Kuata Ocituwa Coku Pitĩla Vowola ya Sokiyiwa
1. Tu pondola ndati oku kuama ongangu ya Yehova yoku linga ovina votembo ya sokiyiwa?
1 Yehova wa siata oku linga ovina votembo ya sokiyiwa. Eye eca ekuatiso kafendeli vaye ‘votembo ya sokiyiwa.’ (Va Hev. 4:16) Yehova ecavo “okulia kuespiritu votembo ya sokiyiwa.” (Mat. 24:45) Omo liaco, tu pondola oku kolela okuti eteke lionyeño ya Yehova ka “li cilua.” (Hav. 2:3) Tu pondola oku kuatisiwa locituwa ca Yehova coku linga ovina votembo ya sokiyiwa! (Osa. 70:5) Omo okuti ka tua lipuile kuenda tua siata oku linga ovopange alua, ka ca lelukile oku pitĩla vowola ya sokiyiwa. Momo lie tu sukilila oku kuata ocituwa coku pitĩla vowola ya sokiyiwa?
2. Momo lie oku pitĩla vowola ya sokiyiwa ci nenela esivayo ku Yehova?
2 Koloneke vilo viasulako, ka ca lelukile oku pitĩla vowola ya sokiyiwa, momo omanu valua vakuakulisola, kuenda vakuakulipandiya. (2 Tim. 3:1-3) Nda Akristão va likolisilako oku pitĩla selo kupange woku sanda eteku, kuenda kolohongele, omanu vakuavo va ka limbuka ocituwa cavo, kuenje, ci va kuatisa oku sivaya Yehova. (2 Pet. 2:12) Anga hẽ tua siata oku pĩtila selo kupange wetu woku sanda eteku, pole, tu cilua oku enda kolohongele? Voku pitĩla selo kolohongele, mua kongela oku imbila kumosi ocisungo catete, kumue lohutililo yoku fetika. Nda tua ci linga, ci lekisa okuti tu kasi oku setukula Isietu wo kilu.—1 Va Kor. 14:33, 40.
3. Momo lie ocituwa coku pitĩla vowola ya sokiyiwa ci kuetele esilivilo?
3 Oku pitĩla vowola ya sokiyiwa ci lekisa okuti, tua kapako vakuetu. (Va Fil. 2:3, 4) Nda tu pitĩla selo kolohongele, kuenda kupange woku kunda, ka tu kokela ocilondokua vamanji. Pole, nda tu kuete ocituwa coku cilua, omanu va ka sima okuti ovina tu linga ovio lika via velapo okuti viavo vi sule. Nda tu kuete ocituwa coku pitĩla vowola ya sokiyiwa, omanu va kasi ponele yetu, va limbuka okuti tua kuambili kuenda tua koleliwa.
4. Nda tua siata oku cilua kovina tu linga, tu pondola ndati oku linga apongoloko?
4 Nda wa siata oku cilua kovina o linga, sokolola lutate esunga liaco. Lipongiya ciwa kuenda soneha ovina o yongola oku linga oco o vi tẽlise votembo ya sokiyiwa. (Uku. 3:1; Va Fil. 1:10) Pinga ekuatiso ku Yehova. (1 Yoa. 5:14) Oku kuata ocituwa coku pitĩla vowola ya sokiyiwa, ci lekisa okuti, tua kapako ovihandeleko vivali via velapo viokuti, oku sola Yehova kuenda omanu vosi.—Mat. 22:37-39.