Apulilo a Tambuluiwa

◼ Osimbu ukundi umue ka papatisiwile, nda o kuete onjongole yaco, nye a sukila oku linga catiamẽla koku endaenda kolohongele kuenda kupange woku kunda?

Oku papatisiwa oyo onjila ya velapo omunu a sukila oku nõla. Osimbu ka taviwile oco a papatisiwe, o sukila oku kuata ukũlĩhĩso watiamẽla kovina Suku a yongola kokuaye. O sukilavo oku lekisa okuti o yongola oku pokola kolonumbi via Suku.

Omo okuti vamanji vosi va vetiyiwa oku yuvula oku liwekapo oku li kongela la vakuavo, ukundi una okuti ka papatisiwile o sukila oku lekisa ombili yoku endaenda kolohongele. (Va Hev. 10:24, 25) O sukilavo oku kuata ocituwa coku eca atambululo kolohongele, kuenda oku lisonehĩsa Kosikola Yupange Wakristão, ndaño okuti lomue o kisikiwa oku ci linga.

Vamanji vosi va kuete ocikele coku kunda olondaka viwa viusoma kuenda oku longisa omanu oco va linge olondonge. Omo liaco, osimbu ukundi ka papatisiwile, o sukila oku lekisa ombili kupange woku kunda. (Mat. 24:14; 28:19, 20) Noke yolosãi vimue, citava hẽ okuti ukundi waco o papatisiwa? Citava, momo vokuenda kuotembo yaco wa lekisa okuti, o kuete ombili kupange woku kunda olosãi viosi. (Osa. 78:37) Pole, ka ci sukila okuti noke yoku fetika upange woku kunda o pita otembo yalua oco a taviwe oku papatisiwa. Nda wa loñoloha citava. Olowola viñami a sukila oku eca vosãi? Ukundi waco eye onõla olowola a pondola oku eca. Akulu vekongelo va kuete ocikele coku kũlĩhĩsa lutete ovina vimue viatiamẽla komunu o yongola oku papatisiwa. Pole, va sukila oku lekisa esunguluko poku ci linga.—Luka 21:1-4.

Vakongelo ana okuti ka muli akulu valua vekongelo, citava okuti oloñuatisi viekongelo vi sapelavo lakundi va yongola oku papatisiwa. Kuenje, va kũlĩhĩsa nda ci tava oku papatisiwa, pole, va sukila oku ivaluka okuti, akundi vaco ka va lisokele koku loñoloha. Akulu vekongelo va kũlĩha okuti omunu o yongola oku papatisiwa o kuete onjongole yoku kala Ombangi ya Yehova, kuenda o sanjukila esumũlũho lioku kala vocisoko ca Yehova, loku endaenda kupange woku kunda. Akulu vekongelo va kũlĩha okuti, omunu o yongola oku papatisiwa ka loñolohele calua, kuenda ka sokisiwa la manji una wa papatisiwa osimbu. Nda akulu vekongelo va limbuka okuti ukundi waco ka loñolohele oco a papatisiwe, va sukila oku sapela laye loku u lekisa olonumbi Viembimbiliya vi lekisa esunga lieci ka papatisiwila, loku wĩha ekuatiso a sukila.