Upi Ongangu Kovaprofeto—Mika
1. Epulilo lipi uprofeto Mika a lingile kuenda momo lie upange waye woku kunda ka wa kale welivova?
1 ‘Otembo yipi oluali lulo lũvi lu ka sulila?’ Uprofeto Mika wa lingavo epulilo ndeli, eci a sandeka esapulo lia Yehova lioku sombisa usoma wa va Isareli kuenda wa va Yudea. Upange waye woku kunda ka wa kale welivova. Kunyamo wo 740 O.Y.K., eci Mika a kala lomuenyo, olondaka via Yehova viatiamẽla ko Samaria via tẽlisiwa. (Mika 1:6, 7) Noke yotembo yimue, o Yerusalãi ya nyõliwa kunyamo wo 607 O.Y.K. (Mika 3:12) Tu kuama ndati ongangu ya Mika, osimbu tu lavoka esombiso lia Yehova koloneke vilo?
2. Ndamupi kuenda momo lie tu lekisila epandi osimbu tu lavoka eteke lia Yehova?
2 Lekisa Epandi: Mika wa soneha ndoco: “Ame njimbila Yehova ovaso, nalamẽla Suku yeyovo liange.” (Mika 7:7) Otembo yaco, Mika ka liwekelepo oku tẽlisa ocikele caye osimbu a kala oku lavoka oku iya kuenyõleho. Eye wa amamako oku sandeka ocitumasuku ca Yehova. Osimbu tu lavoka eteke lia Yehova, ‘tu sesamẽla okuti, kovimuenyo vietu tu kola loku sumbila Suku.’ (2 Pet. 3:11, 12) Epandi lia Yehova li ecelela okuti omanu valua va likekembela. (2 Pet. 3:9) Omo liaco, tu pokoli kolonumbi Viembimbiliya poku kuama ongangu yuprofeto yoku lekisa epandi.—Tia. 5:10.
3. Momo lie tu pingila ku Yehova espiritu sandu liaye?
3 Kolela Kunene wa Yehova: Ndaño okuti Mika wa liyaka lovitangi poku tẽlisa ocikele caye, eye wa sanda oku kolela kunene wa Yehova oco a linge upange waco. (Mika 3:8) Ondaka ya Yehova yi tu vetiya oku pinga ekuatiso kokuaye. Lohenda yaye, eca unene ku vana va kava oco va tẽlise ovikele va kuete vocisoko caye. (Osa. 84:5, 7; Isa. 40:28-31) Ove hẽ, eteke limue wa kuatisiwile ale lunene waco poku tẽlisa ocikele cove? Anga hẽ, wa siata oku pinga ku Yehova oco a ku kuatise lunene wespiritu sandu liaye?—Luka 11:13.
4. Ulandu womuenyo wuprofeto Mika u tu longisa nye koloneke vilo?
4 Mika vokuenda kuomuenyo waye, wa velisilepo upange wa Suku. Eye wa nolelepo oku amamako lekolelo ndaño okuti, wa ñualiwile lomanu vakuavituwa kaviasungulukile. Cimuamue haico okuti, koloneke vilo epandi lietu lia siata oku setekiwa. Omo liaco, tu pamisi epandi lietu oco tu “endeli vonduko ya Yehova Suku yetu, otembo ka yi pui.”—Mika 4:5.