Oku Lilongisa Elivulu Kuata Ukamba Wocili la Yehova Oku Upisa Kosemana 6 ya Susu
1. Oku upisa kosemana 6 ya Susu, epuluvi lipi tu ka kuata oco tu kuate ukamba wocili la Yehova?
1 Yehova o yongola okuti tu kuata ukamba wocili laye. (Tia. 4:8) Oco tu kuatisiwe oku ci linga, o ku upisa kosemana 6 ya Susu, tu ka fetika oku lilongisa elivulu Kuata Ukamba Wocili la Yehova Kelilongiso Liembimbiliya Vekongelo. Catiamẽla kocimãho celivulu eli, kemẽla liatete ku popia ndoco: “Oku sokolola lutate ndomo Yehova a lekisa ocituwa locituwa pokati kovituwa viaye, loku kũlĩhĩsa ndomo Yesu Kristu a lekisa ciwa ovituwa viaco, kuenda oku kuata elomboloko ndomo tu pondola oku kuata ovituwa viaco, ci ka tu kuatisa oku amẽla ku Suku.” Vokuenda kuanyamo wo 2004 kuenda 2005, vakongelo va lilongisa ale elivulu liaco. Noke yanyamo aco ci panda olohuluwa vivali kakundi va papatisiwa, kuenda ci ka kala onjanja yatete kokuavo oku lilongisa ciwa ovituwa via Yehova. Vana va lilongisa ale elivulu eli, oku li pitulula ci ka va kuatisa oku sola ovituwa via Yehova.—Osa. 119:14.
2. Tu ka lilongisa ndati elivulu Kuata Ukamba Wocili la Yehova?
2 Ndomo li Kuamiwa Kelilongiso: Manji o ka songola elilongiso liaco, poku fetika loku teta onimbu o ka tukula olondaka vimue. Elivulu liaco ka li tukula ovinimbu Viembimbiliya vi tangiwa, omo liaco, vokuenda kuelilongiso manji oka songola, o sukila oku nõla ovinimbu vi tangiwa. Noke yonepa yimue, epulilo limosi ale avali citava oku a linga ndapulilo oku pitulula. Nda velilongiso mua kongela okakasia losapi hati, “Apulilo Oku Sokolola,” ci ka lingiwa ndoku pitulula. Nda otembo yecelela, manji o kasi oku songola o pondola oku tanga ovinimbu vimue vi sangiwa vokakasia kuenda eye o ka linga apulilo a sangiwamo, loku pinga oco vamanji va tambulule.
3. Poku fetika oku lilongisa elivulu liaco, nye tu sukila oku linga kuenda momo lie?
3 Tu ka Kuatisiwa Calua: Pongiya ciwa ndaño okuti wa lilongisile ale elivulu liaco. Sanda oku eca atambululo, momo poku ci linga o ka eca esivayo ku Yehova, ci ku kuatisa oku yivaluka ulandu waco kuenda ci kuatisa vakuene kohongele. (Osa. 35:18; Va Hev. 10:24, 25) Poku sokolola ovituwa vikomõhisa via Yehova, ci ka ku kuatisa oku kuata ukamba uwa laye. (Osa. 77:11-13) Ci ka ku kuatisavo oku amamako oku pokola kovihandeleko viaye kuenda ci ka ku vetiya oku vangula lavakuene catiamẽla kokuaye.—Osa. 150:1-6.