Ovipama vi tu Kuatisa Kupange Woku Kunda
1. Ovipama, “Oku Sapela Lomunu o Kasi Posongo Yetu” vikuete ovimaho vipi vivali?
1 Olojanja vimue, Vutala Wondavululi wowiñi mua siata oku sandekiwa ovipama losapi hati: “Oku Sapela Lomunu o Kasi Posongo Yetu.” Ovipama viaco vi kuete ovimãho vivali okuti, oku situlula alongiso Embimbiliya lonjila yimue yi vetiya utima womunu kuenda oku lekisa ndomo tu lombolola lutate alongiso amue. (1 Pet. 3:15) Ndamupi tu talavaya lovipama viaco?
2. Tu talavaya ndati lovipama viaco kupange woku kunda?
2 Talavaya Lavio Kupange Woku Kunda: Ove o pondola oku seleka ovipama vimue Viutala Wondavululi mu sangiwa olonepa viaco. Nda omunu tua sanga konjo yaye, ale ondonge yetu Yembimbiliya wa linga epulilo limue li sangiwa vovipama viaco, wĩha okopia yocipama caco kuenda sokiya otembo yoku sapela catiamẽla kondaka yaco. Nda ku kuete orevista mu sangiwa onepa yaco, citava okuti upa okopia yaco vo jw.org.
3. Tu kuama ndati ovipama vimue poku sapela lomunu tua sanga?
3 O kuama ndati ovipama viaco poku sapela lomunu umue? Vamue va siata oku sapuila omunu oco a tange lolukandi olondaka viatiamẽla komunu wa linga epulilo, osimbu ovo va tanga olondaka Viombangi ya Yehova. Oku kuama onjila eyi ci kuete esilivilo momo cecelela omunu oku kũlĩhisa eye muẽle ovina a lilongisa ketavo liaye okuti ka cu sumuisa.—Esin. 32:2.
4. Tu kuama ndati ovipama evi oco tu li pindise etu muẽle?
4 Lipindisa Ove Muẽle Kuenda Vakuene: Poku tanga ovipama evi, kũlĩhĩsa ovisonehua, alitalatu, kuenda oku kuatiamẽla ocisimĩlo condaka yaco. Kũlĩha etosi liavelapo. Noke sokolola ndomo o talavaya lulandu waco kupange woku kunda. (Olos. 1:5; 9:9) Manji umue ukãi wa popia ndoco: “Oku tanga ovipama viaco ci kasi ndu okuti ñasi oku talavaya lukundi umue wotembo yosi wa ‘loñoloha’ okuti, o tambulula lonjila ya sunguluka apulilo osi vo linga!”
5. Tu kuatisa ndati omanu tu longisa Embimbiliya oku lipongiya oku enda kupange woku kunda?
5 O pondolavo oku kuama ovipama viaco poku kuatisa omanu o longisa Embimbiliya oco a lipongiye oku enda kupange woku kunda. Tangeli kumosi ulandu waco kuenda ecelela okuti eye o kuata ocikele coku kala ukundi. Poku kuama onjila yaco ci kuatisa omunu o longisa Embimbiliya oku lombolola lutate ovina viatiamẽla kekolelo liaye. (Va Kol. 4:6) Ocili okuti, ovipama evi, vimue pokati kolonjila vialua Yehova a siata oku kuama oco a tu kuatise oku ‘tẽlisa ocikundi’ cupange wetu woku kunda.—2 Tim. 4:5.