Ocita Canyamo Loku Sapula Usoma!
1. Afendeli va Yehova va vetiyiwa oku linga nye, osimbu tu lavoka oku tẽlisiwa kuocita canyamo?
1 Vohundo manji Rutherford a linga wa popia hati: “Soma yetu wa viala ale! Ene vulondingupange viaye, vu kuete ocikele coku sandeka esapulo liaco. Omo liaco, sapuli, sapuli, sapuli eci catiamẽla Kusoma kuenda kuviali waye.” Ndaño okuti tunde eci manji Rutherford a popia olondaka evi pa pita ale ci panda ocita canyamo, pole, afendeli va Yehova va vetiyiwa oku sandeka esapulo Liusoma kolonepa viosi violuali. Upange waco owo tu kasi oku linga! Ndeci Akristão vo kocita catete va linga, tu sukilavo oku kundila olondaka viwa Viusoma ‘komanu vosi voluali.’ (Va Kol. 1:23) Poku sokolola upange wa lingiwa vokuenda kuocita canyamo, nye tu sukila oku linga oco tu sandeke Usoma wa Suku? Tu pondola ndati oku amamako oku sandeka Usoma waco osimbu tu lavoka oku tẽlisiwa kuocita canyamo, tunde eci Usoma wa Suku wa tumbikiwa?
2. Alivulu etu a siata ndati oku sandeka Usoma wa Suku?
2 Oku Ivaluka Ndomo Upange Woku Kunda wa Lingiwa Kosimbu: Vokuenda kuanyamo alua, alivulu etu, a siata oku sandeka Usoma wa Suku. Tunde kunyamo wo 1939, orevista yetu yi kuete osapi ya linga hati: Utala Wondavululi Wusapula Usoma wa Yehova. Orevista yaco, ya siata oku lombolola ovina viatiamẽla Kusoma, kuenda eci Usoma waco u ka tẽlisa. O Despertai!, ya siatavo oku lombolola ovina viatiamẽla Kusoma wa Suku okuti, owo lika weca elavoko liocili komanu vosi. Eli olio esunga lieci olorevista viaco vivali vi kasi oku pongoluiwila kalimi alua, kuenda oku vi eca kolonepa viosi violuali!—Esit. 14:6.
3. Olonjila vipi tua siata oku kuama, oco tu sandeke esapulo Liusoma?
3 Afendeli va Yehova va siata oku kuama olonjila via litepa oco va sandeke esapulo Liusoma. Kosimbu, upange woku kunda wa enda oku lingiwa lekuatiso liakãlu a kuete anguena, ovingungu viasapulo, kuenda ongalamafone. Olonjila viaco via litepa via tu kuatisa oku sandeka esapulo Liusoma komanu valua, momo, kotembo yaco ka kua kalele akundi valua Vusoma. (Osa. 19:4) Koloneke vilo, vonumbi yetu yo jw.org, mua siata oku kapiwa ovina vi tu kuatisa oku kundila omanu valua esapulo Liusoma, oku kongelamo vana va kasi kolofeka vina okuti, olombiali ka vi tu ecelela oku kunda.
4. Onjila yipi ya litepa tua siata oku kuama kupange woku kunda?
4 Afendeli va Yehova, va siatavo oku kuama onjila yimue ya litepa, oco va kundile omanu esapulo Liusoma. Oku upisa kunyamo wo 1990, kua lingiwa esokiyo lioku kundila omanu konjo lanjo, oku kundila kovitumãlo ku sangiwa omanu valua, kuenda kovitumãlo violomĩlu. Koloneke vilo, kua lingiwa esokiyo lioku kundila valupale anene mu sangiwa omanu valua kolonepa viosi violuali. Omo liesokiyo liaco, akongelo alua a kasi oku kuatisa kupange woku kundila kovitumãlo vi sangiwa vovikanjo viavo, poku talavaya lotuikanda tuoku eca uvangi, kuenda olomesa ku kapiwa alivulu volokololo mu pita omanu valua. Pole, upange woku kundila konjo lanjo, owo wa velapo koku sandeka esapulo Liusoma.—Ovil. 20:20.
5. Apuluvi api tu ka kuata vunyamo wokaliye wupange?
5 Oku Sokolola Ndomo Upange Woku Kunda u ka Lingiwa Kovaso: Unyamo wokaliye wupange u ka fetika kosãi Yenyenye Linene, vamanji valua va ka litumbika kupange wakundi votembo yosi. O pondola hẽ oku li kongela lavo kupange waco? Nda ku pondola oku ci linga, citava hẽ okuti o litumbika kupange wakundi va sokamo? Cikale okuti o pondola oku kala ukundi wotembo yosi ale sio, pole, Yehova o ka sumũlũisa alikolisilo ove oku kuatisa kupange woku sandeka esapulo Liusoma.—Mal. 3:10.
6. Momo lie osãi ya Mbalavipembe yunyamo wo 2014, yi ka kalela osãi yimue yi likasi?
6 Kosãi ya Mbalavipembe yunyamo wo 2014, Usoma wa Suku u ka tẽlisa ocita canyamo tunde eci wa tumbikiwa. Omo liaco, Utala Wondavululi wowiñi wosãi yaco, u ka lombolola lika ovina viatiamẽla Kusoma wa Suku. Momo lie ku likolisililako oco ambate olorevista vialua viosãi yaco kupange woku kunda? Osimbu tu lavoka ovina vi keya kovaso yoloneke, omunu lomunu pokati ketu o sukila oku likolisilako ‘oku kunda olondaka viwa Viusoma wa Suku,’ oco vosi va yeve ondaka yaco.—Ovil. 8:12.