Ekuatiso ku Vana ka va Lekisa Onjongole Yoku Tanga Elivulu Embimbiliya li Longisa
1. Anga hẽ, elivulu Embimbiliya li Longisa li ka vetiya onjongole yomanu tu vangula lavo onjanja yatete? Lombolola.
1 Oco omunu umue a linge ufendeli wa Yehova, o sukila oku lilongisa Embimbiliya. Vamue ndaño vatiamẽla ketavo limue, pole ka va tava okuti Embimbiliya Ondaka ya Suku. Vakuavo ka va tava ku Suku kuenda ka va lekisa esumbilo Kembimbiliya. Ovimãleho vipi via pongiyiwa oco vi kuatise una okuti kefetikilo ka tava kelivulu Embimbiliya li Longisa? Ovina vikuãimo tu lilongisa, olondaka vi tunda kakundi vokolofeka via litepa vi soka 20.
2. Nda omunu umue wa tu sapuila okuti ka tava ku Suku, nye tu sukila oku sanda oku limbuka kuenda momo lie?
2 Vana ka va tava ku Suku: Nda omunu umue o popia okuti ka tava ku Suku, ci kuete esilivilo oku limbuka esunga liaco. Anga hẽ, eye o tava kelongiso liokuti, ovina via tukuluka ño? Eye wa pua ekolelo ku Suku omo liekambo liesunga voluali ale momo liuhembi watavo? Anga hẽ, eye o kasi vofeka yimue okuti va tatekiwa oku tava ku Suku? Citava okuti eye ka likali okuti kuli Suku, pole lalimue eteke a li yevele okuti o sukila oku tava Kokuaye. Akundi valua va limbuka okuti va pondola oku linga epulilo ndeli, “Olonjanja viosi oco wa siata oku liyeva?” Va kevelela omunu oku tambulula. Yevelela kuenda koko tete kondaka. Eci tu kuata elomboloko liesunga lieci omunu ka tavela ku Suku, tu ka kũlĩha ndomo tu u tambulula kuenda elivulu tu wĩha.—Olosap. 18:13.
3. Tu lekisa ndati esumbilo komunu kuenda kovina a tava?
3 Eci o tambulula ku ka ci linge lonjila yi lekisa ndu okuti o kasi oku pisa ovisimĩlo viaye. Ovisimĩlo vikuãimo via tunda ko Estados Unidos: “Ci kuete esilivilo oku sumbila elianjo liomunu lioku nõla eci a tava. Ku ka kuate ocisimĩlo coku yula ombangulo, pole linga apulilo a vetiya omunu oku situlula ovisimĩlo viaye kuenda oku sanda elomboloko.” Noke yoku yevelela omunu a sanga, manji umue ukuakunyula akongelo poku tambulula, o pula ndoco: “Ove hẽ, wa kũlĩhĩsile ale ulandu waco?”
4. Tu pondola ndati oku kuatisa olo Budistas?
4 Komanu vamue ndeci olo Budista, ka ca lelukile oku tava ku Suku. Akundi vamue ko Grã-Bretanya, va siata oku talavaya lombrochura losapi hati, Como Ter Verdadeira Paz e Felicidade, poku sapela lomanu vaco. Noke yoku tukula olondaka vioku fetika, va kũlĩhĩsa onepa losapi hati, “Existe Realmente um Criador Supremo?” kuenda onepa “Um Guia Prático Para Beneficiar Toda a Humanidade.” Ovo va pondola oku lekisa elivulu Embimbiliya li Longisa loku sapuila omunu va sanga hati: “Ndaño okuti ku tava ku Suku, oku lilongisa Embimbiliya ci ku kuatisa oku sanga olonumbi via sunguluka.” Ukundi umue wotembo yosi woko Estados Unidos okuti, o talavaya vocikanjo va vangula elimi lio Chinesi, wa popia ndoco: “Omanu valua vocikanjo cetu va sole oku tanga. Ovo va tanga elivulu liosi osimbu ka tua tiukile oku va pasuisa. Pole, ka va kuata elomboloko lieci va sukilila oku lilongisa Embimbiliya. Ame ndi sole oku eca ombrochura losapi hati, Olondaka Viwa, onjanja yatete momo ya sonehiwa lonjila yimue yi vetiya omunu oku sapela.” Manji ukuakunyula akongelo vocikanjo va vangula elimi lio Chinesi ko Estados Unidos, wa popia okuti ci tava oku fetika ombangulo lelivulu Embimbiliya li Longisa poku li sanga onjanja yatete. Omo liaco, ca sunguluka oku fetika elilongiso liembimbiliya kocipama 2 ku tukula Embimbiliya, osimbu okuti ocipama 1 ci lombolola eci catiamẽla ku Suku.
