Nda Siata Oku Tendiwa Ndati la Yehova?
1. Embimbiliya li sokisiwa ndati lolumũilo?
1 Olonjanja viñami wa siata oku li vanja volumũilo? Valua pokati ketu, tua siata oku ci linga oloneke viosi oco ci tu kuatise oku limbuka ovina tu sukila oku mioñolola keposo lietu lioketimba. Embimbiliya li sokisiwa lolumũilo. Oku tanga ondaka ya Suku ci tu kuatisa oku likũlĩhĩsa etu muẽle ndomo Yehova a tu tenda. (1 Sam. 16:7; Tia. 1:22-24) Ondaka ya Suku yi pondola “oku limbuka ovisimĩlo lolonjongole viutima.” (Va Hev. 4:12) Tu pondola ndati oku tanga Embimbiliya oloneke viosi loku sokolola lutate ovina viaco oco vi tu kuatise oku kala akundi va loñoloha?—Osa. 1:1-3.
2. Embimbiliya li pondola ndati oku tu kuatisa oku likũlĩhĩsa etu muẽle?
2 Talavaya Lembimbiliya Ndolumuĩlo: Ovolandu afendeli va Yehova va sonehiwa Vembimbiliya, a tu longisa ovituwa viwa tu sukila oku lekisa kokuaye. Soma Daviti wa lekisa ombili Konduko ya Suku. (1 Sam. 17:45, 46) Isaya wa lekisa utõi poku lieca olumue oco a kundile kovikanjo vina okuti ka ca lelukile oku kundilako. (Isa. 6:8, 9) Omo liocisola Yesu a lekisa ku Isiaye, ka tendele upange waye ndocilemo, pole wa u tenda ndono yekavuluko. (Yoa. 4:34) Akristão vokocita catete va kuatele ombili kupangewoku kunda, va kolelele ku Yehova, kuenda va nõlelepo oku amamako lupange wavo. (Ovil. 5:41, 42; 2 Va Kor. 4:1; 2 Tim. 4:17) Oku sokolola lutate kovolandu aco, ci tu kuatisa oku limbuka apongoloko tu sukila oku linga atiamẽla kovituwa vietu oco tu amameko lupange u kola.
3. Momo lie tu sukilila oku linga apongoloko lonjanga komuenyo wetu?
3 Likolisilako Oku Linga Apongoloko: Ka ca sungulukile oku li vanja volumuĩlo okuti ka tu mioñolola ovina tua limbuka ketimba lietu. Omo liaco, tu sukila oku pinga ku Yehova oco a tu kuatise oku limbuka ovina tu sukila oku mioñolola komuenyo wetu. (Osa. 139:23, 24; Luka 11:13) Omo okuti otembo yetu yitito, kuenda mua kongela omuenyo womanu valua, tu sukila oku linga lonjanga apongoloko komuenyo wetu.—1 Va Kor. 7:29; 1 Tim. 4:16.
4. Nye ci pondola oku pita nda okuti omunu umue poku li tala volumũilo Wondaka ya Suku o linga apongoloko ovina a limbuka?
4 Yehova o lete ovina vi kasi vutima wetu okuti eposo lioketimba ci sule. (1 Pet. 3:3, 4) Nye ci pondola oku pita nda okuti omunu umue poku li tala volumũilo Wondaka ya Suku o linga apongoloko ovina a limbuka? Eye “ka lingi ukuakuyeva lika haico a ivalako, puãi o linga ukuakutẽlisa upange; kuenda o sanjuka leci a linga.” (Tia. 1:25) Omo liaco, tu pondola oku kuata esanju loku loñoloha kupange yoku kunda poku “molẽhisa ulamba wa Yehova ndolumuĩlo.”—2 Va Kor. 3:18.