Tu Mioñololi Uloño Wetu Kupange Woku Kunda—Oku Fetika Oku Longisa Embimbiliya Pepito Liomunu Tua Sanga Lombrochura Olondaka Viwa vi Tunda ku Suku!
Esunga Lieci ci Kuetele Esilivilo: Oco tu kuatise omanu oku linga olondonge, tu sukila oku kala alongisi vawa Yondaka ya Suku. (Mat. 28:19, 20) Vosi yetu tu pondola oku loñolõha koku longisa ocili poku talavaya lalivulu tua siata oku tambula. Ombrochura losapi hati: Olondaka Viwa vi Tunda ku Suku! Ya sokiyiwa oku tu kuatisa oku longisa ocili komanu. Omo liaco, tu pondola oku talavaya lombrochura yaco poku fetika oku longisa Embimbiliya pepito liomunu tua sanga.
Seteka Ndoco Vokuenda Kuosãi:
Likutilila oco o kuate onjongole yoku longisa Embimbiliya komunu umue. Pinga ku Yehova oco a ku kuatise oku fetika oku longisa omunu umue Embimbiliya kuenda oku loñoloha koku longisa ocili.—Va Fil. 2:13.
Vokuenda kuefendelo liepata ale kuelilongiso liopokolika, sanda otembo yoku patekela onumbi yaco. Nda wa ci linga, o kuata utõi woku vangula loku fetika oku longisa Embimbiliya pepito liomunu o sanga kupange woku kunda.