5. Momo lie epandi li kuetele esilivilo?
5 Omo okuti komanu vamue cambata otembo oku kolela ku Suku, ci sukila oku lekisa epandi. Citava okuti, epasu lietu liatete ka li vetiya omunu oku tava okuti kuli Ululiki. Pole, vokuenda kuotembo, citava okuti o kuata ukũlĩhĩso u lekisa esunga lieci vamue va kuetele ocisimĩlo caco.
6. Momo lie omanu vamue ka va lekisila onjongole Kembimbiliya?
6 Vana Okuti ka va Lekisa Onjongole Ale ka va Kolelele Kembimbiliya: Ndaño omunu umue o tava okuti kuli Suku, ka kolelele kelongiso Liembimbiliya momo o sima okuti, olio Handakako ya Suku. Citava okuti eye o kasi vofeka yina okuti Hakristãoko kuenda va tiamisila Embimbiliya kalongiso esanda. Ale citava okuti eye o kasi vocikanjo cimue va litukula okuti Akristão kuenda eye ka pondola oku sima okuti komuenyo waye o sukila oku kuama olonumbi Viembimbiliya. Tu kuatisa ndati omanu vaco oco va lekise onjongole Kembimbiliya kuenda oku tava oku lilongisa elivulu Embimbiliya li Longisa?
7. Onjila yipi okuti oku yi kuama yi vetiya omanu oku sola esapulo Liembimbiliya?
7 O filiale yo ko Grecia ya soneha ndoco: “Onjila ya velapo yoku kuatisa omanu ka va kuete onjongole yoku tanga Embimbiliya, oku yikula Embimbiliya kuenda oku va lekisa ulandu u sangiwamo. Akundi valua va limbuka okuti, esapulo Liembimbiliya li vetiya calua utima womunu okuti, ovina vikuavo tu popia visule. (Va Hev. 4:12) Oku mola onduko ya Suku Vembimbiliya, ca kuatisa valua oku sola ulandu u sangiwa Vembimbiliya.” O filiale yo ko India ya soneha ndoco: “Ocili catiamẽla komuenyo kuenda kolofa, ca vetiya omanu valua va Hindo. Ohuminyo Yembimbiliya yeyi okuti, voluali ka mu ka kala vali oku litepa kuakova.” Akundi poku mola ovitangi vi sangiwa vocikanjo cavo, ci va kuatisa oku lekisa eci Embimbiliya li popia ndomo Usoma wa Suku u ka malako ovitangi viaco.
8. Nye tu pondola oku sapuila omanu vana va kuete ovisimĩlo ka via sungulukile viatiamẽla Kembimbiliya omo Lietavo Liesanda?
