Ndomo tu Kuatisa Vana ka va Tẽla Oku Tanga Ciwa
1. Ovitangi vipi tua siata oku kuata poku longisa Embimbiliya komanu vana ka va tẽla oku tanga?
1 Olonjanja vimue tua siata oku sanga omanu vamue ka va tẽla oku tanga ciwa okuti va lekisa onjongole, pole, eci va mola Embimbiliya lalivulu akuavo, va kuata ohele. Nda poku sapela lavo tu eca kokuavo elivulu Embimbiliya li Longisa Nye?, ka va kuata elomboloko. Tu pondola oku va kuatisa ndati oku lilongisa Embimbiliya? Tu konomuisi ovolandu akuãimo a lomboluiwa la vamanji va kasi kueci ci pitahãla 20 kolofeka oco tu limbuke ovina va siata oku linga.
2. Alivulu api a tu kuatisa oku longisa omanu vana ka va tẽla oku tanga ciwa?
2 Nda omunu tu longisa Embimbiliya ka tẽla oku tanga ciwa, ove o pondola oku eca kokuaye olombruchura losapi hati: Yevelela Suku, ale Yevelela Suku Kuenje o Kala Otembo ka yi Pui. Manji umue okuti ukundi wotembo yosi o kasi kofeka yo Estados Unidos, wa siata oku lekisa olombrochura viaco vivali komunu alongisa Embimbiliya, kuenje, o pinga kokuaye oco a nõlepo eyi ya leluka oku yi tanga. Ofiliale yo kofeka yo Kenia ya lombolola okuti olombruchura viaco vi kuete esilivilo momo omanu vo ko Afrika va siata oku longisiwa lika ovolandu okuti, ka va sapela ovina viatiamẽla kapulilo kuenda katambululo. Kolonepa vimue okuti omanu vaco va lilongisa calua kolosikola, va tava lonjanga oku tanga kuenda oku pulisiwa okuti vana ka va lilongisile calua ci sule. Nda omunu o lilongisa Embimbiliya o tẽla oku tanga, akundi valua va siata oku fetikila volombrochura ndeci: Olondaka Viwa vi Tunda ku Suku! Kala Ekamba Lia Suku! ale Elivulu Liasapulo Embimbiliya.
3. Nye tu sukila oku linga catiamẽla komanu vana ka va tẽla oku tanga okuti ci tu kuatisa oku va longisa ciwa?
3 Oku Pandiya: Omanu vana ka va tẽla oku tanga pamue va kuata osõi, kuenje va sima okuti, ka va kapiwileko. Ocina catete tu sukila oku linga, oku longisa ocili ku vana ka va tẽla oku tanga ciwa. Omanu valua okuti ka va tẽla oku tanga ciwa va loñoha kuenda ca leluka oku va longisa. Lekisa esumbilo kokuavo kuenda va kapako. (1 Pet. 3:15) Ovo va ka vetiyiwa oku amamako oku lilongisa nda va limbuka okuti alikolisilo avo a kuete esilivilo kuenda va kula konepa yespiritu. Tu sukilavo oku lekisa ocikembe kokuavo.
Vana ka va tẽla oku tanga, va sima okuti ka ca lelukile oku ci linga, kuenje, valua pokati kavo va sima okuti, ka va kapiwileko. Ocina catete tu sukila oku linga, oku longisa ocili ku vana ka va tẽla oku tanga
4. Tu pondola ndati oku vetiya omanu ka va tẽla oku tanga ciwa oco va pongiye elilongiso liavo?
4 Ndaño okuti omunu o longisa Embimbiliya ka tẽla oku tanga ciwa, u vetiya oku pongiya elilongiso liaye. Akundi vamue vo kofeka yo Afrika do Sul va siata oku vetiya omanu va longisa Embimbiliya oco va pinge komunu umue ukuepata liavo, ale kekamba limue li tẽla oku tanga ciwa, oco li va kuatise. Ukundi umue kofeka yo ko Grã-Bretanya wa siata oku vetiya omanu alongisa Embimbiliya poku ecelela okuti, va pongiya ovinimbu vimue vokuenda kuelilongiso liavo. Kuenje, ci va kuatisa oku limbuka okuti, ca leluka oku sanga atambululo nda a tayiwa ciwa. Manji ukuavo kofeka yo India, wa vetiya omanu a longisa Embimbiliya, oco va kũlĩhĩse alitalatu ocipama ci ka konomuisiwa kosemana yikuavo, kuenda oku sokolola lutate alitalatu aco.
5. Tu pondola ndati oku lekisa epandi poku longisa Embimbiliya komanu?
5 Kuata Epandi: Ndaño okuti wa siata oku talavaya lalivulu a litepa, pole, kũlĩhĩsa atosi avelapo, kuenda kuatisa omunu olongisa Embimbiliya oco a kuate elomboloko liaco. Poku fetika sapela lika ci soka 10 kakukutu ale 15. Ku ka lombolole ovina vialua pole, sokiya lika ovinimbu vimue vocipama locipama. Nda omunu o longisa o kasi oku tanga levando kuata epandi. Eye o ka likolisilako oku loñoloha oku tanga kuenda o ka sanjukila ovina a lilongisa viatiamẽla ku Yehova. Oco o kuatise omunu o longisa Embimbiliya, eci o li sanga laye onjanja yatete, ca sunguluka oku u laleka oco a ende kolohongele.
6. Tu pondola ndati oku kuatisa omanu oku lilongisa oku tanga?
6 Nda omunu tu longisa Embimbiliya o lilongisa oku tanga, o pondola oku kula lonjanga kespiritu. (Osa. 1:1-3) Akundi valua va siata oku kuatisa omanu va longisa Embimbiliya poku talavaya lelivulu losapi hati, Aplique-se à Leitura e à Escrita, vokuenda kuakukutu amue noke yelilongiso. Nda omunu waco wa sumua, o pondola oku u vetiya poku sapela laye ovina a lilongisa kuenda ndomo a ci linga. U vetiya oku limbuka okuti Yehova o sumũluisa alikolisilo aye kuenda u vetiya oku likutilila oku pinga ekuatiso. (Olosap. 16:3; 1 Yoa. 5:14, 15) Akundi vamue kofeka yo Grã-Bretanya va siata oku vetiya omanu va longisa Embimbiliya oco va linge esokiyo lioku kuata ovimãho poku fetikila koku lilongisa ovina via leluka, oku tanga ovinimbu vimue Viembimbiliya, kuenda oku tanga alivulu amue a leluka a lombolola ovina viatiamẽla Kembimbiliya. Voku kuatisa omanu oco va lilongise oku tanga, mua kongela oku va vetiya oku linga ovina va yongola okuti oku lilongisa lika ci sule.
7. Momo lie tu sukilila oku yuvula oku liwekapo oku longisa ocili Cembimbiliya komanu vana ka va tẽla oku tanga ciwa?
7 Yehova wa kapako omanu vana ka va lilongisile calua kosikola. (Yovi 34:19) Ocili okuti, Yehova o pendosola ovitima viosi. (1 Asa. 28:9) Ku ka liwekepo oku longisa ocili Cembimbiliya komanu vana ka va tẽla oku tanga ciwa. Ocili okuti kuli alivulu alua a tu kuatisa oku ci linga. Noke, o pondola oku pongoluila elilongiso liaco velivulu Embimbiliya li longisa Nye? kuenda oku u kuatisa oco a kuate elomboloko liasuapo Liembimbiliya.