundila volokololo viocikanjo cekongelo likuavo, va sukila oku sapela la mitavaso yupange woku kunda. Mitavaso yoku kunda o sukila oku sapela la mitavaso yupange wovekongelo likuavo nda citava oku kundila vocikanjo caco. Vovikanjo vina okuti muli akongelo a vangula elimi likuavo, poku kundila vocikanjo caco, olomitavaso viupange woku kunda va sukila oku sapela pokati oco va yuvule oku sumuisa omanu va kasi vocikanjo caco. ‘Nda omanu va talavayela kumosi, ovina vi sokiyiwa vi enda ciwa.’—1 Va Kor. 14:40.