8 Nda umue o kuete ocisimĩlo ka ca sungulukile catiamẽla Kembimbiliya omo Lietavo Liesanda, u sapuila okuti, Vakuetavo Liesanda ka va sumbilile Embimbiliya kuenda alongiso a sangiwamo. O filiale yo ko India ya soneha ndoco: “Vokuenda kuotembo, tu sukila oku kuatisa omanu oku limbuka okuti atavo esanda ka a sumbile Embimbiliya.” Ovo va popia okuti, va Hindo va vetiyiwa calua locipama ca 4 combrochura losapi, Qual É o Objetivo da Vida? Como Encontrá-lo?, ci lombolola ndomo atavo esanda a seteka oku pengisa Ondaka ya Suku kuenda oku yi nyõla. Ukundi umue wotembo yosi ko Brasil, poku fetika ombangulo lomanu o popia ndoco: “Momo lie ku lilongisila ulandu u sangiwa Vembimbiliya? Omanu valua va kasi oku cilinga lonjongole yavo muẽle, okuti ka va kisikiwa oku tiamẽla ketavo limue. Ove o pondola oku komoha poku lilongisa ulandu waco.”
9. Momo lie ka tu liwekelapo nda omunu umue kefetikilo ka lekisa onjongole yoku kapako ovina Embimbiliya li Longisa?
9 Yehova olete ovina vi kasi vutima womunu lomunu. (1 Sam. 16:7; Olosap. 21:2) Eye o vetiya vana va kuete utima wa sunguluka oco veye kefendelo liocili. (Yoa. 6:44) Omanu valua lalimue eteke va longisiwile ovina viatiamẽla ku Suku ale oku tanga Embimbiliya. Upange wetu woku kunda weca ko kuavo epuluvi ‘lioku kuata ukũlĩhĩso wocili, oco va popeliwe.’ (1 Tim. 2:4) Omo liaco, nda umue ka lekisa onjongole kueci Embimbiliya lilongisa, ku ka liwekepo! Lekisa elivulu limue lia sonehiwa velimi liene oco o vetiye onjongole yaye. Citava okuti vokuenda kuotembo, o fetika oku u longisa Embimbiliya, lekuatiso lielivulu Embimbiliya li Longisa Nye?
[Okakasia kemẽla 4]
Nda omunu tua sanga o popia okuti ka tava ku Suku, seteka oku linga ndoco:
• Oco o limbuke esunga liaco, u pula ndoco: “Olonjanja viosi o kuete ovisimĩlo ndevi?”
• Nda o Budista lekisa ombrochura losapi hati, Como Ter Verdadeira Paz e Felicidade, kamẽla 9-12.
• Nda o tava kelongiso liokuti, ovina via tukuluka ño, ovina vikuãimo vi pondola oku u kuatisa:
Ovipama vio Despertai! losapi hati, “Teve um Projeto?”
O video As Maravilhas da Criação Revelam a Glória de Deus
Olombrochura losapi hati, Como ter uma vida satisfatoria ocipama 4; A vida—teve um Criador? Kuenda A Origem da Vida—Cinco Perguntas Que Merecem Resposta
• Nda wa pua ekolelo ku Suku omo liekambo liesunga kuenda ohali, ovina vi kuãimo vi pondola oku u kuatisa:
Elivulu losapi hati, Existe um Criador Que Se Importa com Você?, ocipama 10
Olombrochura losapi hati, Suku Okuete Muẽle Ocikembe Letu?, onepa 6 kuenda Qual É o Objetivo da Vida? Como Encontrá-lo? onepa 6
• Noke yoloneke vimue, fetika oku u longisa velivulu Embimbiliya li Longisa oco omunu wa sanga a kuate elomboloko liokuti kuli Suku. Ciwa oku fetika locipama cavali ale onepa yikuavo yo sungulukila.
[Okakasia kemẽla 5]
Nda omunu wa sanga ka tava Kembimbiliya, seteka ndoco:
• Konomuisa ovipama 17 kuenda 18 velivulu losapi hati: A Vida—Qual a Sua Origem? A Evolução ou a Criação?
• Nda wa sanga va Hindo, lekisa ombrochura losapi hati, Por Que Devemos Adorar a Deus com Amor e Verdade?
• Nda wa sanga va Yudea lekisa ombrochura losapi hati, Haverá Algum Dia um Mundo sem Guerra? kamẽla 3-11.
• Sapeli ekuatiso li tunda koku kapako olonumbi Viembimbiliya. Alivulu a kuãimo, a pondola oku ku kuatisa oku lekisa esilivilo Liembimbiliya:
Ovipama vio Despertai! losapi hati, “Ajuda para as Familias”
O video A Bíblia: O Poder Dela na Sua Vida
Olombrochura losapi hati, Olondaka Viwa vi Tunda ku Suku!, ovipama 9 kuenda 11; Um Livro Para Todas as Pessoas, kamẽla 22-26; kuenda Como ter uma vida satisfatoria, onepa 2
Nda wa sanga va Budista lekisa ombrochura losapi hati, O Caminho para a Paz e Felicidade, kamẽla 3-7.
Nda wa sanga va Musulumanu, lekisa ombrochura losapi hati, Verdadeira Fé—O segredo de uma Vida Feliz, onepa 3.
Nda o kasi oku kundila vocikanjo cimue ka va sumbile Embimbiliya, ku ka lekise okuti ovina okasi oku longisa vi tunda Vembimbiliya pole, ci linga noke yoku u unyula olonjanja vialua.
• Lombolola ndomo ovitumasuku Viembimbiliya via tẽlisiwa. O pondola oku tavalaya lovimalẽho vi kuãimo:
O video A Bíblia—História Exata, Profecias Confiáveis
Ombrochura losapi hati, Um Livro Para Todas as Pessoas, kamẽla 27-29
• Nda omunu o linga apulilo alua atiamẽla Kembimbiliya, fetika oku u longisa velivulu Embimbiliya li Longisa?
[Okakasia kemẽla 6]
Nda omunu wa sanga o popia hati: “Si tava ku Suku,” o pondola oku tambulula ndoco:
• “Citava okuti ndu ku lekisa eci ca mbetiya oku tava Kululiki?” Kũlĩhisa laye atosi amue a sangiwa velivulu Raciocínios, kamẽla 94-98, ale linga eliangiliyo lioku wĩha elivulu limue wa sola oku tanga.
• “Pole nda kuli Suku, “wa yonguile okuti eye o tuwa ndati?” Omanu valua va tambulula okuti va yongola oku linga ukamba la Suku umue okuti, ukuacisola, ukuesunga, ukuahenda kuenda hokuacameko. Lekuatiso Liembimbiliya lekisa kokuaye okuti Suku o kuete ovituwa viaco. (Nda citava u lekisa ocipama 1 velivulu Embimbiliya li Longisa, oku upisa kocinimbu 6.)
Nda omunu wa sanga o popia hati: “Si tava Kembimbiliya,” o pondola oku tambulula ndoco:
• “Kuli omanu valua va kuete ovisimĩlo ndevi. Vamue va sima okuti Embimbiliya ka li vangula catiamẽla kuloño ale ka li kuete esilivilo. Sapuileko, eteke limue wa tangele ale Embimbiliya osimbu ka tua li sangele? [Ecelela etambululo. Fetika ombangulo poku tukula emẽla lia 3 liombrochura losapi hati, Um Livro Para Todas as Pessoas kuenda eca kokuaye ombrochura yaco.] Omanu valua ka va tava Kembimbiliya momo atavo a siata oku pengisa a longiso alio. Onjanja yikuavo ndi yongola oku sapela love ovolandu a sangiwa kemẽla lia 4 kuenda lia 5.”
• “Omanu valua va kuetevo ocisimĩlo cimuamue leci cove. Citava hẽ, okuti hu lekisa ocina cimue ca ndi komõhisa Vembimbiliya? [Tanga Yovi 26:7 ale Isaya 40:22 li lekisa okuti, Embimbiliya lilitava luloño.] Vembimbiliya mu sangiwa olonumbi viwa vi kuatisa apata. Onjanja yikuavo, ndi yongola oku ku lekisa ulandu umue.”
• Nda pandula omo lioku situlula ocisimĩlo cove. Nda Suku wa sonehela elivulu limue omanu, ulandu upi o sima okuti owo u sangiwamo?” Lekisa komunu ocinimbu Cembimbiliya ci li kuata locisimĩlo caye.